Month: July 2018

Dünən Novxanı qəsəbəsində yerləşən “Aquapark”da baş verən ölüm hadisəsi ilə bağlı yeni iddialar var.

Hadisə zamanı vəfat edən Zamiq Nağıyevin qardaşı Nicat Nağıyev bildirib ki, dünən polis və prokurorluq orqanlarının əməkdaşlarının iştirakı ilə təhlükəsizlik kameralarından hadisə anının görüntülərini izləyiblər: “Zamiq saat 13:36-da Aquaparka gəlib, hadisə isə 15:07-də baş verib. Atraksionun yuxarısında da, aşağısında da nəzarətçi yoxdur. Videodan görünür ki, Zamiq atraksionun aşağısında çimir, bu zaman atraksionun göy rəngli hissəsinin yuxarısından hələ ki şəxsiyyəti bəlli olmayan bir nəfər sürüşüb Zamiqin başından bütün çəkisi ilə zərbə vurur. Dərhal da kənara çəkilib gözləyir, 15:08-də Zamiqin hərəkətsiz olduğunu görən və yaxınlıqdakı masada yemək yeyən 17 yaşlı bir oğlan paltarlı formada suya tullanıb Zamiqi çıxardır. Ətrafdakı digər qonaqlar da ona kömək edirlər, əgər orada nəzarətçi olsaydı, Zamiqi onlar çıxarardılar. Zamiqi vuran şəxs isə kənarda dayanıb baxır və köməklik etmir. 15:16-da Zamiqi tibb məntəqəsinə aparıblar. Aquaparkın rəhbərliyi bildirdi ki, insanlar nəzarətçinin sözünə baxmır deyə daha nəzarətçi işlətmirlər”.

N. Nağıyev qeyd edib ki, qardaşı Z. Nağıyevə qarşı oğurluq hadisəsi də baş verib: “Onun pul qabısı hadisə yerindən kənarda tapılıb, kimsə onun pulunu götürüb boş pul qabını tullayıb. Zamiqin heç bir xəstəliyi, qıcolması yoxdur. Meyiti morqdan aparanda gördük ki, boynunun arxasında və çiyninin yuxarı hissəsində göyərmə var, boynunun arxa sağ hissəsi şişib”.

Qeyd edək ki, Z. Nağıyev evli olub, 5 yaşlı oğlu, 1 yaşlı qızı var. O, turizmlə məşğul olub və insanları turistik yerlərə aparmaqda xidmət göstərib. Həmin gün də qonaqlarını ora apardığı ehtimal edilir. Hazırda polis hadisəni törədən şəxsi axtarır. (Qafqazinfo)

“Söz tapmıram, danışmağa, Elmara güllə atanı Milli Qəhrəman elədilər. Bunu edənlər ermənidir, Elmara güllə atan da ermənidir. Bunun başqa adı yoxdur. Elmara atılan güllə dövlətə atılıb. İnsanlar isə buna sevinir. Bəzi jurnalistlərin yazdıqlarını oxuyanda adam dəhşətə gəlir”.

Bu sözləri gununsesi.info-ya eksklüziv açıqlamasında sui-qəsdə məruz qalan Gəncə şəhər icra hakimiyyətinin başçısı Elmar Vəliyevin qardaşı Şahmar Vəliyev olaya münasibətində bildirib.

Saytımıza açıqlamasında Şahmar Vəliyev baş verən bu cinayətlə bağlı medianın yanaşmasından narazılığını ifadə edib: “Bu insanları düşündürməli olan bir hadisədir. Çünki, dövlətin məmuruna güllə atılıb. Amma bəzi “ermənilər” bunu başqa cür qiymətləndirib, cinayətkarı qəhrəman elədilər”.

Qardaşının durumu ilə bağlı danışan Şahmar Vəliyev onun səhhətinin düzəldiyini deyir: “Yaxşıdır, düzəlir. Hər hansı bir təhlükə yoxdur”.

