Median.Az

Month: Aprel 2026

  • Milli Onkologiya Mərkəzindəki hadisənin DETALLARI: Xəstə üzərində partlayıcı ilə otağa daxil olubmuş – FOTO (Yenilənib)

    Aprelin 30-da saat 14 radələrində Səhiyyə Nazirliyinin Milli Onkologiya Mərkəzində partlayışın baş verməsinə dair Yasamal Rayon Prokurorluğuna məlumat daxil olub.

    Bu barədə Baş Prokurorluqdan məlumat verilib.

    Bildirilib ki, ilkin araşdırmalarla onkoloji xəstə kimi qeydiyyatda olan 1988-ci il təvəllüdlü Mübariz Sahib oğlu Əliyevin qanunsuz olaraq əldə edib saxladığı partlayıcı vasitəni qeyd olunan müalicə müəssisəsinin Radiologiya şöbəsində partlatması nəticəsində həkim Asif Akif oğlu Nəsirovu ümumi təhlükəli üsulla qəsdən öldürməyə cəhd etməsinə əsaslı şübhələr müəyyən edilib.

    Baş vermiş partlayış nəticəsində Mübariz Əliyev aldığı xəsarətlərdən hadisə yerində ölüb, ağır bədən xəsarətləri alan Asif Nəsirovun isə hazırda vəziyyəti ağır olaraq qiymətləndirilir, müalicəsi xəstəxana şəraitində davam etdirilir.

    Aidiyyəti hüquq-mühafizə orqanlarının əməkdaşlarından ibarət istintaq-əməliyyat qrupu tərəfindən tibb sahəsində ekspertin iştirakı ilə isti izlər əsasında hadisə yerinə baxış keçirilib, cinayətin izlərini əks etdirən maddi sübutlar müvafiq qaydada götürülüb, meyitin daxili və xarici müayinəsinin aparılması üçün məhkəmə-tibbi ekspertizası təyin olunub, habelə, digər zəruri prosessual hərəkətlər icra olunub.

    Fakt üzrə cinayət prosessual qanunvericiliyə uyğun olaraq dərhal Yasamal Rayon Prokurorluğunda Cinayət Məcəlləsinin 29,120.2.4 (ümumi təhlükəli üsulla adam öldürmə) və 228.1-ci (qanunsuz olaraq partlayıcı maddələr və qurğular əldə etmə, saxlama, daşıma və gəzdirmə) maddələri ilə cinayət işi başlanıb.

    Hazırda cinayət işi üzrə ibtidai istintaq davam etməklə, hadisənin baş vermə şəraiti və səbəbləri, partlayıcı maddənin əldə edilmə mənbəyi və digər sübut edilməli olan halların müəyyənləşdirilməsi istiqamətində aidiyyəti hüquq-mühafizə orqanları ilə birgə zəruri istintaq və əməliyyat-axtarış tədbirləri həyata keçirilir.

    * * * * *

    Milli Onkologiya Mərkəzində baş verən partlayış nəticəsində xəsarət alan Şüa-diaqnostika şöbəsinin həkim-radioloqu Asif Nəsirlinin fotosu yayılıb.

    Median.Az həmin fotonu təqdim edir:

    * * * * *

    Milli Onkologiya Mərkəzində partlayış hadisəsi Şüa-diaqnostika şöbəsində baş verib.

    Şöbənin birinci mərtəbəsində qeydə alınan olay zamanı həkim-radioloq Asif Nəsirli ağır bədən xəsarətləri alıb.

    O, təcili olaraq xəstəxanaya hospitalizasiya edilib.

    Hadisə yerinə hüquq-mühafizə orqanlarının əməkdaşları cəlb olunublar, hadisənin başvermə səbəbləri araşdırılır.

    * * * * *

    Milli Onkologiya Mərkəzinin otaqlarının birində partlayış olub.

    Oxu.Az-ın əldə etdiyi məlumata görə, xəstə Mübariz Əliyev hadisə yerində ölüb, bir həkim xəsarət alıb.

    Hüquq-mühafizə orqanları hadisə yerinə cəlb olunub. Faktla bağlı araşdırma aparılır.

