Month: February 2026

Mədəni sərvətlərin qorunması üzrə tələblərin pozulmasına görə 30 min manatadək cərimə tətbiq ediləcək.

İnzibati Xətalar Məcəlləsində bununla bağlı dəyişikliklər fevralın 1-dən qüvvəyə minib.

Belə ki, mədəni sərvətlərin mühafizə siyahısına daxil edilmiş milli mədəni irs obyektlerinin Azərbaycan Respublikasının ərazisindən qanunsuz aparılmasına görə fiziki şəxslər 3 min manat məbləğində, vəzifəli şəxslər 6 min manat məbləğində, hüquqi şəxslər 20 min manat məbləğində cərimə ediləcək. Bu əməllərin törədilməsi nəticəsində mədəni sərvətlərin korlanmasına görə, bu az miqdarda (“az miqdarda” dedikdə, 3 min manatdan yuxarı olmayan məbləğ başa düşülür) ziyan vurduqda fiziki şəxslər 5 min manat məbləğində, vəzifəli şəxslər 10 min manat məbləğində, hüquqi şəxslər 30 min manat məbləğində cərimə ediləcək.

Həmçinin, mədəni sərvətlərin mühafizə siyahısına daxil edilmiş mədəni sərvətlərin müvafiq icra hakimiyyəti orqanının müəyyən etdiyi orqanla (qurumla) razılaşdırılmadan başqa yerə köçürülməsinə, eləcə də onların toxunulmazlığını pozan və onlar üçün təhlükə yaradacaq tikinti-quraşdırma, bərpa, rekonstruksiya, konservasiya işlərinin və ya abadlaşdırma tədbirlərinin aparılmasına görə fiziki şəxslər 3 min manat məbləğində, vəzifəli şəxslər 6 min manat məbləğində, hüquqi şəxslər 20 min manat məbləğində cərimə ediləcək.

Bununla yanaşı, Mədəni və təbii irsin, o cümlədən “Tarix və mədəniyyət abidələrinin qorunması haqqında” Qanuna uyğun olaraq tarix və mədəniyyət abidələrinin qorunması və istifadəsi üzrə tələblərin pozulmasına görə fiziki şəxslər 700 manat məbləğində, vəzifəli şəxslər 1000 manat məbləğində, hüquqi şəxslər 3 min manat məbləğində cərimə ediləcək. Bu əməllərin törədilməsi nəticəsində mədəni sərvətlərin korlanmasına görə, bu az miqdarda (“az miqdarda” dedikdə 3 min manatdan yuxarı olmayan məbləğ başa düşülür) ziyan vurduqda fiziki şəxslər 5 min manat məbləğində, vəzifəli şəxslər 10 min manat məbləğində, hüquqi şəxslər 30 min manat məbləğində cərimə ediləcək. Bu xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər 1000 manat məbləğində, vəzifəli şəxslər 1 500 manat məbləğində, hüquqi şəxslər 6 min manatməbləğində cərimə ediləcək.

Bundan əlavə, inşaat və digər təsərrüfat işləri görülərkən tarix və ya mədəniyyət abidəsi aşkar edildikdə dərhal işləri dayandıraraq, bu barədə müvafiq icra hakimiyyəti orqanının müəyyən etdiyi orqana (quruma) məlumat verilməməsinə, habelə dəfinələrdə aşkar edilmiş və ya tapılmış abidələrin dövlətə təhvil verilməməsinə görə fiziki şəxslər 200 manat məbləğində, vəzifəli şəxslər 400 manat məbləğində, hüquqi şəxslər 3 min manat məbləğində cərimə ediləcək./Trend

“Alıcılar at əti ilə mal ətini ayrıd edə bilməz”.

Bunu Qaynarinfo-ya açıqlamasında iqtisadçı ekspert Vahid Məhərrəmli deyib. Onun sözlərinə görə, satıcılar at ətini hissələrə bölürlər:

“Xarici görünüşünə görə onu digər heyvanların ətindən ayrımaq mümkün deyil. Çünki bazarda həm arıq, həm kök, həm də çıxdaş olmuş heyvanların əti var, onu yalnız laboratoriya ayrıd edə bilər. İstehlakçıların özlərinin laboratoriyaları yoxdur. İstehlakçılar laboratoriyaya da müraciət etmək istəmirlər. Onun üçün ödəniş etmək lazımdır. İnsanlar 1-2 kiloqram ət alırlar, həmin əti laboratoriyaya verib yoxlatmaq alıcıya baha başa gələn prosesdir”.

Vahid Məhərrəmli hesab edir ki, bazara nəzarət olunmalıdır:

“Təklif eləmişik ki, bütün heyvanlar uçota alınsın. Məsələn, atın qulağında birka olmalıdır ki, bu heyvan qeydiyyatdadır. Əgər kəsilirsə və yaxud çıxdaş olursa, ölürsə, həmin heyvanla bağlı nəsə baş verirsə, mütləq sahibi onlayn uçot sisteminə məlumat verməlidir. Belə olan halda heç kim ölmüş və yaxud da çıxdaş olunmuş heyvanı kəsib bazara çıxarmağa cəsarət edə bilməz. İnformasiya mərkəzə daxil olduqdan sonra yerlərdə, rayonlarda aqrar inkişaf mərkəzlərinin mütəxəssisləri həmin heyvanın göstərilməsini tələb edir və bundan sonra onu aktlaşdırırlar. Əgər heyvan xəstə olursa, yaxud çıxdaş edilirsə, mütləq onun utilizasiyası baş verməlidir. Yox, əgər heyvan kəsilirsə, istifadəyə yararlıdırsa, həmin sahibkara əti bazara çıxartmaq imkanı verilir”.

Qeyd edək ki, Tərtərdə polis əməkdaşları ilə Qida Təhlükəsizliyi Agentliyinin mütəxəssislərinin iştirakı ilə keçirdikləri tədbir zamanı qanunsuz ət kəsimi ilə məşğul olan Tural Cəfərov, Seymur Məmmədov, Seyfəddin Quliyev və Həsən Cəfərli saxlanılıblar. Onlar çəkisi 146 kiloqram olan qidaya yararsız at ətini mal əti adı altında Bakı şəhərinə apararaq orada satmaq istəyiblər.

Fevralın 8-9-da bəzi bölgələrdə güclü külək əsəcək.

Bu barədə Milli Hidrometeorologiya Xidməti sarı xəbərdarlıq yayıb.

Belə ki, Balakən, Zaqatala, Qax, Şəki, Oğuz, Qazax, Ağstafa, Tovuz, Şəmkir, Gəncə, Naftalan, Samux, Goranboy, Mingəçevir, Tərtər, Yevlax, Bərdə, Xızı, Qusar, Qobustan, Kəlbəcər, Laçın, Füzuli, Zəngilan, Cəbrayıl, Daşkəsən, Gədəbəy, Salyan, Neftçala, Hacıqabul, Sabirabad, Lerik və Yardımlıda qərb küləyi əsəcək, küləyin sürəti 13.9-20.7 m/san təşkil edəcək. ‎