“Badam Medical” cüzi miqdarda borca düşüb.
Median.Az bu barədə İqtisadiyyat.az-a istinadən xəbər verir.
Məlumata görə, “Badam Medical”ın Dövlət Vergi Xidmətinin Bakı şəhəri Lokal Gəlirlər Baş İdarəsinə 2101.88 manat borcu yaranıb.
Qeyd edək ki, “Badam Medical”ın qanuni təmsilçisi Fuad Məmmədovdur.
Son on beş ildə günəş enerjisi texnologiyaları əhəmiyyətli dərəcədə inkişaf edib və daha əlçatan olub. Bu gün yeni elektrik istehsalı güclərinin 80%-dən çoxu məhz bu ekoloji təmiz enerji mənbəyinin payına düşür.
Median.Az “Blikk” nəşrinə istinadən xəbər verir ki, bazarda artıq daha sadə bir həll ortaya çıxıb – birbaşa rozetkaya qoşulan günəş panelləri. Bunun üçün hazır dəsti almaq, onu günəş düşən yerdə – məsələn, balkon məhəccərində və ya qaraj damında yerləşdirmək və sadəcə rozetkaya qoşmaq kifayətdir.
Qeyd olunur ki, bu panellərin quraşdırılması üçün mütəxəssis tələb olunmur və bütün proses çox qısa vaxtda tamamlanır. Üstəlik, köç zamanı bu panelləri asanlıqla söküb özünüzlə aparmaq mümkündür.
Məlumata görə, gücü 800 vatt olan belə bir sistem orta statistik ev təsərrüfatının enerji tələbatının təxminən 20%-ni qarşılaya bilər. Almaniyada artıq bir milyondan çox belə sistem fəaliyyət göstərir və birlikdə 1,6–2,4 qiqavat enerji istehsal edir. Bu isə eyni anda yarım milyon elektrik çaydanının işləməsinə bərabərdir.
Qiymətləndirmələrə əsasən, bütün Avropa üzrə bu tip qurğuların sayı 5 milyona çata bilər. Onlar ümumi enerji təchizatında böyük paya malik olmasa da, ayrı-ayrı ev təsərrüfatları üçün ciddi qənaət imkanı yaradır.
Ekspertlər xəbərdarlıq edir ki, bu panelləri quraşdırmazdan əvvəl elektrik naqillərinin vəziyyəti yoxlanılmalıdır. Əsas problemlərdən biri qoruyucu açarların (RCD) hər zaman iki istiqamətli cərəyanla işləməyə uyğun olmamasıdır.
Bundan əlavə, günəş panellərindəki ağ xətlərin funksiyası da izah olunur. Bu xətlər sadəcə dekorativ element deyil. Daha nazik xətlər “barmaqlar” adlanır və elektronların hərəkəti üçün yol rolunu oynayır. Daha qalın xətlər isə “şinlər”dir – onlar enerjini toplayaraq inverter vasitəsilə məişətdə istifadə olunan dəyişən cərəyana çevirir.
“Google”un işə qəbul üzrə vitse-prezidenti Brayan Onq bildirib ki, CV-də ən böyük problem format deyil, namizədin düşüncə tərzidir.
Qaynarinfo xəbər verir ki, “Forbes”a müsahibəsində işəgötürənlərin dərhal mənfi qiymətləndirdiyi üç əsas “qırmızı bayrağ”ı açıqlayıb.
1. Həmişə haqlı olmağa çalışma və məhdud düşüncə
Peşəkar özünəinam müsbət keyfiyyət sayılsa da, köhnə yanaşmalara bağlı qalmaq və daim haqlı olmağa çalışmaq ciddi mənfi siqnaldır. Bu, geribildirimə qapalı olmaq, təkəbbür və aşağı emosional intellekt kimi qiymətləndirilir.
CV-də bu, belə görünür:
* karyera inkişafının olmaması (məsələn, yüksəlişin olmaması)
* son illərdə yeni bilik və sertifikatların əldə edilməməsi
Əgər son 3 ildə özünüzü inkişaf etdirməmisinizsə, bu, texnologiya və innovasiyaya yönəlmiş şirkətlər üçün ciddi mənfi göstəricidir.
