Month: October 2018

Çerkizov bazarının keçmiş sahibi Telman İsmayılov bəyan edib ki, onun ortaqları “qanuni oğru” Rövşən Lənkəranskinin qətlində iştirak etməyiblər.

Median.Az xəbər verir ki, bununla bağlı biznesmenin vəkili Marina Rusakova TASS agentliyinə məlumat verib.

Onun sözlərinə görə, müdafiə etdiyi şəxs bəzi KİV-lərdə İstanbulda Rövşən Caniyevin qətlində keçmiş tərəfdaşlarının iştirakı haqda açıqlama verməsi ilə bağlı yazılan xəbərləri rədd edir.

Telman İsmayılov iş adamları Vladimir Savkin və Yuri Brilevin qətlində ittiham edilir və 2017-ci ilin noyabrında Moskvanın Basman məhkəməsi onun barəsində həbs qərarı çıxarıb. İsmayılovdan başqa, bu işdə qardaşları Rafiq və Mehman Kərimovun da adları hallanır. Rafiq İsmayılov həbs edilib, Telman isə Rusiyadan kənardadır.

Xatırladaq ki, Rövşən Lənkəranski 2016-cı ildə İstanbulda qətlə yetirilib.

Noyabrın 1-də Bakıda və Abşeron yarımadasında buludlu hava şəraitinin üstünlük təşkil edəcəyi, bəzi yerlərdə fasilələrlə yağış yağacağı gözlənilir. Mülayim şimal-qərb küləyi gündüz şimal-şərq küləyi ilə əvəz olunacaq.

Bu barədə Ekologiya və Təbii Sərvətlər Nazirliyinin Milli Hidrometeorologiya Departamentinin məlumat verilib.

Havanın temperaturu Abşeron yarımadasında gecə 10-14, gündüz 15-17, Bakıda gecə 12-14, gündüz 15-17 dərəcə isti təşkil edəcək.

Atmosfer təzyiqi normadan yüksək 775 mm civə sütunundan 780 mm civə sütununa yüksələcək. Nisbi rütubət 75-85 faiz olacaq.

Bəzi rayonlarda arabir yağış yağacağı gözlənilir. Ayrı-ayrı yerlərdə yağışın intensiv olacağı ehtimalı var. Səhər bəzi yerlərdə duman olacaq. Mülayim şərq küləyi əsəcək.

Havanın temperaturu gecə 6-11, gündüz 15-20, dağlarda gecə 0-5, gündüz 10-15 dərəcə isti təşkil edəcək.

Noyabrın 1-də Abşeron yarımadasında iqlim normasına yaxın temperatur şəraiti meteohəssas insanlar üçün əsasən əlverişli olsa da, havada rütubətin normadan bir qədər yüksək olacağı gözlənilir ki, bu da bəzi meteohəssas insanlarda narahatlıq hissi yarada bilər.

ETSN xəbərdarlıq edir ki, ölkə ərazisində oktyabrın 31-i axşamdan noyabrın 2-si gündüzədək hava şəraitinin qeyri-sabit keçəcəyi, arabir yağış yağacağı gözlənilir. Bəzi yerlərdə yağışın intensiv olacağı ehtimal olunur. Çaylarda sululuğun artacağı ehtimalı var.

Əslində “atalıq məzuniyyət” deyilən bir məsələ yoxdur. Bununla bağlı müvafiq qanunvericiliyə də ayrıca nə isə əlavə etməyə ehtiyac və gərək duyulmur. Bu məsələ bir növ qanunvericilikdə öz əksini də tapıb.

Bunu Oxu.Az-a açıqlamasında Milli Məclisin (MM) Səhiyyə komitəsinin sədr müavini Musa Quliyev deyib.

Onun sözlərinə görə, qanunvericilikdə övladlarla, uşaqlarla bağlı məzuniyyət məsələsində bu məqam var:

“Orada qeyd edilir ki, valideyn – ana və ya ata üç il ərzində məzuniyyətə çıxa bilər.

Onun da biri ili ödənişli əsaslarla, iki ili isə öz hesabına olur. Yəni, əgər evdə, ailədə qadının məvacibi kişinin məvacibindən çox olarsa, o zaman qarşılıqlı razılıq əsasında kişi-ər məzuniyyət götürə, uşağa baxa bilər.

Amma bizdə belə bir ənənə, təcrübə də yoxdur əslində. Həm də mentalitet buna bir o qədər imkan vermir ki, evin kişisi məzuniyyət götürüb uşağa baxsın. Həmçinin, bizdə kişilərin əməkhaqları qadınların əməkhaqlarından yüksək olur.

