Month: January 2019

Bu gün rayon yerlərində valideynlər hələ də oğlan uşaqlarının sünnət edilməsi üçün dəllək axtarırlar. Hətta bəzən bu işi ailənin ağsaqqalına, başqa ixtisas sahibi olan həkimlərə də həvalə edirlər. Maraqlısı budur ki, həkimlər özü də bu məsələnin hansı üsulla gerçəkləşdirilməsində həmfikir deyillər.

Bir qrup həkimlər oğlan uşaqlarının dünyaya gəldikdən sonra bir neçə aylığında, hətta 40-ı çıxmamış sünnət olunmasını doğru hesab etdikləri halda, digər bir qrup isə tamamilə bunun əksini iddia edir. Onlar düşünür ki, sünnət üçün cinsiyyət orqanının müəyyən qədər inkişaf etməsi lazımdır.

Median.Az xəbər verir ki, oxu.az-a uşaq cərrahı Qədir Qədirov deyib ki, sünnət köhnə üsulla aparılmalıdır:

“Uşaqlarda sünnət məsələsinə xüsusi diqqət etmək lazımdır. Çünki çapıq toxuma normal toxuma kimi inkişaf eləmir. Məsləhətdir ki, bu proseduru ya bir yaşa qədər, ya da bir yaşdan sonra gerçəkləşdirsinlər.

Təəssüf ki, bu məsələyə diqqət edilmir. Ya uşaq doğulan zaman sünnət edilir, ya da çox gecikdirilib, məktəb yaşlarına qədər uzadılır. Mən öz praktikamda 27 yaşlı kişini sünnət etmişəm. Bu, doğru deyil. Amma bundan başqa, anadangəlmə anomaliyalar var ki, sidik kanalı aşağıda olur, bunlar istisna hal hesab edilir. Uşaqlara narahatlıq yaratsa da, onun erkən aylarda əməliyyat olunması məsləhət deyil.

Tibdə məsləhət görülür ki, 5-6 yaşdan tez müdaxilə olunmasın. Bu müddət ərzində cinsiyyət orqanı formalaşır və əməliyyatın nəticəsi uğurlu olur. Amma erkən yaşlarda əməliyyat olunan zaman sidik kanalı kiçilir və sidik ifrazı zamanı problem yaranır.

Lazer üsulu ilə damarların yandırılaraq sünnət edilməsi doğru deyil. O şüa azyaşlıların xayalarında gedən prosesi ləngidir. Bu isə gələcəkdə sonsuzluq riskini artırır. Sperm sayının azalmasına səbəb olur. O baxımdan, sünnət valideynlərin hesab etdiyi qədər də asan proses deyil. Onun səliqəli kəsilib, səliqəli tikilməsi məqsədəuyğundur”. “Mən, demək olar ki, toplu sünnət prosedurlarını yerinə yetirmişəm. Bir gündə 20-30 uşağı sünnət etmişəm. Mən qoruyucu “zajim” dediyimiz qurğu ilə əməliyyat edirəm. Sünnət steril şəraitdə saxlanılan və bir dəfə istifadəyə yararlı olan soyuq cərrahi bıçaqla aparılır. Bu zaman heç bir qorxusu olmur.

40 ildən çoxdur bu işi görürəm və bilirəm ki, lazer üsulu nə qədər risklidir. Bu gün edilən əməliyyat zamanı uşağa dəyən ziyan özünü 20 il sonra ağır xərçəng xəstəliyi ilə büruzə verə bilər. Odur ki valideynlər diqqətli olsunlar. Pul xətrinə uşaqların gələcəyi ilə oynamaq olmaz”.

Milli Məclisin deputatı, iş adamı Əsabil Qasımovun dünən İsveçrədə qış turizm mərkəzində xizək sürərkən vəfat edən oğlu 29 yaşlı Elçin Qasımovun nəşinin Azərbaycana gətirilməsi istiqamətində iş görülür.

Median.Az publika.az-a istinadən xəbər verir ki, millət vəkilinin oğlunun nəşinin Azərbaycana gətirilməsi üçün aidiyyəti qurumlarla iş aparılır. Artıq Əsabil Qasımovun böyük oğlu Taleh Qasımov cənazənin gətirilməsi üçün İsveçrəyə yola düşüb.

Bildirilir ki, Elçin Qasımov bir neçə gün əvvəl Avropa ölkələrinə səyahətə çıxıb və İsveçrədə Alp dağlarında xizək sürərkən bədbəxt hadisə ilə üzləşib. O, atasının sahibi olduğu və baş ofisi Murtuza Muxtarov küçəsində yerləşən “Karat Holding”də şöbə müdiri vəzifəsində çalışırmış.

Qeyd edək ki, Əsabil Qasımov 79 saylı İmişli seçki dairəsindən deputat seçilib. O, Milli Məclisin İqtisadi siyasət, sənaye və sahibkarlıq komitəsinin üzvüdür.

