Month: March 2018

“Övladımın olması münasibətilə dövlət yoldaşıma guya 99 manat sevinc pulu verməlidir. Bəlkə 99 manat xərcim çıxıb, amma 2 aya yaxındı bu pulu ala bilmirəm”.

Bu sözləri minval.info-nun əməkdaşı Səmral Quluzadə deyib.

O bildirib ki, əvvəl Sabirabaddakı “Asan xidmət”dən uşaq üçün doğum haqqında şəhadətnamə ala bilməyib:

“”Asan xidmət” də çoxdan mənim üçün “zülm xidmət” olub bu öz yerində. Nə vaxt bu quruma işim düşüm yol pulu, rüsumlarla cibim də boşalıb, əsəblərim də pozulub. İşim də ya həll olmayıb, ya da xeyli get-gəldən sonra gec həll olub”.

Səmral Quluzadənin ailəsi bu səbəbdən “sevinc pulu”nu ala bilmək sevincini yaşamayıb.

“Minval” əməkdaşının sözlərinə görə, daha sonra ortaya çıxıb ki, şəxsiyyət vəsiqəsindən əlavə yaşayış yerindən arayış də lazımdır:

“Buna görə Neftçaladan Sabirabada məktubla arayışım göndərilib. 4 gündür ki, gəlib çıxmır. Bu da “Azərpoçt”un mənə “xeyiri”. Hər iki rayon poçtdan söyləyirlər ki, “bizlik deyil Bakılıqdır”. Bakıdan isə problemin nədən ibarət olduğunu bilmədiklərini deyirlər”.

Qeyd edək ki, Səmral Quluzadə hər ay kirayə haqqı ödədiyindən sosial durumu ürəkaçan deyil. Bu səbəbdən ailəsinin haqqı olan sevinc pulundan yararlanmaq istəyib. Lakin Səmralın arzusu günlərdir ki, gerçəkləşmir.

Məsələ ilə bağlı minval.info hüquqşünas Əsabəli Mustafayevin fikirlərini öyrənib.

Onun sözlərinə görə, poçtdan məktubun çatıb-çatmamasını xəbərnamə və ya qəbz vasitəsilə öyrənmək olar:

“Əgər oradan bildirilsə ki, məktub xəbərnaməsiz göndərilib, bu zaman qəbz tələb edilməlidir. Həmin şəxs bunu qəbzin üzərindəki şifrə vasitəsilə yoxlaya bilər. Ya özləri, ya da ki bizə verə bilərlər. Bu şifrə ilə “Azərpoçt”un rəsmi saytından öyrənmək olar ki, vəziyyət nə yerdədir”.

Ə.Mustafayev bildirib ki, sevinc pulunun alınması üçün yaşayış yerindən arayışın tələb olunmasına rast gəlməyib: “Ola bilsin, bu sənədi ailəyə ödəniş edəcək müvafiq orqanı həmin ünvana əsasən müəyyən etmək üçün istəyirlər. Bilirsiniz, təcrübə ilə qanunvericilik arasında fərq var. Buna görə əgər arayışda dirəniblərsə, belə qayda ilə həll etmək olar”.

Dövlət Sosial Müdafiə Fondunun rəsmi saytından “uşaq pulunu” almaq üçün tələb olunan sənədlər barədə belə cavab verilib:

“Uşağın doğum haqqında şəhadətnaməsinin surəti, müavinət alan şəxslərin bank rekvizitləri və ya poçt ünvanı (faktiki yaşayış ünvanı) və sair əlavə olunur”.

Cəlilabadda bir gəncin ölümcül döyülməsi haqda sosial şəbəkələrdə məlumat yayılıb.

Bizim Yol-un verdiyi xəbərə görə həmin gənci döyənlərin Rayon yanğından Mühafizə xidmətinin rəisi və polis kapitanı olduğu deyilirdi. DİN Mətbuat Xidmətinin Lənkəran Regional qrupunun baş inspektoru, polis leytenantı Məhəmməd Rzayevin Bizim Yol-a verdiyi məlumata görə, yazıda deyilənlər əslində həqiqəti əks etdirmir: “Həmin münaqişədə adıçəkilən polis əməkdaşı deyil onun qardaşı olub. Məsələ ilə bağlı hal-hazırda rayon prokurorluğunda araşdırma aparılır. Aparılan araşdırmanın nəticəsindən asılı olaraq məsələyə hüquqi qiymət veriləcək”.

