Month: March 2018

Milli Məclisin deputatı, millət vəkili Hadi Rəcəbli xarici bir çoxx xarici ölkələrdə olduğu kimi Azərbaycanda da dövlət və onun atributlarına qarşı təxribatlar yayan saytların və sosial şəbəkələrin bağlanılmasının vacibliyini vurğulayıb. Hadi Rəcəbli deyib:
“Bəzi texniki məsələlər var ki, ona qarşı mübarizə aparmaq hələ ki, çətin görünür. Amma bir çox inkişaf etmiş ölkələrdə təhqirə və böhtana, dövlət və onun atributlarına qarşı təxribatlar yayıldığı üçün həmin saytlar və sosial şəbəkələr dərhal bağlanılır. Düşünürəm ki, artıq Azərbaycanda da bu addımları atmaq lazımdır”.

Bəs ölkəmizdə dövlət və onun atributlarına qarşı təxribatlar yayan, təhdid kampaniyası ilə məşğul olan sosial şəbəkələrin fəaliyyəti dayandırıla bilərmi?

Məsələ ilə bağlı Milli Məclisin İnsan hüquqları komitəsinin üzvü millət vəkili Fazil Mustafa açıqlamasında ölkəmizdə sosial şəbəkələrin bağlanılmasının yolverilməz olduğunu bildirib.

Onun sözlərinə görə, sosial şəbəkələrin bağlanması, internet resurslarına çıxışın məhdudlaşdırılması dünyada ölkənin imici üçün müsbət qiymətləndirilmir. Bu fikir qeyri-realdır. Çünki, insanlar informasiya əldə etmək üçün lazımi məkanları tapacaqlar. İnternet məkanından ayrı qalmaq mümkün deyil:

“Sosial şəbəkələrin fəaliyyətinin dayandırılması Azərbaycan üçün mənfi nəticələr verə bilər. Ola bilər ki, bu fikir doğru anlaşılmayıb. Hansısa bir sosial şəbəkənin bağlanması dünyadan təcridolunma yoludurmu!? Bu fikir inandırcı deyil. İnanmıram millət vəkili Hadi Rəcəbli belə bir fikir səsləndirsin.

F. Mustafa vurğulayıb ki, sosial şəbəkələrdə yayılan təxribat xarakterli fikirlərin qarşısını almaq üçün müvafiq dövlət qurumları, Xarici İşlər Nazirliyi, Diasporla İş üzrə Dövlət Komitəsi, müxtəlif Fondlar bu istiqamətdə öz işləri ilə məşğul olmaq əvəzinə daha passiv fəaliyyət göstərərlərsə, ölkəmizə qarşı bu cür neqativ halların olması baş verə bilər:
“Müəyyən dərəcədə dövlət büdcəsindən maliyyələşən təşkilatlar öz funksional fəaliyyətlərini normal qaydada yerinə yetirməlidirlər ki, bu cür təhdid kampaniyasının qarşısını almaq mümkün olsun. Vaxtında profilaktik tədbirlər aparılmadığına görə, ölkədə təxribatyönümlü problemlərin baş verməsi yaşanır. Bu məsələdə sosial şəbəkənin bağlanması çıxış yolu deyil. Müasir dövrdə internet xətti hava ilə çəkilir, dünya artıq qlobollaşıb. Sosial şəbəkələrin bağlanması yolverilməzdir”, – deyə millət vəkili əlavə edib.

Aprel ayında maqnit qasırğası gözlənilir.

Median.az “RİA Novosti”yə istinadən xəbər verir ki, bu barədə Rusiya Elmlər Akademiyasının Fizik İnstitutunun Günəş rentgen astronomiyası laboratoriyası məlumat yayıb.

Günəşin maqnit sahəsi və küləklərin strukturunun riyazi hesablanmasından sonra qasırğanın Yerin orbitinə aprelin 12-də çatacağı müəyyən edilib.

Alimlərin proqnozların görə 70% ehtimalla, maqnit qasırğa minimal gücdə olacaq. Qasırğanın beş ballıq şkala ilə 2-ci dərəcəli olma riski yalnız 10 faiz təşkil edir.

Ölkə ərazisində qapalı məkanlarda tütün məmulatları ilə bağlı qadağa qüvvəyə minsə də, ancaq bəzi obyektlər buna məhəl qoymur.

Median.az ARB TV-yə istinadən xəbər verir ki, bir çox yerlərdə qadağanı bildirən elan lövhələri vurulsa da, obyekt sahibi müştərinin rahatlığı üçün icazəni verir. İnzibati xəta növü kimi qiymətləndirilsə də, cəmiyyətdə bu qadağaların mövcudluğuna rast gəlinmir.

Bəziləri kimin cərimələnəcəyindən xəbərsizdi, kimisi də “obyekt sahibi icazə verir” deyib çəkir.

