Month: April 2018

Göyçay rayonu Qarabaqqal kənd sakinlərinin həyat və sağlamlıqları ciddi təhlükə qarşısındadır. Belə ki, burada istifadə edilən su arxının yamacını və mal-qaranın örüş yerini rayonun zibillik poliqonu ediblər.

Bu barədə Minval.info-ya kənd sakini 2-ci qrup əlil Anar Xəlilov məlumat verib. O bildirir ki, bundan əvvəl Göyçay şəhərinin zibillərini maşınlarla Mirzəhüseyinli kəndinə boşaldıldırdılar: “Mirzəhüseyinli kənd sakinləri şikayət etdilər deyə, Ekologiya və Təbii Sərvətlər Naziriliyi tədbir gördü. İndi isə Göyçay rayon icra başçısı Mehdi Səlimzadə bizim kəndi zibillik poliqonu edib. Zibilin suyu Qarabaqqal kənd camaatının istifadə etdiyi arxın suyuna qarışır. Nəticədə də kənd sakinlərinin həyat və sağlamlıqları ciddi təhlükə qarşısında qalır”.

A.Xəlilov həmçinin kəndin mal-qarasının örüş yerinin də burada yerləşdiyini deyir: “Buna görə hər gün kəndin mal-qarası bu zibillikdən keçib örüşə gedir. Artıq bu zibilliyə görə kənddə çoxlu sayda mal-qara zəhərlənərək tələf olub. Mən özüm bu zibiliyin mundarladığı arxın suyundan istifadə etdiyim üçün onkoloji xəstə olmuşam 2-ci qrup əliləm”.

Rayon sakininin sözlərinə görə, zibillik çirkabına bulaşmış sudan kənd camaatı içməli su kimi, əkin və mal-qara üçün istifadə edir: “Başqa su mənbəyi yoxdur. Hər gün bura Göyçayın mərkəzindən yük maşınları ilə zibil gətirilib boşaldılır. Bu ciddi məsələ barədə rayon icra başçısı Mehdi Səlimzadəyə, 6 saylı ərazi Ekologiya və Təbii sərvətlər şöbəsinə və digər qurumlara müraciət etsək də heç bir tədbir görülməyib”.

Anar bəy söyləyir ki, vəziyyətin bu yerdə olması nəticəsində kənd sakinləri ağır xəstəliklərə düçar olub. Eyni zamanda mal-qara tələf olub və əkinlər yararsız hala düşüb
“Qarabaqqal bələdiyyəsinin sədri Ramin Nəbiyev və kənd icra nümayəndəsi Seymur Nəbiyev laqeyidlik göstərirlər. Onlar icra başçısı Mehdi Səlimzadənin sifarişi ilə işləyirlər. Bu problem tez bir zamanda həll edilməsə kənd sakinləri məhv, mal-qara isə tələf olacaq” – Xəlilov deyir.
Kənd sakini Göyçay rayon icra başçısı Mehdi Səlimzadənin barəsində ciddi tədbirlərin görülməsini istəyir.
Yazıda adıçəkilən şəxslərin mövqeyini dərc etməyə hazırıq.

Bakı metrosunun “Koroğlu” stansiyasında sərnişin qatar yoluna düşüb.

Hadisə sərnişinlərin metroda sıxlıq təşkil etdiyi vaxta təsadüf edib. Bu barədə Bakı Metropoliteninin mətbuat xidməti və ictimaiyyətlə əlaqələr şöbəsinin rəisi Nəsimi Paşayev məlumat verib:

“Deməli, “Koroğlu”nun ən basabas vaxtında sərnişinin telefonu düşüb relslərin üstünə. O da eləmə tənbəllik, bir göz qırpımında düşüb telefonu götürüb çıxıb. Təbii ki, o qədər basabas olub ki, onun bu hərəkətini bir çox insan, hətta bizim nəzarətçi də görməyib. Gözünə döndüyüm qardaş bilib ki, belə etmək olmaz, qadağandır, yaxınlaşıb bizim işçiyə ki, bəs, mən düşüb telefonu götürüb çıxdım. Həqiqətən, çox vicdanlı sərnişin olub. Baxmayaraq ki, bizim növbətçi polis çağırıb onu təhvil verib polisə. Yəqin inzibati tənbeh edib buraxacaqlar”./milli.az

Azərbaycanda spirtli içkilərin qəbuluna məhdudiyyətin qoyulması ilə bağlı təkliflər irəli sürülüb. Məsələ artıq millət vəkilləri səviyyəsində də müzakirəyə çıxarılır.

