Month: June 2018

İki gün öncə deputat Fazil Mustafanın sosial şəbəkə profilində ilahiyyatçı Hacı Şahin Həsənlinin də yer aldığı videonu paylaşaraq sərt sözlər yazması xeyli inanclını qəzəbləndirib.

Median.Az  “minval.info” saytına istinadən xəbər verir ki, bu səbəbdən ölkə dindarları Milli Məclis üzvünü baykot edib, hətta onun karikaturası hazırlanıb. Belə ki, deputat həmçinin dindarlar barədə “mələşirlər” kimi ağır sözlər işlədib.

İnanclılar sosial şəbəkə profillərində Fazil Mustafaya etirazlarını bildiriblər. Bundan əlavə, Rusiyada yaşayan müsəlmanlar deputatın şəkilləri zibil qablarının üzərinə vurub.

İlahiyyatçı Hacı Şahin Həsənli də öz növbəsində onun bütün dediklərinə geniş məqalə yazıb. O, deputatın İmam Hüseynə ağlamaq və mərsiyə oxumaq barədə qeyd etdiklərinə dəlil və sübutlarla cavab verməyə hazır olduğunu bildirib.

Təhsili və işləri ilə bağlı bir çox Avropa ölkələrində olan gənc fəal Ağa Meydiyev sosial şəbəkə hesabında təkcə ilahiyyatçını deyil, bir növ dini və dindarları müdafiə edəcək paylaşımı ilə diqqət çəkib. O, xristian dininə mənsub olan avropalı iş adamı ilə birgə Hacı Şahin Həsənlilə görüşündən söhbət açıb:

“2018-ci ilin əvvəlində Almaniyada və dünyada olduqca məşhur olan şirkətlərdən birinin işçisi, Azərbaycanda səfərdə oldu. Ən azı 50-dən çox ölkəyə səfər etmiş , iş təcrübəsi 2o ildən çox olan həmin şəxsə Hacı Şahin Həsənli barədə məlumat vermişdim. Onunla görüşmək istədi. Gərgin olmaqla yanaşı məhsuldar fəaliyyəti olan Hacı Şahin dəyərli vaxtını bizə ayırdı. Görüşdük, danışdıq. Cümə günü isə “Məşədi Dadaş” məscidində qonaq oldu, çıxışı ingilis dilinə elə orada ona tərcümə edirdim”.

A.Mehdiyev daha sonra avropalı qonağın ilahiyyatçı barədə təəssüratlarını bölüşüb:

“Olduqca intellektual, mənəvi, dünyagörüşlü şəxsdir. Belə xarizmatik, faydalı insanlar dünyada çox azdır. Ona sevgim, hörmətim var. Şahin Həsənlini tanımağa çox məmnun oldum”.

Gənc fəal daha sonra bildirib ki, bu görüşdən sonra həmin iş adamı görüşdən sonra İmam Hüseyn ziyarətinə getmək istəyib.

Xatırladaq ki, Ağa Mehdiyev 3 il öncə Fransa nəşrlərindən birində İslam peyğəmbərinin karikaturası çəkildiyi üçün terror hadisəsi olduqdan sonra ictimaiyyətin böyük marağına səbəb olacaq addım atıb. O, müsəlmanlar terrorçuluqda günahlandırılan zamanda bütün deyilənlərin üstündən xətt çəkib. Belə ki, A.Mehdiyev dostu ilə birgə şəhərin mərkəzində yerləşən xristian kilsələrindən birinə gedən yolun üzərindəki qarı təmizləyiblər. Bununla onlar İslam dininin sülh dini olduğunu cəmiyyətə çatdırmaq istəyiblər.
 

Rusiyada saxlanılan azərbaycanlı iş adamı Məhərrəm Həsənov (“Pokrov Məhərrəm” kimi məşhurdur) yenidən azadlığa buraxılıb.

Median.Az qafqazinfo-ya istinadən xəbər verir ki, Şəmkirdən olan iş adamı yerli məhkəmənin qərarına əsasən, ev həbsinə buraxılıb.

