Month: March 2021

Azərbaycanda sabaha olan hava şəraiti açıqlanıb.

Ekologiya və Təbii Sərvətlər Nazirliyinin Milli Hidrometeorologiya Xidmətinin verdiyi məlumata görə martın 6-da Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Gecə və səhər bəzi yerlərdə duman olacaq, mülayim cənub-qərb küləyi əsəcək, gündüz arabir güclənəcək.

Havanın temperaturu Abşeron yarımadasında gecə 3-5, gündüz 9-14, Bakıda gecə 3-5, gündüz 12-14 dərəcə isti olacaq. Atmosfer təzyiqi normadan yüksək 767 mm civə sütunundan 761 mm civə sütununa enəcək, nisbi rütubət gecə 65-75, gündüz 55-60 faiz təşkil edəcək.

Martın 6-da Azərbaycanın rayonlarında hava şəraitinin əsasən yağmursuz keçəcəyi gözlənilir. Bəzi yerlərdə duman olacaq, qərb küləyi əsəcək, ayrı-ayrı yerlərdə arabir güclənəcək. Havanın temperaturu gecə 0-5, gündüz 13-18 dərəcə isti, dağlarda gecə 0-5 dərəcə şaxta, gündüz 8-13 dərəcə isti olacaq.

Tibbi-meteoroloji proqnoza gəlincə, Abşeron yarımadasında martın 6-da arabir güclənən cənub-qərb küləyinin 7-də güclü şimal küləyi ilə əvəz olunacağı və atmosfer təzyiqinin xeyli tərəddüdü gözlənilir ki, bu da meteohəssas insanlar üçün əlverişsizdir.

Nazirlər Kabinetinin qərarına müvafiq olaraq, Bakı-Pirşağı-Sumqayıt elektrik qatarları mart ayının 6, 7 və 8-i hərəkətdə olmayacaq.

Bu barədə “Azərbaycan Dəmir Yolları” QSC-dən məlumat verilib.

Bildirilib ki, 9 mart tarixindən etibarən cari cədvəl üzrə hərəkət bərpa olunacaq.

Yeni Azərbaycan Partiyasının (YAP) qurultayında yeni İdarə Heyəti seçilib.

Bu barədə jurnalistlərə deputat Elman Məmmədov məlumat verib.

O bildirib ki, YAP İdarə Heyətinin sədri Prezident İlham Əliyevdir.

Baş nazirin müavini Əli Əhmədov isə sədr müavini olaraq qalıb.

Deputat Səməd Seyidov isə bildirib ki, partiyada böyük dəyişikliklər olub.

Qeyd edək ki, yeni İdarə Heyətinin üzvlərinin sayı 40 nəfərdən ibarətdir.

FETÖ terror təşkilatına üzv olmaqda ittiham edilən azərbaycanlı iş adamı Mübariz Mənsimov ev həbsi şərtiylə azadlığa buraxılıb.
 
İnterAz xəbər verir ki, bu barədə iş adamının köməkçisi Fidan Quliyeva sosial şəbəkələrdə paylaşıb.
 
Qeyd edək ki, Bu gün FETÖ terror təşkilatına üzv olmaqda ittiham edilən azərbaycanlı iş adamı Mübariz Mənsimovun məhkəməsi keçirilib. Məhkəmədə şahidlər dindirilib, daha sonra Mənsimova söz verilib. O, ifadəsində ona qarşı irəli sürülən ittihamları qəbul etməyərək bəraətini istəyib.

Müdafiə Nazirliyi Füzuli rayonunun Yuxarı Rəfədinli kəndindən görüntülər hazırlayıb.

Həmin görüntüləri təqdim edirik:

Qazaxıstanın dövlət televiziyası 44 günlük Vətən Müharibəsindən bəhs edən “Dağdakı Qarabağ, yeni atəşkəs” adlı sənədli film yayımlayıb.

AZƏRTAC xəbər verir ki, filmin çəkilişləri işğaldan azad edilən ərazilərdə aparılıb.