“Elmar Vəliyevin qardaşı kimi olayın hansı səbəbdən baş verdiyini bilirsinizmi” sualına Şahmar Vəliyev “heç nə bilmirəm” deyə cavab verib.

Dövlət Gömrük Komitəsi tərəfindən xarici ölkələrdən sifariş edilən mobil telefonlarla bağlı aparılan araşdırma nəticəsində mövcud gömrük və vergi qanunvericiliyinin ciddi şəkildə pozulması halları müəyyən edilib.

DGK-dan verilən məlumata görə, asan yolla qazanc əldə etmək istəyən bəzi şəxslər xarici ölkələrdə təsis etdikləri onlayn ticarət portalları vasitəsilə Azərbaycan Respublikası vətəndaşlarının adına mobil telefonlar göndərir və ölkə ərazisinə gətirilən həmin telefonların daha sonra topdan və ya pərakəndə satışını təşkil edirlər.

Aparılan araşdırma zamanı o da müəyyən edilib ki, bir çox hallarda sənədlərdə adı çəkilən şəxslər faktiki olaraq sifarişlərdən xəbərsizdir.

Üstəlik gömrük orqanlarına təqdim olunan bəyannamələrdəki rəqəmlərin sifarişçinin bank hesabındakı rəqəmlərdən dəfələrlə aşağı olduğu aşkar edilib ki, bunun da məqsədi gömrük vergi və rüsumlarından yayınmaqdır.

Digər tərəfdən gömrük orqanına təqdim olunan bəyannamələrdə malların tərkibi də düzgün göstərilmir.

Qeyd edək ki, son bir ayda poçt göndərişləri vasitəsilə ölkə ərazisinə 30 minə qədər mobil telefon gətirilib ki, bunun da 25 mini Birləşmiş Ərəb Əmirliklərinin Dubay şəhərindən göndərilib. Əksər hallarda isə gömrük rəsmiləşdirilməsi üçün saxta invoyslar təqdim edilir.

Poçt göndərişləri ilə bağlı yuxarıda sadalanan problemlərin aradan qaldırılması üçün aparılan araşdırmalar isə bəzi hallarda onlayn ticarətdən qanuni yollarla istifadə edən şəxslərin sifarişlərinin yubanmasına, vaxtında sahibinə təhvil verilməməsinə səbəb olur.

Sifarişlərin çatdırılmasında baş verən geçikmələrin əsas səbəblərindən biri də “Azərpoçt” MMC tərəfindən yüklər barədə məlumatların əvvəlcədən elektron qaydada gömrük orqanlarına təqdim edilməməsidir. Bu da ölkəyə gətirilən yüklərin gömrük yoxlaması və rəsmiləşdirilməsi prosesini xeyli ləngidir. Belə ki, bu məlumatlar olmadığı üçün daxil olan yüklərin çeşidlənməsi, sifarişlərin mütəmadiliyinin yoxlanılması məqsədilə gömrük əməkdaşları bütün malların hər birinə tək-tək baxış keçirməli, daha sonra isə həmin məlumatları sistemə daxil etməlidir.

Qeyd edək ki, hazırda gömrük orqanları tərəfindən aparılan araşdırmalar davam etdirilir və araşdırmaların sonunda gömrük qanunvericiliyinin tələblərinin kobud surətdə pozan hüquqi və fiziki şəxslərin məsuliyyətə cəlb edilməsi ilə bağlı aidiyyatı dövlət qurumlarına müraciət olunacaq.

Ötənilki «sarımsaq bumu» fermerləri böyük ziyana salıb

Azərbaycanda sarımsağın qiymətindəki ötənilki bahalaşmadan sonra bu sahəyə axın edən fermerlərin əksəriyyəti zərərlə üzləşib.

Bu barədə fed.az-a sarımsaq əkini ilə məşğul olan fermerlər bildirib.

Göyçaydan olan fermer Xurşud Qasımovun FED.az-a verdiyi məlumata görə keçən il sarımsağın qiymətinin yüksək olması onu bu il sarımsaq əkməyə həvəsləndirmişdi. Xatırladaq ki, ötən il ölkədə həm sarımsağa tələbatın artması, həm də müəyyən qıtlığı nəticəsində qiymətlər həddən artıq yüksəlmiş və 5-6 manat, hətta bəzən 10 manata qalxmışdı.