  • Sürücülərin NƏZƏRİNƏ: Həftəsonu bəzi yollar bağlı olacaq

    Vətəndaşların daha rahat və təhlükəsiz hərəkətini təmin etmək məqsədilə həftəsonu təmir işlərinin davam etdirilməsi nəzərdə tutulur.

    Bu barədə Azərbaycan Avtomobil Yolları Dövlət Agentliyin (AAYDA) məlumat yayıb.

    Bildirilib ki, bununla əlaqədar olaraq aşağıda adları qeyd olunan ərazilərdə 1 may saat 23:00-dan 4 may saat 07:00-dək hərəkət aparılacaq işlərdən asılı olaraq qismən və ya tam məhdudlaşdırılacaq:

    Səməd Vurğun küçəsi (A.A.Bakıxanov küçəsindən M.Mirqasımov küçəsinədək olan hissə);

    Rəşid Behbudov küçəsi (S.Rəhimov küçəsindən S.Zeynalov küçəsinədək olan hissə);

    Vaqif prospekti (C.Hacıbəyli küçəsindən S.Vurğun küçəsinədək olan hissə).

    Bundan başqa, Xarici Dairəvi yolda (“20 Yanvar” istiqaməti) 1-3 may tarixlərində, hər gün saat 07:00-23:00-dək qismən məhdudiyyət və 1-4 may tarixlərində, hər gecə saat 23:00-07:00 arası tam məhdudiyyət tətbiq olunacaq.

    “Xarici Dairəvi yolda tam məhdudiyyət tətbiq edildiyi müddətdə hərəkət Salyan şosesi (Bibiheybət məscidi istiqaməti) üzrə təmin ediləcək”, – məlumatda qeyd edilib.

  • Bakıda bağ evlərinin aylıq kirayə qiyməti 40 min manata çatır

    Bakıda bağ evlərinin aylıq kirayə qiymətləri 1 000 manatdan başlayaraq 40 min manatadək dəyişir.

    Median.Az Xəzər TV-yə istinadən xəbər verir ki, yay mövsümünün başlamasına hələ xeyli vaxt qalsa da, bağ evləri artıq indidən bron edilir. Vətəndaşlar evləri həm günlük, həm də aylıq olaraq kirayələyirlər. Qiymətlərin yüksək olmasına baxmayaraq, tələbat kifayət qədər çoxdur.

    Rieltor Hacıbala Quliyevin sözlərinə görə, 1 000-1 500 manatlıq evlərə tələbat böyük olsa da, bazarda bu qiymət kateqoriyasında olan mənzillərin sayı azdır. Kirayəçi olmaq istəyənlər isə seçim edərkən əsasən evin təmirinə və otaqların sayına önəm verirlər.

    Mütəxəssislər bildirirlər ki, yay fəsli yaxınlaşdıqca bağ evlərinin kirayə qiymətlərində artım müşahidə edilə bilər.

  • Tələsiklik və diqqətsizlik: Piyadaları ölümə aparan vərdişlər – Psixoloq

    “İnsanlar çox zaman riskləri düzgün qiymətləndirmədən, vərdişə əsaslanan və ya tələsik qərarlar verərək yol hərəkəti qaydalarını pozurlar”.

    Bunu Qaynarinfo-ya açıqlamasında psixoloq, Psixologiya Elmi-Tədqiqat İnstitutunun sədri Elnur Rüstəmov yol hərəkəti qaydalarını pozan piyadaların piyada keçidi olmayan yerlərdən keçərkən həyatını itirməsi və öz ölümlərinə doğru qaçmasının səbəbini izah edərkən deyib.

    Psixoloq vurğulayıb ki, tanış mühit olduqda insan “mən bu yolu tanıyıram” düşüncəsi ilə piyada keçidindən istifadə etmədən yolu qısaltmağa çalışırlar:

    “Bu isə diqqətin zəifləməsi, sürücünün məsafəsinin düzgün hesablanmaması və təhlükənin dərk olunmaması ilə nəticələnir. Digər tərəfdən, müasir həyat tərzi də bu davranışlara təsir edir. Tələsiklik, gündəlik stress, diqqətin mobil cihazlara yönəlməsi kimi faktorlar insanın situasiyanı adekvat qiymətləndirməsini zəiflədir. İnsan özünü təhlükəsiz hiss etdiyi anda belə əslində risk zonasında olur. Bu, şüurlu şəkildə təhlükəyə getmək deyil, daha çox diqqət və davranış nəzarətinin zəifləməsidir”.

