Month: November 2019

“Bu gün Azərbaycan Milli Məclisi müstəqillik tariximizin nailiyyətlərindən biri sayılan İnsan Hüquqları üzrə Müvəkkil institutunun həyatında növbəti əhəmiyyətli addımı atdı”.

Median.Az modern.az-a istinadən xəbər verir ki, bu fikirləri Milli Məclisin sədr müavini Bahar Muradova bildirib.

B.Muradovanın qənaətinə görə, dönəm etibarı ilə üçüncü, Ombudsman olaraq isə ikinci seçimi təsdiq edilib:

“Uzun illərin təcrübəsi üzərinə enerji, dinamizm və yeni nəfəs gəldi.

Deməli, varisliyə əsaslanan inkişaf üçün hər şey var.

Çox hörmətli Elmira xanıma, Azərbaycan Respublikasının ilk Ombudsmanına dərin minnətdarlığımı bildirir, Səbinə xanıma isə uğurlar arzulayıram”.

Azərbaycan Respublikasının Prezidenti cənab İlham Əliyevin tapşırığına əsasən, mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq, Daxili İşlər naziri, general-polkovnik Vilayət Eyvazov noyabrın 29-da Sumqayıt şəhərində daxili işlər orqanlarının fəaliyyətinə və səlahiyyətinə aid məsələlərlə əlaqədar növbəti qəbul keçirib.

DİN-dən verilən məlumata görə, Daxili İşlər naziri əvvəlcə şəhərin mərkəzində, ulu öndərin adını daşıyan parkda ümummilli lider Heydər Əliyevin abidəsini ziyarət edərək əziz xatirəsini böyük hörmət və ehtiramla yad edib, önünə gül dəstəsi qoyub.

Daha sonra Şəhər Polis İdarəsində Sumqayıt da daxil olmaqla respublikanın Abşeron, Qobustan, Qubadlı, Zəngilan şəhər və rayonlarından, eyni zamanda, həmin bölgədə məskunlaşmış qaçqın və məcburi köçkünlərdən müraciət edən 28 nəfər ilə görüşən nazir onların polis orqanlarının fəaliyyəti ilə bağlı müraciətlərini şəxsən dinləyib, problemlərinin operativ şəkildə, mövcud qanunvericiliyə uyğun həlli üçün Nazirliyin aidiyyatı baş idarə və xidmət rəislərinə konkret tapşırıqlar verib. Müraciətlərin böyük əksəriyyəti elə yerindəcə öz həllini tapıb.

Sakinlər göstərilən diqqət və qayğıya, bölgələrdə mütəmadi olaraq vətəndaşların qəbulunun təşkilinə, icra orqanlarının rəhbərləri tərəfindən müraciətlərinə operativ münasibətə və həssas yanaşılmasına görə dövlətimizin başçısına minnətdarlıq edib, onun ölkəmizin tərəqqisinə, iqtisadi dirçəlişinə, beynəlxalq imicinin daha da yüksəldilməsinə yönəlmiş siyasətini daim dəstəkləyəcəklərini bildiriblər.//oxu.az

Hesablama Palatasının növbəti Kollegiya iclası keçirilib.

Qaynarinfo quruma istinadən xəbər verir ki, iclasda Azərbaycan Dövlət Neft Fondunun 2020-ci il üçün büdcəsinin layihəsinə verilmiş rəy müzakirə olunub.

Rəydə Fondun büdcə layihəsi, habelə vəsaitinin 2020-ci ildə istifadəsinin əsas istiqamətləri (proqramı) və Fondun 2020-ci ildə idarə edilməsi ilə bağlı xərclər smetasının layihələri məqbul hesab edilib, onların təsdiq edilməsi barədə müvafiq fərman layihəsinin Fondun Müşahidə Şurasına təqdim edilməsi üçün quruma göndərilməsi tövsiyə olunub.

Kollegiya iclasında həyata keçirilmiş aşağıdakı nəzarət tədbirləri üzrə auditor hesabatları da müzakirə olunub:

Vergilər Nazirliyinin 12 saylı Ərazi Vergilər Baş İdarəsində inzibatçılığın təşkili vəziyyətinə dair;

Sabunçu Rayon İcra Hakimiyyətinə dövlət büdcəsindən ayrılan vəsaitlərin istifadəsinə dair;

Mədəniyyət Nazirliyinin 2017-2018-ci illər üzrə maliyyə hesabatlarına dair.

Kollegiya iclasında nəzarət tədbirləri üzrə auditor hesabatları barədə müvafiq qərarlar qəbul olunub. Nəzarət tədbirlərinin nəticələri üzrə qərarların icrasını təmin etmək məqsədilə aidiyyəti qurumlara kollegiya qərarlarının və auditor hesabatlarının göndərilməsi, Milli Məclisə müvafiq məlumatın təqdim olunması qərara alınıb.

İclasda həmçinin İş Planı ilə nəzərdə tutulmuş bir kənar dövlət maliyyə nəzarəti tədbiri ilə bağlı proqram müzakirə olunaraq təsdiq edilib, bir kənar dövlət maliyyə nəzarəti tədbiri ilə bağlı proqramda dəyişiklik edilməsi, Hesablama Palatası Kollegiyasının 2019-cu il 11 oktyabr tarixli, Q-137 nömrəli Qərarı ilə təsdiq edilmiş “Hesablama Palatası tərəfindən inzibati xətalar haqqında işlər üzrə icraatın aparılması Qaydaları”nın qəbul edilməsi ilə əlaqədar olaraq Palatanın digər metodiki sənədlərinin həmin Qaydalara uyğunlaşdırılması üzrə məsələlər, eləcə də “Kollegiya Qərarlarının və auditor hesabatlarının hüquqi təhlili üzrə Arayış”ın layihəsi müzakirə olunaraq təsdiq edilib.

Bakı Metropolitenin “Gənclik” stansiyası bağlandı.

Median.Az qaynarinfo-ya istinadən xəbər verir ki, modern.az-ın hadisə yerində olan əməkdaşının verdiyi məlumata görə, “Gənclik” metrostansiyasına sərnişinlərin daxil olması məhdudlaşdırılıb. Stansiyada həddindən artıq sərnişin sıxlığı olduğu üçün, insanların platformaya daxil olması çətinləşib.

Qax rayonunda 73 yaşlı piyadanı avtomobil vurub.

“Report”un məlumatına görə, hadisə bu gün axşam saatlarında şəhərin Heydər Əliyev prospektində qeydə alınıb.

Belə ki, Qax rayon sakini, 1946-cı il təvəlludlü İbrahimxəlil Məcidovu yolu keçmək istəyərkən “Mercedes” markalı avtomobil vurub. Yaralı Qax Rayon Mərkəzi Xəstəxanasına yerləşdirilib.

Faktla bağlı araşdırma aparılır.