Month: December 2020

Azərbaycan Silahlı Qüvvələrinin oktyabr ayında işğaldan azad edilmiş Hadrut kəndi yaxınlığındakı Çaylaqqala və Köhnə Tağlar kəndlərini Ermənistanın işğalçı qüvvələrinin qalıqlarından təmizləmə əməliyyatı başa çatdıqdan sonra mütəxəssislər meşələrdə gizlənən və təxribat törədən erməni qruplarının beynəlxalq terrorçular kimi qəbul edilə biləcəyi barədə danışmağa başladılar. Rusiya sülhməramlı kontingentinin komandiri general-leytenant Rüstəm Muradov deyib: “Dekabrın 11-də Hadrut bölgəsinin Çaylaqqala və Köhnə Tağlar yaşayış məntəqələrinin yaxınlığında atəşkəs pozulub. Hazırda bu ərazidə vəziyyət normallaşıb”.

Demək olar ki, azad edilmiş ərazilərdə olan jurnalist Fərdin İsazadə özünün “Facebook” səhifəsində orada baş verənlər barədə danışıb.

“Azad edilmiş ərazilərə səfərim müşayiətsiz həyata keçdi və məni maraqlandıran yaşayış məntəqələrini ziyarət etməkdə sərbəst idim. Xocavənd rayonunda, xüsusən də Hadrut kəndi ətrafındakı yaşayış məntəqələrində daha çox işlədik. Biz Çaylaqqala, Köhnə Tağlar, Tuğ, Böyük Tağlar, Azıx, Zoğalbulaq, Ağdam (kənd) və başqa istiqamətlərdə olduq. Tam əminliklə deyə bilərəm ki, Ermənistan hələ hərbi əməliyyatların aktiv mərhələsində Çaylaqqala və Köhnə Tağlar üzərində nəzarəti itirmişdi”, – deyə İsazadə yazır.

Onun sözlərinə görə, bu ərazinin coğrafiyası dağlıq və meşəlikdir, bu da əraziyə bələd olan bir insana təbii kamuflyajdan istifadə edərək gizlənməyə imkan verir. Atəşkəsdən sonra Azərbaycan ordusunun bölmələri nəzarətində olan müəyyən ərazilərdə, tərk edilmiş evlərin zirzəmilərində və çardaqlarında ayrı-ayrı silahlı birləşmələrin üzvlərini ələ keçirib.

Jurnalist hesab edir ki, Çaylaqqala və Köhnə Tağlar yaxınlığında qəfil peyda olan quldur birləşmələri ətrafdakı meşələrdə və dağlarda gizləniblər. Çaylaqqala və Köhnə Tağlar yaxınlığında Azərbaycan ordusunun atışması məhz bu quldur birləşmələri ilə baş verib. Ermənistan hökuməti isə vəziyyətdən istifadə etmək qərarına gəlib.

“Paşinyan sülhməramlıların resurslarından istifadə etməklə strateji yüksəkliklər üzərində nəzarəti bərpa etməyə çalışır. Eyni zamanda guya “gənc əsgərlərinə” qarşı “Türkiyə xüsusi təyinatlılarının” hazırladığı xəritəni də atır. Bütün bu cəfəngiyyat ATƏT-in Minsk Qrupunun amerikalı və fransalı həmsədrlərinin Bakı və İrəvan səfəri zamanı baş verir. Hansı sahibə xidmət edirsən, Nikol? Qərar verməyin vaxtı çatmayıbmı?”, – deyə İsazadə soruşur.

2020-ci il dekabrın 13-də saat 17 radələrində Müdafiə Nazirliyinin N saylı hərbi hissəsinin bir hərbi qulluqçusu, Ağdam rayon sakinləri 1984-cü il təvəllüdlü Əhmədov Toğrul Vilayət oğlu və 1990-cı il təvəllüdlü Məmmədov Elçin Qanboy oğlu işğaldan azad olunmuş Ağdam rayonunun Şahbulaq kəndinin ərazisində olarkən piyada əleyhinə minaya düşüblər.

Bu barədə Baş Prokurorluğun və Daxili İşlər Nazirliyinin mətbuat xidmətləri məlumat yayıb.

Nəticədə Elçin Məmmədov həlak olub, hərbi qulluqçu və Toğrul Əhmədov isə ağır dərəcəli bədən xəsarətləri alıb.

Dərhal prokurorluq və polis əməkdaşları tərəfindən hadisə yerinə və meyitə baxış keçirilib, məhkəmə-tibb ekspertizaları təyin edilib, digər zəruri prosessual hərəkətlər yerinə yetirilib.

