450 manat dəyərində velosipedi oğurlamaqda şübhəli bilinən şəxs saxlanılıb.
Bu barədə hüquq-mühafizə orqanlarından məlumat verilib.
Daxili İşlər Nazirliyinin (DİN) “102” Xidməti-Zəng Mərkəzinə aprelin 19-da gecə saatlarında Yasamal rayonu, Abbas Mirzə Şərifzadə küçəsində yerləşən mənzillərdən birinin qarşısından 450 manat dəyərində velosipedin oğurlanması barədə məlumat daxil olub.
Məlumat əsasında Yasamal Rayon Polis İdarəsinin və 29-cu Polis Şöbəsinin əməkdaşları birgə əməliyyat-axtarış tədbiri həyata keçirib.
K.Kərimova məxsus velosipedi oğurlamaqda şübhəli bilinən Bakı şəhər sakini, 1976-cı il təvəllüdlü Ə.Abdullayev müəyyən olunaraq saxlanılıb.
Araşdırma zamanı məlum olub ki, Ə.Abdullayev əvvəllər Cinayət Məcəlləsinin 315-ci maddəsi (Hakimiyyət nümayəndəsinə qarşı müqavimət göstərmə və ya zor tətbiq etmə) ilə məhkum olunub.
Faktla bağlı araşdırma aparılır.
