Month: July 2018

Ötən gün Gəncədə baş verən hadisələr bir daha müəyyən qüvvələrin ölkədə təxribat törətməkdə maraqlı olduğunu göstərdi. İki polisin vəhşicəsinə öldürülərək şəhid olması isə olayların ən pik nöqtəsi oldu. Maraqlıdır ki, bir neçə gün öncə rüşeymi atılan bu hadisələr məhz ötən gün (Türkiyə prezidenti Rəcəb Tayyip Ərdoğanın Azərbaycana səfər etdiyi gün) alovlandı. 

Millət vəkili Zahid Oruc Sfera.az-a açıqlamasında baş verən hadisələri belə şərh edib:

“Bu hadisələrin təsadüf olduğunu, yaxud bilərəkdən, məhz Ərdoğanın səfəri günündə baş verdiyini də demək olar. Yunis Səfərovun məlum terror əməlinin informasiya resurslarında, sosial şəbəkələrdə müzakirə edilməsi, tirajlandırılması, onun mücahid obrazının yaradılması və xalq mənafeyi uğrunda çarpışan biri kimi təqdim edilməsi fonunda düşünülürdü ki, müəyyən zaman keçməlidir ki, əhali bu təbliğatı qəbul edərək ona itaət etsin. Nəticədə isə Yunis Səfərov cinayətkar qəhrəman obrazında təqdim edilsin və sonunda geniş toqquşlamalara yol açılsın. Bu gün Türkiyəni sevməyənlər çoxdur və onlar istəyirlər ki, Azərbaycanda daha fərqli modelli dövlət quruluşu yaratsınlar”. 

Gəncə ilə Nardaranı nə birləşdirir?

Millət vəkili Z.Oruc həmçinin bir neçə il öncə Nardaranda baş verən hadisələrdə də Gəncə ilə müəyyən əlaqənin olduğunu diqqətə çatdırıb:
“O zamanlar “Nardaran da min bir Azərbaycandır, min bir dövlətdir” adı altında təbliğatlar aparılırdı. Həmin məkan vaxtı ilə xalq hərəkatında mübarizənin mərkəzlərindən biri olub. Onlar azadlıq hərəkatında böyük töhfələr veriblər. Lakin sonrakı illərdə bu prosesdən çox sürətlə qopma baş verdiyini müşahidə etdik. Kəndin əhalisindən mücahid hazırlayaraq işığa, qaza, suya qarşı baykot sədaları səsləndirməyə istiqamətləndirməklə onları siyasiləşdirərək dini istəklərini istismar ediblər. 2015-ci ildə MTN-in məlum cinayətkar heyətinin rəhbərlikdən getməsi fonunda Nardaranda baş verən olaylarda da iki polis şəhid oldu. Nardarandakı məlum hadisələr fonunda Gəncədə müsəlman birliyinin fəaliyyət üzvləri ayağa qalxaraq polisə qumbara atmışdılar. Sual edilə bilərdi ki, bu sinxron bağlılığın əsası nədir. Onlar niyə bu coğrafiyanı əhatə etmək istəyirlər? İki məkan arasında yeraltı sular bir-birinəmi axır? Bu səbəbdən Elmar Vəliyevə qarşı sui-qəsdin fərdi yaxud da şəxsi identifikasiyada olmadığını söyləyərkən haqlıydıq. Ötən gün məlum əməllərin törədilməsi həmin qruplaşmaların din üzərindən ya da məscidlər vasitəsi ilə hakimiyyətlə savaşma planıdır. Bu hadisələr qətiyyən siyasi meydanın daralması fonunda hansısa siyasi qüvvələrin aktivləşməsi deyil. Bu hadisə Ərdoğanın səfəri günü Gəncədə oynanılan dram deyil, daha artıq dərəcədə bölgədə möhkəmlənmək, Azərbaycana din ixrac etmək, dövlət quruluşumuzu dəyişdirmək istəyənlərin uzunmüddətli fəaliyyətinin nəticəsidir. Onların Gəncəni Nardaranlaşdırmaq, Bakını Dəməşqə çevirmək kimi ssenariləri var. 

