Month: February 2018

Metroda, metro keçidlərində gündəlik olaraq gördüyünüz cərəyan yuvalarından istifadə, əslində sərnişinlər üçün qadağandır.

“Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayev bununla bağlı Metbuat.az-a açıqlamasında bildirib ki, İnzibati Xətalar Məcəlləsində bunun cəriməsi də var:

“Ümumiyyətlə, Metropolitendən istifadə qaydaları var. Bu qaydalarda Metropolitenin elektrik şəbəkəsinə icazəsiz qoşulmaq qadağandır. Çünki onlar sərnişinlər üçün quraşdırılmayıb. Cərəyan yuvalarından yalnız Metropolitenin əməkdaşları istifadə edə bilərlər. Amma kiminsə ondan istifadə etməyi vacibdirsə, bu zaman onlar stansiya növbətçisi, rəis müavini, yaxud da rəisə yaxınlaşaraq lazımı köməkliyi ala bilərlər. İnzibati Xətalar Məcəlləsinə görə, müvafiq icazəsi olmadan Metropolitenin elektrik şəbəkəsinə qoşulan sərnişinləri 70 manat cərimə gözləyir”.

Bu gün dünyanın bir sıra ölkələrində reseptsiz dərmanların marketlərdə də satılmasına icazə verilir. Azərbaycanda isə hələ ki, bu cür icazə yoxdur.

Median.Az-in məlumatına görə, məsələyə münasibət bildirən Milli Məclisin Səhiyyə Komitəsinin sədr müavini Musa Quliyev Trend-ə deyib ki, Azərbaycanda hələ ki, bununla bağlı məsələ gündəmdə deyil.

Deputat vurğulayıb ki, dünyada belə bir təcrübə olsa da, Azərbaycanda tətbiq olunmur. Onun sözlərinə görə, ölkəmizdə dərman vasitələrinin deyil, bioloji aktiv maddələrin aptekdən kənarda, marketlərdə satılmasına icazə verilib:

“Biz bu məsələyə bir neçə ay əvvəl baxdıq və qanunvericiliyə dəyişiklik edildi. Hazırda bioloji aktiv maddələrin marketlərdə satılmasına qanunla icazə var, burada uyğun sanitar-gigiyenik normalar, temperatur, işıq rejimi gözlənilməklə satışına icazə verilir. Əgər bu şəraiti təmin edən marketlər istəsələr, bioloji aktiv maddələri də sata bilərlər. Lakin dərman vasitələrinin satılmasına icazə verilmir. Dərmanların satışına icazə verilməsi hələ ki, gündəmdə deyil. Bilirsiniz ki, Azərbaycanda icbari tibbi sığortaya keçid planlaşdırılır və reseptlə satılan dərmanlar icbari sığorta paketinə daxil olacaq. Bəlkə də ondan sonra bu məsələyə baxmaq olar”.

M.Quliyev bildirib ki, böyük ölkələrdə bu təcrübə tətbiq olunur: “Dərmanların marketlərdə satılmasına icazə verilməsi üçün uyğun şərait yaradılmalıdır. Təsəvvür edin ki, kənd rayonunda mağazada dərman satılır. Bilməyəcəklər ki, o dərmanı hansı şəraitdə, hansı tepmeraturda saxlamaq lazımdır. Hələ ki, reseptsiz satılan dərmanların apteklərdən kənarda satılmasına icazə verməyə ehtiyac görmürəm, çünki Azərbaycanda aptek şəbəkəsi kifayət qədər genişdir”.

Qeyd edək ki, Rusiyada ərzaq mağazalarında reseptsiz verilə bilən dərmanların satışına icazəni nəzərdə tutan qanun layihəsi 2017-ci ildə hazırlanıb.

Mütəxəssislər hesab edirlər ki, qanun layihəsi qəbul olunacağı təqdirdə əsasən kiçik şəhərlərdə apteklər bağlana bilər.

Qeyd olunur ki, bu qanundan daha çox ərzaq mağazalarının yaxınlığında yerləşən apteklər zərər görəcək.

Qanun layihəsinin müəlliflərinin fikrincə isə, reseptsiz verilə bilən dərmanların ərzaq mağazalarında satışı dərmanların ucuzlaşmasına gətirib çıxara bilər.