Faktla bağlı Cinayət Məcəlləsinin 100.2 (təcavüzkar müharibəni planlaşdırma, hazırlama, başlama və ya aparma), 120.2.1 (cinayətkar birlik–təşkilat tərəfindən qəsdən adam öldürmə), 120.2.12 (milli, irqi, dini ədavət və ya düşmənçilik niyyəti ilə qəsdən adam öldürməyə cəhd) və digər maddələri ilə cinayət işi başlanılıb və istintaqın aparılması Baş Prokurorluğun İstintaq İdarəsinə həvalə edilib.

Hazırda faktla bağlı prokurorluq və polis əməkdaşları tərəfindən intensiv istintaq hərəkətləri və əməliyyat tədbirləri həyata keçirilir.

Baş Prokurorluq və Daxili İşlər Nazirliyi bir daha əhaliyə xəbərdarlıq edərək, işğaldan azad olunmuş ərazilərdə təhlükənin mövcudluğunu nəzərə alıb müvafiq icazə olmadan, ərazilər minalardan və digər partlayıcı vasitələrdən tam təmizlənənədək həmin bölgələrə səfər etməmələrini xahiş edir.

Xətai Rayon İcra Hakimiyyətinin başçısı Rafiq Quliyev özünə yeni müavin təyin edib.

Unikal.org-un məlumatına görə, R.Quliyevin əmri ilə, Səmədov Anar Qorxmaz oğlu Xətai Rayon İcra Hakimiyyəti başçısının birinci müavini təyin edilib.

Qeyd edək ki, A.Səmədov Bakı Şəhər İcra Hakimiyyətinin Memarlıq və Şəhərsalma Baş İdarəsinin müdir müavini vəzifəsində çalışıb.

Dövlət Miqrasiya Xidmətinin rəisi Vüsal Hüseynov Azərbaycanda yaşama icazəsi olmayan şəxslərin SMS icazədən necə istifadə etməsi barədə məlumat verib.

O, bu barədə özünün “Facebook” səhifəsində paylaşım edib.

Onun sözlərinə görə, SMS icazə üçün yaşama icazəsinin üzərindəki, belə icazə yoxdursa, olduğu yer üzrə qeydiyyat nömrəsi istifadə edilir:

“919 çağrı xidməti fasiləsiz və gücləndirilmiş rejimdə işləyir, bununla belə xüsusi zərurət yoxdursa, əcnəbi vətəndaşlar SMS icazə üçün nömrəni axşam və ya gecə saatlarında əlaqə saxlamaqla əldə edə bilər. Bu nömrə, həmçinin, Xidmətin internet səhifəsindən asanlıqla əldə edilə bilər”.

Dekabrın 13-də səhər saatlarında Xəzər rayonu ərazisində 1985-ci il təvəllüdlü Rəşad Məmmədovun aldığı bədən xəsarətləri nəticəsində ölməsi barədə Xəzər rayon prokurorluğuna məlumat daxil olub

Xəzər rayon prokurorluğundan verilən məlumata görə, dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Faktla bağlı Xəzər rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.

İstintaqla hadisənin zərərçəkmişin qayınatası, 1962-ci il təvəllüdlü Azər Cəfərovun aralarında şəxsi münasibətlər zəminində yaranmış münaqişə zamanı odlu silahdan atəş açaraq Rəşad Məmmədovu qəsdən öldürməsinə əsaslı şübhələr müəyyən edilib.

Azər Cəfərov şübhəli şəxs qismində tutularaq istintaqa cəlb edilib.

Hazırda cinayət işi üzrə zəruri istintaq tədbirləri davam etdirilir.

Azərbaycanın Müdafiə Nazirliyi Cəbrayıl rayonunun Əmirvarlı kəndindən videoreportaj yayıb.

Həmin görüntüləri təqdim edirik:

Hikmət Hacıyev xarici jurnalistlərin suallarını cavablandırıb

Dekabrın 9-da Global Journalism Council-un təşkilatçılığı ilə Azərbaycana səfər edən xarici jurnalistlər işğaldan azad edilmiş ərazilərimizdə – Füzulidə, Ağdamda, eləcə də ən çox raket hücumuna məruz qalan Tərtərdə olublar.

“Report” xəbər verir ki, xarici jurnalistlər ermənilərin törətdiyi vəhşiliklərlə yerində tanış olublar. Məcburi köçkünlərlə görüşərək gerçəkləri həm də işğal hadisələrinin canlı şahidlərinin dilindən eşidiblər.

Dekabrın 12-də Prezidentin köməkçisi – Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev ölkəmizə səfər edən xarici jurnalistləri qəbul edib və onların suallarını cavablandırıb.

H.Hacıyev Ermənistanın işğalçılıq siyasəti və son vəziyyətlə bağlı əcnəbi jurnalistləri məlumatlandırıb.