Kimləsə münasibət problemli ola bilər, kiminsə idarəçiliyinin əleyhinə ola bilərsiz. Lakin dini gətirib alət etmək düzgün deyil. Gəncədən Bakını vurmaq olmaz. 2016-cı il hadisələrində ən çox vətəndaşlar arasında telefon danışıqlar məhz Gəncədən gedirdi. Yəni, kəşfiyyat orqanları daha çox Gəncədə qərarlaşmışdır. Bu bizim üçün bir siqnal olmalıdır. Gəncə dövlətçiliyimizin əsası olduğu üçün bizi o damardan vurmaq istəyirdilər. Ötən gün baş verən hadisələr zamanı polisin də əlində silah vardı, onları öldürmək üçün imkan vardı.  Amma belə olsaydı, gör nə baş verəcəkdi. Deyəcəkdilər ki, xalqa qarşı güllə atıldı”. 
Z.Oruc bildirir ki, 90-cı illərdə baş verən hadisələr fonunda susqunluq nümayiş etdirən həmin qüvvələrdir ki, yenidən aktivləşib:
“Hər zaman böyük təəccüb hissi ilə qarşılayırdım ki, 90-cı illərdə neft müqavilələrinə terror və qətliamlarla reaksiya verən qüvvələr nə əcəb şimal-cənub, şərq-qərb layihələri, böyük strateji  planlarımız reallaşarkən sükut nümayiş etdiriblər. Baş verən bu hadisələr isə onların yatmadığını, ayıq olduğunu bir daha göstərdi. Məqsəd bəllidir”.

Z.Oruc saytlarda bu hadisələrlə bağlı yayımlanan xəbərlərə də münasibət bildirib:

“Növbəti addım hərbi hissələrdə 30-40 nəfərin qətlə yetirilməsi olacaq deyə, xəbər lentlərində belə bir məlumat verilmişdi. Əsgərin öldürülməsi o ordunun üzərinə, dövlətin təməl daşı və sənin öz təhlükəsizliyinə fokuslanır. Bunu dərk etməyənlər yazıqdır. Necə düşünmək olar ki, Əlikram Hümbətov əlində silah gəlib sizə gələcək quracaq. Necə bunu ağıla gətirmək olar? Bu adam xəstədir. O adama bir tribuna verirlər və xalq mücahidi kimi təqdim olunur. Ötən gün Orduxan yazır ki, “it kimi gəbərən polislər”. Ay nadanlar… Sabah bu adamlarla demokratiya qurmaq olmaz. Tankla, topla, silahla demokratiya qurulmur…Ötən gün xəbər lentlərində diqqətimi çəkən məqamlardan biri budur ki, insanlarımız nə qədər bu hadisələrə daha ayıq yanaşsalar da, digər tərəfdən isə qarşıdakı dövrdə hansı təxribatların baş verəcəyi söylənilirdi. Sanki konkret ssenari və kitab var və hadisələr də bu ssenariyə uyğun olaraq cərəyan edir”.

Azərbaycan Prezidentinin ictimai-siyasi məsələlər üzrə köməkçisi, PA-nın ictimai-siyasi şöbəsinin müdiri Əli Həsənov son günlər ölkədə yaşanan hadisələrə münasibət bildirib.

Median.Az Əli Həsənov sosial şəbəkədə yazdığı statusu təqdim edir: 
Gəncədə yaranmış həssas dönəm cəmiyyətimizin dövlətin ətrafinda daha sıx birləşməsini tələb edir
Iyul ayının 3-ü axşam Gəncə Şəhər İcra hakimiyyətinin başçısı Elmar Vəliyevə qarşı törədilmiş sui-qəsdlə bağlı BBC əməkdaşının sualına cavab verərkən, mən ilkin məlumatlardan çıxış edərək söyləmişdim ki, ”bu icra başçısına qarşı törədilmiş kriminal hadisədir, silahlı basqın olub, başçı və mühafizəçisi xəsarət alıb, hadisəni törədən şəxs yaxalıanıb, hüquq mühafizə orqanları lazımi tədbirləri görürlər”. 

Belə ağır cinayət hadisələri zamanı müvafiq orqanların rəyi olmadan daha təfsilatlı şərhlə çıxış etməyi düzgün hesab etmədim. Bir dövlət məmuru kimi mənim həmin açıqlamam, əlbəttə ki, dövlətin hadisəni nəzarətə götürdüyü haqqında cəmiyyəti məlumatlandırmaq istəyilə əlaqəli olmuşdu.

