Month: June 2018

Azərbaycana daxil olan əcnəbilər və ya vətəndaşlığı olmayan şəxslərin qeydiyyatı ilə bağlı müddətin dəyişdirilməsi Milli Məclisin (MM) son iclasında müzakirəyə çıxarılıb.

Layihə barədə məlumat verən MM-in Hüquq siyasəti və dövlət quruculuğu komitəsinin sədri Əli Hüseynli bildirib ki, bununla bağlı Azərbaycan prezidenti tərəfindən Milli Məclisə Miqrasiya Məcəlləsinin 21-ci (Əcnəbilərin və vətəndaşlığı olmayan şəxslərin Azərbaycan Respublikasında olduğu yer üzrə qeydiyyata alınması) maddəsinə dəyişiklik edilməsi ilə bağlı layihə təqdim olunub.

Layihəyə əsasən, artıq Azərbaycanda 10 gündən yox, 15 gündən artıq müvəqqəti olan əcnəbi və ya vətəndaşlığı olmayan şəxslər ölkədə olduqları yer üzrə qeydiyyata alınmalıdırlar.

Millət vəkili Elmira Axundova isə dəyişikliklə bağlı çıxışında bunları deyib:

“Miqrasiya Məcəlləsinə təklif olunan dəyişiklikdə əcnəbilərin və vətəndaşlığı olmayan şəxslərin Azərbaycana gəlişinə qadağa və məhdudiyyətlər nəzərdə tutan 16-cı maddənin 1.8-ci bəndində əvvəllər əcnəbi və vətəndaşlığı olmayan şəxslərin miqrasiya qanunvericiliyini pozduğuna görə iki və daha çox inzibati məsuliyyətə cəlb olunduqda onların ölkəyə girişinə qadağa və məhdudiyyətlər tətbiq olunurdu.

Amma indi təklif olunan dəyişiklikdə isə qeyd olunur ki, həmin inzibati məsuliyyətə görə tətbiq edilən cəriməni ödədikdə bu qadağa götürülür. Buradan belə çıxır ki, ölkəmizə gələn əcnəbilər yaşama qaydalarını pozduğu halda müəyyən məbləğdə cərimə ödəyərək yenə də burada qalıb istədiyi davranışı davam elətdirə bilər.

Bəzi xaricilər üçün bu məbləği ödəmək elə də çətin olmayacaq. Bu halda belə liberallaşma neqativ halların çoxalmasına gətirib çıxarmayacaqmı?”

Millət vəkilinin sözlərinə görə, onsuz da mətbuatda, xüsusən də sosial şəbəkələrdə bəzi xarici turistlərin bizim ölkəmizdə özlərini artıq dərəcədə sərbəst aparmasına dair, xoşagəlməz hərəkətlərinə dair (məsələn, xanımlarımıza qarşı) çoxsaylı şikayətlər və etirazlar nəzərə çarpır:

“Mənə elə gəlir ki, bu maddəyə bir əlavə də etmək lazımdır ki, əgər hansısa əcnəbi artıq bir dəfə cərimələnib və ikinci dəfə yaşama qaydalarını pozubsa, onu respublikamızın hüdudlarından kənara çıxarmaq məqsədəuyğun olardı. Yoxsa, ancaq cərimələrlə kifayətlənsək, neqativ hallar çoxala bilər”.

Layihə sonra geniş müzakirələr açılmadan səsə qoyularaq qəbul edilib.//oxu.az

Deputat Qüdrət Həsənquliyev parlamentdə “Məhkəmələr və hakimlər haqqında” qanuna dəyişikliklərin müzakirəsi zamanı iradlarını bildirib.

Millət vəkili qeyd edib ki, dəyişikliklər hakimlərin müstəqilliyinə xidmət edir, lakin bu problemi tam həll etmir.

Millət vəkili qanunun yenidən işlənməsini təklif edib:

“Bu gün hakimlərin beş ildən bir qiymətləndirilməsi hakimlərin müstəqilliyinə ciddi şəkildə ziyan vurur. Bizdə hər beş ildən bir hakimlərin fəaliyyəti qiymətləndirilir, peşəkar çatışmazlıq aşkar ediləndə hakim vəzifəsindən kənarlaşdırılır. Bu gün təklif edilən dəyişiklikdə onlara bir şans daha verilir”.

Onun sözlərinə görə, hakimlər xüsusi tələblərlə seçilir, onlara qarşı müəyyən tələblər var. Bu mənada, peşəkar çatışmazlığı olan hakimin olması halları məhduddur:

“Hakimlər mülki, cinayət işlərinə baxanda hər hansı qanunu pozanda prokuror, müdafiə tərəfi müdaxilə edə bilir. Beş ildən bir qiymətləndirmə hakimləri asılı vəziyyətdə saxlayır. Bu məsələ ləğv edilməlidir.

Hakim qanunu pozanda ondan şikayət vermək hüququ qanunla tənzimlənir. Vəzifə səlahiyyətindən istifadə etmə, özünü pis aparmasına görə, saxtakarlıq kimi hallarda da vəzifəli şəxs kimi məsuliyyətə cəlb edilir.

Yalnız cinayət törədəndə onun məsuliyyətə cəlb edilməsini qanuna daxil etməliyik. BMT tələblərinə uyğun olaraq hakimlər ömürlük təyin olunanda, vəzifənin icrası ilə bağlı müəyyən yaş həddi olanda müstəqil olurlar.

