Month: July 2024

Bakının Murtuza Muxtarov küçəsində yerləşən “Axund hamamı” satışa çıxarılıb.

Bununla bağlı sosial şəbəkələrdə məlumat paylaşılıb.

Belə ki, bina yerli əhəmiyyətli memarlıq abidələrinin siyahısında olub. Lakin Mədəniyyət Nazirliyinin binanın üzərinə vurduğu müvafiq lövhə çıxarılıb.

Murtuza Muxtarov, 141 ünvanında yerləşən “Axund hamamı” 1885-ci ildə tikilib. Türkiyəli memar və ustaların əsaslı təmir etdikləri hamamın binası 2013-cü ilin avqustundan öz təyinatı üzrə fəaliyyət göstərib. Yerli əhəmiyyətli memarlıq abidələrinin siyahısında XIX-XX əsrlərə aid olduğu qeyd edilən hamam “3706” inventar nömrəsi ilə qeydiyyata alınıb.

Məlumatlara görə, “Axund hamamı” xüsusi mülkiyyətdədir.

Sosial şəbəkələrdə iddia edilib ki, abidə 2019-cu ildən 1.7 milyon manata satışa çıxarılıb.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli məsələ ilə bağlı Oxu.Az-ın sorğusuna cavab olaraq bildirib ki, Murtuza Muxtarov küçəsində yerləşən “Axund hamamı” yerli əhəmiyyətli memarlıq abidəsidir:

“Tarixi tikili xüsusi mülkiyyətdədir. Abidənin məlumat lövhəsinin çıxarılması barədə məlumatımız var. Məsələ araşdırılır. Məlumat lövhəsi yenidən öz yerinə bərpa olunacaq. Təəssüf ki, abidələrə bu cür yanaşma halları ilə tez-tez rastlaşırıq. Bir daha bütün vətəndaşları, mülkiyyətində və ya istifadəsində tarixi abidələr olan şəxsləri tarixi irsimizə həssas yanaşmağa çağırır, abidələrin qorunması haqqında Azərbaycan Respublikası qanunvericiliyinə riayət olunmasını tələb edirik”.

Sabah Astara və Cəlilabad rayonlarının bir hissəsinə qazın verilişi dayandırılacaq.

“Report”un məlumatına görə, Astara şəhəri istiqamətində diametri 160 mm-lik orta təzyiqli yeraltı qaz xəttinin kipliyə sınaq olunması ilə əlaqədar Astara şəhəri Qum küçəsi, Nizami küçəsi və S.Vurğun küçəsi olmaqla ümumilikdə 2200 abonentin qaz təchizatının sabah saat 10:00-dan işlər yekunlaşana qədər və eləcə də Cəlilabad rayonunun Seyidbazar kəndi istiqamətində olan orta təzyiqli yeraltı qaz kəmərinin kipliyə sınaq edilməsi məqsədilə Cəlilabad şəhəri Səttarxan, H.Aslanov, M. Hadi, Əzizbəyov, Vaqif, A.Azərtürk, Qurtuluş küçəsinin bir hissəsi və Hasıllı, Hacıismayıllı, Seyidbazar kəndləri olmaqla ümumilikdə 3 200 abonentin qaz təchizatının sabah saat 09:00-dan işlər başa çatana qədər dayandırılması planlaşdırılır.

Qaz təchizatı avadanlıqlarını nəzarətdə saxlamaq və təhlükəsizlik tədbirlərinə riayət etmək xahiş edilir.

Ağdaş Rayon İcra Hakimiyyətinin başçısı Tofiq İbrahimovun səhhətində problem yaranıb.

“Unikal”ın əldə etdiyi məlumata görə, o, iki aydır ki, işə çıxmır.

Hazırda Tofiq İbrahimovu onun birinci müavini İsmayıl Yusifzadə əvəz edir.

Onun nə vaxt işinə qayıdacağı bəlli deyil.

Məcburi Köçkünlərin Sosial İnkişaf Fondunun direktoru, Mili Məclisin VI çağırış deputatı Mahir Abbaszadə barəsində inzibati protokol tərtib edilib.

“Qaynarinfo”nun əldə etdiyi məlumata görə, Mahir Abbaszadə İnzibati Xətalar Məcəlləsinin 327.8-ci maddəsi ilə ittiham edilir.

İş baxılması üçün Nərimanov Rayon Məhkəməsinə göndərilib və hakim Vüsal Qurbanovun icraatına verilib.

327.8-ci maddə nəqliyyat vasitələrinin sürücüləri tərəfindən yol hərəkəti qaydalarının pozulması – zərər çəkmiş şəxsin sağlamlığına yüngül bədən xəsarətinin yetirilməsi ilə bağlıdır. Maddədən aydın olur ki, Mahir Abbaszadə qəza törədib və nəticədə zərərçəkmiş şəxs yüngül bədən xəsarəti alıb. Maddədə inzibati cəza növü kimi 300 manat məbləğində cərimə edilməsi və ya nəqliyyat vasitəsini idarə etmək hüququnun 6 аydаn 1 ilədək müddətə məhdudlaşdırılması nəzərdə tutulur.

Mahir Abbaszadə 2018-ci ildə Məcburi Köçkünlərin Sosial İnkişaf Fondunun direktoru vəzifəsinə təyinat alıb. Deputat kimi isə Milli Məclisdə 121 saylı Laçın seçki dairəsini təmsil edir.

Azərbaycan Ordusunun zabiti bədbəxt hadisə nəticəsində həlak olub.

Bu barədə Müdafiə Nazirliyindən məlumat verilib.

“Azərbaycan Ordusunun zabiti Seydullah Sadiq oğlu Məhərrəmovun baş vermiş bədbəxt hadisə nəticəsində həlak olması ilə bağlı məlumatı təsdiq edirik.

Faktla bağlı araşdırma aparılır.

Müdafiə Nazirliyinin rəhbərliyi həlak olan hərbi qulluqçumuzun ailəsinə və yaxınlarına dərin hüznlə başsağlığı verir, səbir diləyir. Allah rəhmət eləsin!”, – məlumatda deyilir.

“Qanunsuz tikililərlə bağlı mübarizə Bərdədə ən yüksək səviyyədə aparılır. Zaman-zaman çoxsaylı qanunsuz tikintiyə cəhd halları olsa da, bunun qarşısı alınıb”.

Bunu Gununsesi.info-ya açıqlamasında Bərdə Rayon İcra Hakimiyyətinin başçısı Vidadi İsayev rayonda qanunsuz tikililərə göz yumduğu üçün töhmət alması barədə xəbərə münasibətində deyib.

Həmin məlumatda bildirilir ki, FHN və Arxitektura və Şəhərsalma Komitəsinin birgə yoxlaması zamanı Bərdədə çoxsaylı tikililər aşkarlanıb və buna görə Prezident Administrasiyası tərəfindən Vidadi İsayevə töhmət verilib.

İcra başçısı FHN, Dövlət Əmlak Xidməti və Arxitektura və Şəhərsalma Komitəsinin belə bir yoxlama apardığını təsdiqləyib:

“Ancaq bu yoxlama təkcə Bərdədə deyil, bütün rayonlarda, şəhərlərdə aparılır. Bu məsələlər cənab prezidentin diqqətindədir. Tikintiyə məsul qurum da icra hakimiyyəti deyil. Mövcud qanunvericiliyə görə, bir neçə qurumun razılığından sonra tikinti aparılmalıdır. Bərdədə də bunlara ciddi nəzarət olunur. Ancaq mənə töhmət verilməsi barədə məlumat doğru deyil”.