Month: April 2018

Prezidentliyə iki namizəd arasında qarşıdurma başlayıb.

Sərdar Cəlaloğlu və Qüdrət Həssənquliyev arasında qarşıdurma bricinin qarşı tərəfi Azərbaycanı Rusiyanın təsirinə salmaq barədə fikirlər səsləndirməkdə ittiham etməsi ilə başlayıb.

Buna cavab olaraq Q. Həsənquliyev Cəlaloğlunu aşağılayan açıqlama ilə çıxış edib. O, bildirib ki, ADP sədrinin ona bu şəkildə hücumu bir neçə səbəbdən ola bilər: “Bir neçə il öncə o, dəfələrlə qəbuluma gəldi ki, adını çəkmək istəmədiyim, Prezident Administrasiyasında işləyən bir məmur ayda ona 10.000 dollar pul verir, amma o şübhələnir ki, həmin məmur ona pul ”atır”. Məndən xahiş etdi ki, bu məsələyə aydınlıq gətirmək üçün ona kömək edim. Mən də dedim ki, bu çox çətin məsələdir, amma çalışaram nəsə öyrənim. Bundan sonra daha bir neçə dəfə gəldi ki, bəs nə oldu?

Onu mənim qapım ağzında boynubükük vəziyyətdə çox adam görüb. Dedim, təəssüf ki, heç nə öyrənə bilmədim. Bundan sonra o, məndən narazı qaldı”.

S.Cəlaloğlu isə musavat.com-a açıqlamasında Həsənquliyevin ona böhtan atdığını qeyd edib: “Deyirb ki, guya mən onun qəbulunda olmuşam və sair. Kişiliyi varsa, o məmurun adını çəksin və mənim onun qəbuluna getməyimi sübut eləsin. Sən kimsən mən sənin qəbuluna gəlim?! Mən heç sənin ağanın qəbuluna getməmişəm və getmirəm! Sən özünü nə hesab edirsən?! Boynu bükük vəziyyətdə dayanan sənin kimi olar ki, ipin başqasının əlindədir, həmin şəxsin qapısından ikiqat əyilib keçirsən. Boynunu elə sıxıb ki, yüksək vəzifədə təmsil olunduğun iqtidarın əleyhinə qarşında oturan Araz Əlizadə, Hafiz Hacıyev, Zahid Oruc ittihamlar yağdırır, təmsil olunduğun iqtidar xalqa xəyanətdə ittiham olunur, sənin cəsarətin çatıb bir kəlmə reaksiya verə bilmirsən, başını aşağı dikib dayanırsan. Halbuki o ittihamlar həm də sənə çatır. Çünki həmin hakimiyyətdə böyük vəzifədə olmusan. Sərdar Cəlaloğlu isə siyasi repressiyalardan, məhrumiyyətlərdən başı dik, alnı açıq çıxıb. Sərdar Cəlaloğlu kiminsə qapısında boyun bükən olsaydı repressiyalara, işgəncələrə məruz qalmazdı, Qüdrət Həsənquliyev kimi deputat olardı. Sərdar Cəlaloğlu 4 dəfə deputat seçilib, dördündə də parlamentə buraxılmayıb. Qüdrət Həsənquliyev isə heç vaxt deputat seçilməyib, lakin saxta mandatla deputat oturdulub. İndi bax gör boynu bükük kimdir. Mənə qarşı ətrafındakı bir neçə quyruq bulayanları qısqırdıb. Mən Qüdrət Həsənquliyev barəsində elə şeylər açıqlayaram ki, o, heç vaxt başını yuxarı qaldırıb kimsənin üzünə baxa bilməz. Azərbaycanda ən çox boynu bükük adam odur. Mən onun tayı deyiləm. Siyasi məsələləri şəxsi müstəviyə daşımasın. O özü bilir mən nəyi nəzərdə tuturam. Barəsində elə şeylər açaram ki, yerə girər! Bəsdir, ayıbdır”./xezernews.az

Prezident İlham Əliyev Könül Kazım qızı Xasıyevaya ilə bağlı sərəncam imzalayıb.

Azərbaycan musiqi sənətinin inkişafında xidmətlərinə görə sənətçiyə Azərbaycan Respublikası Prezidentinin fərdi təqaüdü veriləcək.

Nazirlər Kabinetinə bu sərəncamdan irəli gələn məsələləri həll etmək tapşırılıb.

Azərbaycan-Gürcüstan sərhədinin Ağstafa rayonu istiqamətindən keçən 7 kilometrlik hissəsinə ötən əsrin 90-cı illərinin əvvəllərində basdırılmış tank və piyada əleyhinə minalar hələ təmizlənməyib. Virtualaz.org “Kavkazskiy uzel” portalına istinadən xəbər verir ki, 2015-ci ildə Böyük Britaniya və Amerika qeyri-kommersiya təşkilatı “The Halo Trust” Gürcüstan hökumətindən minaların təmizlənməsi üçün icazə alıb, lakin Azərbaycan tərəfi təşkilata minatəmizləmə işlərinə başlamağa icazə verməyib.

