Month: August 2019

Biləsuvar rayonunda bacısı ilə intim münasibətdə olan həmyerlisini öldürməkdə təqsirli bilinən Yardımlı rayon sakini, 1975-ci il təvəllüdlü Əli Süleymanovun cinayət işi üzrə məhkəmə prosesi başa çatıb.

Median.Az Publika.az-a istinadən xəbər verir ki, Əli Süleymanovun bacısı Ramilə ailəli olub (cinayət işində adı keçən şəxslərin ad və soyadları şərti verilib – red.), amma hadisədən bir müddət əvvəl ərindən ayrılıb.

Bacısından sevgilisindən ayrılmasını tələb etdi

Ramilə atası Samir və anası Tamara ilə birlikdə Biləsuvar rayonu Xırmandalı kəndi ərazisində yerləşən “Muğan Qışlaq” otlaq sahəsində çoban yatağında yaşayıb.

Əli Süleymanov “Muğan-Qışlaq” otlaq sahəsindəki digər çoban yatağında yaşayan Natiq Səmədov ilə bacısının intim münasibətlərdə olmasını eşidib. Əli dəfələrlə onlardan münasibətlərinə son qoymalarını tələb edib. Amma onlar Əlinin bu tələbinə əhəmiyyət verməyiblər, görüşməkdə davam ediblər.

Əli Süleymanov 25 dekabr 2016-cı il tarixdə, saat 15 radələrində yaşadığı Bakı şəhərindən “Muğan-Qışlaq” otlaq sahəsinə gəlib. Orada yaşayan qohumu Rasimin Məşhəd ziyarətindən qayıtması münasibətilə təşkil olunmuş məclisdə iştirak edib.

Bacısının evdən çıxdığını gördü

Sonra o, axşam saat 20 radələrində valideynlərinin yaşadığı çoban yatağına gəlib. Həmin gecə Əli atası, anası, bacısı və onlarda qonaq olan xalası Rəsmiyyə ilə bir alaçıqda yatıb.

Ertəsi gün, səhər saat 06.30-da Əli bacısı Ramilənin evdən çıxdığını bilib. Onun Natiq ilə görüşə getdiyi və onların bir yerdə olduğunu başa düşüb. Əli onların münasibətlərinə son qoymaq üçün Natiqi öldürmək qərarına gəlib.

Bacısını otlaqda tutdu

Bu məqsədlə Əli evdən bıçaq götürüb və Natiqin valideynləri ilə yaşadığı, təxminən 2000 metr aralıdakı evə gedib. O, təqribən 470 metr məsafə qət etdikdən sonra saat 06.45-də Natiqin bacısı Ramilə ilə otlaq sahəsində söhbət etdiklərini görüb.

Bu zaman Əli onlara yaxınlaşaraq Natiqi söyüb, bıçaqla onun döş qəfəsinə bir neçə xəsarət yetirib. Ürək nahiyəsindən xəsarət alan Natiq hadisə yerində ölüb.

13 il cəza, ciddi rejim

İstintaq orqanı tərəfindən Əli Süleymanovun barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham elan olunub.
Lənkəran Ağır Cinayətlər Məhkəməsinin hökmü ilə Əli Süleymanov 13 il müddətinə azadlıqdan məhrum edilib. Onun cəzası 2016-cı il dekabrın 27-dən hesablanıb. Əli Süleymanovun cəzasını ciddi rejimli cəzaçəkmə müəssisəsində çəkməsi qərara alınıb.
Hökmdən narazı qalan Əli Süleymanov apelyasiya şikayəti verib. O, əsassız olaraq Cinayət Məcəlləsinin 120.1-ci maddəsi ilə məsuliyyətə cəlb olunduğunu deyib.

O, qeyd edib ki, Natiq Səmədovu qətlə yetirməyib. O, bu səbəbdən barəsində bəraət hökmünün çıxarılmasını xahiş edib.

Bəraət şikayəti rədd edildi

Bundan başqa, hökmdən narazı qalan Natiq Səmədovun da anası apelyasiya şikayəti verib. Hüquqi varis təqsirləndirilən şəxsin cəzasının ağırlaşdırılmasını istəyib.

Hər iki tərəfin şikayətinə Şirvan Apelyasiya Məhkəməsində baxılıb. Apelyasiya şikayətinin dəlillərini araşdıran hakim heyəti sonda qərar elan edib. Qərara əsasən, şikayət təmin olunmayıb.

Bu qərardan narazı qalan Əli Süleymanov kasasiya şikayəti verib. Onun kasasiya şikayəti araşdırılması üçün Ali Məhkəməyə göndərilib.
Hakim Hafiz Nəsibovun sədrliyi ilə araşdırma aparılıb. Kasasiya şikayətini araşdıran hakim heyəti sonda qərar elan edib. Qərara görə, kasasiya şikayəti təmin olunmayıb.

Qeyd edək ki, bundan bir müddət əvvəl də Ali Məhkəmədə Əli Süleymanovun şikayəti əsasında məhkəmə qurulmuşdu. Həmin vaxt aparılan araşdırma zamanı Əli Süleymanov saxlanıldığı Penitensiar Xidmətin 15 saylı Cəzaçəkmə Müəssisəsində hakimi Hafiz Nəsibovun adına məktub göndərib.

