Month: December 2025

Bu gün Qroznıda, Ümummilli lider Heydər Əliyevin adını daşıyan meydanda 2024-cü il dekabrın 25-də Bakıdan Qroznıya uçan “Azərbaycan Hava Yolları”na (AZAL) məxsus sərnişin təyyarəsinin qəzaya uğraması nəticəsində həlak olanların xatirəsinə ucaldılmış memorial lövhənin açılış mərasimi keçirilib.

Bu barədə Median.Az Azərbaycanın Rusiyadakı səfirliyinə istinadən xəbər verir.

Açılış mərasimində Azərbaycanın Rusiyadakı səfiri Rəhman Mustafayev, AZAL prezidenti Samir Rzayev, Rusiya Federasiyası Çeçenistan Respublikası hökumətinin rəhbəri Qalas Taymasxanov, Çeçenistan Respublikası hökuməti və parlamentinin nümayəndələri, eləcə də yerli Azərbaycan icması iştirak edib.

AZAL prezidenti Samir Rzayev mərasimdə çıxışı zamanı memorial lövhənin ucaldılması qərarına görə Çeçenistan Respublikasının rəhbəri Ramzan Kadırova minnətdarlığını bildirib.

O qeyd edib ki, memorial lövhənin Heydər Əliyev adına parkda ucaldılması dərin simvolik əhəmiyyətə malikdir. Azərbaycan xalqının Ümummilli lideri Heydər Əliyevin adı dövlətçilik və məsuliyyət ideyaları ilə ayrılmaz şəkildə bağlıdır.

S.Rzayev vurğulayıb ki, faciənin xatirəsi, şübhəsiz ki, sülhün, insan həyatının və xalqlar arasında etimadı qorumağın zəruriliyini xatırlatmağa xidmət edəcək. Memorial lövhə humanizm, insani mərhəmət və Azərbaycan–Çeçenistan dostluğunun rəmzinə çevriləcək və burada həmişə sükut, xatirə, ehtiram hökm sürəcək.

Dekabrın 25-dən etibarən Kənd Təsərrüfatı Nazirliyinin tabeliyində fəaliyyət göstərən “Aqrar Tədarük və Təchizat” ASC-nin təşkilatçılığı ilə Bakının daha yeddi ərazisində və Sumqayıt şəhərində “Kənddən Şəhərə” Yeni il yarmarkaları keçiriləcək. Yeni il və Dünya Azərbaycanlılarının Həmrəyliyi Günü münasibətilə təşkil olunan yarmarkalar Sumqayıt şəhərinin 9-cu mikrorayon ərazisində (köhnə “Şərq bazarı”nın yaxınlığı), Bakıda isə “Əhmədli”, “Xalqlar Dostluğu”, “Neftçilər”, “Qara Qarayev”, “Nəriman Nərimanov”, “Elmlər Akademiyası” və “Azadlıq” metro stansiyalarının yaxınlığında fəaliyyət göstərəcək. “Kənddən Şəhərə” yarmarkaları dekabrın 29-dək davam edəcək.

Bu barədə Kənd Təsərrüfatı Nazirliyi məlumat yayıb.

Bildirilib ki, yarmarkaların təşkilində əsas məqsəd fermerlərin satış imkanlarını genişləndirmək, regionlardan gətirilən yerli məhsulları daha çox istehlakçıya çatdırmaq, bayram günlərində vətəndaşların keyfiyyətli, təbii və yerli məhsullara rahat çıxışını təmin etməkdir. Layihə çərçivəsində xüsusilə kiçik və orta fermer təsərrüfatlarında istehsal olunan məhsulların bazara çıxışının təmin olunmasına xüsusi önəm verilir.

Yarmarkalarda ölkənin 40-a yaxın regionundan iştirak edəcək 160-a yaxın fermer öz təsərrüfatlarında yetişdirdikləri 150-dən artıq çeşiddə məhsulu satışa çıxaracaqlar.

Qeyd edək ki, təşkil olunan yarmarkalarda fermerlər satış üçün yer, piştaxta, tərəzi və digər zəruri avadanlıqlarla ödənişsiz şəkildə təmin olunurlar.

Sumqayıt Dövlət Universitetinin nəzdində fəaliyyət göstərən Sumqayıt Dövlət Texniki Kollecinin 21 illik direktoru Mətanət Səfər qızı Piriquliyeva vəzifəsindən azad olunub.

Məlumatı Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyindən Xeberle.com-a təsdiqləyiblər.

Qeyd edək ki, Mətanət Piriquliyeva 2004-cü ildə Təhsil Nazirinin sərəncamı ilə Sumqayıt Dövlət Texniki Kollecinin direktoru təyin edilib.

“Valideyn himayəsindən məhrum olmuş uşaqların müəssisəyə yerləşdirilməsi zamanı onların fikirləri, maraqları, etnik mənşəyi, müəyyən dinə və mədəniyyətə mənsubiyyəti, ana dili, təhsili və tərbiyəsi üçün daha əlverişli şərait və yerləşdirmənin uşaq üçün təhlükəsizliyi nəzərə alınır”.

Bu barədə Baku.ws-in sorğusuna cavab olaraq Sosial Xidmətlər Agentliyindən bildirilib.

Qeyd edilib ki, eləcə də uşağın sağlamlıq vəziyyəti qiymətləndirilir. Uşaq səhiyyə müəssisələrində müvafiq tibbi müayinələrdən keçirildikdən sonra aidiyyəti üzrə müəssisəyə yerləşdirilir:

“Uşağın yaşı, sağlamlıq vəziyyəti, istək və mənafeləri, bacarıqları və digər xüsusiyyətləri nəzərə alınmaqla fərdi inkişaf planı tərtib edilir. Fərdi inkişaf planında uşağın emosional və psixoloji vəziyyəti ilə əlaqədar tədbirlər də öz əksini tapır və sosial işçi tərəfindən uşaqlarla mütəmadi iş aparılır.

Uşaqların qohumlarına qəyyumluğa, himayəyə və qohum olan şəxslər olan himayədar ailəyə verilməsi imkanları araşdırılır, bu mümkün olmadıqda uşağın övladlığa verilməsi üçün prosesə başlanılır.

Övladlığagötürmə çərçivəsində valideyn himayəsindən məhrum olmuş sağlam uşaqlara görə aylıq 240 manat, 18 yaşınadək əlilliyi olan uşaqlara görə isə 600 manat məbləğində aylıq müavinət ödənilir. Həmin uşaqlar himayədar ailəyə yerləşdirildikdə isə sağlam uşağa görə aylıq ödəniş 355–395 manat, 18 yaşınadək əlilliyi olan uşağa görə isə 500–650 manat təşkil edir. Himayədar ailəyə verilmiş uşaqlara mövsümi geyimin alınması üçün 200 manat məbləğində rüblük müavinət də təyin edilir”.

Yanvarın 28-də Azərbaycanın regionlarında 7 torpaq müsabiqəsi və 9 torpaq hərracı keçirəcək.

Median.Az bu barədə İqtisadiyyat Nazirliyi yanında Əmlak Məsələləri Dövlət Xidmətinə (ƏMDX) istinadən xəbər verir.

Məlumata görə, hərraclar Dövlət Xidmətinın Sumqayıt, Gəncə, Xaşmaz və Cəlilabad ərazi şöbələrində olacaq. Müsabiqə və hərraclara müxtəlif bələdiyyə orqanlarına məxsus 16 torpaq sahəsi çıxarılacaq.

Hərraclar barədə ətraflı məlumatı buradan əldə etmək mümkündür.