Month: October 2018

Bu gün əsən güclü külək Abşeron rayonunun Mehdiabad qəsəbəsində məcburi köçkünlərin yaşadığı “Qarant şəhərciyindəki 7 mərtəbəli 4 binanın dam örtüyünü qopardıb. Binalardan birinin dam örtüyü tamamilə, digərlərininki isə qismən dağılıb.

Qaçqınların və Məcburi Köçkünlərin İşləri üzrə Dövlət Komitəsi sədrinin göstərişi ilə Komitənin Tikinti-təmir və kommunal xidmətlər şöbəsinin, Mənzil İstismar Departamentinin, Tikilməkdə Olan Müəssisələr Müdiriyyətinin rəhbərləri və məsul əməkdaşları dərhal hadisə baş verən şəhərciyə gediblər.

Hazırda hadisə yerinə cəlb edilmiş təmir-tikinti briqadaalrının dam örtüklərinin qopmuş konstruksiyalarını şəhərciyin ərazisindən təmizlənməsi və binaların damındakı vəziyyətin araşdırılması ilə məşğuldur. Komitənin məsul əməkdaşları şəhərciyə və məcburi köçkünlərə dəymiş ziyanı müəyyənləşdirirlər.

Təbii fəlakətin fəsadlarının aradan qaldırılması, binaların dam örtüyünün bərpası işləri tam başa çatanadək Dövlət Komitəsinin nəzarətində saxlanılacaqdır.

Hazırda Fövqəladə Hallar Nazirliyinin nümayəndələri də hadisə yerindədirlər.

Bakının mərkəzi “Park Bulvar” ticarət-əyləncə mərkəzinə gələn hər kəs heç olmasa bir dəfə bu oğlanla qarşılaşıb:

Tanış olun – “Park Bulvar”ın təmizlik xidmətinin əməkdaşı, ikinci qrup əlil Xaqani Əliyev. 

Doğulduğu andan uşaq serebral iflici sindromundan əziyyət çəkən gülərüz bakılı yeddi ildir hər gün işə gələrək, mərkəzin üçüncü mərtəbəsində nəzakətlə masaların təmizliyinə riayət edir. 

Onun gözləri çox şeyi deyir. Bu gözlərdə sevgi və hüzün var, mənə elə gəlirdi ki, o, ətrafdakılara nəsə demək istəyir. Bu günlərdə onunla söhbət etmək qərarına gəldim. 

“Elə hallar olur ki, kimlərsə mənə gözlərində nifrət və kədərlə baxıb. Bəziləri hətta məndən qorxur. Ancaq onlarla ünsiyyətə başlayanda həmin şəxslər başa düşür ki, mənim ürəyim onlarınkından daha şövqlə döyünür”, – oğlan deyib. 

Yəqin ki, Xaqani öz təcrübəsində məşhur “Böyük Getsbi” kinofilmindəki ifadələri sınaqdan keçirib: “Heç bir dini və irqi fərq sağlam və xəstə insanlar arasındakı fərqdən böyük ola bilməz”. 

Gəncin sözlərinə görə, onun həyatı anasının bətnində ikən dəyişib. 

BAŞLANĞIC

“Anam mənə hamilə olanda büdrəyib və pilləkəndən yıxılıb. Həkimlər uzun müddət bizim həyatımız üçün mübarizə aparıb. Allaha şükürlər olsun ki, anam sağ qaldı, ancaq mən bu sindromla doğuldum. Uşaq olanda cəmiyyətlə heç bir problem yaşamırdım, çünki əlillər üçün xüsusi məktəbdə təhsil alırdım. Mənim özüm kimi insanlarla əhatə olunmuşdum. Vaxt keçdikcə, bu tendensiya dəyişdi. Həyat əsl üzünü mənə göstərməyə başladı. Xəstə insanları ələ salmağı xoşlayan şəxslərlə qarşılaşdım. Bu, çox ağrılı idi”, – müsahibimiz qeyd edib. 

Bu sarsıntılar, həyatın, cəmiyyətin münasibəti Xaqanidə öz mənəvi gücünü ətrafdakılara nümayiş etdirmək üçün stimul yaradıb. O, iş üçün mümkün olan hər yerə müraciət edir, ancaq əbəs yerə… İşə götürənlər “xəstə” oğlanı qəbul etmək istəmirlər. 

