Month: January 2021

“2020-ci ildə Vətən müharibəsi nəticəsində şəhid olmuş 2 015 nəfərin vərəsələrinə 11 min manat birdəfəlik sığorta ödənişi verilib”.

Əmək və Əhalinin Sosial Müdafiəsi Nazirliyinin Sosial təminat siyasəti şöbəsinin müdiri Babək Hüseynov “Yeni” TV-nin canlı yayımında bildirib.

“Ağır xəsarət alan hərbçilərdən 2 858 nəfərin, yüngül xəsarət alan 3 726 nəfərin ya özlərinə, ya da ailə üzvlərinə ümumilikdə 32 milyon manat məbləğində sığorta ödənişinin verilməsi davam edir”, – deyə şöbə müdiri qeyd edib.

O bildirib ki, ümumilikdə şəhidlərin üçdə ikisinin ailəsinə ödəniş həyata keçirilib:

“Eyni zamanda 2 790 şəhidin 7 190 ailə üzvünə sosial ödənişlər təyin edilib. 11 hərbi qulluqçuna əlillik dərəcəsi müəyyən edilib”.

Xəzər dənizində zəlzələ olub.

Bununla bağlı Respublika Seysmologiya İdarəsi məlumat yayıb.

Məlumata görə, yeraltı təkanlar yerli vaxtla saat 12:09-da Xəzər dənizində qeydə alınıb.

Maqnitudası 3,1 bal olan zəlzələnin ocağı 62 kilometr dərinlikdə olub.

Paytaxtın Yasamal rayonu Ümid Əkbərov 38 ünvanında yolun bir hissəsində baş verən sürüşmə zamanı qaz xəttində sızma qeydə alınmayıb.

Bu barədə Oxu.Az-a açıqlamasında “Azəriqaz” İB-nin Mətbuat xidmətinin rəhbəri Ceyhun Səfərov məlumat verib.

O bildirib ki, hadisə yerinə qurumun əməkdaşları tərəfindən baxış keçirilib:

“Sürüşmə qeydə alınan ərazidə qaz xəttinin dayağı zədələnib. Zədələnmiş dayağın bərkidilməsi istiqamətində zəruri tədbirlər görülür. Qaz xəttində isə hər hansı zədələnmə və sızma qeydə alınmayıb”.

* * * * *

Paytaxtın Yasamal rayonu ərazisində yolun bir hissəsi çöküb.

Söhbət rayonun Ümid Əkbərov 38 ünvanından gedir.

Qeyd olunan ünvanda yolda baş verən sürüşmə nəticəsində ərazidən keçən qaz xəttinə və yüksək gərginlikli yeraltı elektrik xəttinə də ziyan dəyib.

Baş verən hadisənin səbəbini öyrənmək məqsədilə Yasamal Rayon İcra Hakimiyyəti ilə əlaqə saxladıq.

İcra Hakimiyyətindən Oxu.Az-a bildiriblər ki, sözügedən əraziyə baxış keçirilib:

“Məlumatımız var. Məsələ araşdırılır və yekun nəticələr barədə ictimaiyyətə məlumat veriləcək”.

“Hazırda müharibə əlillərinin avtomobillə təminatı üçün heç bir növbə yoxdur”.

Əmək və Əhalinin Sosial Müdafiəsi Nazirliyinin Sosial təminat siyasəti şöbəsinin müdiri Babək Hüseynov “Yeni” TV-nin canlı yayımında bildirib.

Onun sözlərinə görə, Vətən müharibəsində əlil olan şəxslər də növbəlilik əsasında avtomobillə təmin olunacaq:

“2020-ci ildə əlilliyi olan 400 nəfərə avtomobil verilib”.

“2014-cü il yanvarın 1-dən 2020-ci il yanvarın 1-nə qədər qeydiyyata alınan şəhid ailələri və qazilər barədə siyahılar yerli icra hakimiyyəti orqanlarında var. Bu siyahılar Əmək və Əhalinin Sosial Müdafiəsi Nazirliyinə təqdim ediləcək”.

Əmək və Əhalinin Sosial Müdafiəsi Nazirliyinin Sosial təminat siyasəti şöbəsinin müdiri Babək Hüseynov “Yeni TV”nin canlı yayımında bildirib.

Onun sözlərinə görə, 44 gün davam edən Vətən müharibəsi zamanı şəhidlər və qazilərimiz oldu ki, onları da uzun müddət gözlətməmək üçün hər iki kontingentin mənzil təminatı proqramı paralel olaraq həyata keçiriləcək:

“Sərəncamın icrasını beş il ərzində yekunlaşdırmaq tapşırığı verilib”.

B.Hüseynov qeyd edib ki, mənzil şəraitinin yaxşılaşdırılmasına ehtiyacı olan şəxslər barədə ilkin qiymətləndirilmələr var:

“Bir neçə ay ərzində 2020-ci ildə baş verən müharibədə şəhid olanların ailələrinin və əlillik qazanmış şəxslərin növbəyə durması davam edəcək. Həmin şəxslərin sayı onlar tam növbəyə durandan sonra bilinəcək”.

Prezident İlham Əliyev Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında sərəncam imzalayıb.

//oxu.az

Dövlət uşaq müəssisələrindəki uşaqların doğma ailə mühitinə qayıdışına nail olunması istiqamətində görülən işlər nəticəsində son bir ildə 38 uşaq müəssisələrdən öz ailəsinə qaytarılıb.

Bununla bağlı Əmək və Əhalinin Sosial Müdafiəsi Nazirliyi məlumat yayıb.

Övladlığagötürmə sahəsində idarəetmənin Əmək və Əhalinin Sosial Müdafiəsi Nazirliyi tərəfindən həyata keçirilməsinə başlandığı 1 noyabr 2019-cu ildən bu günə qədər isə 27 uşaq (14 oğlan və 13 qız) övladlığa verilib.

Onlardan beşi ögey ana – ögey ata, 17-si yaxın qohum tərəfindən, ikisi valideynlər arasında razılıq əsasında, üç uşaq isə dövlət uşaq müəssisəsindən övladlığa götürülüb. Övladlığa götürülmüş uşaqlardan 10-u 0-3 yaş, 16-sı 4-11 yaş, 1-i isə 12-18 yaş aralığında olanlardır.

Bildirilib ki, uşaqların övladlığa götürüldüyü ailədə inkişafı üçün şəraitin olması xüsusi diqqətdə saxlanır. Bu istiqamətdə ciddi nəzarət, övladlığa götürülən hər uşağın ailədəki vəziyyətinin öyrənilməsi üçün dövri monitorinqlər həyata keçirilir.