İyulun 6-da Baş Prokurorluq, Daxili İşlər Nazirliyi və Dövlət Təhlükəsizlik Xidmətinin yaydığı birgə məlumatda baş vermiş cinayətin terror xarakteri, cinayəti törədən Yunis Səfərovun xarici vətəndaş olduğu, Azərbaycan dövləti tərəfindən sanksiyalaşdırılmayan döyüş əməliyyatlarında iştirak etdiyi bildirildi. Həm yerli, həm xarici mediada dərc olunmuş materiallarda, sui-qəsdçinin həyat yoldaşının bir neçə dəfə yayımlanmış video müraciətlərində onun bu əməli şəxsi motivlərlə, qisas naminə və ya bəzilərinin iddia etdiyi kimi “sosial zülmə” qarşı etiraz olaraq deyil, məhz Suriyada uğrunda döyüşdüyü “ideallar” naminə – şəriət dövləti bərqərar etmək üçün törətdiyi bəlli oldu.

Yunis Səfərov maddi təminatı yüksək olan bir ailənin üzvüdür, xarici vətəndaşdır və təbii ki, Azərbaycanın hansısa bölgəsində sosial ədalət naminə “solçu inqilabı” haqqında düşünməyəb də. Açıqlamalardan göründüyü kimi, o, bu əmələ uzun illər hazırlaşıb, öz niyyətini həyata keçirmək üçün müvafiq məqam və tapşırıq gözləyib. Görünür, Mingəçevir şəhərində baş vermiş qəza ilə əlaqədar yaranmış gərginlik bunun üçün əlverişli məqam hesab edilib. 
Sözügedən dairələrə yaxın xarici media və Facebook səhifələrinin hələ 2017-ci ilin əvvəllərində Gəncə İH başçısı haqqında islamofob və anti-şiə imici yaratmaq cəhdləri Azərbaycan KİV-lərində müzakirə olunmuşdu. Bu ilin əvvəllərindən isə müəyyən reket nəşrlərdə Elmar Vəliyevin kobud rəftarı haqqında dərc edilən materialların sayında kəskin artım müşahidə edilmişdi. Görünür, ölkə əhalisinin dini mövzulara o qədər də həssas olmaması səbəbindən onun barəsində “sosial zülmün səbəbkarı” imici formalaşdırmağa ehtiyac varmış.

Hadisə baş verdikdən dərhal sonra radikal dini səhifələr və saytlar, Vətənə xəyanət ittihamı ilə mühakimə edilmiş separatçılara bağlı KİV-lər Yunis Səfərovu yeni “gəncəbasar qisasçısı”, “qəhrəman” elan etməyə tələsdilər. Bu dəfə də onlara Avropadakı iaşə müxalifəti və onların rəhbərlik etdiyi internet kanallarından, Leyla Yunusova kimi anti-milli ünsürlərdən kömək gəldi. Rusiyada “talış separatçısı kimi ad-san qazanmış” İsmayıl Şabanovun, Hollandiyada eyni statusla yaşayan Ələkrəm Hümbətovun çevrəsi cinayətkarın müdafiə komitəsini yaradıb xarici dövlət rəsmilərinə müraciət etdilər. 2016-cı ilin aprel döyüşləri zamanı erməni hərbi mundiri ilə ekranlardan Azərbaycanı, Azərbaycan əsgərini aşağılayan bir xain ona şeir də həsr etdi. Təsadüfi deyil ki, Azərbaycan dövləti və onun müstəqil siyasətinin əleyhinə son dövrlərdə sistemli ideoloji təxribatla məşğul olan bəzi xarici dini saytlar da bu günlərdə xüsusi canfəşanlıq göstərdilər. Kimə məxsusluğu bəlli olmayan Ru-clip.ru saytının Youtub kanalı isə “Səda HD” kimi təqdim olunan şirkətin hazırladığı və üsyana səsləyən 5 klip – çağırış yayımladı.

Beləliklə, biz dövlətçiliyimizə qarşı separatçıların, radikal dindarların, yalnız pula və məişət komfortuna işləyən “iaşə müxalifəti”nin sinxronlaşdırılmış ideoloji təxribatı faktı ilə üz-üzəyik. Xarici anti-Azərbaycan qüvvələrin bu mənfur niyyətini anlamaq olar, ancaq daxildən onlara dəstək verən, poilis əməkdaşlarına qarşı qəddar cinayətə bəraət qazandırmağa çalışan, yaxud da xaricə qaçıb erməni maliyyəsinin girovuna çevrilənlərin xain canfəşanlığını heç cür başa düşmək mümkün deyil. 