“Bir müddət də keçdi və məni müsahibəyə çağırdılar. “Park Bulvar”da məni dərhal sevdilər. Çoxdan gözlədiyim işimə qovuşdum. İlk bir neçə il gecə növbəsində çalışdım. Sonra məni gündüz növbəsinə keçirdilər. Məhz gündüz növbəsi həyatımı kökündən dəyişdi. Hətta təntənəli toy mərasimində özümü bəy kimi belə təsəvvür etməzdim, ancaq necə deyərlər, tale…”

TOY

İş-ev, ev-iş: Xaqaninin həyatı belə keçirdi, ancaq bir gün o, kafelərdən birində aşpaz kimi çalışan gözəl qıza rast gəldi. Əlbəttə, o düşünürdü ki, sağlamlığı məhdud olan oğlanın bu qıza özünü sevdirmək üçün heç bir şansı yoxdur. Ancaq o, sınadı.

Xaqani nəinki onunla tanış ola, həmçinin dostluq münasibətləri qura bildi. Qız gündən-günə onun içindəki yeni, xoş və işıqlı guşələri kəşf edirdi və artıq Xaqaninin xəstəliyinin onun üçün əhəmiyyəti qalmamışdı. 

Onlar ailə qurmaq qərarına gəldilər. Klassik melodramlarda, əsasən, burada “happy end”i ifadə edən titrlər gedir. Ancaq qəhrəmanımız üçün belə olmadı. Əsas çətinliklər bundan sonra başladı.

“Həyat yoldaşımın ailəsi ilə dil tapmaq mənim üçün çətin idi. Onlar deyirdilər ki, qızlarının “xəstə” ilə nikah bağlamasına imkan verə bilməzlər. Ancaq mən təslim olmadım. Başa düşürdüm ki, vaxt gələcək və onlar mənə qarşı bu münasibətlərinə görə peşman olacaqlar. Çox istəyirdim ki, onlar məni sevsinlər. Qız mənə görə hər kəsə qarşı çıxdı. O, hər şeyi özü etdi. Bir sözlə, biz birlikdə sevgimiz uğrunda mübarizə apardıq”, – Xaqani deyir. 

Xaqani və sevgilisinin 2016-cı ildə təntənəli toy mərasimi olub. Mərasimə, demək olar ki, ticarət mərkəzinin xidmət personalından rəhbərliyə qədər bütün işçi kollektivi qatıldı. 

Zamanla qızın valideynləri Xaqanini öz kürəkənləri kimi qəbul etdi. Bu gün onlar Xaqanini çox sevirlər. Cütlüyün iki yaraşıqlı, sağlam oğlan övladı var. 

Xaqaninin həyat tarixçəsi əfasanəvi Koko Şanelin fikirlərinin həqiqiliyini sübut edir: “Canlı eybəcər ola bilməz”. 

P.S. Qeyd etmək istərdik ki, bu məsələdə “Park Bulvar” ticarət əyləncə mərkəzinin digər işə götürənlərdən fərqli olaraq, gənc oğlana şans verməsi və eyni zamanda, onun həyatını kökündən dəyişdirməyə kömək etməsi nümunəvi haldır.//oxu.az

Dövlət Təhlükəsizlik Xidməti sosial şəbəkə istifadəçilərinə xəbərdarlıq edib.

Qurumun adından və loqotipindən istifadə etməklə sosial şəbəkələrdə saxta səhifə, kanal, profillərin yaradılması, işlədilməsi yolverilməzdir və qanunla müəyyən edilmiş qaydada məsuliyyət yaradır.

Ekspertlərin sözlərinə görə, son zamanlar bəzi sosial şəbəkə istifadəçiləri tərəfindən dövlət qurumlarının səhifələrinin, profillərininin yaradılmısı kimi hallar artıb.

Bəzən bu cür profillər, səhifələr xoş niyyətli olur. Həmin dövlət qurumu barədə normal, həqiqəti əks etdirən informasiyalar paylaşılır. Amma bəzən də əksinə.

ARB TV-nin “Günə doğru” proqramı mövzu ilə bağlı maraqlı süjet hazırlayıb.

“Dövlət qurumlarının adından səhiflələr, profillər yaradılır, onların emblemləri, sloqanları, loqoları qoyulur. Onların adından açıqlamalar verilir. Sanki onların bir bəyanatı, press-relizi cəmiyyət üçün açıqlaması kimi verilir. Burda artıq cinayət tərkibi var”, – deyə ekspert Osman Gündüz bildirib.