Prezidentin köməkçisi xüsusilə ermənilərin mədəni və mənəvi sərvətlərimizə vurduğu ziyan barədə danışaraq nə zamansa maddi müstəvidə dəyən zərərin bərpa olunacağını, ancaq mənəvi və mədəni zərərin çətin sağalacağını deyib.

Hikmət Hacıyevlə görüşdə Global Journalism Council-un beynəlxalq məsələlər üzrə rəhbəri azərbaycanlı jurnalist Elşad Eyvazlı, əcnəbi jurnalistlər Şinji Haşimoto (Kyodo- Japan), Aziz Gürpınar (Kyodo News), Piotr Patryk (The Economist, USA), Jordi Banos (La Vanguardia-Spain), Filippo Cicciu (RSI Switzerland), Albert Naya (CNN İspanya), Paul Osterlund (Foreign Policy -USA), İlya Topper (EFE, Spain), Kahraman Haliscelik (GJC) və İsmail Bayazit (GJC) iştirak ediblər.

Dekabrın 11-də TƏBİB-in rəhbər heyəti ilə “Türkiyə Acil Tıp Derneği”nin (TATD, www.tatd.org.tr) rəhbər heyəti arasında videokonfrans formatında görüş keçirilib.

Bu barədə Tibbi Ərazi Bölmələrini İdarəetmə Birliyindən (TƏBİB) məlumat verilib.

Görüşdə TƏBİB-in İdarə Heyəti sədrinin müşaviri Şəhriyar Fətullayev qarşı tərəfə TƏBİB-in yaradılması, onun əsas vəzifə və məqsədləri, hazırkı fəaliyyəti və gələcək planları barədə geniş məlumat verib.

Bundan başqa, təxirəsalınmaz və təcili tibbi yardım xidməti (TTTYX) sahəsində Azərbaycanda olan mövcud vəziyyət və TƏBİB tərəfindən həyata keçirilməsi planlaşdırılan zəruri islahatlar barədə TATD nümayəndə heyətinə ətraflı məlumat verilib, Türkiyə və inkişaf etmiş ölkələrdəki fundamental təcili tibbi yardımın təşkilinin metodları, strategiyası müzakirə edilib, eləcə də qarşılıqlı maraq doğuran digər məsələlər üzrə fikir mübadiləsi aparılıb.

Türkiyə tərəfinin nümayəndə heyətinin rəhbəri TATD sədri Süleyman Türedi isə öz növbəsində Dərnək haqqında Azərbaycan tərəfinə təqdimat verib. Cənab Türedi Azərbaycandakı səhiyyə sistemində aparılan islahatlara töhfə vermək məqsədilə TTTYX-nın qurulması, təşkili, kadr potensialının hazırlanması və inkişaf etdirilməsi üçün qarşılıqlı razılaşma əsasında TATD tərəfindən TƏBİB-ə zəruri dəstəyin göstərilməsinə hazır olduğunu və bu sahədə gələcək əməkdaşlıq perspektivləri barədə öz təkliflərini bildirib.

Tədbirin sonunda hər iki tərəf görüşdən məmnunluq hissini ifadə edib və əldə edilmiş razılaşmaya əsasən qurumlar arasında qarşılıqlı əməkdaşlığın rəsmi həyata keçirilməsi məqsədilə Koordinasiya Qrupunun yaradılması qərara alınıb.

Aparılan təmir-bərpa işləri ilə əlaqədar olaraq 14 dekabr tarixindən Bakı-Ələt-Qazax-Gürcüstan ilə dövlət sərhədi avtomobil yolunun 96-cı kilometrliyində, magistralın Hacıqabul rayonu Navahi qəsəbəsi ərazisindən keçən hissəsində Bakı şəhəri istiqaməti üzrə hərəkət qismən məhdudlaşdırılacaq.

Bu barədə Azərbaycan Avtomobil Yolları Dövlət Agentliyi (AAYDA) məlumat yayıb.

Məlumata görə, məhdudlaşdırma təmir-bərpa işləri bitənədək qüvvədə olacaq.

Təmir müddəti ərzində nəqliyyat vasitələrinin hərəkəti ikitərəfli olmaqla magistralın əks istiqaməti üzrə təşkil olunacaq.

Sürücülərdən sözügedən ərazidə diqqətli olmaları, yol hərəkəti qaydalarına və yol nişanlarının tələblərinə riayət etmələri xahiş olunur.

Rusiya sülhməramlıları tərəfindən Azərbaycan, Rusiya prezidentləri və Ermənistanın baş nazirinin 2020-ci il 10 noyabr tarixli birgə bəyanatında nəzərdə tutulmuş hüdudları aşan yeni xəritə təqdim edilməsi Azərbaycan ictimaiyyətində ciddi narazılıq, təəssüf və təəccüb doğurur.