Azərbaycanda murdar və leş ətlərdən istifadə olunaraq kolbasa, sosis məmulatlarının hazırlanması haqqında dəfələrlə yazılıb.

Bu dəfə şikayət ölkəmizdə müxtəlif çeşidli kolbasa və sosis istehsalı ilə tanınan “Səhliyalı” şirkətinin “Halal nemət, 1000 bərəkət” markalı məhsulundandır.

Kəmalə Qasımova ad-soyadlı istehlakçı “Halal nemət, 1000 bərəkət”in “Manqalüstü” sosisinin içindən siçan nəcisi tapıb.

“20 Yanvar” metrostansiyası yaxınlığında yerləşən “Araz” marketdən sosisi aldım, evə gəlib, yemək hazırlayanda, xoşagəlməz mənzərə ilə üzləşdim”, – deyə şikayətçi bildirib.

K.Qasımova sosisin şəkillərini çəkərək, redaksiyamıza təqdim edib.

Fotolara baxan zaman efirdə gecə-gündüz reklamı gedən bu məhsulun keyfiyyəti və mənşəyi ilə bağlı ciddi şübhə yaranır.

İnternetdə bu müəssisə ilə bağlı kiçik bir araşdırma aparan zaman “Səhliyalı” şirkətinin leş ətlərdən geninə-boluna istifadə etdiyi iddiası ilə rastalşdıq. Hətta, şirkətin qoca, südsüz heyvanların ətindən istifadə etdiyi bildirilir. Həmçinin, bir müddət əvvəl “Halal nemət, 1000 bərəkət” markalı məhsulun içindən qurd çıxması sosial şəbəkələrdə geniş müzakirəyə səbəb olduğu da mətbuatda yer alan yazılarda qeyd edilir.

Bu iddianın nə dərəcədə doğru, yaxud yalan olduğu barədə bir fikir deyə bilmərik.

Şirkət rəsmilərinin mövqeyini dinləyib, aydın şəkildə yazmağa hazırıq.(cebhe.info)

İctimai Televiziya və Radio Yayımları Şirkəti aprelin 11-nə təyin edilən Azərbaycan Prezidentinin seçkilərində ödənişli seçkiqabağı təşviqat aparılması üçün qiymətləri açıqlayıb.

“Report”un xəbərinə görə, prezidentliyə qeydə alınan namizədlərin və ya onların səlahiyyətli nümayəndələrinin çıxışının saniyəsi minimum 7 manatdır.

Çıxışın saniyəsinin maksimum qiyməti isə 25 manat müəyyən edilib. Ödənişli təşviqata qoşulan namizədlər günün müxtəlif saatlarında çıxış edə bilərlər.

Xatırladaq ki, İctimai Televiziya və Radio Yayımları Şirkəti prezidentliyə qeydə alınan namizədlərə həm də ödənişsiz efir vaxtı ayıracaq.

Qeyd edək ki, seçkiqabağı təşviqat martın 19-da başlayır.

Çinli qadın getdiyi idman zalının soyunma otağında qadınların çılpaq şəklini çəkib, sevgilinə göndərdi.

Azxeber.com xarici KİV-ə istinadən bildirir ki, sözügedən hadisə Çinin Shenyang şəhərində baş verib.

Belə ki, Chen adlı qadın getdiyi idman zalının soyunma otaqlarında qadınların çılpaq şəklini çəkərkən tutulub. Polisə ifadə verən qadın şəkillərini sevgilisi üçün çəkdiyini, ona göndərdiyini bildirib.

Faktla bağlı araşdırma davam edərkən, Çin mətbuatı qadının şəkilləri cinsi məzmunlu saytlara satmaq üçün çəkdiyini iddia edib.