Month: December 2019

Milli Məclis fəaliyyətini davam etdirsə də, qanun və qərar qəbul etmək üçün yeni seçkilərə qədər yığışmayacaq.

Bunu Milli Məclis Aparatının rəhbəri Səfa Mirzəyev jurnalistlərə açıqlamasında bildirib.

O deyib ki, Konstitusiya Məhkəməsinin qərarına qədər deputatların xarici səfərləri müvəqqəti dayandırılmışdı:

“Artıq Konstitusiya Məhkəməsinin qərarı var. Bu yaxınlarda Avropa Şurasının və digər beynəlxalq təşkilatların yığıncaqları olacaq və həmin iclaslara Milli Məclisin üzvləri gedəcək. Dekabrın 18-də Bakıda Türkdilli Ölkələrin Parlament Assambleyasının iclası keçirilməlidir. Sadəcə, parlamentin qanun və qərar qəbul etməklə əlaqədar plenar iclasları keçirilməyəcək. Yeni qanunları 6-cı çağırış parlament qəbul edəcək”.

Daxili İşlər Nazirliyi Yevlaxda polisin qohumunun qız qaçırması məsələsinə münasibət bildirib.

DİN-dən oxu.az-ın sorğusuna cavab olaraq bildirilib ki, sosial şəbəkələrdəki səhifələrin birində – “Yevlaxın Rüstəmli kəndində iki gün öncə bir qızı zorla qaçırıblar. Polisə müraciət ediblər, oğlanın qohumu polisdə işləyir deyə işə baxmırlar”, – qeyd edilən status həqiqəti əks etdirmir və polisin nüfuzunu ləkələmə məqsədi daşıyır:

“Bununla əlaqədar DİN-in Mətbuat Xidmətinin Bərdə regional qrupundan verilən məlumata görə, dekabrın 1-də Yevlax rayon Rüstəmli kənd sakini Ə.A. DİN-in “102 Zəng Mərkəzi” Xidmətinə və Yevlax Rayon Polis Şöbəsinə müraciət edərək qızının Qaraməmmədli kənd sakini olan bir nəfər tərəfindən qaçırılması barədə şikayət ünvanlayıb.

Həmin gün şikayətlə əlaqədar Yevlax RPŞ-nin əməkdaşları tərəfindən araşdırmalara başlanılıb”.

“Aparılmış araşdırmalar nəticəsində dekabrın 2-də həmin qız tapılaraq, onun izahatı alınıb və o zorla deyil, könüllü olaraq həmin şəxslə ailə quracağını bildirib.

Bununla belə, toplanmış materiallara hüquqi qiymət verilməsi üçün Yevlax Rayon Prokurorluğuna verilib”, – deyə DİN-dən qeyd edilib.

Müdafiə Nazirliyi Göyçayda evin həyətinə düşən bağlama barədə məsələyə münasibət bildirib.

MN-dən oxu.az-ın sorğusuna cavab olaraq bildirilib ki, atmosferin meteoroloji vəziyyətinin qiymətləndirilməsi məqsədilə artilleriya təlimlərindən əvvəl helium qazı doldurularaq buraxılan zond (şar) havanın müxtəlif parametrlərini ölçmək imkanı verir:

“Meteoroloji vəziyyəti qiymətləndirmək üçün havaya buraxılmış bu zond təhlükəsizdir və təşvişə heç bir səbəb yoxdur”.

Qeyd edək ki, bəzi yerli elektron KİV-də Göyçay rayonunda yaşayan sakinlərdən birinin evinin həyətinə üzərində şar olan plastik qabdan ibarət bağlama düşüb və üzərində “Ermənilər şərərfsizdir, hər şey vətən üçün” yazısı yayılıb.

Xaçmaz rayonunun Armudpadar kəndində yığılıb qalan zibillər natəmizlik yaradıb.

1000-dən çox əhalisi olan bu kənddə bütün sakinlər, demək olar ki, məişət tullantılarını eyni ünvana atır.

Bu da anti-sanitar vəziyyət yaradıb, pis qoxudan və zibil əlindən həmin ərazidən keçmək mümkün deyil.

Sakinlər bildirir ki, bu halın yaranmasına səbəb məişət tullantıları üçün qutuların olmaması, eləcə də, zibilin vaxtında təmizlənməməsidir.

Məsələ ilə bağlı aidiyyəti orqan olan kənd bələdiyyəsinə üz tutuq. İş saatı olmasına baxmayaraq, idarədə heç kim yox idi. Telefon bağlantısı ilə bələdiyyə sədrinə suallarımızı ünvanladıq.

Sən demə, bələdiyyə sədri zibilliyin olmasından xəbərsizdir. Amma uzun sürən danışıqdan sonra, nəhayət ki, bələdiyyə sədri Təvəkkül Həsənovu ərazidə zibilliyin olduğuna inandıra bildik. O bildirdi ki, “sabah əraziyə baxış keçiriləcək və qısa müddətdə problem həllini tapacaq”.