    Elnur Rüstəmov hesab edir ki, bu baxımdan əsas yanaşma maarifləndirmə və davranış mədəniyyətinin formalaşdırılmasıdır:

    “Yol hərəkəti qaydaları sadəcə texniki tələblər deyil, insan həyatını qoruyan psixoloji təhlükəsizlik çərçivəsidir. Piyada keçidindən istifadə, işıqfor siqnallarına riayət və diqqətli davranış insanın özünü qoruma instinktinin düzgün istiqamətləndirilməsidir”.

    Elnur Rüstəmovun sözlərinə görə, cəmiyyətdə bu davranışların normaya çevrilməsi həm fərdi, həm də ictimai təhlükəsizliyin əsas şərtidir.

  • Dünya azərbaycanlıları Nyu-York merinin paylaşımına qarşı petisiya başladıb

    ABŞ-nin Nyu-York şəhərinin meri Zöhran Kvame Mamdaninin “X” platformasında etdiyi paylaşımda 1915-ci il qondarma erməni soyqırımı, eləcə də Azərbaycanın öz ərazi bütövlüyünü və suverenliyini bərpa etmək səyləri barədə səsləndirdiyi əsassız və qərəzli fikirlər dünya azərbaycanlılarının kəskin etirazı ilə qarşılanıb.

    “Report” xəbər verir ki, dünya ictimaiyyətinin düzgün məlumatlandırılması və beynəlxalq qurumların obyektiv yanaşmasının təmin olunması məqsədilə Azərbaycan-Amerika Gənclər Federasiyasının təşəbbüsü ilə petisiya başladılıb.
    Dünya azərbaycanlıları bu petisiyaya dəstək verməklə Nyu-York merinin Azərbaycanla bağlı həqiqəti əks etdirməyən paylaşımından ciddi narahatlıqlarını ifadə ediblər.

    Petisiyada ABŞ-nin Azərbaycan və Ermənistan arasında sülh sazişini dəstəklədiyi, münasibətlərin normallaşdırılması istiqamətində mühüm addımların atıldığı bir dövrdə bu cür qərəzli yanaşmaların narahatlıq doğurduğu qeyd edilib. Bildirilib ki, Birləşmiş Millətlər Təşkilatının (BMT) Qarabağa göndərdiyi son nümayəndə heyətinin 2023-cü il 2 oktyabr tarixli qiymətləndirməsinə əsasən, mülki əhaliyə qarşı zorakılıq halları müşahidə edilməyib, həmin ərazilərdə mülki infrastrukturun zədələnməsi faktları aşkarlanmayıb. 44 günlük Vətən müharibəsi zamanı Gəncə, Bərdə və Tərtər də daxil olmaqla Azərbaycanın bir sıra şəhərlərinin raket və artilleriya atəşinə məruz qaldığı, bunun isə mülki itkilərə və infrastrukturun zədələnməsinə səbəb olduğu xüsusi vurğulanıb. Bundan əlavə, 1992-ci ilin fevral ayında bəşəriyyətin ən ağır faciələrindən biri olan Xocalı soyqırımına diqqət çəkilib, Azərbaycanın yüzlərlə mülki vətəndaşının amansızcasına qətlə yetirildiyi xatırladılıb.

    Sonda bu kimi məsələlərdə BMT Nizamnaməsinə, BMT Təhlükəsizlik Şurasının qətnamələrinə, beynəlxalq hüququn ümumi prinsiplərinə və tarixi faktlara əsaslanan obyektiv mövqe sərgilənməsi tələb edilib.

    Dünya azərbaycanlıları qeyd edilən link vasitəsilə petisiyaya qoşula bilərlər:

    https://shorturl.at/ZtUnS

    Qeyd edək ki, ABŞ, Kanada, İsrail, Böyük Britaniya və Avropanın Almaniya, Finlandiya, İspaniya, Macarıstan, Çexiya, Sloveniya, İsveç, Yunanıstan və başqa ölkələri, eləcə də 44 ölkəni birləşdirən 17 Koordinasiya Şurası Nyu-York şəhərinin merinin Azərbaycanı əsassız şəkildə ittiham etməsinə qarşı çıxaraq, dünya ictimaiyyətinin düzgün məlumatlandırılması və beynəlxalq qurumların obyektiv yanaşmasının təmin olunması məqsədilə bəyanatlar yayıb, ABŞ Prezidenti Donald Trampa və Nyu Yorkun meri Zöhran Kvame Mamdaninə etiraz məktubları göndəriblər.