2. Aşağı uyğunlaşma qabiliyyəti
Onqun sözlərinə görə, qeyri-müəyyən şəraitdə işləmək bacarığı ən vacib keyfiyyətlərdən biridir. Müasir iş mühiti daim dəyişir və işəgötürənlər çevik insanlara üstünlük verir.
CV-də bu problem belə üzə çıxır:
* dəyişikliklərə necə uyğunlaşdığınızı göstərən nümunələrin olmaması
* yalnız vəzifə siyahısı təqdim edilməsi, real nəticə və təsirin göstərilməməsi
Yəni, sadəcə nə etdiyinizi deyil, çətin şəraitdə nəyi necə dəyişdirdiyinizi və hansı nəticə əldə etdiyinizi göstərmək vacibdir.
3. Təşəbbüs göstərmək əvəzinə göstəriş gözləmək
Bu, liderlik çatışmazlığı kimi qəbul olunur. İşəgötürənlər yalnız tapşırıqları yerinə yetirən deyil, məsuliyyət götürən və təşəbbüs göstərən əməkdaşlar axtarır.
CV-də bu səhv adətən belə görünür:
* “kömək etdim”, “dəstək oldum” kimi passiv ifadələrdən istifadə
* şəxsi təsirin və məsuliyyətin vurğulanmaması
Əvəzində, “rəhbərlik etdim”, “təşkil etdim”, “həyata keçirdim” kimi ifadələr istifadə olunmalıdır. Bu sözlər nəticəyə görə məsuliyyət daşıdığınızı göstərir.
Brayan Onq vurğulayıb ki, bu üç amil işəgötürənlərin namizədləri ilkin mərhələdə dəyərləndirərkən ən çox diqqət yetirdiyi məqamlardır.
Dünya Bankı 2026-cı ildə Azərbaycanda ümumi daxili məhsulun (ÜDM) 2%, 2027-ci ildə isə 1.8% artacağını proqnozlaşdırır.
Bu barədə məlumat Dünya Bankının Avropa və Mərkəzi Asiya regionu üzrə iqtisadi proqnozunun (ECA Economic Update) son yenilənməsində yer alıb.
Bildirilir ki, yanvar qiymətləndirmələri ilə müqayisədə proqnoz göstəriciləri müvafiq olaraq 0.2 və 0.1 faiz bəndi artırılıb. Qeyd edilir ki, Azərbaycan iqtisadiyyatı 2025-ci ildə 1.4% artıb.
Dünya Bankının proqnozlarına əsasən, 2026 və 2027-ci illərdə Cənubi Qafqaz dövlətlərinin ÜDM-nin ümumi artımı hər il 3.4%-ə çatacaq.
Paytaxtın Binəqədi rayonunda azyaşlının avtomobil idarə etməsi ilə bağlı kadrlar yayılıb.
Median.Az xəbər verir ki, bu barədə Baku.ws-in “qaynar xətti”nə görüntülər göndərilib.
Görüntüləri göndərən şəxs qeyd edib ki, demək olar, hər gün Heydər məscidinə yaxın ərazidə bir qrup insan maşınlarını azyaşlılara verirlər. Onlar da yolda təhlükəli vəziyyət yaradırlar.
Şikayətçilər bu barədə tədbir görülməsini xahiş edirlər.
Bakıda avtobus dayanacağında yatan vətəndaşın 680 manatı oğurlanıb.
Qaynarinfo-nun məlumatına görə, hadisə barədə polisə məlumat verildikdən sonra cinayətin üstü açılıb.
Məlum olub ki, zərəçəkmiş S. Rafiqoğlunun pulunu oğurlayan həmin vaxt ərazidən keçən İ.Tahirov adlı şəxsdir. O, saxlanılıb və barəsində Cinayət Məcəlləsinin 177.2.5-ci maddəsi ilə ittiham elan edilib.
Cinayət işinə Nəsimi Rayonu Məhkəməsində hakim Ceyhun Tağıyevin sədrliyi ilə baxılıb.
