Month: January 2021

Hindistan hökuməti Çin mobil applikasiyalarına qarşı sanksiyaları sərtləşdirib və onlardan 59-nu həmişəlik qadağan edib.

Bu barədə “Times of India” qəzeti ölkənin Elektronika və İnformasiya Nazirliyinə istinadən məlumat yayıb. Qadağan olunmuş mobil əlavələr arasında “Tik-Tok”, “Baidu”, “WeChat” kimi məşhur proqramlar da var.

Nazirlik qərarın səbəblərini “Çin mobil proqramlarının Hindistanın suverenliyi və bütövlüyünə, həmçinin təhlükəsizliyinə zərər verməsi” ilə izah edib.

Qeyd edək ki, hindistanlı istifadəçilər Çin applikasiyalarını şəxsi məlumatlardan düzgün istifadə etməməkdə günahlandırıb və müvafiq qurumlara şikayət ediblər.

Geolokasiya söndürüldükdə belə smartfonu tapmaq mümkündür.

“Praym”ın məlumatına görə, bu barədə Rusiyanın Moskva Dövlət Radiotexnika, Elektronika və Avtomatlaşdırma Texniki Universitetinin İnformasiya Təhlükəsizliyi İntellektual Sistemləri kafedrasının dosenti Evgeny Kaşkin açıqlama verib.

Mütəxəssisin sözlərinə görə, bir neçə axtarış üsulu var.

“IOS və “Android” bazasında cihazlarda “Telefonu tap” funksiyası var. Onun köməyi ilə itmiş apparatın geolokasiyasını tapmaq olar”, – deyə o bildirib.

Kaşkin əlavə edib ki, elektron cihazın həqiqi coğrafi yerinin təyin edilməsi söndürüldükdə isə smartfonu SİM kartın köməyi ilə tapmaq olar. Məsələ burasındadır ki, o, avtomatik olaraq yaxınlıqdakı qülləyə qoşulur.

“Beləliklə, smartfon və mobil operatorun qülləsi arasındakı siqnalın səviyyəsinə dair məlumatlardan istifadə edərək abunəçinin yerini dəqiq müəyyənləşdirmək çətin olmayacaq”, – deyə ekspert əlavə edib.

Ancaq Kaşkin belə müəyyənləşdirmənin dəqiqliyinin az olduğunu bildirib. Bundan əlavə, yalnız provayder qülləyə qoşulma barədə məlumatlı olur və informasiyanı polisin sorğusu ilə təmin edə bilər.

Mütəxəssis smartfon itdiyi təqdirdə cihazın IMEI kodunu göstərməklə hüquq-mühafizə orqanlarına müraciət etməyi məsləhət görüb.

“Oğurluq halında SIM kart dəyişdirilsə və telefonun geolokasiyası söndürülsə belə tapmaq mümkündür”, – deyə mütəxəssis vurğulayıb.

Smartfonu tapmağın başqa bir yolu da insanların sosial şəbəkələrdə istifadə etdikləri coğrafi etiketləri izləməkdir.

ABŞ-ın HBO teleşirkəti sehrbaz Harri Poterin macəraları barədə serial hazırlayacaq.

Bu barədə “Hollywood Reporter” xəbər yayıb.

Bildirilir ki, hazırda şirkət franşizanın sahibi “Warner Bros.” film studiyası ilə birlikdə ssenaristlər axtarır və onlarla yeni seriallar üçün ideyaları müzakirə edir.

Ancaq tərəflər yalnız danışıqlar aparılır, heç bir razılaşma əldə olunmayıb.

O da vurğulanır ki, bir neçə vəziyyət layihənin həyata keçirilməsinə mane ola bilər. Birincisi Harri Potter kitablarının müəllifi Coan Roulinq serialın yaradılması fikrini təsdiqləməlidir.

Bundan sonra şirkətlər Harri Potter ilə əlaqəli filmlərin və müxtəlif məzmunun yayımlanmasına dair müqaviləyə sahib olan “NBCUniversal” media korporasiyası ilə danışıqlar aparmalıdır.

Harri Potter barədə kitablar seriyası (1997-2007) 400 milyon nüsxə tirajla nəşr olunub və 65 dilə tərcümə edilib.

2021-ci ilin yayında erkən rezervasiya mərhələsində Türkiyəyə tətil qiyməti 15% artıb.

Bu barədə Rusiya Turoperatorlar Assosiasiyası məlumat yayıb.

Turoperatorlar yay ayları üçünTürkiyəyə satışların aprelə yaxın pik həddə yüksələcəyini gözləyirlər.

“İndi qiymətlər “planlandığı kimi” keçən ilə nisbətən 15 %-ə qədər artıb. Hələlik iyun ayında Türkiyənin “hər şey daxil” “beşliyi”nə iki nəfərlik bir həftəlik turu 60 min rubla (1 356 AZN) almaq olar. Mövsüm başladıqdan sonra Türkiyəyə qiymətlərin daha da artması ehtimalı var”, – deyə bildirilir.

Qeyd olunur ki, Türkiyəyə tətillər üçün erkən edilən sifariş kampaniyaları 31 mart 2021-ci il tarixinədək etibarlıdır. Hal-hazırda Türkiyə kurortlarına turlar gedişlə oktyabr ayının sonuna qədər sifariş edilə bilər.