Month: November 2018

Qusar ərazisində yol kənarına çəkilən nişanlanma işarələri zamanı yol verilən kobud səhv sosial şəbəkələrdə gülüş hədəfinə çevrilib.

Yol-nişanlanma işləri yol kənarındakı peyinə məhəl qoyulmadan icra edilib.

Məsələ barədə Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirib ki, həmin əraziyə baxış keçiriləcək:

“Ola bilsin ki, yolda rənglənmə işləri aparılarkən diqqətsizliyə yol verilib. Belə bir şey varsa, aradan qaldırılacaq”.

Qeyd edək ki, fotonu Facebook sosial şəbəkəsində “Кусары онлайн” səhifəsi paylaşıb.//oxu.az

Deputat Qüdrət Həsənquliyev Milli Məclisdə akkreditasiyadan keçmiş bəzi parlament müxbirlərinin qeydiyyatının ləğvini tələb edib.

O deyib ki, buna səbəb onun çıxışlarının təhrif olunmasıdır.

Millət vəkili qeyd edib ki, ötən dəfə iclasların birində Milli Məclisin işçilərinin əməkhaqqının 3 faiz həcmində artırılmasını deyib:

“Buradakı bəzi jurnalistlər isə elə təqdim etdilər ki, guya mən deputatların maaş davasını edirəm. Əslində, maaş artırılmalıdır. Amma hesab edirəm ki, bu məsələ başqa tərəfə yozulmamalı idi.

Bizi mediada bəzi reket jurnalistlər biabır edirlər. Demədiyimiz ifadələri tamamilə təhrif edirlər. Mən bu barədə mətbuat xidmətinin rəhbəri Akif Təvəkküloğlu ilə danışmışam və onlar barəsində müəyyən ölçülər götürüb akkreditasiyalarının ləğv edilməsini istəmişəm”.//oxu.az

Noyabrın 16-da Bakı və Abşeron yarımadasında hava şəraitinin dəyişkən buludlu olacağı, arabir tutulacağı, yağmursuz keçəcəyi gözlənilir. Səhər bəzi yerlərdə zəif duman olacaq. Cənub-şərq küləyi əsəcək.

Bu barədə oxu.az-a Ekologiya və Təbii Sərvətlər Nazirliyinin Milli Hidrometeorologiya Departamentindən məlumat verilib.

Havanın temperaturu Abşeron yarımadasında gecə 7-9, gündüz 12-15, Bakıda gecə 7-9, gündüz 13-15 dərəcə isti təşkil edəcək. Atmosfer təzyiqi normadan yüksək 766 mm civə sütunu, nisbi rütubət gecə 70-80, gündüz 60-65 faiz olacaq.

Bəzi rayonlarda arabir yağış yağacağı gözlənilir. Gündüz əksər rayonlarda hava yağmursuz keçəcək. Səhər ayrı-ayrı yerlərdə duman olacaq. Şərq küləyi əsəcək.

Havanın temperaturu gecə 6-9, gündüz 10-15 dərəcə isti, dağlarda gecə 0-5 dərəcə şaxta, gündüz 3-8 dərəcə isti təşkil edəcək.

Artıq istismar müddətini başa vurmuş 25 qatar dəyişdirilib. Bu, ventilyatorların da dəyişdirilməsi deməkdir. Ümumiyyətlə, ventilyatorların iş qrafiki mövsümə uyğun şəkildə dəyişdirilir.

Bunu Oxu.Az-a açıqlamasında “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov Bakı metrosunda havalandırma sistemlərinin standartlara cavab vermədiyini bildirərək, mövcud problemlərin həll olunmasının vacibliyini vurğulayan deputat Fazil Mustafanın fikirlərinə cavab olaraq deyib.

Onun sözlərinə görə, bu istiqamətdə görülən işlərə mütəmadi olaraq nəzarət var:

“Artıq istismar müddətini başa vurmuş 25 qatar dəyişdirilib. Eyni zamanda, bu, ventilyatorların da dəyişdirilməsi deməkdir. Ümumiyyətlə, ventilyatorların iş qrafiki mövsümə uyğun şəkildə dəyişdirilir. Əvvəllər yay-qış olaraq qrafik ildə iki dəfə qrafik dəyişirdisə, artıq bu dörd qrafiklə əvəz olunub. Bu da şəhərdə tətbiq edilən isitmə sistemi ilə də əlaqəlidir.

Mütəmadi olaraq monitorinqlər aparırıq. Hər gün mütəxəssislər metropolitenin mikroiqlim laboratoriyasında bu istiqamətdə işlər görür. Bu gün stansiyanın 15-20 nöqtəsində oksigen səviyyəsi, rütubətin, hava axınının və sürəti, hərarət xüsusi spektlər vasitəsilə ölçülür və nəzarətdə saxlanılır. Bu da mövcud havalandırma qurğularının imkanlarından konstruktiv istifadə etməyimizə imkan yaradır.

Bu gün köhnə qatarlar olduğu üçün onlara yeni havalandırma sistemlərinin qoşulması qeyri-mümkündür. Bunu istehsalçı şirkətlər də təsdiqləyir ki, köhnə vaqonlara bu sistemlərin qurulması yeni vaqon istehsalına bərabər bir işdir.

Hər bir vaqonun 31 il istismar müddəti var. İstismar müddəti bitən və ya vaxtından əvvəl hər hansı problemlərdən dolayı istifadəyə yarasız vaqonlar xətdən çıxarılır. Onların yerinə yeni alınan qatarlar buraxılır”.

Qurum rəsmisi bildirib ki, qatarlarda havalandırma ilə bərabər, sərnişin çoxluğu bu narahatlığa səbəb ola bilir:

“Sərnişinlərin çoxluğunu nəzərə alsaq da, tunelə beş vaqondan artıq buraxmaq mümkün deyil. Bunun üçün gərək yeni xətlər açılsın. Qatarlar arasında iki dəqiqədən az interval qoymaq mümkün deyil. Mövcud şərtlər arasında sərnişinlərin rahatlığını təmin etmək üçün “Bakı Metropoliteni” QSC əlindən gələ bütün tədbirləri görür.

Hazırda 25 müasir tipli vaqonumuz sərnişinlərin ixtiyarına verilib. Gələcəkdə alınacaq yeni nəsil vaqonlar da bu problemin tamamilə aradan qaldırılmasına xidmət edəcək”.