Məsələni diqqətdə saxlayacağıq.

Dağıstan gömrüyündə avtomobil keçid məntəqəsinin tikintisi zamanı yeyintiyə yol verilib.

Dağıstan Federal Xəzinədarlıq İdarəsi maliyyə-təsərrüfat fəaliyyətinin yoxlanılması zamanı yerli gömrük işində pozuntular aşkar edib.

“Daqstroyresurs” şirkəti Rusiya-Azərbaycan sərhədində “Qarax” çoxtərəfli avtomobil keçid məntəqəsinin tikintisini 2011-ci ildə başa çatdırmalı idi, lakin şirkət öhdəliklərini yerinə yetirə bilməyib.

2014-cü ildə məhkəmə şirkətlə bağlanan müqaviləni məcburi ləğv edib və 64.3 (təxminən 1,7 milyon AZN) milyon rubl pulun tikintiyə xərclənmədiyi aşkar olunub.

“Daqstroyresurs” şirkəti isə bu pulu Azərbaycan ərazisində iş qurmaq üçün xərcləyib.

“RİA Dərbənd”in məlumatına görə, ötən ilin dekabrında pulu geri ala bilməyən Dağıstan gömrüyü məntəqə tikilmədiyi üçün şirkətin borclarını silib.

Xəzinədarlıq bu işi maliyyə pozuntusu hesab edib. Yerli mediaya yayılan məlumata görə, Dağıstan gömrük şöbəsi 2020-ci ilin mart ayına qədər bu məsələnin həll edilməsini tələb edib.

Xəbər verdiyimiz kimi, Azərbaycanda növbədənkənar Parlament seçkiləri keçiriləcək. Budəfəki seçkilərdə bir sıra “sürpriz” namizədlərin olacağı istisna edilmir. Bu namizədlər arasında sabiq təhsil naziri, AMEA-nın Riyaziyyat və Mexanika İnstitunun direktoru Misir Mərdanovun da adı çəkilir.

Məsələ ilə bağlı Unikal.org-a açıqlama verən Misir Mərdanov deputat olmaq arzusunu gizlətməyib:

“Bəli, mənsub olduğum Yeni Azərbaycan Partiyası (YAP) namizədliyimi irəli sürərsə, prosesə qoşularam. Ancaq bu barədə danışmaq hələ tezdir.

Cənab Prezident Konstitusiya Məhkəməsinə növbədənkənar parlamentin keçirilməsi ilə bağlı sorğu göndərib. Konstitusiya Məhkəməsinin qərarından sonra bu məsələlərə baxılacaq”.

“YAP-dan namizədliyinizin veriləcəyini gözləyirsiniz?” sualına isə M.Mərdanov “İnşallah, Allah qoysa…”, – cavabını verib.

Dekabrın 2-də Azərbyacanla Gürcüstan sərhədində yerləşən Candargöldə itkin düşmüş balıqçıların meyitləri aşkar edilib.

Məlumatı Gürcüstanın Daxili İşlər Nazirliyinin Fövqəladə Hallar Xidməti yayıb.

Qeyd edək ki, Candargöldə balıq tutmaq istəyən iki nəfər balıqçının qayığı əsən şiddətli küləkdən sonra gözdən itmişdi. Azərbaycanla Gürcüstan tərəfi itən balıqçıları birgə axtarırdı.

* * * * *

Azərbaycan və Gürcüstandan olan xilasedicilər iki ölkənin sərhədində yerləşən Candargöldə dekabrın 2-də itkin düşən balıqçıların axtarışlarını davam etdirirlər.

Xatırladaq ki, hadisə şahidlərinin verdiyi məlumata əsasən, iki nəfər şəxs qayıqla balıq tutmağa yollanıblar. Lakin əsən şiddətli küləkdən sonra balıqçılardan heç bir xəbər yoxdur.

Median.Az Gürcüstanın Daxili İşlər Nazirliyinin Fövqəladə Hallar Xidmətinə istinadən xəbər verir ki, axtarışlara 55 xilasedici cəlb edilib.

Ötən gecə dalğıcların gölün dərinliklərində apardıqları axtarış da nəticə verməyib. Axtarışlara havadan dəstək verilir, gölün ərazisinə dron və helikopter cəlb edilib.

Artıq Candargölün 80 faiz ərazisində axtarış işləri yekunlaşıb. Prosesdə Azərbaycan xilasediciləri də iştirak edib. Əldə olunan razılığa əsasən, gürcü xilasedicilər Azərbaycan tərəfə keçərək, yerli xilasedicilərlə birgə axtarış işlərində iştirak edəcəklər.