Deputat Aydın Hüseynov açıqlamasında bildirib ki, bütün növ spirtli içkilərin pərakəndə satışına günün müəyyən saatlarında qadağa qoyula bilər. Türkiyə və Rusiya modelini nümunə göstərib.

Millət vəkili Aydın Mirzəzadə də, həmkarının fikirləri ilə razı olduğunu deyir. Amma deputat bu qadağanı tam olaraq tətbiq edilməsinin əleyhinədir.

Aydın Mirzəzadə (Deputat): “Axşamtərəfi spirtli içki satan mağazaların sayını məhdudlaşdırmaq olar. Yəni ki, bütün mağazaların deyil, ancaq mərkəzdə yerləşən, böyük ərazisi olan mağazaların sayını müəyyən qədər məhdudlaşdırmaq olar”.

Amma, Şərabçılıq institunun direktoru Taryel Pənahov səsləndirilən bu fikirlərlə razı deyil. Onun fikrincə bu, ölkə iqtisadiyyatına və yerli istehsala ziyan vura bilər:

“Bu gün Azərbaycana çox sayda turistlər gəlir. Həmin turistlər axşam içki istəsələr, nə etməlidirlər? Onsuz da ondan istifadə etmək istəyən adam onu tapıb içəcək. Bu, sadəcə büdcəyə, bazara ciddi ziyan vuracaq”.

Alimin fikrincə yerli istehsal olan və keyfiyyətli şərab növlərimizi və araqların təbliğatını aparmaq və dünya bazarına çıxış yollarını çoxaltmaq barədə düşünmək daha məqsədə uyğundur. Hazırkı vəziyyətdə isə, yerli istehsalda və satışda hərc-mərclik hökm sürür.

Spirtli içkilərin keyfiyyəti məsələsi kimi, bu məhdudiyyətin tətbiq olunacağından sonrakı vəziyyət də maraqlıdır. Çünki heç kim qara bazarın formalaşmayacağına söz verə bilməz. Elə millət vəkili Aydın Mirzəzadə də bu fikirdədir.

Aydın Mirzəzadə (Deputat): “Keyfiyyətsiz, tələblərə cavab verməyən içki almağa məcbur olacaqlar. Müəyyən insanlar əlavə gəlir əldə etmək üçün məhdudsuz sayda spirtli içki alaraq onu bir neçə dəfə baha sata bilərlər”.

Məhdudiyyətlə bağlı məsələ hələ ki təklif formasındadır. Amma hazırkı qanunvericiliyə görə, yetkinlik yaşına çatmayan şəxslərə tütün məmulatları kimi spirtli içkinin də satışı qadağandır.

“Aprelin 11-i Azərbaycan Respublikası Prezidenti seçkiləri günü olduğundan, sabah, yəni aprelin 10-u qısa iş günüdür”.

Bunu “Report”a açıqlamasında Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin müdiri Elman Babayev deyib. O bildirib ki, Azərbaycan Respublikası Əmək Məcəlləsinin 108-ci maddəsinə əsasən bu Məcəllənin 91, 92 və 93-cü maddələrində nəzərdə tutulmuş hallar (yəni əmək şəraiti ilə əlaqədar qısaldılmış iş vaxtı müəyyən edilən hallar) istisna olunmaqla qalan iş yerlərində səsvermə günü qabağı iş gününün müddəti həftəlik iş günlərinin sayından asılı olmayaraq bir saat qısaldılır.

Şöbə müdiri xatırladıb ki, Azərbaycan Respublikası Prezidenti seçkilərinin 2018-ci il aprelin 11-nə təyin olunması ilə əlaqədar “2018-ci il üçün iş vaxtının norması” və “2018-ci ilin istehsalat təqvimi”ndə müvafiq dəyişikliklər edilib və aprelin 11-i seçkilərlə əlaqədar qeyri-iş günü elan olunub.