  • 40 min il sonra geri döndülər: Alyaskada buz dövrü canlıları dirçəlir

    Alyaskada mamontlar dövründən bəri dərin donmuş vəziyyətdə qalan qədim mikroblar ərimə prosesindən sonra yenidən “canlanmağa” başlayıb.

    Bu barədə “Daily Galaxy” nəşri məlumat yayıb.

    Alimlərdən ibarət qrup, Tristan Karo rəhbərliyi altında Alyaskanın mərkəzində yerləşən tuneldən daimi donuşluq nümunələri götürüb. Həmin tunelin divarlarında hələ də bizon qalıqları görünür. Tədqiqatçılar torpağı əridərək əvvəllər “ölü” hesab edilən materialın altı ay ərzində davranışını izləyiblər. Məlumata görə, ilk aylarda aktivlik minimal olsa da, daha sonra vəziyyət kəskin şəkildə dəyişib.

    “Bunlar heç də ölü nümunələr deyil. Onlar hələ də üzvi maddələri parçalaya və onu karbon qazı şəklində buraxa bilən aktiv həyatı dəstəkləmək qabiliyyətinə malikdir”, deyə Karo bildirib.

    Təcrübənin diqqətçəkən xüsusiyyəti tuneldə hiss olunan güclü qoxu olub.

    “İçəri daxil olanda ilk hiss etdiyin şey çox xoşagəlməz qoxudur. Uzun müddət havalandırılmamış rütubətli zirzəmi kimi iy verir. Mikrobioloq üçün bu çox maraqlıdır, çünki qeyri-adi qoxular çox vaxt mikrob aktivliyinin göstəricisi olur”, deyə rəhbər əlavə edib.

    Geologiya elmləri professoru Sebastian Kopf isə belə qədim həyatın “oyanmasının” iqlim üçün müəyyən risklər daşıdığını bildirib. Onun sözlərinə görə, çoxlu karbon ehtiva edən donmuş torpaqların əriməsi müasir elmin ən böyük suallarından biri olaraq qalır.

  • Hikmət Hacıyev Kolumbiya XİN rəhbərinin müavini ilə görüşüb – FOTO

    Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Kolumbiya xarici işlər nazirinin müavini Xuana Esperansa Kastro Santamariya ilə görüşüb.

    Bu barədə H.Hacıyev öz sosial şəbəkə hesabında paylaşım edib.

    O bildirib ki, görüş zamanı tərəflər səmərəli müzakirələr aparıb və ölkələr arasında siyasi dialoqun mövcud səviyyəsi ümidverici qiymətləndirilib.

  • Gömrükdə yeni qayda: FİN ləğv edilir, “ASAN İmza” gəlir – Nə dəyişəcək?

    2026-cı il iyunun 1-dən etibarən xaricdən sifariş edilən bağlamaların gömrük bəyan edilməsi qaydalarında ciddi dəyişikliklər qüvvəyə minir. Yeni qaydalara əsasən, “Smart Customs” mobil tətbiqi və e.customs.gov.az portalında artıq şəxsiyyət vəsiqəsinin FİN kodu və şifrə (parol) ilə bəyannamə yazmaq mümkün olmayacaq. 

    Beləliklə, FİN və parol sistemi ləğv edilir. Elektron ticarət bəyannamələri bundan sonra yalnız gücləndirilmiş elektron imza vasitələri – “ASAN İmza” və ya SİMA rəqəmsal imza ilə həyata keçiriləcək. 

    Qərar bəzi vətəndaşlar arasında çaşqınlıq yaradıb. Sosial şəbəkələrdə və ictimai müzakirələrdə bu dəyişikliyin onlayn ticarəti məhdudlaşdıracağı ilə bağlı narahatlıqlar da səslənir.