Müttəhim məhkəmə zamanı özünü verilmiş ittihamla təqsirli bilib. Bildirib ki, oğurluq edərkən içkili olub.
Məhkəmənin hökmü ilə İ.Tahirova 2 il müddətinə azadlığın məhdudlaşdırılması cəzası təyin edilib. Onun şübhəli şəxs qismində saxlanıldığı 2 gün müddət 1 günə 2 gün hesabı ilə təyin olunmuş cəzadan çıxılıb və üzərində qəti olaraq 1 il 11 ay 26 gün müddətinə azadlığın məhdudlaşdırılması cəzası saxlanılıb.
“OpenAI” süni intellektin (Al) iqtisadiyyatı köklü şəkildə dəyişdirəcəyini bildirir. Şirkət 4 günlük iş həftəsi, yeni vergi modeli və süni intellekt gəlirlərinin cəmiyyətə paylanması kimi diqqətçəkən təkliflər irəli sürüb.
“OpenAI”ın “Industrial Policy for the Intelligence Age” adlı sənədində açıq mesaj verilir: süni intellekt üçün dövlət nəzarəti lazımdır və bu proses təxirə salınmamalıdır.
Şirkətin fikrincə, süni intellekt yalnız yeni texnologiya deyil. Al iqtisadiyyatı, əmək bazarını və cəmiyyətin strukturunu dəyişdirəcək qədər böyük transformasiya yaradır. Bu səbəbdən hökumətlər də bu dəyişikliklərə uyğun yeni iqtisadi siyasət hazırlamalıdır.
Süni intellekt ən çox iş yerlərinə təsir edəcək
Sənəddə əsas risk kimi iş yerlərinin itirilməsi göstərilir. “OpenAI” süni intellektin uzunmüddətli perspektivdə böyük fayda verəcəyini vurğulayır. Lakin eyni zamanda bəzi peşələrin və hətta bütöv sahələrin tamamilə dəyişə biləcəyini də qəbul edir.
Sənəddə qeyd olunan digər risklər:
* Demokratiyaya mümkün təsirlər
* Sərvətin az sayda şirkət və şəxslərin əlində cəmlənməsi
* Texnologiyanın pis niyyətli şəxslər tərəfindən istifadə olunması
Beləliklə, süni intellekt yalnız texnologiya deyil, həm də iqtisadi və sosial məsələ kimi qiymətləndirilir.
Yeni sahə: Qayğı və əlaqə iqtisadiyyatı
İnsanlar işlərini itirərsə, nə baş verəcək? “OpenAI” hesab edir ki, yeni bir sahə – “care and connection economy” (qayğı və əlaqə iqtisadiyyatı) sürətlə inkişaf edəcək.
Bu sahəyə daxildir:
* Uşaq baxımı
* Yaşlılara qulluq
* Təhsil
* Səhiyyə xidmətləri
* İcma xidmətləri
Yəni insanların birbaşa ünsiyyət qurduğu sahələr. Şirkətə görə, süni intellekt bəzi işləri aradan qaldırsa da, bu istiqamətlərdə yeni məşğulluq imkanları yarana bilər.
4 günlük iş həftəsi təklifi
Sənəddə ən diqqətçəkən təkliflərdən biri iş saatları ilə bağlıdır. “OpenAI” hesab edir ki, hökumətlər və şirkətlər 32 saatlıq, yəni 4 günlük iş həftəsini sınaqdan keçirməlidir. Əsas şərt isə maaşların azaldılmamasıdır.
Təklifə görə, pilot proqramlar həyata keçirilməli, məhsuldarlıq və xidmət səviyyəsi qorunmalıdır. Sistem uğurlu olarsa, 4 günlük iş həftəsi daimi tətbiq edilə və ya işçilərə daha çox məzuniyyət verilə bilər.
Bu yanaşma belə bir ideyaya əsaslanır: əgər süni intellekt daha çox işi görərsə, insanlar daha çox boş vaxta sahib ola bilər.