Belə həssas vəziyyət cəmiyyətimizin, bütün vətəndaşlarımızın milli dövlətçilik ətrafında daha sıx birliyini tələb edir. Xüsusən ictimai rəyə təsir imkanı olan insanlar – millət vəkilləri, ziyalılar, tanınmış ictimaiyyət nümayəndələri, siyasi fəallar, media və QHT təmsilçiləri daha həssas davranmalı, iqtidara və ya onun ayrı-ayrı nümayəndələrinə bəslədikləri fərdi münasibətlərlə dövlət və Vətən mənafelərini bir-birindən fərqləndirməlidirlər.
XIX əsr Rusiyasında Vera Zasuliç adlı qadın ilk terror aktını həyata keçirəndə rus ziyalılarının müəyyən kəsimi onu qəhrəman kimi təqdim etməyə çalışmışdı və buna qismən nail də olmuşdular. Həmin terrorun mifləşdirilməsi ilə başlayan hadisələr sonrakı dövrdə Rusiyada üç inqilaba, milyonlarla insanın vətəndaş savaşında həlak olmasınadək inkişaf etmişdir.

İdeoloji təxribat deyəndə bir məqamı da yada salmaq yerinə düşərdi. Yaxın tariximizdə Azərbaycan əsilli xarici vətəndaşın törətdiyi ilk terror aktın Azərbaycan Dövlət Neft Akademiyası hadisəsidir. Amma həmin terror öz hədəfinə çatmamış, terror aktı, onu törədən şəxs və arxasındakı qüvvələr cəmiyyət tərəfindən birmənalı olaraq lənətlənmişdilər. Bu dəfə də terror Azərbaycan əsilli xarici vətəndaş tərəfindən törədilib. Amma qeyd etdiyim kimi, ona ictimai bəraət qazandırmaq üçün uzun müddətli iş aparılıb. Bəzi sosial səhifələrdə “qalxın, digər şəhərlərdə də bunu təkrar edin” çağırışları terrorun yeni dalğasına çağırış kimin qiymətləndirilə bilər. Çünki bu, aksiyalarda Azərbaycan vətəndaşlarının kütləvi iştirakını təmin etmək məqsədi güdülür.
1970-ci illərin ikinci yarısında Türkiyədə solçular və sağçılar öz aralarındakı gərginliyi və dövlətlə anlaşılmazlıqları silah, “devrim”(əslində terror) gücünə həll etməyə başlayanda Süleyman Dəmirəlin dediyi məşhur bir ifadə yadıma düşdü: “Cümhuriyyət polisinə güllə atan əllər kəsilməlidir”. Əlbəttə ki, bununla müasir Türkiyədə heç də Osmanlı dövlətinin tarixinə aid olan sərt cəzanın birbaşa tətbiqi nəzərdə tutulmurdu, dövlətin məmurunu terror edənlərin sərt şəkildə cəzalandırlmasınin vacibliyinə diqqət çəkilirdi. 

Əminliklə deyə bilərəm ki, Azərbaycanda qarşıdurma, xaos yaratmaq istəyənlər qanunun sərt üzünü görəcəklər və ən ciddi şəkildə cəzalandırılacaqlar. Bununla yanaşı, təsadüfən, hadisə ictimai maraq kəsb etdiyinə görə, öz iradələrinin əleyhinə olaraq bu əməlin iştirakçısına çevrilmiş hər kəsi bu yanlış addımlardan çəkinməyə dəvət edirəm. Azərbaycan dövləti, dövlətçiliyi, milli maraqlarımız heç vaxt müzakirə mövzusu olmamalıdır və bu dəyərlərə təhlükə yarandıqda hər bir vətəndaş, hər bir azərbaycanlı öz qəti mövqeyini ortaya qoymalı, milli iradəsini nümayiş etdirməlidir. Buna görə də Azərbaycan dövlətinin terror və terror çağırışlarına qarşı atacağı sərt addımların ziyalılar, tanınmış ictimaiyyət nümayəndələri, vətəndaş cəmiyyəti təmsilçiləri tərəfindən düzgün anlaşılmalı, geniş kütlələrə düzgün mesajlar verilməlidir. Hər hansı səbəb və ya bəhanə ilə terrora bəraət qazandırmaq cəhdləri yolverilməzdir, sosial səhifələrin aktiv iştirakçıları və KİV nümayəndələri yazı, rəy və şərhlərində müvafiq qanunvericiliyin tələblərini və dövlət maraqlarını unutmamalı, hadisələrə daha peşəkar və obyektiv yanaşmalıdırlar.