Month: Mart 2018

Martın ikinci yarısından Bakıdakı topdansatış mərkəzlərində pomidor və xiyar kəskin bahalaşıb. Hazırda Bakı bazarlarında Zirə pomidorunun 1 kiloqramı 6-7 manatadır. İran və Gürcüstandan gətirilən pomidorun kiloqramı isə 2 manat 50 qəpik – 4 manat arası satılır.

Digər meyvə-tərəvəz məhsullarından fərqli olaraq, pomidorun qiyməti bir gecə içərisində artırılıb. Belə ki, martın 17-dən pomidorun bahalaşacağı ilə bağlı satıcılara xəbərdarlıq edilib, ertəsi gün bütün topdansatış mərkəzləri qiyməti 2 dəfə artırıb.

Hazırda Bakının ən ucuz bazarı sayılan “8-ci kilometr” bazarında salxım pomidor 7 manata, Zirə pomidoru iriliyindən asılı olaraq 5-7 manata, Qazax pomidoru 3 manat 50 qəpik, Şəmkir pomidoru 3 manat 50 qəpik-4 manat, çəhrayı pomidor 4 manata satılır. Türkiyə pomidoru isə nisbətən ucuz – 2 manat 50 qəpik-3 manata təklif edilir. Xiyarın qiymətinə gəldikdə isə, patron 4 manata, melit növ xiyar 3 manata, İrandan gətirilən xiyar 2 manata, Bakı istixanalarının məhsulu isə 3 manata satışdadır.

Satıcılar bildiriblər ki, qiymətlərə bayram və qıtlıq təsir edib. Bayramdan sonra qiymətlər nisbətən ensə də, rayonlardan məhsul gətirənlər azalıb.

Meyvə-tərəvəz satışı ilə məşğul olan Həsən Abdulov bildirib ki, bayramdan sonra satış zəifləyir. Indi əsasən kartof, soğan kimi gündəlik istifadə edilən tərəvəzlər satılır.

“Təzə bazar”da isə kiloqramı 3 manat 50 qəpikdən ucuz pomidor tapmaq mümkün deyil. Zirə pomidoru 7 manata, Türkiyə pomidoru isə 4 manata təklif edilir. Bayram ərəfəsi isə pomidorun qiyməti 9-11 manatdan ucuz olmayıb. Hazırda bazarda çəhrayı pomidor 4 -4 manat 50 qəpiyə, Şəmkir pomidoru 4 manat 40 qəpiyə, patron xiyarları isə 5 manata satışa çıxarılıb.

Bakı bazarlarında pomidorun bu cür kəskin bahalaşmasını bəlkə də mövsüm amilləri ilə izah etmək olardı. Lakin araşdırmalarımız göstərir ki, Azərbaycan istixanalarında yetişdirilən pomidorun qiyməti baxımından Bakı və Rusiyanın hətta ən ucqar şəhərlərinin bazarları arasında ciddi fərq yoxdur.

Belə ki, Tümen bazarlarında hazırda Şəmkir pomidoru Azərbaycan valyutası ilə təxminən 5 manat-5 manat 20 qəpiyədir. Bunu Tümendə yaşayan və ticarətlə məşğul olan azərbaycanlılardan dəqiqləşdirdik. Moskvadakı soydaşlarımızdan aldığımız məlumata görə isə hazırda Rusiya paytaxtının bazarlarında Bakı və Şəmkir pomidorlarının qiyməti təxminən 180-200 rubl arasındadır. Bu, 4-6 manat deməkdir.

Bakı xiyarı isə Moskva bazarlarında Bakının özündən xeyli ucuzdur-cəmi 2 manata təklif edilir.

Bəs necə olur ki, Azərbaycanda yetişdirilən pomidorun yerli bazarlardakı qiymətləri ilə qonşu Rusiyanın bazarları arasındakı qiyməti demək olar eynidir? Axı bu heç bir iqtisadi qanunlara sığmır. Yerli bazarlarda qəfildən pomidoru iki dəfə bahalaşdıran qüdrətli əllərin sahibləri kimlərdir?//virtualaz.org

Bakı şəhər Baş Polis İdarəsi Milli Şuranın Bakıda keçirdiyi mitinqlə bağlı məlumat yayıb.