Həmin məktubunda Əli Süleymanov kasasiya şikayətini geri götürdüyünü göstərib. O, kasasiya şikayətinə baxılmadan icraatdan çıxarılmasının təmin olunmasını hakimdən xahiş edib.

Xəbər verdiyimiz kimi, ötən gün yeni Ələt-Astara yolunun Biləsuvar rayonu ərazisindən keçən hissədə ağır yol qəzası nəticəsində 2 nəfər ölüb, 1 nəfər isə yaralanıb.

Median.Az-ın məlumatına görə, sözügedən hadisə ilə bağlı fikirlərini bölüşən yol təhlükəsizliyi məsələləri üzrə ekspert Ərşad Hüseynov həmin yolda tez-tez belə ağır qəzaların baş verməsinin əsas səbəbi kimi süni işıqlandırmanın olmamasını göstərib.

“Diqqət edirsinizsə, ağır hadisələrin mütləq əksəriyyəti qaranlıq vaxtı baş verir. Əsas səbəb də bununla bağlıdır. Yolda süni işıqlandırma yoxdur, yüksək sürətlə intensiv qarşılıqlı hərəkət var (demək olar ki, hər zaman qarşı hərəkət hissəsi ilə avtomobil gəlir)”, – Hüseynov sosial şəbəkə hesabında qeyd edib.


O, bu şəraitdə iki ciddi problemin yarandığını bildirib:

“1) sürüclərin bəziləri yaxın işıqdan istifadəyə məcbur olduğuna görə zəruri məsafəni görə bilmir, orada olan istənilən maneə (dayanan avtomobil, hətta azacıq döngələrdə qoruyucu sədlər və s.) sürücü üçün görünməz olur. Yaxın işığın düşdüyü məsafədə həmin maneəni görən sürücünün manevr imkanı ya olmur, ya da sərt manevr edərək qəzaya uğrayır;
2) xeyli sürücü qarşıdan gələnlərə məhəl qoymadan uzaq işıqla sürür. Bu halda uzaq işıq gözünə düşən sürücü praktiki olaraq heç nəyi görmür, qarşıda gözlənilməz maneəyə və ya döngələrdə ayırıcı zolaqdakı və ya yolkənarı qoruyucu səddə çırpılır”.

Hüseynov problemi aradan qaldırmaq üçün bir neçə təklif irəli sürüb:

“1) Ləngitmədən həmin yol tam işıqlandırılmalıdır. Müsair az enerji sərf edən, hətta alternativ enerjidən istifadə edən işıqlandırma sistemi yaradılmalıdır;

2) Bütün yol boyu nişanlanma xətləri müasir işıqqaytarıcı boyalarla işlənməlidir, özü də hərəkət hissələrinin kənarları avtomagistral üçün nəzərdə tutulan 1.2 xətti ilə işarələnməlidir. Ayırıcı zolaqdakı və kənarlardakı qoruyuci sədlər isə standarta uyğun işıqqaytarıcı elementlərlə (üçbucaqlı bayraqçıqlarla) təmin edilməlidir”.

Ekspert sürücülərə bunları tövsiyə edib:

“1) 5.1 nişanına və üzərində “110-120” yazılan 3.24 nişanına aldanıb çox yüksək sürətlə sürməsinlər (xüsusən qaranlıqda), görünmə şəraitinə uyğun sürət seçsinlər;
2) İşıq cihazlarından düzgün istifadə etsinlər, digər sürücülərə hörmət edərək, qarşıdan gələnlər varsa, qaydalara uyğun olmaqla uzaq işıqdan istifadə etməsinlər”.

90-cı illərin məşhur Amerika cizgi filmlərinin yaradıcısı, ssenarist Qordon Bressak ABŞ-da dünyasını dəyişib. Median.Az qafqazinfo-ya istinadən xəbər verir ki, o, 68 yaşında Los-Anceles şəhərində vəfat edib.

Bressakın ölüm xəbərini oğlu Ceyms Kallen Bressak sosial şəbəkə hesabında verib. O, atasına onda hekayə və filmlərə yaratdığı sevgiyə görə minnətdarlığını bildirib.

Amerika KİV yazır ki, multiplikator uzun sürən xəstəlikdən sonra dünyasını dəyişib.

Qeyd edək ki, Qordon Bressak üç dəfə “Emmi” mükafatına layiq görülüb. O, “Pinki və Breyn”, “Qara Plaş”, “Cimmi Neytronun macəraları”, “Smurfiklər”, “Qüdrətli Maks” və s. məşhur cizgi filmlərinin ssenari müəlliflərindən biri olub.

Nəsimi rayonunda bədbəxt hadisə baş verib.

Median.Az xəbər verir ki, Şamil Əzizbəyov küçəsində 1987-ci il təvəllüdlü Həsənov Vüsal Akif oğlu binadan yıxılaraq ağır xəsarət alıb.

Yaralı ağır vəziyyətdə xəstəxanaya çatdırılaraq reanimasiya şöbəsinə yerləşdirilib.

Ona qapalı kəllə-beyin travması diaqnozu qoyulub. Vəziyyəti ağır qiymətləndirilir.

İlkin məlumata görə, V.Həsənov binanın fasadını təmir edərkən yıxılıb.

Faktla bağlı Nəsimi Rayon Polis İdarəsində araşdırma aparılır.//oxu.az