Month: November 2018

Bakı sakini qonşusu tərəfindən üzləşdiyi əməllərlə bağlı polisə müraciət edib.

Suraxanı rayonu Hövsan qəsəbəsi Bağlar yaşayış massivində nömrəsiz evdə yaşayan Elmira Əliyeva (ad şərtidir) müraciətində qonşuluqda ev tikdirən İsrail adlı şəxsin ona məxsus olan qaz sayğacını sındıraraq yararsız hala saldığını bildirib. E.Əliyeva ərizəsində qeyd edib: “2018-ci ilin fevral ayında qonşum İsrail adlı şəxs fərdi yaşayış evini tikdiyi zaman mənim qaz sayğacımı yararsız hala salıb. Bununla bağlı mən həmin şəxsi çağıraraq sayğacı ona göstərdim. O da mənə narahat olmamağımı, bir problem yaranarsa, özünün həll edəcəyini bildirdi. Mən də onun sözünə inanıb heç bir yerə şikayət etmədim. Bir müddət sonra “Azəriqaz”ın laboratoriyası sayğacın zədəli olduğunu aşkarlayıb və mənim smart kartımı bloklayıb. Bununla bağlı mən yenidən qonşuma müraciət etdim. Bildirdim ki, “Azəriqaz” sayğacın dəyərini tələb edir – 236 manat. Bu zaman o, heç bir pul ödəməyəcəyini dedi, bununla yanaşı, həmin şəxs təxminən iki il müddətində həm üz-üzə gələrkən, həm də “whatsapp” vasitəsilə əxlaqsız təkliflər edərək, narahat edir. Mənə yazırdı ki, bu məsələni heç kim bilməyəcək, ikimizin arasında qalacaq. Mən bu iki məsələ ilə əlaqədar təxminən bir ay əvvəl Suraxanı rayon 30-cu polis bölməsinə ərizə ilə müraciət etdim. Ərizəmə sahə müvəkkili Tural baxır. Bu müddət ərzində Tural həmin vətəndaşı polis bölməsinə dəvət edib gətirə bilmir. Özü da etiraf etdi ki, həmin İsrail adlı vətəndaşdan qorxur. Mənə məsləhət görürlər ki, o adamdan şikayət etməyim, həmin adamı “işverən” kimi təqdim edib, məni qorxudurlar. Hətta qızımın evdə tək olduğunu, ona İsrail tərəfindən bir zərər toxunacağı ilə mənə təzyiq edirlər. Qeyd etmək istəyirəm ki, mən qızımla tək yaşayıram. 29 oktyabrda İsrailin həyat yoldaşı tərəfindən küçədə təhqirə, söyüşə məruz qalmışam. Məni zorlatdıracağı ilə hədələyib. Bu barədə 102 xidmətinə məlumat vermişəm. Həmin vaxt dərhal polis bölməsinə dəvət edildim, izahatım alındı. Bundan sonra isə İsrail 102-yə zəng edərək məndən şikayət edib ki, guya onu təhqir etmişəm, pul tələb etmişəm”.

Məsələ ilə bağlı 30-cu Polis Bölməsindən bildirilib ki, Elmira Əliyevanın şikayəti araşdırılarkən onun sayğacının İsrail adlı şəxs tərəfindən sındırılması sübuta yetirilməyib. Belə ki, adları qeyd edilən şəxslərin evləri arasında başqa 2 nəfərin evi var və təmir vaxtı E.Əliyevanın sayğacının sındırılması mümkün deyil. Qadının qonşusu tərəfindən təhqirə məruz qalması, ona əxlaqsız təkliflərin edilməsi də araşdırma zamanı sübuta yetirilməyib. Belə ki, E.Əliyeva yazışmaları polisə təqdim etməyib. Bu səbəbdən də araşdırmalar dayandırılıb və şikayətçiyə məhkəməyə müraciət etməsi məsləhət görülüb. (publika.az)

Bu gün paytaxt ərazisində, eləcə də, bölgələrdə icazəsiz tikilən evlərdə yaşayan vətəndaşlar kifayət qədərdir. Əmlak Məsələləri üzrə Dövlət Komitəsi tərəfindən sentyabr ayı üçün açıqlanan nəticələrə əsasən, Azərbaycanda təxminən 500 min qanunsuz tikili var. Bu tikililərdən təxminən 300 mini isə Bakıda yerləşir. Görəsən, vətəndaşlar qanunsuz tikililərini özəlləşdirə bilərlərmi?