Bir müddət əvvəl Dövlət İmtahan Mərkəzi də belə bir halla üzləşmişdi. Müəyyən şəxslər sosial şəbəkədə mərkəzin loqotipindən istifadə etməklə açdıqları səhifələr vasitəsilə istifadəçiləri yalan məlumatlarla aldatmağa cəhd göstərmişdilər. Amma çox keçmədi ki, imtahan mərkəzinin rəsmiləri bundan xəbər tutdu və müvafiq tədbirlər görüldü.

Xanlar Xanlarzadə – DİM-in Sektor müdiri: “Həmin sosial şəbəkə istifadəçiləri dövlət imtahan mərkəzinin adından və loqotipindən istifadə edirlər. DİM-in press-relizlərindən istifadə etməklə, müəyyən məlumatlar paylaşırlar, daha sonra isə istifadəçilərin suallarını cavablandırırlar.

Azər Badamov – Millət vəkili: “Dövlət qurumları adından sosial şəbəkələrdə məlumat yayırlarsa, onların məqsədi var. Bu təxribat xarakterli məqsədlərdir. Və onların qarşısı ciddi şəkildə alınmalıdır”.

Hər hansı bir dövlət qurumuna məxsus əmtəə nişanlarından qanunsuz istifadə etməyə yol vermiş şəxslər məsuliyyətə cəlb olunur.

Tahir Əlirzayev – Vəkil: “Cinayət məcəlləsinin 310-cu maddəsində vəzifəli şəxsin səlahiyyətlərinin mənimsənilməsi maddəsinə əsasən həmin cinayət əməlini törətmiş şəxsi 1500 manat cərimə, 3000 manata qədər 2 ilədək islah işləri və eyni zamanda 3 ilədək azadlıqdan məhrumetmə cəzası nəzərdə tutulur”.

Hazırda sosial şəbəkələrdə bu cür saxta profil və səhifələrin aşkarlanıb, silinməsi çox rahatdır.

Osman Gündüz – Ekspert: “Bu yaxınlarda facebook ciddi təmizləmə işi apardı. Onların artıq robotları var, alqoritmləri var ki, hansı səhifə saxtadır. Bunlar müəyyən edə bilirlər və dərhal silə bilirlər”.

Mütəxəssislər bu cür saxta səhifə və profillə qarşılaşan şəxslərə öncə sosial media resurslarının özünün administrasiyasına müraciət etməyi məsləhət görür. Növbəti addımda isə hüquq mühafizə orqanlarına müraciət edilməlidir.

Bunu etməklə sosial şəbəkədə saxta profil və səhifə açan şəxslərin saxta niyyətinin qarşısını almaq olar.

Ötən il Ucar rayonunun Qaradağlı kəndində başqasına qoşularaq qaçan iki uşaq anası yenidən ailəsinə qayıdıb.

Median.Az xəbər verir ki, bu barədə A24.az-a kənd sakinləri məlumat verib. Məlumatda bildirilir ki, iki azyaşlı uşağını atıb, başqa kişiyə qoşularaq qaçan kənd sakini, 1991-ci il təvəllüdlü Çinarə Ağayeva əri və onun ailəsi ilə barışıb.

Məlumata görə, qoşulub qaçdığı kişi ilə bir neçə ay yaşayan Ç.Ağayeva hazırda Qaradağlı kəndində həyat yoldaşı, 1993-cü il təvəllüdlü Ayaz Ağayevlə birlikdə yaşayır.

“Çox xoşbəxt ailədirlər. Qız başqa kişiyə qoşularaq qaçdı. Bir neçə aydan sonra isə qayıdıb evlərinə gəldi. Yoldaşı da onu qəbul etdi. İndi heç nə olmamış kimi yaşayırlar. İki uşaqları var. Övladları da məktəbə gedir. O gündən sonra ailələrində heç bir problem yaşanmayıb. Ayaz da fəhlə işləyir. Başlarını aşağı salıb dolanırlar”, – deyə kənd sakinləri bildiriblər.

Xatırladaq ki, Ç.Ağayeva ailə qurandan sonra tanış olduğu başqa kişi ilə bir müddət sevgi münasibətində olduqdan sonra 2017-ci ilin iyulunda iki azyaşlı övladını və həyat yoldaşını ataraq ona qoşulub qaçmışdı.