Filmdə Qarabağ münaqişəsinin tarixinə qısa ekskursiya edilir və qeyd olunur ki, BMT Təhlükəsizlik Şurası Azərbaycanın Ermənistan tərəfindən işğal edilən ərazilərinin qeyd-şərtsiz boşaldılması haqqında qətnamələr qəbul edib. Lakin münaqişənin davam etdiyi müddətdə vasitəçilik missiyasını həyata keçirən ATƏT-in Minsk qrupunun səmərəsiz fəaliyyəti nəticəsində Azərbaycanın bütün sülh cəhdləri nəticəsiz qalıb.

Sonda Azərbaycan güc yolu ilə öz ərazi bütövlüyünü bərpa etməyə qərar verib. Ay yarım davam edən müharibə Azərbaycanın qələbəsi ilə başa çatıb və 30 illik işğala son qoyulub. Qeyd olunur ki, qısa müddətdə Azərbaycan Ordusu Cəbrayıl, Zəngilan, Füzuli, Qubadlı rayonlarını və Şuşa şəhərini işğaldan azad edib, ardınca 10 noyabr üçtərəfli atəşkəs razılaşması ilə Ağdam, Kəlbəcər və Laçın rayonları döyüşsüz geri alınıb.

Bununla belə Qələbənin asanlıqla əldə edilmədiyi, Azərbaycan tərəfinin qəhrəman hərbçilərinin şəhid olduğu bildirilir. Ermənistan tərəfindən isə itkilərlə bağlı dəqiq rəsmi məlumatın verilmədiyi, ayrı-ayrı mənbələrin yaydığı məlumata əsasən 4500-dən çox erməni hərbçisinin öldüyü qeyd olunur.

Ağdam şəhərinin müharibədən sonrakı mənzərəsindən dəhşətə gəldiyini vurğulayan müəllif buranın əbəs yerə “Qafqazın Xırosima” adlandırılmadığını söyləyir və bildirir ki, şəhərin qalıqları içərisində yeganə tikili yarı dağıdılmış vəziyyətdə olan Ağdam məscidi qalıb, başqa heç nə yoxdur.

İşğaldan azad edilmiş ərazilərdəki vəziyyətlə yanaşı, Ermənistanın Gəncə, Tərtər və Bərdə şəhərlərinə xain raket hücumu, onlarla dinc sakinin və uşaqların qətlə yetirilməsi filmdə əksini tapır.

Filmin yaradıcı qrupu Vətəni üçün canını vermiş övladların qəhrəmanlıqlarını, şəhid ailələrinin mərdliklə sinə gərdiyi ağrı-acıları və onların kədərə bürünmüş zəfər sevincini böyük peşəkarlıqla tamaşaçılara çatdırır.

Azərbaycanda xeyli sayda fərqli etnik qrupların, dini icmaların nümayəndələrinin bir arada sülh içərisində yaşadığı, onların da Vətən müharibəsində öz ana yurdları üçün qəhrəmanlıqla vuruşduğu və şəhid olduğu qeyd edilir, Bakı və Azərbaycanın arxiyepiskopu Aleksandrın və Azərbaycan Dağ Yəhudiləri İcmasının başçısı Melih Yevdayevin bununla bağlı fikirlərinə yer verilir.

Filmdə həmçinin, Türkiyə-Rusiya Monitorinq Mərkəzinin fəaliyyəti, işğaldan azad edilən ərazilərin idarə edilməsi, minalardan təmizlənməsi və bərpa planları haqqında Azərbaycanın rəsmi mövqeyi geniş əksini tapır. Qeyd olunur ki, Füzuli şəhərində beynəlxalq hava limanının tikintisi, Naxçıvan dəhlizi vasitəsilə nəqliyyat yollarının bərpası Mərkəzi Asiya ölkələri, xüsusilə Qazaxıstan üçün böyük əhəmiyyət daşıyır.

Avtomobil və dəmir yollarının bərpası nəticəsində Aktau, Almatı, Daşkənd və Bişkek şəhərlərindən Avropaya daha sürətli və rahat çıxış təmin olunacaq.

Filmdə Azərbaycanın mədəniyyət və musiqi beşiyi Şuşanın, Qarabağın, bütövlükdə işğal altındakı torpaqların azad olunması ilə təkcə iqtisadi deyil, həm də mənəvi-mədəni sferada böyük sıçrayışın gözlənildiyi qeyd olunur.