Sakin: “Toya getdiyimiz zaman yazıb-yapışdırılmağına rəğmən nə toy sahibi, nə də qonaqlar buna məhəl qoymur”.

Sakin: “Kafelərə gedəndə qadağalar görürük, amma yenə də çəkməyə icazə verirlər. Bir söz demirlər, gedib oturan kimi qabağımıza külqabını qoyurlar”.

Ancaq bir məsələ də var ki, İnzibati Xətalar Məcəlləsində obyekt sahiblərinə yalnız siqaretdən qadağa haqqında lövhənin olmamasına görə cərimə yazıla bilər. Deməli, qanunun işləmə mexanizimində müəyyən boşluqlar mövcuddur.

Tahir Əlirzayev – hüquqşünas: “Qanunvericilikdə elə olmalı idi ki, restoran və kafe sahibləri özləri müştərilərin siqaret çəkmələrinə icazə verməsin. Müştəri siqaret çəkdiyi təqdirdə restoran və ya kafe sahibi izibati məhsuliyyətə cəlb edilməlidir”.

Artıq bu iş Fövqəladə Hallar və Daxili İşlər Nazirliyinə tapşırılıb. Bu iki strukturun əməkdaşları tərəfindən keçirilən reyd zamanı vətəndaş təyin olunmamış yerdə tütün məmulatlarında istifadə edərsə, Daxili İşlər Nazirliyinin yaxud da Fövqəladə Hallar Nazirliyinin əməkdaşları qanun çərçivəsində həmin şəxsi cərimələyə bilər.

Fazil Mustafa – millət vəkili: “Bu qadağa hər zaman cərimə növü kimi tətbiq olunmamalıdır. Bir növ vətəndaşlara xəbərdarlıq olunması vacibdir”.

Xatırladaq ki, müəssisələrdə, idarələrdə, təşkilatlarda siqaret çəkmək üçün xüsusi yerlərin ayrılmasının və görünən yerlərdə “siqaret çəkmək qadağandır” xəbərdarlıq yazısının və ya işarəsinin olmasının təmin edilməməsinə görə vəzifəli şəxslər 400 manat məbləğində, hüquqi şəxslər 1000 manat məbləğində cərimə edilir.

Kürdəmir sakini intihar edib.
Median.az-ın APA-ya istinadən xəbərinə görə, hadisə gecə saatlarında rayonun Garıs Əyribənd kəndində baş verib.

Kənd sakini, 1996-ci il təvəllüdlü Əli Vidadi oğlu Cabbarov Girdiman çayın Kürdəmir rayon hissəsindən keçən hissəsindəki körpüdən özünü asaraq intihar edib. Ə. Cabbarovun hansı səbəbdən özünə qəsd etməsi hələlik məlum deyil.
Faktla bağlı Kürdəmir Rayon Prokurorluğunda araşdırma aparılır.

Bu gün bəzi mətbuat orqanlarında Milli Məclisin Əmək və sosial siyasət komitəsinin sədri Hadi Rəcəblinin sosial şəbəkələrin bağlanmasına çağırış edən açıqlaması yayılıb. Bu açıqlama geniş ictimai müzakirəyə səbəb olub.

Median.az xəbər verir ki, məsələ ilə bağlı Milli Məclisin Əmək və sosial siyasət komitəsinin sədri Hadi Rəcəbli modern.az-a açıqlamasında fikirlərinin təhrif olunduğunu vurğulayıb.

Deputat bildirib ki, o, “Sosial şəbəkələri bağlamaq lazımdır!” sözlərini deməyib.

“Çox təəssüflər olsun ki, mənim fikirlərim yenə təhrif olunub və konteksdən çıxarılaraq, bəzi saytlarda yayımlanıb. Bu fikirlər insanları çaşdırır. Mən demişəm ki, tərbiyəsizlik edən, qanunları pozan, hüquqi normaların əleyhinə olan saytlar və Facebook-dakı bəzi səhifələr qanunlar daxilində bağlanmalıdır. Mən deməmişəm ki, ümumiyyətlə sosial şəbəkələri bağlamaq lazımdır. Bu düzgün yanaşma deyil. Mənim sözümü niyə təhrif edirlər axı? Mən heç vaxt o sözü deməmişəm. Demokratik cəmiyyətin elementlərindən biri də saytlar, sosial şəbəkələrdir. Amma burada da qanun olmalıdır. Mən açıqlamamda demişəm ki, xaricdən Azərbaycan əleyhinə qarayaxma kampaniyası aparan şəxslər söyüş söyürlər. Bu da Azərbaycan mentalitetinə uyğun gəlmir. Bildirmişəm ki, həmin sözləri deyən, iftira və yalanlar yağdıran saytların bağlanması hüquqi qaydalar və qanunlar daxilində olmalıdır”.