Vergi sistemi dəyişə bilər
Sənəddə iqtisadiyyatla bağlı daha böyük dəyişiklik ehtimalı da qeyd olunur. Əgər süni intellekt insan əməyinə olan ehtiyacı azaldarsa, dövlətlərin gəlir modeli də dəyişə bilər.
“OpenAI”a görə gələcəkdə:
* Əmək gəlirlərindən toplanan vergilər azala bilər
* Kapital və iri şirkətlərdən alınan vergilər arta bilər
Başqa sözlə, avtomatlaşdırmadan ən çox qazanan şirkətlərin daha çox vergi ödəməsi gündəmə gələ bilər.
Süni intellekt gəlirləri cəmiyyətə paylana bilər
Sənəddə daha radikal bir təklif də yer alır: ictimai sərvət fondu. Bu modeldə süni intellektdən əldə olunan böyük gəlirlər bir neçə şirkətdə cəmlənmir, fonda toplanaraq vətəndaşlara qaytarılır.
Bu yanaşma bəzi ölkələrdəki suveren sərvət fondlarına bənzəyir və məqsəd süni intellektdən yaranan sərvətin geniş kütləyə yayılmasıdır.
Süni intellekt artıq infrastruktur kimi qiymətləndirilir
Sənədin diqqətçəkən tərəflərindən biri də süni intellektin necə təqdim olunmasıdır. “OpenAI” artıq onu sadəcə alət kimi deyil, iqtisadiyyatın əsas infrastruktur elementlərindən biri kimi görür.
Bu yanaşmaya görə, gələcəkdə sənayelər, dövlət xidmətləri və iqtisadi sistem böyük ölçüdə bu texnologiya üzərində qurula bilər.
Optimist gələcək, amma açıq sual qalır
“OpenAI”-nin təqdim etdiyi mənzərə ümumilikdə optimistdir. Şirkət hesab edir ki, süni intellekt iqtisadiyyatı daha səmərəli edə və insanlara daha çox vaxt qazandıra bilər.
Lakin bu ssenarinin reallaşması bir əsas şərtdən asılıdır: məhsuldarlıqdan əldə olunan qazancın işçilərə də çatması. Əks halda, gəlir yalnız şirkətlərin mənfəətinə çevrilə bilər.
Sənədin maraqlı tərəfi odur ki, süni intellekti inkişaf etdirən şirkətlərdən biri indi bu texnologiyanın necə tənzimlənməsi və vergiyə cəlb olunması barədə təkliflər verir. Bunun uzaqgörənlik, yoxsa maraqların qorunması addımı olduğu isə müzakirə mövzusudur.
Bununla belə, 4 günlük iş həftəsi ideyası artıq bir çox insan üçün cəlbedici görünür.
//qaynar.az
Unutqanlıq adi bir hadisə kimi qəbul edilsə də, bəzi hallarda ciddi xəstəliklərin ilkin siqnalı ola bilər. Mütəxəssislər xüsusilə təkrarlanan və həyat keyfiyyətinə təsir edən unutqanlığın diqqətdən kənarda qalmamalı olduğunu bildirir.
Qaynarinfo hübaerturk-e istinadən xəbər verir ki, nevroloq Hasan Armağan Uysal bildirib ki, normal və xəstəliklə bağlı unutqanlıq arasındakı əsas fərq informasiyanın itirilib-itirilməməsidir. Onun sözlərinə görə, gündəlik həyatda açarın yerini unutmaq, adları xatırlamaqda çətinlik çəkmək və ya bir anlıq nə üçün hansısa yerə getdiyini unutmaq normal hesab olunur. Bu hallarda məlumat itmir, sadəcə gec xatırlanır.
Lakin xəstəliklə bağlı unutqanlıq zamanı informasiya tamamilə itə bilər. Bu halda insan eyni sualları təkrar-təkrar verir, hadisələri yenidən danışır və bunun fərqində olmur. Həkimin sözlərinə görə, belə vəziyyət artıq sadə unutqanlıq deyil, ciddi siqnaldır.