Bunları nəzərə alaraq bir neçə hektar sahədə sarımsaq əkən X.Qasımov təqribən 50 ton məhsul əldə etsə də, qiymətlərin kəskin azalması ona gözlədiyi gəliri gətirməyib: «Ötən il 5-6 manata satılan sarımsaq bu il məhsul bolluğu nəticəsində 80-90 qəpiyə düşüb».

Yer gəlmişkən, ötən il sarımsağın qiyməti o qədər yüksək olub ki, hətta bu vaxta qədər kənd təsərrüfatı ilə məşğul olmayan adamlar da, sarımsaq əkməyə başlayıblar. Bunlardan biri İsmayılov İsmayıl sarımsağın yüksək qiymətini görərək bu sahəyə yatırım etməyi qərara alıb. O FED.az-a bildirib ki, bu məqsədlə Bakıda məşhur ticarıt mərkəzlərinin birindəki mağazasını satıb, eləcə də əlində olan vəsaitləri sərf edərək, Göyçayda 3 hektar ərazidə sarımsaq əkib. Buradan 20 tona yaxın məhsul əldə etsə də, İ.İsmayılov onu sata bilməyib: «İlk dəfə idi ki, bu sahə ilə məşğul olurdum, bundan əvvəl ticarətlə məşğul idim. Ötən il sarımsağın qiyməti yüksək idi – 3-10 manat arasında. Mən də qərara gəldim bu sahəyə yartırım edim. Amma məhsul yığımından sonra qiymətlərin kəkin azalması baş verib. Sarımsağın kiloqrammı 50 qəpik – 1,5 manatadək azalıb. Nəticədə iş adamı azı 25 min manat zərərə düşüb.

İndi İ.İsmayılov ümidini Rusyadakı tanışlarına bağlayıb və sarımsaqları qonşu ölkəyə ixrac etmək hazzında düşünür. Yeri gəlmişkən Rusiyanın ayrı-ayrı əyalətlərində sarımsağın qiyməti 100-200 rubl və ya 2,5-5 manat arasında dəyişir.

Göyçayda sarımsaq biznesində «yanan» iş adamlarının sayı az deyil, hətta 100 ton məhsul götürərək sata bilməyən sahibkarlar da var. Amma onlar geniş məlumat verməkdən imtin edirlər.

Rayonda sarımsaq biznesidə baş verənlərdən icra hakimiyyətinin də xəbəri var. Göyçay Kənd Təsərrüfatı İdarəsinin əməkdaşı Elçin İsmayılov FED.az-a bildirib ki, problemi həll etmək üçün müəyyən tədbirlər görülür: «Rayonda tədarük,alqı-satqı məntəqələri vasitəsi ilə bu problemin aradan qaldırılması üçün müəyyən işlər həyata keçiilir».

Fermerlərin əlində qalan sarımsaqların əsas alıcısı bir qədər əvvəl kənd təsərrüfatına dəstək məqsədilə yaradılan «Ərzaq Məhsullarının Tədarükü» ASC ola bilərdi. ASC-dən təsdəqliyiblər ki, burada fermerlərin məhsullarını dövlət ehtiyacları üçün almağa hazırdırlar. Belə ki, indii bu təşkilat 2 minə yaxın dövlət qurumunun ərzağa olan tələbatını ödəmək üçün yerli məhsul alır. Amma bunların arasında sarımsağın payı çox azdır.

ASC-nin nümaynədəsi Nicat Nəsirov FED.az-a bildirib ki, sarımsağa dövlət tələbatı o qədər də böyük deyil və 2017-2018-ci il mövsümündə cəmi 48 ton olub: «Doğrudur, bu il üçün sifarişlər hələ toplanır və son rəqəm məlum deyil, amma çox güman ki, bu ilki, sifariş də ötənilkindən çox da fərqlənməyəcək».