Şəkinin Cəfərabad kənd sakini Xəyal Qurbanəliyev nümunəvi addımı ilə gündəmə gəlib.

Median.Az-in DTV-nin “Bu gün” proqramına istinadən məlumatına görə, Şəkinin Cəfərabad kənd sakini Xəyal Qurbanəliyev keçən il noyabrın 24-də işlədiyi mərkəzi bazarın yaxınlığındakı ərzaq mağazasında malları səliqəyə salarkən orada düyüncəyə bükülmüş xeyli miqdarda pul tapıb.

Pulun hansı müştəri tərəfindən unudularaq qaldığını və pulun gəlib aparacağını zənn edərək bir aya yaxın axtarış etsə də, hələ də pul sahibi gəlib çıxmayıb. Müştərinin pul itirdiyi yeri bilmədiyini zənn edən Xəyal Qurbanəliyev hamıya nümunə olacaq addım atıb. O, televiziyaya müraciət edərək pulun sahibinin tapılmasında köməklik etməyə xahiş edib.

Nəvəsinin təhsil haqqısı üçün uzun müddət yığdığı 520 manatın doğrudan da harada itdiyini bilməyən Şəki rayonu Dəhnə kənd sakini Arzu Valehova bu pulu itirdiyi üçün çıxılmaz vəziyyətə düşdüyünü qeyd edib və xeyirxah əməlinə görə X. Qurbanəliyevə təşəkkürünü sevinc göz yaşları ilə bildirib.

Xəyal Qurbanəliyevin hamıya nümunə ola biləcək bu hərəkəti bütün həmkarlarının alqışlarına, yarmarkada ümumxalq sevincinə səbəb olub.
//Baku.ws

Sabunçu rayonunun icra başçısı Adil Vəliyev ötən ilin martın 27-də yol süpürən zaman yük maşını tərəfindən vurularaq həlak olan Cəmilə Salahovanın azyaşlı qızları üçün ev tikdirib.

Median.Az musavat.com-a istinadən xəbər verir ki,  anası sağ olarkən illərlə kirayələrdə yaşayan Zümrüd və Lalənin artıq yeni, təmirli, işıqlı evi var.

Qızlar bu evdə ana əvəzi kimi gördükləri xalaları Tünzalə Salahovanın himayəsində yaşayırlar. İndi evləri daha genişdir, dərslərini rahatlıqla hazırlaya bilirlər.

Söhbət əsnasında bəlli oldu ki, hazırda bu ailə rayon icra hakimiyyətinin diqqətindədir, evlə bağlı yaranan hər hansı problemdə, yarımçıq qalan işlərin davam etdirilməsində onlara diqqət və qayğı ilə yanaşılır. Tam təmirli, mbel və əşyalarla təmin olunmuş ev iki otaq, bir mətbəx və geniş dəhlizdən ibarətdir. Həmçinin geniş həyətyanı sahəsi də var.

Tünzalə Salahova azyaşlı qızların mənzillə təmin olunmasına görə bir daha mətbuat vasitəsilə millət vəkili Qənirə Paşayevaya və Sabunçu rayon icra başçısı Adil Vəliyevə təşəkkürünü çatdırdı: “Belə bir gözəl şəraitli ev tikib bizə verdikləri üçün onlara çox minnətdaram. Adil müəllim, bu müddət ərzində bizim problemlərimizlə maraqlanıb, evin tikilib başa çatdırılması üçün göstəriş verib. Bu bizim üçün böyük bir hədiyyədir. Həyatımız boyu özümüz işləyib belə bir ev tikə bilməzdik, 1 otaqlı kirayə daxmaya isə ödəməyə pulumuz belə yox idi. İndi tək dərdim bu uşaqların dolanışığıdır. Dövlətdən qızların hərəsinə 65 manat müavinət verilir. Bir də özüm süpürgəçilik edib qazanıram, birtəhər dolanırıq”.

İndi Tünzalə xanımı narahat edən əsas uşaqların himayəsi ilə iş məsələsinin bir-birilə uzlaşmamasıdır: “Qızları hər gün oxuduqları 148 nömrəli məktəbə aparıram, dərsləri ayrı- ayrı vaxtlarda bitdiyi üçün iki dəfə onları gətirmək üçün eyni yolu gedirəm. Piyada təxminən 20-25 dəqiqəlik yoldur. Avtobusa verməyə pulumuz olmadığından hər gün piyada gedirik. Elə yaşdadırlar ki, evdə onlara nəzarətsiz qoyub işə gedə bilmirəm. Mən də süpürgəçiyəm, yol süpürürəm, səhər tezdən işdə olmalıyam. Rəhbərlik isə uzun müddətdir ki, güzəşt edir, ancaq artıq seçim etməliyəm. Ya işdən çıxıb uşaqlara baxmalı, ya da onları nəzarətsiz qoyub işə çıxmalıyam. Evdə otursam bir tikə çörəyə də həsrət qalacam, heç bir əlavə gəlirimiz yoxdur. Qızları isə bu yaşda yola tək buraxa bilmərəm, məktəbə getdikləri yolda nəqliyyat sürətlə hərəkət edir, çox təhlükəlidir. Qorxuram ki, bir gün anaları kimi onları da maşın vura bilər. 56 yaşım var, pensiya yaşıma da hələ 9 il qalıb. Mərhum bacımın aylıq maaşı bu uşaqlara təyin olunsa, mən də oturub onların qayğıları ilə məşğul ola bilərdim”.

