Month: December 2018

Xəbər verdiyimiz kimi, Gədəbəy rayonunun mərkəzində müəllim “F-1” əl qumbarasını partladaraq intihar edib.

Median.Az Unikal.org-a istinadən xəbər verir ki, intiharın təfərrüatları ilə bağlı məlumatlar əldə edilib.

Belə ki, özünə qəsd edən 1974-cü il təvəllüdlü Nemət İlyas oğlu Bayramov Gədəbəy Rayon Peşə Liseyinin müəllimi olub. Liseyin direktoru Şakir Məsumovun verdiyi məlumata görə, mərhum idman müəllimi olub:

“Nemət idman müəllimi idi. Onun hansı səbəbdən bu addımı etməsi bilinmir. Mərhum ailəli olub bir qız övladı var idi. Onun qızı iki dəfə əməliyyat olunmuşdu. Həyat yoldaşının da əməliyyat olunacağı bildirilir. Deyilənə görə sosial problemləri var imiş. Özləri rayonun mərkəzində yaşayırlar. Evə gələrkən yolda özünü partladıb. Mərhum hələ dəfn olunmayıb. Cənazəsini yaşadığı mənzilə gətiriblər”.

Nəqliyyat, Rabitə və Yüksək Texnologiyalar Nazirliyi Dünya Azərbaycanlılarının Həmrəyliyi Günü və Yeni il bayramı günlərində əhalinin nəqliyyat, telekommunikasiya, o cümlədən internet, mobil rabitə xidmətləri, radio-televiziya yayımı ilə keyfiyyətli, fasiləsiz şəkildə təmin edilməsinə dair strukturuna daxil olan və strukturuna daxil olmayan tabeliyindəki qurumlara, həmçinin digər telekommunikasiya operatorlarına müvafiq tapşırıqlar verib.

Nazirlikdən daxil olan məlumata görə, bayram ərəfəsində və bayram günlərində sabit telefonların fasiləsiz işinin təmin edilməsi məqsədilə rabitə xidmətləri borclarına və digər səbəblərə görə telefonların şəbəkədən açılmaması, daxil olan müraciətlərə həssaslıqla yanaşılaraq operativ tədbir görülməsi nəzərdə tutulur.

Bayram günlərində məsul növbətçilər təşkil edilməklə nəqliyyat, telekommunikasiya xidmətlərinin, radio-televiziya yayımının fasiləsiz və keyfiyyətli işinin təmin edilməsi, kabel və xətt zədələnmələrinin operativ aradan qaldırılması, poçt şöbələrinin iş rejiminin tənzimləyici qrafik üzrə qurulması, profilaktik, tikinti-quraşdırma işlərinin dayandırılması, rabitə obyektlərinin mühafizəsinin gücləndirilməsi üzrə müvafiq tədbirlər görüləcək.

Şəhərlərarası nəqliyyatın, Bakı Beynəlxalq Avtovağzalının bayram günlərində gücləndirilmiş iş rejimində fəaliyyəti təmin ediləcək. Sərnişin sıxlığı yaranarsa, lazımi sayda əlavə avtobus xəttə buraxılacaq.

Vətəndaşlardan rastlaşdıqları istənilən problemlə bağlı “1655” saylı “Qaynar xət”lə əlaqə saxlamaları xahiş olunur.

Cəlilabad rayonunda 11-ci sinif şagirdi Hüseynov Oruc Atif oğlu itkin düşüb. Dekabrın 8-də evdən çıxan məktəbli bir daha geri qayıtmayıb. Atif Hüseynov 18 gündür ki, övladından xəbərsizdir. Faktla bağlı hüquq-mühafizə orqanlarına məlumat verilsə də, məktəblinin harada olduğu bilinmir.

Median.Az-ın xəbərinə görə, Atif Hüseynov Azvision.az -a bildirib ki, oğlu Orucun heç bir problemi olmayıb, onun hansı səbəbdən evi tərk etməsi qaranlıq qalır.

“Nə məktəbdə, nə də evimizdə problem olub. Oruc evin tək oğludur, həmişə ona qayğı ilə yanaşmışıq. Biz normal ailəyik, problemimiz olmayıb. Həmçinin aramızda heç bir narazılıq olmayıb. Oxuduğu məktəbin müəllim və şagirdlərindən izahat alınıb. Hələ nəticə yoxdur. Hadisə altıncı gün olub. Mən usta işləyirəm. Oruc şənbə-bazar günlərində mənə kömək edirdi. İşdən çıxandan sonra pul verdim ki, oğlum, evə çörək və digər ərzaq al, mən də gəlirəm. Evə bazarlıq edib anasına verib, sonra evdən çıxıb. Beş dəqiqədən sonra evdən zəng ediblər, telefonuna zəng çatmayıb. O gedən gedib”.