Qeyd edək ki, Rusiyada “tərəvəz mafiyası”nın əsas fiqurlarından olan iş adamı ilk dəfə bu ilin martın sonlarında Moskva polisi tərəfindən saxlanılmış, qısa müddət sonra azadlığa çıxmışdı.

Dələduzluq maddəsi ilə ittiham olunan “Pokrov Məhərrəm” yenidən Moskva polisi tərəfindən saxlanılsa da, bu gün baş tutan məhkəmədə iş adamı ev dustaqlığına buraxılıb.

Müasir dövürdə əksər insanlar informasiyanı smartfon və ya kompüter vasitəsilə alır. Xüsusi ilə gənc nəslin nümayəndələri günün bir neçə saatını mobil telefonları ilə keçirir. Bəs yetkinlik yaşına çatmayan uşaqlar gün ərzində smartfondan hansı məlumatları alır?

Məsələ ilə bağlı ARB TV-nin “Günə doğru” verilişində maraqlı sujet yayımlanıb.

Sakin: “Facebook, İnstagram, WhatsApp-dan istifadə edirəm”.

Sakin: “Sosial şəbəkələrə girirəm. Kim nə qoyub, nə paylaşıb baxıram”.

Göründüyü kimi gün ərzində gənclərin əksəriyyəti sosial şəbəkələrdə müxtəlif şəkillərə və videolara baxmaqla zaman keçirir. Valideynlər bildirir ki, nəinki yeniyetmələri, azyaşlı uşaqları belə kompüter və telefonlardan ayırmaq çətinləşib. Onlar problemdən çıxış yolunu xüsusi qadağanedici proqramlardan istifadədə görür.

Psixoloqlar bilir ki, uşaqlarda informasiya mədəniyyətinin formalaşdırılmasında valideynlərin bilavasitə rolu var. Valideynlər uşaqları intelektual oyunlar oynamağa sövq etməli, onları nəzarətdən kənar buraxmamalıdır.

Mehriban Mütəllimova (psixoloq): “Artıq yeniyetmə yaşına çatana kimi uşaqların xəbərləri izləməsini düzgün görmürəm. Çünki orada gördükləri pis hadisələr onlarda mənfi emosiyaların yaranmasına gətirib çıxarır”.

Gün ərzində övladına nəzarət imkanı olmayan valideynlər xüsusi proqramlarla onarın kompüter və smartfondan istifadəsinə məhdudiyyətlər qoya bilər. Sözügedən qadağanedici proqramlar provayder vasitəsi ilə və ya azyaşlıların istifadəsində olan cihazın müvafiq funksiyaları ilə aktivləşdirilir.

Valideynlər həmçinin bilməlidir ki, sözügedən cihazlardan övladlarının istifadəsinə tam qadağa qoymaq düzgün deyil. Çünki müsair dövr üçün bu uşağı bəzi sahələrdə inkişafdan ləngidə bilər. Yeni texnologiyadan istifadə müasir uşaqların əsas üstünlüyüdür. Lakin bu istifadə düzgün istiqamətləndirilmədikdə arzuolunmaz nəticələr verə bilər.

Bakı şəhərinin mərkəzi küçə və prospektlərində piyadaların təhlükəsiz və rahat hərəkətini təşkil etmək məqsədi ilə Bakı Nəqliyyat Agentliyi (BNA) tərəfindən qoruyucu tumbaların quraşdırılmasına başlanılıb.

BNA-dan baku.ws-ə verilən məlumata görə, birinci mərhələdə 10 min ədəd qoruyucu tumbaların quraşdırılması planlaşdırılır. Qoruyucu tumbalar, avtonəqliyyat vasitələrinin qəza zamanı səkilərə çıxmalarının qarşısını almaqla və səkilərdə park etmələrini əngəlləməklə piyadaların təhlükəsiz, rahat və fasiləsiz hərəkəti üçün imkan yaradacaq.

Tikinti-quraşdırma işlərinə 1 iyun 2018-ci il tarixində başlanılıb və nümunə üçün Bülbül prospektində 50 ədəd tumba quraşdırılıb.