Vətəndaşların Əmək Hüquqlarını Müdafiə Liqasının sədri Sahib Məmmədov məsələ ilə bağlı açıqlamasında bildirdi ki, mərhum Cəmilə Salahovanın aylıq əmək haqqı yetkinlik yaşına çatana qədər hər ay azyaşlı qızlarına ödənilməlidir: “Əgər valideyn əmək müqaviləsi ilə işləyirsə, bədbəxt hadisələrdən icbari sığorta olunubsa, həmin sığorta şirkəti uşaqlar yetkinlik yaşına çatana qədər, əgər ali təhsil alarlarsa, həmin dövrdə də mərhumun aylıq maaşının 100 faizi həcmində hər ay sığorta pulu ödənilməlidir. Əgər sığorta olunmayıbsa, o zaman bu pulu işəgötürən ödəməlidir. Yox əgər əmək müqaviləsi də yoxdursa, o zaman məhkəməyə verilə bilər və məhkəmə qaydasında işəgötürən hər ay həmin vəsaiti uşaqların hesabına köçürə bilər. Həmin qadının əmək müqaviləsi var imişsə, həmin vəsait ödənilməlidir. Əks halda məhkəmə qərarı ilə bunu bərpa etmək olar. Hətta qərarın geriyə də qüvvəsi var və almadığı müddəti də hesablanıb ödənilməlidir”.

Bəzi Avropa İttifaqı ölkələrində zəngin xaricilərə pasportların və vizaların satılması ilə bağlı tətbiq olunan proqramlar mütəşəkkil cinayətkar qruplaşmaların blok ərazisində çiçəklənməsi və çirkli pulların yuyulması, korrupsiya və vergidən yayınma ilə bağlı riskləri artıra bilər. Bu barədə Avropa Komissiyasının 24 səhifəlik hesabatında deyilir. Komissiya yaranmış vəziyyətlə bağlı “həyəcan təbili” çalıb.

Median.Az xəbər verir ki, bununla bağlı “Reuters”də məqalə dərc olunub.

Hesabata görə, hazırda Avropa İttifaqında çoxmilyardlıq “investisiya miqrasiyası” hesabına zəngin insanlar bu Avropa ölkələrində vətəndaşlıq və ya daimi yaşayış hüququnu satın ala bilir. Bu sxemlər leqal olsa da, bəzən qeyri-şəffaf şəkildə aparılır, və pasport və ya vizanı əldə etməyə çalışan şəxsin bioqrafiyası lazımi səviyyədə yoxlanılmır.

Avropa İttifaqında Malta, Kipr və Bolqarıstan kimi ölkələr 1-2 milyon avro investisiya müqabilində xarici ölkə vətəndaşlarına “qızıl pasportlar” satır.

12 Avropa İttifaqı ölkəsi isə o qədər də böyük məbləğdə olmayan yatırımlar müqabilində xaricilərə “qızıl viza” və daimi yaşayış hüququnu satır. Misal üçün, Xorvatiyada bunun üçün minimal investisiya məbləği 15 min avrodur, Lüksemburq və Slovakiyada isə azı 5 milyon avro tələb olunur.

Məqaləyə əsasən, keçmişdə bu mexanizmin olmaması ucbatından bu gün Britaniyada “rəngarəng keçmişi” olan xarici vətəndaşlar yaşayıb. Zamira Hacıyevanın işi ilə bağlı qalmaqal buna misal göstərilir.

“Rəngarəng keçmişi olan “investorların” Britaniyada “qızıl viza” almasına dair ortada açıq-aşkar sübut var. Oktyabr ayında Britaniyada ilk dəfə olaraq korrupsiyaya görə həbs olunmuş azərbaycanlı bankirin həyat yoldaşı Zamirə Hacıyevaya qarşı “İzaholunmaz Sərvət haqqında Order”in tətbiqi, sonuncunun 2010-cu ilə Britaniyaya “investor viza”si ilə gəldiyini sübuta yetirib.

“Britaniyada “mənşəyi məlum olmayan sərvətə order”in ilk dəfə 2018-ci ildə “Azərbaycan Beynəlxalq Bankı”nın sabiq rəhbəri Cahangir Hacıyevin həyat yoldaşı Zamirə Hacıyevaya qarşı istifadə olunması göstərdi ki, o, 2010-cu ildə Böyük Britaniyaya “investor vizası” ilə gəlib”, – deyə “Reuters”də dərc olunan məqalədə deyilir.