Bunu Trend-ə Milli Məclisin deputatı Cavid Osmanov deyib.

Deputat bildirib ki, Azərbaycan ictimaiyyəti haqlı olaraq Rusiya sülhməramlılarına gündə bir xəritə cızaraq dövriyyəyə buraxmaq səlahiyyətini kimin verdiyini sual edir:

“Xəritələrlə manipulyasiya və sülhməramlılar tərəfindən səlahiyyət çərçivəsini aşan hərəkətlər Rusiyanın öz öhdəliklərini pozduğunu açıq-aydın göstərir. Sülhməramlı missiyanın vəzifə və funksiyaları beynəlxalq qanunvericiliklə və birgə üçtərəfli bəyanatla tənzimlənir. Rusiya sülhməramlıları fəaliyyətini öz öhdəliklərinə uyğun qurmalıdırlar”.

C.Osmanov vurğulayıb ki, Xocavənd rayonunun Köhnə Tağlar və Çaylaqqala kəndlərində gizlənmiş erməni terrorçuları Azərbaycan Ordusunun əsgərlərinə və mülki şəxslərə qarşı hücumlar edib, nəticədə ölən və yaralananlar var:

“Azərbaycan bundan öncə həm Rusiya sülhməramlılarına, həm də erməni tərəfinə belə hallar baş verəcəyi təqdirdə ciddi tədbirlər görüləcəyi barədə xəbərdarlıq edib. Keçirilmiş əməliyyat nəticəsində hazırda həmin kəndlərə Azərbaycan nəzarət edir. Əgər yeni hallar baş verəcəksə, Azərbaycan tərəfi adekvat addımlar atacaq.

Buna görə də Rusiya sülhməramlılarının hazırlayıb yaydığı xəritə qeyri-realdır və qısa zamanda ona düzəliş edilməsinə ehtiyac var.

Rusiya tərəfi yaxşı bilir ki, bu ölkənin sülhməramlılarının Dağlıq Qarabağda yerləşdirilməsi Azərbaycan ictimaiyyəti tərəfindən birmənalı qarşılanmayıb və çoxsaylı suallara, cəmiyyətin müəyyən qruplarının narazılığına səbəb olub. Baş verən yeni hallar isə Azərbaycan ictimaiyyətində Rusiya sülhməramlılarına olan müəyyən etimad limitini əsaslı şəkildə sarsıdır”.

C.Osmanov qeyd edib ki, Azərbaycan ictimaiyyəti müharibə dövründə Rusiyanın Ermənistanı intensiv şəkildə silahlandırmasını yaxşı xatırlayır:

“Azərbaycan xalqı Gəncə, Bərdə və Tərtər şəhərlərinin məhz Rusiyanın Ermənistana verdiyi yeni silahlarla raket atəşinə tutulduğunu da yaxşı bilir. Rusiyada müəyyən qüvvələr Gürcüstan, Ukrayna, Moldova, Belarus və digər ölkələrdə reallaşdırdıqları planları Azərbaycanda təkrarlamağa cəhd göstərməməlidirlər.

Görünür Rusiyada müəyyən dairələr dekabrın 10-da Bakıda keçirilmiş Qələbə paradında Rusiyanın Ermənistana hədiyyə etdiyi, amma Azərbaycan Ordusu tərəfindən götürülmüş və ya məhv edilmiş texnikanın nümayişini həzm edə bilmir”.

C.Osmanov əlavə edib ki, istisna deyil ki, həmin dairələr Qələbə paradında Türkiyə Prezidenti Rəcəb Tayyip Ərdoğanın iştirakından da bərk qıcıqlanıblar:

“Rusiya istər Dağlıq Qarabağda sülhməramlı missiyanın həyata keçirilməsində, istərsə də bu regiondakı fəaliyyətində Azərbaycan xalqının maraqlarını nəzərə almalıdır. Rusiyada bəzi dairələr anlamalıdırlar ki, ənənəvi qaydada, digər ölkələrə qarşı olduğu kimi, Azərbaycandan da ixrac edilən kənd təsərrüfatı məhsullarına məhdudiyyətlər tətbiq olunması və bunun olduqca bəsit şəkildə sanitar-epidemioloji tələblərlə pərdələnməsi süni şəkildə əngəl yaratmaqdan başqa bir şey deyil. Azərbaycan ictimaiyyəti bunu görür və başa düşür. Bu isə Azərbaycanda anti-Rusiya meyllərinin daha da güclənməsinə səbəb olur.

Rusiyada müəyyən qüvvələr başa düşməlidirlər ki, Azərbaycana qarşı atılan hər bir addımın acısını Ermənistan çəkəcək. Bu proses son nəticədə Rusiyanın Azərbaycandakı imicinə böyük zərbə olacaq”.