Atasının dediyinə görə, itkin düşən oğlu dindardır. Araşdırma zamanı məlum olub ki, O. Hüseynov ölkə xaricinə çıxmayıb.

“Bir adam demir ki, mən onu filan yerdə görmüşəm. Kimə salam veribsə, polis onlardan izahat alıb. Sanki buxarlanıb, yoxa çıxıb. Bir Allah bəndəsi onu avtobusa, maşına minən yerdə, yol keçəndə görməyib. Oğlum bir anın içində yoxa çıxıb. Sevdiyi qız yox idi, olsa da, bizə deməzdi. Abır-həyalı uşaqdır. Dostlarının hamısını tanıyıram, dindar uşaqlardır. Oğlum özü də dindardır, bir dəfə Kərbəlada, iki dəfə Məşhəddə olub. Kərbəladan təzə gəlmişdi”, – deyə A. Hüseynov bildirib.

O. Hüseynovu görənlərdən aşağıdakı nömrə ilə əlaqə saxlamaları xahiş olunur: 051 546 52 23

Dekabrın 28-də MM-in payız (qış) sessiyasının, eləcə də, il ərzində sonuncu plenar iclası keçiriləcək.

Sonuncu iclasın gündəliyinə isə ən azı 44 məsələ daxil edilib.

Bunlar “Məhkəmələr və hakimlər haqqında”, “Notariat haqqında”, “Antiinhisar fəaliyyəti haqqında”, “Elektron ticarət haqqında”, “Lisenziyalar və icazələr haqqında”, “Patent haqqında”, “Banklar haqqında” və digər qanunlara, o cümlədən, İnzibati Xətalar, Mülki, Gömrük, Şəhərsalma və Tikinti məcəllələrinə dəyişiklik layihələridir.

Qeyd edək ki, Şəhərsalma və Tikinti Məcəlləsinə nəzərdə tutulan dəyişikliklər layihəsinə əsasən, Azərbaycanda hazırda yerli icra hakimiyyətləri tərəfindən bütün şəhər və qəsəbə yaşayış məntəqələrinin və onların ərazisinin müəyyən hissələrinin müfəssəl planlarının hazırlanması və təsdiqi işi həyata keçirilməkdədir.

Odur ki, müfəssəl planın məcburi tətbiqi müddətinin daha bir il uzadılması zərurəti yaranıb.

Qeyd olunur ki, Şəhərsalma və Tikinti Məcəlləsinin 11.1-ci maddəsinin birinci cümləsinə əsasən, tikinti layihələri şəhərsalma sənədlərinin, o cümlədən, müfəssəl planın müəyyənləşdirdiyi tələblərə uyğun olmalıdır.

Belə plan olmadıqda və ya onun müddəti bitdikdə, tikinti layihələrinə onlar həyata keçiriləcəkləri ərazinin planlaşdırılması sənədlərinə (baş planlara və (və ya) ümumi planlara), habelə müfəssəl planın hazırlanması zamanı nəzərə alınan tələblərə uyğun olduqda və bir sıra şərtlərin birgə mövcud olduğu hallarda yol verildiyi müəyyən edilsə də, Məcəllənin 75-ci və 80-ci maddələrində tikinti obyektinin inşasına icazənin məhz müvafiq tikinti ərazisi üçün qüvvədə olan müfəssəl plan əsasında verildiyi göstərilir.

“Azərbaycan Respublikasının Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanununun 2.2-ci maddəsində tikinti layihələrinin şəhərsalma sənədlərinə uyğunluğuna məcəllənin 11.1-ci maddəsinin birinci cümləsində nəzərdə tutulmuş tələbin Məcəllənin qüvvəyə mindiyi 2013-cü il 1 yanvar tarixdən yeddi il sonra tətbiq edilməsi nəzərdə tutulur.

Hazırda yerli icra hakimiyyətləri tərəfindən bütün şəhər və qəsəbə yaşayış məntəqələrinin və onların ərazisinin müəyyən hissələrinin müfəssəl planlarının hazırlanması və təsdiqi işi həyata keçirilməkdədir və bu səbəbdən də müfəssəl planın məcburi tətbiqi müddətinin daha bir il uzadılması zərurəti yaranıb.

Beləliklə, müfəssəl planın məcburi tətbiqinin 2020-ci ildə həyata keçirilməsi planlaşdırılır.

MM-in sonuncu plenar iclasında Dünya Azərbaycanlılarının Həmrəyliyi Günü münasibətilə müraciət qəbul ediləcək.

Sessiya dövlət himinin oxunması ilə başa çatacaq və bununla da MM növbəti qış tətilinə çıxacaq. MM-in növbəti sessiyası, 2019-cu ilin yaz sessiyası fevral ayının 1-də öz işinə start verəcək.

Yanvar ayının 15-20-si tarixlərindən isə yaz sessiyası ilə bağlı komitə iclasları başlayacaq.//oxu.az