    İqtisadçı Natiq Cəfərli isə məsələni Qaynarinfo-ya şərh edərək bildirib ki, dəyişiklik daha çox nəzarət sisteminin gücləndirilməsinə xidmət edir:

    “Artıq insanlar bu sistemə öyrəşib. Fərq ondadır ki, nəzarət mexanizmi daha sistemli formaya keçir. “ASAN İmza” və SİMA üzərindən bu proses daha rahat idarə oluna bilər”.

    Onun sözlərinə görə, yeni qaydalar elektron ticarətin sürətinə müəyyən təsir göstərə bilər:

    “İnsanların yeni platformalara uyğunlaşması vaxt alacaq. Amma əsas məsələ odur ki, sifariş prosesi dayanmasın. Elektron ticarət artıq vətəndaşın gündəlik həyatına çevrilib”.

  • Bakıda mənzillərin qiymətləri yüksəldi (Video)

    Son illərdə daşınmaz əmlak bazarında, xüsusilə, yeni tikili binalarda mənzil qiymətləri sürətlə dəyişir.

    Sakinlər Baku TV-yə bildirirlər ki, ev sahibi olmaq onlar üçün getdikcə əlçatmaz arzuya çevrilir.

    Əmlak ekspertlərinin sözlərinə görə, qiymət artımının əsas səbəblərindən biri tikinti xərclərinin yüksəlməsidir. Bununla yanaşı, bəzi hallarda süni qiymət artımları da qeydə alınır.

    Daşınmaz əmlak üzrə ekspert Elnur Fərzəliyev bildirib ki, istismar müddəti bitmiş və qəzalı binaların sökülərək yerində yeni yaşayış komplekslərinin tikilməsi əlavə xərclər yaradır.

    Onun sözlərinə görə, bu proses zamanı tikinti şirkətləri sakinlərə yeni mənzil, köç və kirayə xərcləri ödəyir ki, bu da maya dəyərinin artmasına səbəb olur.

    Ekspert əlavə edib ki, sərmayəçilərin bu cür layihələrə daha çox yatırım etməsi də qiymətlərin yüksəlməsinə təsir göstərir.

    Onun sözlərinə görə, Bakı və digər iri şəhərlərdə tikinti üçün yararlı torpaq sahələrinin azalması və inşaat həcminin aşağı düşməsi tələbatı artırır. İpoteka şərtləri və bank faizləri də bazara təsir edən amillər sırasındadır. Güzəştli kreditlər isə alıcılıq qabiliyyətini artıraraq qiymət artımını sürətləndirir.

    İqtisadçı Xalid Kərimli isə qeyd edib ki, son beş ildə əhalinin gəlirləri təxminən 45 faiz artsa da, mənzil qiymətləri 47 faizə qədər yüksəlib. Onun sözlərinə görə, xüsusilə, Bakı şəhərinin mərkəzində tikinti üçün yararlı torpaq sahələrinin çatışmazlığı qiymət artımını daha da sürətləndirir. Xalid Kərimli əlavə edib ki, inflyasiya, enerji, kommunal və işçi qüvvəsi xərclərinin artması da tikinti şirkətlərinin xərclərini yüksəldir və bu, birbaşa mənzil qiymətlərinə təsir göstərir.

  • Paytaxtda yeni xəstəxana tikiləcək

    Bakının Lökbatan qəsəbəsində uzun müddətdir yarımçıq qalan xəstəxana binası yenidən qurulacaq.

    Median.Az Baku.ws-ə istinadən xəbər verir ki, layihə Səhiyyə Nazirliyinin Tikilməkdə Olan Müəssisələrin Müdiriyyəti tərəfindən həyata keçiriləcək. Görüləcək işlərin ümumi dəyəri təxminən 1.9 milyon manat təşkil edir.

    Planlaşdırılan işlərə əsasən, mövcud bina əvvəlki təyinatından fərqli şəkildə yenidən qurulacaq və burada 218 çarpayılıq Psixiatriya Mərkəzi ilə 123 çarpayılıq Narkoloji Mərkəz fəaliyyət göstərəcək.

    Layihənin əsas məqsədi paytaxtda psixi sağlamlıq və narkoloji xidmətlərin genişləndirilməsi, habelə bu sahədə tibbi xidmətlərin əlçatanlığının artırılmasıdır.