Ona görə də indi qanunvericilikdə bununla bağlı nə isə icad etməyə, hansısa zəruri dəyişikliyə ehtiyac yoxdur.

Qanunvericiliyin müvafiq müddəaları bu məsələyə imkan verir”.

Qeyd edək ki, “atalıq məzuniyyəti” təklifi BMT-nin Əhali Fondu, Ailə, Qadın və Uşaq Problemləri üzrə Dövlət Komitəsi və Əmək və Əhalinin Sosial Müdafiəsi Nazirliyi tərəfindən birgə hazırlanmış “Azərbaycanda gender əsaslı cinsi seçimin qarşısının alınması və aidiyyəti cavab tədbirlərinin görülməsinə dair Milli Fəaliyyət Planı”nın layihə sənədində qeyd edilib.

Təkliflərdə uşaqlarını böyüdən və eyni zamanda karyera quran qadınlara dəstək verən ölkələrin qabaqcıl təcrübəsinə əsaslanaraq, qanunvericiliyə dəyişikliklərin edilməsini nəzərdən keçirmək məsələsi də yer alıb.

Layihəyə əsasən, bu tədbirlərin Əmək və Əhalinin Sosial Müdafiəsi Nazirliyi, Ailə, Qadın və Uşaq Problemləri üzrə Dövlət Komitəsi, Nazirlər Kabineti və MM tərəfindən həyata keçirilməsi nəzərdə tutulur.

Həmçinin, xatırladaq ki, Əmək Məcəlləsinə əsasən, həyat yoldaşları doğuşla əlaqədar məzuniyyətdə olan kişilərə 2 həftə (atalıq məzuniyyəti), ailədə hər hansı problem olarsa və ya xüsusi baxıma ehtiyacı olan başqa xəstə varsa, həm kişi, həm də qadın 7 gün ödənişsiz məzuniyyətə çıxa bilər.

İnsan alverində təqsirləndirərək həbs edilən tanınmış prodüser Təranə Səmədovanın bu yaxınlarda verdiyi müsahibəsi yayımlanıb.

Median.Az xəbər verir ki, Səmədova CVN TV-ə müsahibəsində qadın alverinə görə ittiham olunmasından və həbsilə bağlı xəbərlərə reaksiyasından danışıb:

“Xəbərləri göz yaşları içərisində oxuduyurdum. Anam əlini çiynimə qoyub dedi ki, sən nələrin öhdəsindən gəlmisən, bu nədir ki? Həmin vaxt çox pis oldum ki, mən bu damğanın altından necə çıxacağam? Anam dedi ki, bu damğa deyil, həyatın sınağıdır”.

Prodüser bu sözləri deyərkən göz yaşlarını saxlaya bilməyib.

Qeyd edək ki, iki qadını fahişəliyə cəlb etməkdə ittiham olunan T. Səmədova 1 il müddətinə azadlıqdan məhrum edilib və artıq Bakı İstintaq Təcridxanasına köçürülüb.

“Artıq şəhid hərbi qulluqçulardan 96 faizinin vərəsələri bu ödəməni almaq hüququna malik olduqlarını öyrənib”. 

Bu barədə Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin müdiri Fazil Talıbov bildirib.

O, yaxın günlərdə göstəricinin artacağını qeyd edib: “Hazırda Əmək və Əhalinin Sosial Müdafiəsi Nazirliyinin rəsmi saytındakı (http://www.mlspp.gov.az) “Birdəfəlik ödəmə” bölməsində vətəndaşlar tərəfindən sorğu-axtarış prosesinin davam etdiyini nəzərə alsaq, bu göstərici qarşıdakı günlərdə daha da artacaq.

Şəhidlərimizin ruhu hər birimiz üçün müqəddəs, uca, əzizdir və ölkəmizdə şəhid ailələrinin sosial müdafiəsinin gücləndirilməsi işlərinin davamı kimi, Prezident İlham Əliyevin müvafiq Fərmanının icrası olaraq, şəhid hərbi qulluqçuların vərəsələrinin birdəfəlik ödəmə ilə təminatı işlərinin də layiqli səviyyədə, tam şəffaf şəraitdə yerinə yetirilməsi üçün nazirlik bütün lazımi tədbirləri görməkdə davam edir”.

Şöbə müdiri bildirib ki, bu ilin sonuna qədər birdəfəlik ödəmələrin verilməsinə başlanacaq və gələn il ərzində ödəniş prosesi tam yekunlaşacaq.