Month: March 2018

Suraxanı rayonu, Yeni Günəşli qəsəbəsi, “AB” massivi, bina 62, mənzil 7-də yaşayan Qasımova Şölə Qasım qızı 275 nömrəli tam orta məktəbin direktorundan şikayətçidir.

“Təzadlar” vasitəsilə Azərbaycanın 1-ci vitse-prezidenti xanım Mehriban Əliyevaya müraciət edən şikayətçi iddia edir ki, sözügedən məktəbin direktoru Fəridə Şərifova ona işdən çıxması ilə bağlı məcburi ərizə yazdırıb.

“Hörmətli Mehriban xanım!

Mən Qasımova Şölə Qasım qızı,2007-ci ildən paytaxtın Suraxanı rayonunun Yeni Günəşli qəsəbəsində yerləşən 275 nömrəli tam orta məktəbdə təsərrüfat işləri üzrə direktor müavini işləyirdim. Çalışdığım müddətdə heç bir nöqsanım olmayıb. Lakin 2017-ci il sentyabrın 27-də 275 nömrəli tam orta məktəbinə direktor təyin olunan Fəridə Şərifova qərəzli şəkildə müxətlif bəhanələr gətirməklə mənə 2 dəfə töhmət verdi. Sonra isə təzyiqlər göstərərək işdən çıxmağım barədə ərizə yazmağımı tələb etdi. Bu barədə aidiyyəti qurumlara, o cümlədən prezident cənab İlham Əliyevə onlayn müraciət göndərdim. Müraciətimə müsbət cavab gəlsə də, direktor Fəridə Şərifova qanunsuz olaraq məni Azərbaycan Respublikası Əmək Məcəlləsinin 70-ci maddəsinin “ç” bəndi ilə işdən azad etdi.

Bunun da səbəbi o idi ki, əvvəlcədən direktor Fəridə Şərifova məni kabinetinə çağıraraq “Şölə xanım, mən bu vəzifəyə elə-belə gəlməmişəm, arxamda adamlarım var, özüm də lazım olan adamları görə-görə gəlmişəm. Əgər vəzifədə qalmaq istəyirsənsə, nə demək istədiyimi başa düşdün!” – deyə tələb etdiyi pulu vermədim. Ona üç övladım olduğunu, onları təkbaşına böyütdüyümü, hətta onlardan birinin ürək qüsurlu olduğunu və əməliyyatı Heydər Əliyev Fondunun prezidenti, Azərbaycan Respublikasının birinci vitse-prezidenti Mehriban xanım Əliyevanın dəstəyi ilə olunduğunu deməyimə də möhəl qoymadı.

İstirahət günlərinin birində direktor Fəridə Şərifova məni məktəbə çağırdı. Kabinetinə daxil olanda direktorun yanında tanımadığım iki kişi vardı. Onlar məndən seçki ilə bağlı sənədləri tələb etdi. Həmin adamların kimliyini soruşanda, direktor səsini yüksəldərək, “sənə nə var kimdirlər, belə qohumumdur, qardaşımdır” dedi.
Beləliklə, hədə dolu təkidlərlə məni 2011-ci ildən sədri olduğum seçki məntəqəsindən də işdən kənarlaşdırdı.

Direktorun arxasında dayanan Bakı Şəhəri üzrə Təhsil İdarəsinin müdiri Məhəbbət Vəliyeva, onun bu qanunsuzluqlarına dəstək verən məktəbin həmkarlar ittifaqı təşkilatının sədri Sahab İsayev və təlim-tərbiyə işləri üzrə direktor müavini Ayişə Məmmədovadır.

Ümumiyyətlə, son illər 275 nömrəli tam orta məktəbdə təhsil adına yaraşmayan işlər cərəyan edir. Məktəbdə baş alıb gedən rüşvətxorluğa görə keçmiş direktor Elmira İsmayılova işdən çıxarılsa da, yeni direktor təyinatı heç nəyi dəyişmədi. Əksinə, direktor qanunsuzluqların sayını daha da artırmağa başladı. Bu barədə aidiyyəti qurumları xəbərdar etsəm də, direktor barədə heç bir tədbir görülmür. Görəsən, niyə?”

Şikayətlə bağlı 275 nömrəli tam orta məktəbin rəhbərliyinin mövqeyini öyrənmək cəhdimiz alınmadı. Odur ki, qarşı tərəfi də dinləməyə hazırıq. \\tezadlar.az\\

6 saylı cəzaçəkmə müəssisəsində saxlanılan məhkum Sahib Qüdrət oğlu Ağayev “Yeni Müsavat”a məktub yollayıb. S.Ağayev ölkə başçısının imzaladığı qanunların hakim və dövlət ittihamçıları tərəfindən layiqincə icra edilməməsindən şikayətçidir.

CM-in 177.3.2-ci maddəsi ilə təqsirli bilinərək 8 il müddətinə azadlıqdan məhrum edilən S.Ağayev yazır ki, hökm üzrə tərəfindən vurulmuş ziyan 18 min 957 manat təşkil edir: “10 fevral 2017-ci il tarixdə prezident tərəfindən məhkumların həyatında böyük dəyişiklik edəcək yüksək səviyyəli və professional şəkildə düşünülmüş bir sərəncam imzalandı. Sərəncamın əsas məqsədi cinayət törədən insanlara səhvlərini düzəltmək üçün şəraitin yaradılmasıdır. Bu istiqamətdə böyük ictimai təhlükə törətməyən və az ağır cinayətlər üzrə ”azadlığın məhdudlaşdırılması” cəzasının alternativ olaraq sanksiyalara əlavə edilməsi və bu cəza növünə üstünlük verilməsi, azadlıqdan məhrumetmə cəza növünün müstəsna hallarda tətbiq olunması tapşırığı verilib.

