30 yaşlı Nikola Qanbi sosial şəbəkə tətbiqi ilə tənha insanları bir araya gətirməyi hədəfləyir. O, indiyə qədər 646 min dollar investisiya toplayaraq, yeni nəsil “Facebook” ola biləcək bir platforma yaratmağa çalışır.
Tənhalıq problemi və yeni sosial şəbəkə ideyası
Qaynarifno xəbər verir ki, pandemiyadan sonra Londona köçən Nikola Qanbi burada dost çevrəsinə sahib olmağın çətin olduğunu hiss edib. İngiltərənin Nottingem şəhərindən olan və bir müddət Avstraliyada yaşayan Qanbi 2021-ci ildə ortağı Ceyson İliflə birlikdə Londona köçüb.
Qanbi və İlif şəhərin sosial həyatına tez uyğunlaşacaqlarını düşünsələr də, insanlarla tanış olmağın çətinliyini anlayıblar. Qanbi bu vəziyyəti belə ifadə edib:
“Milyonlarla insanın yaşadığı bir şəhərdə olmaq, amma həqiqi bir bağ qura bilməmək necə mümkündür?”
O, müxtəlif yolları sınayıb: qadın sahibkarlar üçün təşkil olunan tədbirlərdə iştirak edib, lakin bu görüşləri çox rəsmi hesab edib. Hətta Bumble BFF kimi dostluq qurmağa kömək edən tətbiqlərə də baxıb, ancaq Facebook qruplarını “dəbdən düşmüş” və çox funksional olmayan platformalar kimi görüb.
Daha sonra Qanbi və İlif problemin fərdi deyil, qlobal olduğunu anlayaraq insanları real həyatda bir araya gətirən sosial platforma yaratmaq ideyası üzərində işləməyə başlayıblar.
Onlar bir tətbiq agentliyi ilə əməkdaşlıq edərək ilk versiyanı hazırlayıb universitetlərdə sınaqdan keçiriblər.
“Cliq” – sosial medianın “əksi” olan platforma
Fevral 2023-cü ildə təsis edilən “Cliq” ənənəvi sosial media platformalarına alternativ kimi təqdim olunur. İstifadəçilər maraq sahələrinə uyğun icmalara qoşula bilirlər. Məsələn, qaçış, oxu, pilates və ya dini mövzularda qruplar mövcuddur.
İcma üzvləri real həyatda görüşlər təşkil edərək yeni dostluqlar qurmağı hədəfləyir.
Qanbi tətbiqin məqsədini belə izah edir:
“Bu, insanlarla daha orijinal şəkildə tanış olmağı asanlaşdırır və insanlara telefonlarını bir kənara qoymağı öyrədir. Hazırda ekran vaxtımızın çox yüksək olduğu bir dövrdə bu, olduqca çətindir”.
Lansmandan bəri 528.900 funt-sterlinq (təxminən 646 min dollar) investisiya toplayan “Cliq” 100 min istifadəçiyə çatıb. Şirkətin əsas bazarları Böyük Britaniya ilə yanaşı ABŞ, Avstraliya və Balidir.
Yalnızlıq – qlobal problem
“Cliq”in yaradılması, dünyanın müxtəlif yerlərində “yalnızlıq pandemiyası” adlandırılan vəziyyətin yayılması ilə əlaqədardır.
“Gallup”un 2023-cü ildə keçirdiyi qlobal yalnızlıq sorğusuna görə, respondentlərin beşdə biri günün çox hissəsində özünü tənha hiss etdiyini bildirib. Eyni zamanda, bu insanlar daha çox qəzəb və fiziki ağrı hiss etdiklərini də etiraf ediblər.
ABŞ-ın Baş Cərrahı Vivek Murthi 2023-cü ildə dərc etdiyi “Yalnızlıq və İzolyasiya Pandemiyamız” adlı hesabatda yalnızlığın demans, insult və hətta erkən ölüm kimi sağlamlıq problemlərinə yol aça biləcəyini vurğulayıb.
Qanbi də bu problemin sosial media tərəfindən daha da dərinləşdirildiyini düşünür:
“Telefonlarımız sayəsində özümüzü bağlı hiss edirik, çünki dostlarımızın və ya fenomenlərin nə etdiyini daim izləyirik. Amma bu insanlarla həqiqətən görüşmürük. Bu, bizi səthi bağlılıq hissi ilə aldadır. Əslində, həqiqi sosial əlaqələrimiz yoxdur”.
“Gerçək sosial şəbəkə” yaratmaq hədəfi
Qanbi bildirir ki, “Cliq”in uğuru, istifadəçilərin ortaq maraq və məqsədlər ətrafında birləşməsindən qaynaqlanır. O, sosial şəbəkə tətbiqləri ilə sosial media tətbiqləri arasında fərqi belə izah edir:
“Sosial şəbəkə – dostlarla əlaqə qurmaq, sosial media isə sadəcə məzmun istehlak etmək üçündür. Facebook-un əvvəlki versiyası buna misal ola bilər. Ancaq o dövrdən sonra bütün platformalar sosial mediaya çevrildi – Instagram, TikTok kimi. Biz sadəcə oturub məzmun istehlak edirik, telefonlarımızdan asılı vəziyyətə düşürük. Əslində heç kimlə sosiallaşmırıq və bu, real həyatda qarşılıqlı əlaqəni azaldır”.
“Cliq” “Facebook”un yeni versiyası ola bilərmi?
Gənc sahibkar yalnızlığı aradan qaldırmaq və insanları real dünyada bir araya gətirmək üçün “Cliq”i yaradıb. Onun fikrincə, bu platforma sosial mediadan fərqli olaraq, həqiqi dostluqlar qurmağa və ünsiyyətə kömək edəcək.
Hələlik layihə inkişaf mərhələsində olsa da, 700 min dollara yaxın investisiya toplaması və qlobal bazarda 100 min istifadəçiyə çatması, onun uğur qazana biləcəyini göstərir.
Bəs bu, “Facebook”un yeni versiyası ola bilərmi? Bu sualın cavabını zaman göstərəcək.
