Month: May 2021

Dünyaca məşhur Azərbaycan əsilli fransalı fotoqraf Reza Deqati vaxtilə Şuşada çəkdiyi bir fotonu paylaşıb.

Məşhur fotoqraf öz “Facebook” səhifəsində fotonun tarixçəsi və o günlər barəsindəki xatirələrini yazıb:

“Şuşa 1992.

Şuşadakı son jurnalist idim. Rusiyanın hərbi yardımı və ağır texnika vasitəsilə erməni qüvvələrinin mühasirəyə aldıqları şəhəri onun işğalından bir az əvvəl tərk etməli idim.

Birinci Qarabağ müharibəsini işıqlandırdıqdan sonra başa düşdüm ki, Azərbaycanın həqiqi peşəkar ordusu yox idi, döyüşçülərin çoxu könüllü və ya polis idi. Mülki şəxslər də Qarabağı qorumaq üçün birləşmişdilər. Vəziyyət çox gərgin və tələfatlar çox yüksək olsa da, öz daimi işlərini tərk edən və Azərbaycanın hər yerindən gəlmiş müdafiəçilərin yüksək ruhu məni heyrətləndirirdi. Bir gün skripkasını cəbhəyə gətirən bu virtuoz skripkaçı ilə tanış oldum. Skripka atəş nəticəsində məhv oldu, lakin yayı qaldı və həmin skripkaçı öz “Kalaşnikov”undan istifadə edərək bəzi melodiyalar ifa etdi. Azərbaycanlılar çox yaxşı musiqiçidirlər. Mən Parisə qayıtdım və Qarabağda çəkdiyim şəkillərimi azərbaycanlıların davam etməkdə olan faciəsinə, bir milyon qaçqının mövcudluğuna, minlərlə mülki şəxsin qətlə yetirilməsinə göz yummağa qərar verən media üçün gətirdim”, – deyə R.Deqati qeyd edib.

Səkkiz ay sonra nəşi tapılan qəhrəman şəhidimiz Əli Yusifovun nəşi Naxçıvan Beynəlxalq Hava Limanında qarşılandıqdan sonra doğulduğu rayona yola salınıb.

Şərur Şəhidlər xiyabanı onun sonuncu mənzili oldu.

Şəhidin dəfn mərasimində dövlət və hökumət nümayəndələri, Əlahiddə Ümumqoşun Ordunun, Səfərbərlik və Hərbi Xidmətə çağırış üzrə dövlət xidmətinin rəsmiləri, ali məclisin deputatları, ictimaiyyət nümayəndələri və minlərlə sakin iştirak edib.

Mərkəzi Qərargah Ankarada yerləşən, 110 yaşlı “Türk ocaqları” təşkilatı Şuşada kitabxana yaratmaq istəyir. “Türk ocaqları”nın əsas qurucu babalarından olan Əhməd bəy Ağaoğlunun adını daşıyacaq kitabxananın ərsəyə gəlməsi üçün “Türk ocaqları” bütün imkanlara sahibdir.

Bu barədə Azərbaycan “Türk ocağı”nın sədri, tarix üzrə fəlsəfə doktoru Akif Aşırlı Modern.az-a məlumat verib.

A.Aşırlı qeyd edib ki, Türkiyədə və Avropanın bir çox ölkəsində 200-dən çox şöbəsi olan “Türk ocaqları” Şuşanın tarixi önəmini və mədəniyyət paytaxtı kimi gərəkliyini çox gözəl anlayır və azad Şuşada gözəl bir kitabxana tikib, Türk Dünyası mütəfəkkirlərinin əsərləri ilə zənginləşdirməyi arzu edir.

Türkiyənin dövlətçilik tarixində böyük rolu olan “Türk ocaqları”nın əsasının Əhməd bəy Ağaoğlunun evində qoyulmasına diqqət çəkən A.Aşırlı deyib: “Cənab Ali Baş Komandan İlham Əliyev “Türk ocaqları”nın bu təklifinə müsbət rəy versə, qısa müddət ərzində bu proseslərə başlanıla bilər.

“Türk ocaqları”nın hər bir üzvü bu işi qəlbən, ruhən həyata keçirməyə hazırdır”.

A.Aşırlı qeyd edib ki, Ə.Ağaoğlu, Əli bəy Hüseynzadə kimi mütəfəkkirlərin Türkiyədə quruculuğunda iştirak etdiyi “Türk ocaqları” 44 günlük Vətən Savaşında daim Azərbaycanın yanında olub, qızğın döyüşlər zamanı Tərtərə, Bərdəyə və Gəncəyə 420 ailə üçün humanitar yardım göndərib.

Əksər hospital və xəstəxanalarda “Türk ocağı”na mənsub onlarla milliyyətçi türk həkimi təmənnasız yaralıları əməliyyat edib həyata qaytarıblar.