Mütəxəssis qeyd edib ki, gündəlik həyatı çətinləşdirən unutqanlıq halları xüsusi diqqət tələb edir. Tanış yerdə yolu itirmək, maliyyə işlərində qarışıqlıq, yemək hazırlayarkən mərhələləri unutmaq və ya söz tapmaqda çətinlik çəkmək kimi hallar “yaşa bağlı normal vəziyyət” kimi qiymətləndirilməməlidir.
Unutqanlığın ən çox rast gəlinən səbəblərindən biri olan alzheimer xəstəliyi adətən gizli şəkildə başlayır. Erkən mərhələdə yeni məlumatları öyrənmək çətinləşir, eyni suallar təkrarlanır və əşyalar qeyri-adi yerlərə qoyulur. Xəstəlik irəlilədikcə isə istiqamət tapmaq, qərar vermək və gündəlik həyatı təşkil etmək daha da çətinləşir.
Bununla yanaşı, hər unutqanlıq ciddi nevroloji problem demək deyil. Xüsusilə gənclərdə unutqanlığın səbəbi çox vaxt yuxusuzluq, stress, depressiya və həddindən artıq informasiya yüklənməsi ilə bağlı olur. Həkim vurğulayıb ki, yaddaşın düzgün işləməsi üçün diqqət vacibdir və bəzən problem yaddaşda deyil, diqqətin zəifləməsində olur.
Mütəxəssis həmçinin bildirib ki, unutqanlıq getdikcə artırsa, gündəlik həyata təsir edirsə və ya davranış dəyişiklikləri ilə müşayiət olunursa, vaxt itirmədən müayinə olunmaq vacibdir. Erkən diaqnoz xəstəliyin gedişini idarə etməyə, müstəqilliyi daha uzun müddət qorumağa və düzgün müalicəyə vaxtında başlamağa imkan yaradır.
Sonda həkim beyin sağlamlığını qorumaq üçün sağlam həyat tərzinin vacibliyini qeyd edib. Onun sözlərinə görə, müntəzəm fiziki aktivlik, keyfiyyətli yuxu, sosial ünsiyyət, yeni biliklər öyrənmək və ümumi sağlamlıq göstəricilərinə nəzarət yaddaşın qorunmasında mühüm rol oynayır.
Sabah Bakının Sabunçu və Binəqədi rayonlarının bir hissəsinin təbii qazla təchizatında fasilə yaranacaq.
Median.Az bu barədə Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin Tərtər regional Qaz İstismar İdarəsinə istinadən xəbər verir.
Məlumata əsasən, qaz xətlərində aparılacaq təmir-quraşdırma işləri ilə əlaqədar saat 10:00-dan etibarən Sabunçu rayonu üzrə Maştağa-Gülçülük, Südçülük, Daş Karxanası və Subtropik Sovxoz ərazisinin, Binəqədi rayonu üzrə isə 7-ci mikrorayon, A.Kunanbayev, İ.Hacıyev və S.Axundov küçələrinin qaz təchizatı müvəqqəti dayandırılacaq.
Ədliyyə Nazirliyinin Penitensiar Xidmətinin 6 saylı cəzaçəkmə müəssisəsində baş vermiş yanğın zamanı bir neçə məhbus zəhərləndiyi bildirilib.
Tiraj.az-a daxil olan məlumatda iddia edilir ki, zəhərlənmiş məhbuslar tibb məntəqəsinə yerləşdirilib.
Ədliyyə Nazirliyindən isə sayta bildirilib ki, baş vermiş yanğın hadisəsi ilə bağlı məhkumlar arasında hər hansı zəhərlənmə halı qeydə alınmayıb: “Eləcə də hadisə nəticəsində xəsarət alan yoxdur”.
Xatırladaq ki, aprelin 7-də 6 saylı cəzaçəkmə müəssisəsində yanğın hadisəsi baş verib. Bu haqda Ədliyyə Nazirliyi və Fövqəladə Hallar Nazirliyi Mətbuat xidmətləri birgə məlumat yayıb.
Məlumatda deyilir ki, hadisə yerinə dərhal Fövqəladə Hallar Nazirliyi Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub, yanğın qısa müddət ərzində nəzarətə götürülərək tam söndürülüb.