Month: July 2025

Xalq artisti Alim Qasımova tanınmış reper Gölgədən təklif gəlib.

Bu barədə Qaynarinfo-ya muğam ifaçısının prodüseri İlkin Robin məlumat verib. Onun sözlərinə görə, xanəndə reperin ona etdiyi təklifə razılıq verməyib:

“Alim müəllim gedib onlarla görüşüb, şəkil də söhbət əsnasında çəkilib. Amma sözügedən layihə ilə bağlı dəqiq bir qərar verilməyib. Yəqin ki, Alim müəllim qərarını yaxın vaxtlarda açıqlayacaq”.

Xatırladaq ki, bir müddət öncə Xalq artisti dəvət aldığı məclislərin birində rep demişdi. Onun bu ifası sosial şəbəkələrdə böyük müzakirəyə səbəb olmuşdu.

Dünyanı görmədən duyan, əlləri, qəlbi ilə musiqiyə toxunan qarmon ifaçısı Fidan Quliyeva iradənin və ümidin sübutudur.

O, anadangəlmə görmə məhdudiyyətlidir. Buna baxmayaraq qarmonda məharətlə ifa edir. Uşaqlıqdan musiqiyə həvəs göstərən Fidanın valideynləri onu musiqi məktəbinə qoyurlar. Orada müəllimi Vüsal Qəhrəmanovun sayəsində qarmonu öyrənir və sevir.

Fidan hazırda 5 saylı respublika xüsusi internat məktəbində təhsil alır. Deyir ki, qarmon ifa etmək o qədər də asan deyil, amma bunun öhdəsindən uğurla gəlir.

O söyləyir ki, əgər gözləri açılsaydı, ilk görmək istədiyi şey işıq olardı.

Ətraflı Baku TV-nin videomaterialında:

Rusiyanın Saratov şəhərində yolda Azərbaycan bayraqları ilə hərəkət edən avtomobillərin görüntüləri yayılıb.

Görüntülər “Mnoqonatsional” teleqram kanalında paylaşılıb.

Videodan maşınların qırmızı və ağ lentlərlə bəzədildiyini də görmək mümkündür. Ehtimal edilir ki, avtomobillər toy karvanının bir hissəsi olub.

Rusiya Daxili İşlər Nazirliyinin Saratov vilayəti üzrə Baş İdarəsindən TASS-a bildirilib ki, videogörüntü ilə bağlı araşdırmalara başlanılıb.

Həmin görüntüləri təqdim edirik:

Son zamanlar Xəzər dənizi sahillərində su ilanlarının sayında artım müşahidə olunur. Yay mövsümündə çimərliklərə axın edən vətəndaşlar sahil ərazilərdə tez-tez bu canlılarla qarşılaşırlar.

“Qafqazinfo” xəbər verir ki, dənizdə ilanla qarşılaşan, hətta onunla mübarizə aparmalı olanlardan biri də QHT sədri Mahirə Əmirhüseynovadır.

Feysbuk hesabında bununla bağlı paylaşım edən qadın qeyd edib ki, hadisə Şıxov çimərliyində olub: “Dünən havanın istisinə sevincək olub 6 qadın Şıxov çimərliyinə üz tutduq. Dənizdə bizdən başqa tək bir oğlan var idi. Üzdüyümüz anda İradə xanımın qoluna ilan sarıldı, təsəvvür edin, nə hala düşdük. Köməyə gələn bəy ilanın başından tutub dənizdən çıxardı. Bu adam olmasaydı, qorxudan 6 meyit olmuşduq. Hələ də özümüzə gələ bilmirik, qışqırmaqdan səsimiz də batıb.

Bu oğlan bizim qəhrəmanımız oldu. Adını bilmədiyimiz həmin şəxsə təşəkkür edirik. Allah onu qorusun!”

Xəzərin sahilindəki çimərliklərdə su ilanlarının olması normal hal kimi qarşılansa da, ilk dəfə onu görənləri qorxudur. Onlarla üz-üzə gəlməmək üçün sahillərdə daşlı-qayalı ərazilərdən, qamışlıq yerlərdən uzaq durmaq lazımdır.

Azərbaycan Milli Elmlər Akademiyası (AMEA) Zoologiya İnstitutunun biologiya üzrə fəlsəfə doktoru, dosent Təvəkkül İsgəndərov də saytımıza açıqlamasında qeyd edib ki, bununla bağlı hər hansı bir tədbir görülə bilməz: “Bəzi çimərlik yerlərinə bitişik daşlı-qayalı quru yerlər var, onlar da həmin ərazilərdə yaşayır. Bunların içərisində zəhərli gürzələr də var. Lakin bu canlıların dənizlə əlaqəsi yoxdur, yəni nə qidalanmaq üçün, nə də çoxalmaq üçün. Onlar çimərliyin dəniz olan hissəsinə girmirlər. Ancaq insanlar ərazidə səs edərsə, ocaq yandırarsa, maşın saxlayarsa, həmin ilanlar oyanır. Belə narahatlıqlar olduqda onlar özlərini xilas etmək üçün suya atılırlar. Bu təbii ki, çox nadir ehtimaldır. Ancaq sırf su ilanı insan üçün təhlükəli deyil.

Bunlardan qorunmaq üçün nə tədbir görülə bilər ki? İlanları tutub başqa yerə apara bilmərik ki, burada insanlar istirahət edir. Yəni, bu, mümkün deyil. Amma hər bir halda insan üçün təhlükəlidir. İnsanlar sadəcə ehtiyatlı olmalıdır”.

Bakıda mağazadan alınan uşaq peçenyesinin içindən dəmir parçasının çıxdığı iddia olunur.

Bu barədə Mirəli Süleymanov adlı valideyn sosial şəbəkə hesabında paylaşım edib.

“Bu, uşaqlar üçün alınan “Bolluq LTD” MMC məhsuludur. Sizcə, bunu uşaq yesə, sağ qalarmı?! Çox məsuliyyətsizlik edirlər, uşağı zülmlə saxla, hansısa firmanın diqqətsizlik və məsuliyyətsizliyinə qurban ver. Utanın heç olmasa, öz övladlarınızı düşünün”, – deyə M.Süleymanov bildirib.

Məsələ ilə bağlı “Bolluq LTD” MMC-nin Keyfiyyətə nəzarət və laboratoriya departamentinin müdiri Məmməd Dünyamalıyev saytımıza açıqlamasında bildirib ki, şikayət araşdırılıb və həmin məhsulun “Bolluğ”a məxsus olmadığı üzə çıxıb: “Məlumat bu gün səhər bizə daxil olub. Həmin məhsulun foto müşahidəsi aparılanda elə görünür ki, qeyd olunan peçenye yağlıdır və onun tərkibi iki lay qatdan ibarətdir. Amma orada göstərilən məhsul isə üçqatlı tort məhsulunun strukturudur. Yəni ambalaj bizimdir, amma orada qoyulan məhsulun isə bizim məhsulla uzaqdan-yaxından əlaqəsi yoxdur. Dəfələrlə belə hallar baş verib. Yəni sellofan bizim olur, içinə isə suxarı məhsulu tökürlər ki, bu, “Bolluğ”un məhsuludur, içindən iy gəlir və s. Məhsulu araşdırdıqda isə görürsən ki, suxarı qırıntılarının heç bizim istehsalımızla əlaqəsi yoxdur. Bunlar hamısı şantaj xarakterlidir və yaxud müəyyən bir vəsait almaq üçün edilir”.