Bizdə 68 yaşdır və hesab edirəm ki, bu, artırılmalıdır. Onsuz da hakim işləyə bilmədiyini görəndə istefa verəcək. Ölkəmizdəki hakimlərin mövcud problemi hakimlərin müstəqilliyi, əməkhaqqının az olmasıdır”.

Spiker Oqtay Əsədov isə bildirib ki, hakimlərin öz istəyi ilə istefa verməsi gözlənilən deyil:

“Siz inanırsınız ki, Azərbaycanda hakim istefa verəcək? Öz sözünüzə özünüz də inanmırsınız”.

Milli Məclisin bu gün keçirilən növbədənkənar iclasında millət vəkilləri son günlər Bakı-Sumqayıt yolunda yaranan tıxac probleminə sərt reaksiya veriblər.

Deputat Fazil Mustafa bildirib ki, iki ildir “Bakıxanov” istiqamətində metro stansiyası açılacağını deyirlər:

“Amma bu iki il müddətində büdcədən metro stansiyası çəkilməsi üçün vəsait ayrılmır. Halbuki indi təsdiq etdiyimiz büdcə iki milyard artırılıb. Stansiyalar çəkilməsə, bir ildən sonra Bakı fəlakətli vəziyyətdə olacaq.

Görürsünüz ki, Xırdalan yolu bağlanıb, hər yer iflic vəziyyətindədir. Ona görə imkan varkən metro tikintisi həyata keçirilmədir. İndi Xırdalan yolunda olan vəziyyəti görürsünüz. İnsanlar neçə saat tıxacda qalırlar”.

Deputat Fəzail Ağamalı da qeyd edib ki, 20 Yanvar-Masazır istiqamətində dəhşətli vəziyyət hökm sürür:

“Elə bir vəziyyətdir ki, söz tapıb deyə bilmirsən. Alternativ yollar da yoxdur. Həmin yol dörd il bundan qabaq çəkilib. Bir nəfər dilli-dilavər jurnalist çıxıb deyir ki, yolun təmirinə ehtiyac var idi. Mən tam məsuliyyətlə deyirəm ki, o yolda çat yox idi.

Orada pul yemək, başqa məqsədlər var idi. Mən Naxçıvanla bağlı deyə bilərəm ki, orada yüksək yol mədəniyəti var. Bakıda isə bu yoxdur. Orada yolların kənarında ağaclar, yaşıllıqlar salınıb. Mən “Azəravtoyol”a deyərdim ki, gedib Naxçıvandan yol çəkməyi öyrənsinlər”.

Spiker Oqtay Əsədov qeyd edib ki, onun da yaşadığı yer Sulutəpə ərazisidir:

“Mən də eyni əziyyəti çəkirəm. Amma yollarımıza nə olub ki?! Sadəcə, yol kənarında evlər tikilib. Yolun genişləndirilməsinə həmin evlər mane olur. Amma bu məsələnin də üzərində iş gedir”.

Deputat Cavid Qurbanov isə həmkarları tərəfindən irəli sürülən “Bakıda yaxşı yol çəkilmir” ittihamlarına cavab verib. O, həmkarlarını ədalətli olmağa çağırıb. Bildirib ki, Bakının hər bir tərəfi su ilə əhatə olunduğundan yolları genişləndirmək olmur:

“Buna görə də problemlər yaranır. Metro stansiyalarına gəlincə, biz daha çox yerüstü xətlərin çəkilməsinə üstünlük veririk. Çünki bu daha ucuz variantdır, həm də keyfiyyətlidir”.

Sentyabrdan yeni nəsil şəxsiyyət vəsiqələrinin verilməsinə başlanacaq.

Bbarədə Milli Məclisin Hüquq siaysəti və dövlət quruculuğu komitəsinin sədri Əli Hüseynli məlumat verib.

O qeyd edib ki, Azərbaycanın artıq 10 regionunda bununla bağlı yeni texnologiyalar quraşdırılıb:

“Daxili İşlər Nazirliyindən aldığım məlumata görə, sentyabrdan etibarən prosesin özünə başlanılacaq”.

Qeyd edək ki, bu məsələ “Azərbaycan Respublikası vətəndaşının yeni nəsil şəxsiyyət vəsiqəsinin tətbiqi müddətləri ilə əlaqədar Azərbaycan Respublikasının bəzi qanunlarında dəyişikliklər edilməsi haqqında” qanun layihəsində öz əksini tapıb.

Parlamentin son iclasında “Dövlət rüsumu haqqında” qanuna dəyişikliklər edilib.

Belə ki, avto-nəqliyyat vasitələrinin dövlət qeydiyyatına alınmasına görə dövlət rüsumu artırılıb.

Dəyişikliyə əsasən, 001, 002, 003, 004, 005, 006, 007, 008, 009 rəqəmləri olan avto nömrələrə seriyası müxtəlif hərflərdən ibarət olduqda dövlət rüsumu 1500 manatdan 2000 manatadək artırılıb.

Seriya eyni olduqda rüsum 3000 manat (əvvəl 2500) təşkil edəcək.

Bundan başqa, 100, 200, 300, 400, 500, 600, 700, 800, 900 rəqəmləri olan nömrələrə seriyası müxtəlif hərflərdən ibarət olduqda 1500 manat (əvvəl) 1000), seriya eyni hərflərdən ibarət olduqda 2000 manat (1500) rüsum ödəniləcək.

Dəyişikliyə əsasən, 111, 222, 333, 444, 555, 666, 777, 888, 999 rəqəmləri olan nömrələrə seriyası müxtəlif olduqda 1000 manat (əvvəl 500), seriyası eyni hərflərdən ibarət olduqda 1500 manata (1000) qaldırılması təklif edilir.