Month: October 2018

Son zamanlar ölkə yollarında ağır tonnajlı avtomobillərin iştirakı ilə çox sayda qəza baş verir və əksər hallarda bu qəzalar insan itkisi ilə nəticələnir. Amma görünən odur ki, hələ də belə qəzalardan nəticə çıxarmayanlar var. Çünki ötən gün paytaxtın Ziya Bünyadov prospektində hərəkət edən ağır tonnajlı yük maşını ətrafa təhlükə saçıb. Bu anları əks etdirən görüntülər isə sosial şəbəkələrdə paylaşılıb.

Median.Az Xezerxeber.az-a istinadən xəbər verir ki, yolun bu hissəsində hərkət sürəti maksimum 60 kilometr olsa da, ağır tonnajlı yük maşını saatda 100 km-dən də artıq sürətlə hərəkət edib. Üstəlik, avtomobillərin sıx hərəkət etdiyi yolda.

Dövlət qeydiyyat nişanı 10 ZX 243 olan yük avtomobilini arxadan çəkməyə çalışan minik maşınının sürücüsü saatda 100 kilmetr sürətlə hərəkət etsə də, bu avtomobilə çata bilmir. Üstəlik, qadağan edildiyi halda yük avtomobili ən sol zolaqla hərəkət edir.

Yol hərəkəti üzrə ekspert Ərşad Hüseynovun sözlərinə görə, burada yük avtomobilinin qaydları pozması açıq aydın görünür. Çünki yük avtomobillərinə bu yolda maksimum saatda 60 km. sürətlə hərəkət etməyə icazə verilir. Amma yol polisi bu görüntü əsasında sırf sürət həddini aşdığına görə sürücünü cərimələyə bilməz. Bunun üçün araşdırma aparmalı, ərazidəki kameralara baxılmalıdır. Üstəlik, belə avtomobilləri idarə edən sürücülər qaydalara daha ciddi əməl etməlidir. Çünki kütləsi çox olduğundan onların iştrakı ilə qəzaların fəsadları ağır olur. İctimai qınaq da pozuntuların azalmasına kömək edir.

Qeyd edək ki, artıq sözügedən avtomobilin məxsus olduğu şirkətdə hadisədən xəbərdardır və görüntüylə bağlı araşdırma aparılır.

Qəbələ rayonunda Suriya vətəndaşı olan turistlərin qaldığı evdə baş verən yanğın zamanı xəsarət alanlar müalicə üçün Bakıya gətiriləcək.

Median.Az xəbər verir ki, bunu “Report”a açıqlamasında Səhiyyə Nazirliyinin mətbuat katibi Pərviz Abubəkirov deyib.

Onun sözlərinə görə, hadisə zamanı xəsarət alan 1 kişi, 3 qadın və 1 yaşlı körpə Qəbələ Rayon Mərkəzi Xəstəxanasına yerləşdiriliblər və orada müalicə olunurlar: “Bir nəfərə ambulator yardım göstərilərək evə buraxılıb. Bundan başqa, hadisə nəticəsində 1995-ci il təvəllüdlü əcnəbi vətəndaş dünyasını dəyişib”.

Nazirlik rəsmisi əlavə edib ki, xəstəxanada olan 5 nəfər Ə.Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) Plastik və Rekonstruktiv Cərrahiyyə klinikasının nəzdində fəaliyyət göstərən Yanıq Şöbəsinə gətiriləcək: “Onların vəziyyətləri ağır deyil”.

Qeyd edək ki, Qəbələ rayonunda ərəb turistlərin qaldığı evdə baş verən yanğın zamanı 1 nəfər ölüb, 6 nəfər yaralanıb.

Rusiya Azərbaycanlılarının Federal Milli-Mədəni Muxtariyyətinin Moskva Regional bölməsinin adı daha çox qalmaqallarda hallanan sədri Ağadadaş Kərimov “Nar bayramı”nda təxribata əl atıb.

Median.Az Diaspor.az-a istinadən xəbər verir ki, A.Kərimovun Azərbaycan mədəniyyətinə həsr olunmuş “Qranat” ümumşəhər “Nar bayramı” ilə bağlı keçirdiyi tədbirdə qarşıdurma yaranıb. “Nar bayramı”nın Kərimov tərəfindən Azərbaycan adına layiq şəkildə keçirilməməsi həmyerlilərimiz tərəfindən haqlı olaraq etiraza səbəb olub.

Tədbirdə Ermənistanla bağlı bəzi eksponantların nümayiş olunması azərbaycanlılar tərəfindən qəzəblə qarşılanıb. Bununla yanaşı, Azərbaycan dəyərləri adı altında keçirilən tədbirdə Azərbaycan bayrağı və Azərbaycana aid heç bir eksponatların nümayiş olunmaması həmyerlilərimizin təəccübünə səbəb olub.

Kərimovun bu tədbiri erməni diaspor təşkilatları ilə birlikdə həyata keçirməsi məlum olduqdan sonra həmyerlilərimiz sivil şəkildə öz etirazlarını bildiriblər. Yeni imic formalaşdırmaq naminə Rusiyadakı azərbaycanlılar arasında nüfuz qazanmağa çalışan Kərimovun erməni və separatçı təşkilatlarla birlikdə “Nar bayramı” adlı tədbir keçirməsi ifşa olunub. Bu addımına görə həmyerlilərimizin tədbir zamanı tənqidinə tuş gələn diaspor sədri bütün planlarının ifşa olunduğunu gördükdə provakasiyaya əl atıb. Belə ki, o, erməni əqidədaşları ilə birlikdə birləşərək tədbirdə iştirak edən azərbaycanlıları uzaqlaşdırmağa çalışıb. Eyni zamanda, separatçı təşkilat nümayəndələrini köməyə çağıraraq erməni diaspor nümayəndələri ilə birlikdə azərbaycanlıları təhqir edərək öz çirkin tədbirinin əsl mahiyyətini üzə çıxarıb.

Daha sonra hadisə yerinə Rusiya hüquq-mühafizə orqanlarının əməkdaşlarını çağıran Kərimov tədbir iştirakçısı olan azərbaycanlıların həbs olunmasını tələb edib. Amma buna baxmayaraq, həmyerlilərimiz sivil şəkildə etiraz etdiklərini bildiriblər. O, tədbirdə dəfələrlə təxribata əl atsa da, onun bu cəhdləri uğursuz olub. Tədbir Kərimovun yaxın dostları olan erməni və separatçıların Azərbaycan əleyhinə səsləndirdikləri şüarla sona çatıb.

Xatırladaq ki, A. Kərimov bir müddət əvvəl qızını erməni oğlana ərə verdikdən sonra azərbaycanlıların qəzəbinə tuş gəlmişdi. O, erməni ilə qohum olduğuna görə qürur hissi keçirdiyini bildirmişdi. Eyni zamanda, Qarabağ haqqında səsləndiyi fikir isə ictimaiyyətdə birmənalı qarşılanmamışdı. O, qarabağlı olmadığını və buna görə də, Dağlıq Qarabağda döyüşməyi düzgün hesab etmədiyini vurğulamışdı.