Məsələnin hüquqi tərəfini oxu.az-a hüquq müdafiəçisi Sahib Məmmədov şərh edib.

O bildirib ki, qanunsuz tikililərin yerləşdiyi ərazidən çox şey asılıdır:

“Azәrbaycan Konstitusiyasının Şәhәrsalma vә Tikinti mәcәllәsində tikintilərin sökülməsinə dair xüsusi maddə var. Azərbaycan Respublikasının Mülki Məcəlləsində özbaşına tikinti və onun nəticələrinə dair, Daşınmaz Əmlakın Dövlət Reyestri Xidmətində bu məsələ ilə əlaqədar maddələr yer alıb.

Əgər sırf fərdi yaşayış evlərindən danışırıqsa, birinci baxmaq lazımdır ki, tikinti harada aparılıb. Məsələn, dövlət və ya bələdiyyəyə məxsus olan torpaqlarda inşa edilən qanunsuz tikililər heç bir halda özəlləşdirilə bilməz. Yaşayış sahəsi üçün nəzərdə tutulmayan torpaqlarda inşa edilən evlər qanunla özəlləşdirilə bilməz və bu evlərin sökülməsi zamanı heç bir kompensasiya nəzərdə tutulmur.

Bəzən bələdiyyələr dövlət torpaqlara aid qanunsuz sərəncam verir və ya hər hansı səlahiyyəti olmayan bir şəxs bu torpaqları başqa bir vətəndaşın istifadəsinə verir. Həmin vətəndaş da bu torpaqda özü üçün yaşayış evi tikir. Bu hallara praktikamızda çox rast gəlinir. Belə halda qanunsuz tikililər Daşınmaz Əmlakın Dövlət Reyestri Xidməti tərəfindən qeydiyyata alınmır.

Eyni zamanda, torpaq mülkiyyətçisi Şәhәrsalma vә Tikinti mәcәllәsində qeyd edilən normaları pozaraq icazəsiz şəkildə yaşayış evi tikibsə, bu da reyestrə daxil edilə bilməz.

Amma bir məsələ var ki, özbaşına tikililərə mülkiyyət hüququ o zaman tanına bilər ki, şəxs bunu öz adına olan torpaq sahəsində tikmiş olsun. Bu zaman həmin şəxs özəlləşdirmə üçün məhkəməyə müraciət edir. Məhkəmə isə məsələyə baxır və həmin qanunsuz tikilinin Daşınmaz Əmlakın Dövlət Reyestri Xidmətində qeydiyyata salınmasına dair qətnamə verir.

Başqa bir məsələ isə ondan ibarətdir ki, məhkəmə qərar verərkən nəzərə almalıdır ki, qanunsuz tikililərin dövlət reyestrinə daxil edilməsinə dair verilən qətnamələr digər vətəndaşların hüquqlarını və qanunla qorunan mənafelərini pozursa və ya fiziki şəxslərin həyatı və sağlamlığı üçün təhlükə yaradırsa, onda mülkiyyət hüququ tanına bilməz.

Təsərrüfat işləri üçün nəzərdə tutulan torpaq sahələrində az qala kiçik qəsəbələr salınır ki, bunlar da qanunla rəsmiləşdirilə bilməz.Yalnız bu məsələdə bütün tikililərin sökülməsi adekvat addım olmadığı üçün dövlət qanunlar çərçivəsində müəyyən güzəştlərə gedə bilir.

Dövlət baxır ki, bu kənd təsərrüfatı təyinatı ilə ayrılmış sahədir. Çıxış yolu olaraq torpağın təyinat sahəsi dəyişdirilir və yaşayış təyinatlı edilir. Yalnız bundan sonra həmin torpaq sahəsindəki qanunsuz tikililərə mülkiyyət hüququ tanına bilər”.