Biz məhkumlar 1 ildir ki, bu sərəncamın icra vaxtını səbirsizliklə gözləyir, qeyd-şərtsiz icra olunmasına ümid bəsləyirdik. Lakin mənzərə tamam fərqlidir. 2 mart 2018-ci il tarixdə “Cinayət Məcəlləsində dəyişikliklər edilməsi haqda” 20 oktyabr 2017-ci il tarixli 816-VQD nömrəli Qanununun tətbiqi və hüquqi tənzimləmə məsələlərinə dair ərizəmə 6 saylı cəzaçəkmə müəssisəsinin inzibati binasında Nizami Rayon Məhkəməsinin hakimi Rauf Əhmədovun sədrliyi ilə açıq məhkəmə iclasında baxıldı.

Məhkəmə iclasında sərəncam üzrə tapşırıq və tövsiyələri, yeni qanunun tətbiqi xüsusiyyətlərini rəhbər tutaraq ictimai dildə deyil, hüquqi dildə çıxış etdim. Əməlimin CM-in 177.2.4-cü maddəsinə tövsif olunduğunu, həmin əməlin az ağır cinayətlər kateqoriyasına aid olduğunu və prezident tərəfindən imzalanan sərəncamın 8, 10.2 və 10.5-ci bəndləri üzrə tapşırığı, 13.4-cü bəndi üzrə tövsiyəni rəhbər tutaraq barəmdə “azadlığın məhdudlaşdırılması” cəza növünün tətbiq olunmasını xahiş etdim. Hakim Rauf Əhmədov bildirdi ki, yalnız zərər ödənildiyi halda bu cəza növünün tətbiqi mümkündür. Baxmayaraq ki, hətta bu formada belə nəzərdə tutulsaydı, məndən əvvəl məhkəməsi olmuş və ziyanı tam ödəmiş şəxslərin heç birinə bu cəza növü tətbiq edilməyib.

Mən israrla “azadlığın məhdudlaşdırılması” cəza növü üzrə cəza çəkərək zərərin ödənilməsinin mümkün olduğunu, yəni həm azadlığın məhdudlaşdırılması cəza növü üzrə cəzanın icrası işinin, həm də ziyanın ödənilməsi işinin probasiya üzrə icra məmurları tərəfindən icra olunduğuna görə ziyanın ödənilməsi vəzifəsi ilə azadlığın məhdudlaşdırılması cəza növünün mümkünlüyünü bildirdim. Hakim Rauf Əhmədov heç bir əsaslı səbəb gətirmədən iddiamın qarşısında cavabsız qaldı. Hakim ərizəmi oxumadan məhkəmə iclasına çıxmışdı. Ən dəhşətlisi odur ki, Rauf Əhmədov Cəzaların İcrası Məcəlləsi üzrə probasiya məsələlərinin təsbit olunduğundan və həmin qanunun 1 yanvar 2018-ci il tarixindən qüvvədə olduğundan bixəbərdir”.

Məhkum yazır ki, prezidentin imzaladığı sərəncamın 9-cu bəndi üzrə “Cinayət qanunvericiliyinin prinsiplərinə və cəza təyin etmənin ümumi əsaslarına ciddi riayət edilsin, cinayət təqibi və cəzaların icrası zamanı qeyri-prosessual münasibətlərə yol verilməsin, korrupsiya və vəzifədən sui-istifadə hallarına qarşı mübarizədə daha ciddi tədbirlər görülsün” qeydi var: “Müşahidələrimə istinadən bildirmək istərdim ki, Rauf Əhmədov başda olmaqla, Nizami Rayon Məhkəməsinin hakimləri yeni qanunu heç bir humanistlik göstərmədən, prezident sərəncamı üzrə tapşırıqlara məhəl qoymadan ən sərt şəkildə məcburi qaydada tətbiq edirlər. Daha doğrusu, vəzifələrindən sui-istifadə edərək korrupsiyaya şərait yaradırlar. Bu kimi hakimlər insanlarda ölkə rəhbərliyinə inamı sarsıdırlar. Bizim 1 illik gözləntilərimiz nəticəsiz qaldı.

“Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə” 10 fevral 2017-ci il tarixli Sərəncamın adından da göründüyü kimi, CM-in 10.3-cü maddəsinə əsasən, həmçinin əvvəllər məhkum edilmiş şəxslər üzrə də alternativ cəzaların tətbiqinə üstünlük verilməlidir. Lakin heç bir alternativ cəzalar tətbiq olunmur”.

Məhkum Sahib Ağayev yazır: “Çox xahiş edirəm ki, korrupsiyaya şərait yaradan Rauf Əhmədov kimi hakimlər barəsində ciddi tədbirlər görəsiniz”.

Qeyd edək ki, hakim Rauf Əhmədovun adı əvvəllər də mətbuatda dəfələrlə hallanıb. Rauf Əhmədov sabiq metropoliten rəisi, hazırda YAP Yasamal təşkilatının sədri olan Tağı Əhmədovun oğludur.