Bildirilir ki, sərhədin bu hissəsinə mindən çox tank və piyada əleyhinə minalar basdırılıb. Minalanmış ərazi Marneuli rayonunun Kirac-Muğanlı, Təkəli, Qaçağan kəndlərinin yaxınlığındadır. 1991-ci ildə Gürcüstan hakimiyyəti sərhədin həmin hissəsinə nəzarət edə bilmirdi və Azərbaycan tərəfi Ermənistan hərbi qüvvələrinin sərhədin bu hissəsindən keçməsinin qarşısını almaq üçün minalar basdırıb. Çünki bu sərhəd üçbucağı eyni zamanla Ermənistanı Gürcüstanla birləşdirir. 

2015-ci il iyulun 6-da “The HALO Trust” Marneuli rayonunun həmin ərazisində minaların tipini və yerini müəyyən etmək üçün Gürcüstan hökumətindən icazə alıb. Lakin təşkilatın meneceri İrakli Çitanava deyib ki, onlar işlərə başlaya bilməyiblər.

“İcazə alandan dərhal sonra biz hazırlıq işlərinə başladıq və avqustda minalanmış əraziyə, sərhədin təxminən 50 metrliyinə yaxınlaşdıq. Ancaq gördük ki, Azərbaycan tərəfi ağır texnikanı, əsgərləri çıxarıb. Onlar tələb etdilər ki, biz ərazini tərk edək. O vaxt XİN-in və sərhəd polisinin nümayəndələri də bizimlə idi. Lakin biz geri çəkilməli olduq”-Çitanava danışıb.

Gürücstan Müdafiə Nazirliyindən təşkilata göndrilən məktubda göstərilir ki, Azərbaycanla sərhəddə minaların təmizlənməsi işləri bu məsələ ilə bağlı yekun razılaşma əldə olunana qədər dayandırılmalıdır. Azərbaycanın işğal altındakı ərazilərində də minaların təmizlənməsi ilə məşğul olan bu təşkilat müəyyən edib ki, cəmi 2.2 milyon kvadratmetr ərazi minalanıb. Minaları təmizləmək üçün iki-üç il vaxt və 3 milyon dollar lazımdır.

Bakıda ofis rəhbərləri və ya yeni tikililərin komendantları sakinlərə müxtəlif ölkələrdən olan turistlərə öz mənzillərini təklif etməyi qadağan etmək hüququna malik deyillər.
Median.Az xəbər verir ki, bu barədə Oxu.Az-a tarix elmləri namizədi, istefada olan polis polkovniki Tahir Behbudov danışıb.
Oxu.Az redaksiyasına paytaxt sakinləri tərəfindən şikayət daxil olub. Şikayətdə deyilir ki, eyni vaxtda Bakının bir neçə yeni tikilisində liftlərə «Mənzil sahiblərinin nəzərinə!!! Artıq dərəcədə xahiş olunur ki, mənzillərinizi İran və ərəb mənşəli şəxslərə kirayə verməyəsiniz!» yazısı olan kağızlar yapışdırılıb.
Sakinlər həmin müraciətdə gizli irqçilik əlamətləri seziblər.
T.Behbudovun fikrincə, Azərbaycan dövləti turizmin inkişafına diqqət ayırır, bu cür neqativ hadisələrin şahidi olmaq kədər hissi doğurur:
«Azərbaycan qanunvericiliyində analoji hərəkətlərə görə inzibati və ya cinayət cəzasını nəzərdə tutan maddə yoxdur.
Həmçinin bir faktı nəzərə almaq lazımdır ki, qanunla ev sahibləri və yaxud digər şəxslər Azərbaycan Respublikasının vətəndaşına hər hansı bir şəxsə, o cümlədən əcnəbilərə öz əmlakını kirayəyə verməyi qadağan edə bilməz.
Onlar, sadəcə, xahiş edə bilərlər. Kirayə verib-verməməyə isə siz qərar verirsiniz».
Ekspert bildirib ki, ola bilsin, turistlər bu binalarda baş vermiş hadisələr zamanı yaranmış problemlərin səbəbi olublar:
«Məsələn, mənzildə suyu açıq qoyublar, gecələr səs-küy salıblar və yaxud da təmizliyə riayət etməyiblər.
Əgər hətta belə də olsa da, bu, heç kimə mənzillərin əcnəbilərə kirayə verilməsinə mane olmaq hüququ vermir. Turistlərlə Azərbaycan cəmiyyətindəki mədəni normalar mövzusunda söhbətlər aparmaq olar».