“Neftçi” Sloveniya toplanışını “Spartak” üzərində qələbə ilə başa vurdu

Növbəti mövsümün hazırlıqlarını davam etdirən “Neftçi” sonuncu yoxlama oyununu keçirib.

Samir Abasovun yetirmələri Moskva “Spartak”ı ilə üz-üzə gəliblər.

Avstriyanın Fillax şəhərindəki “Sportzentrum Landskron”da keçirilmiş görüş Azərbaycan təmsilçisinin 2:1 hesablı qələbəsi ilə yekunlaşıb.

“Ağ-qaralar”ın qollarını 8-ci dəqiqədə Namik Ələskərov, 45+2-ci dəqiqədə isə yeni transfer Harramiz Soares vurub. Moskva təmsilçisinin qoluna isə 44-cü dəqiqədə Mixail İqnatov imza atıb.

Qeyd edək ki, təlim-məşq toplanışını Sloveniyanın Kranyska Qora bölgəsində keçirən “Neftçi” iyunun 21-də yerli “Olimpiya” ilə 1:1 hesablı heç-heçə edib, iyulun 24-də isə “Domjale”yə 1:2 hesabı ilə uduzub.