İdarədən oxu.az-a daxil olan məlumatda bildirilir ki, martın 31-də özünü Demokratik Qüvvələrin Milli Şurası adlandıran quruma daxil olan partiya və birliklərin Yasamal rayonundakı idman-sağlamlıq kompleksinin stadionunda Bakı Şəhər İcra Hakimiyyəti ilə razılaşdırılmış mitinqi keçirilib.

Saat 15.00-dan 17.00-dək davam edən toplantıda Azərbaycan Xalq Cəbhəsi, Müsavat və Azərbaycan Xalq partiyalarının, Müsəlman Birliyi, “NİDA” hərəkatlarının, eləcə də müxalifətyönümlü bir sıra qeyri-hökumət və gənclər təşkilatlarının ümumi sayı 1200 (min iki yüz) nəfərədək olan üzvü və təəssübkeşi iştirak edib.

Azərbaycan Avtomobil Yolları Dövlət Agentliyi Ramanıda ağacları kəsib yol çəkir.

Median.Az xəbər verir ki, bu barədə AFN-ə məlumatı qəsəbədə yaşayan sakinlər veriblər.

Onların sözlərinə görə və aşağıdakı fotolardan da göründüyü kimi, kəsilən ağaclar agentliyə məxsus maşınlara yüklənib daşınıb.

Sakinlər bildirirlər ki, hadisə Ramanıya girişdə yolun sağında sahibini tanımadıqları obyektin qarşısında baş verib: “Yəqin ki, obyektin qarşısını asfaltlayırlar, ona görə ağacları kəsirlər”.

1994-cü ildə Ağdamda şəhid olan Qarayev Rafiq Sədiyar oğlunun Göyçayda yaşayan ailəsi evsizlikdən şikayətçidir.

Şəhidin bacısı 46 yaşlı Aygün Qarayeva “Qafqazinfo”ya bildirib ki, anası, qardaşı və ailəsi ilə birlikdə çətin vəziyyətdə yaşayır:

“Anam uzun zamandır ağır xəstədir, yeriyə bilmir. Qardaşımın şəhid olduğuna görə aldığımız pul ancaq iynə-dərmana çatır. Hazırda bir otaqlı evdə 7 nəfər yaşayırıq. Səhhətim normal olanda anama baxa bilirdim. İndi də onkoloji xəstəliyə görə kömək edə bilmirəm.

Hələ ailədə autizmli xəstəmiz də var. Evimiz bərbad vəziyyətdədir. Vəziyyətimizlə bağlı  bir çox yerlərə məktub yazmışıq”.

Şəhid bacısı deyir ki, ev üçün siyahıya düşsələr də, neçə ildir növbədədirlər:

“Göyçay İcra Hakimiyyətindən gəlib evə baxıblar, sənədlərimizi alıb bizi siyahıya saldılar. Hələ ki, heç bir xəbər yoxdur. Dəfələrlə şikayət etdim. Dedilər, gözləyin tikilsin. Evimizin də şəraitsizliyi bizi lap xəstə edib”.

“Azad İstehlakçılar Birliyi tezliklə bütün dönər hazırlayan restoran, kafe və obyektlərdə yoxlamalara başlayacaq. Təkcə Bakıda 15 000 dönərxana var. Lakin rəsmi sertifikat yalnız 2 şirkətə məxsusdur. Bu şirkətlərin isə 60 obyekti var. Digər dönərxanalarda istifadə olunan ətin içində mənşəyi məlum olmayan ət, at, eşşək əti, hətta ölü insan ətinin olması da istisna deyil. Bu bazara heç bir ciddi nəzarət yoxdur, yoxlamalar aparılmır”.

Median.Az yerli KİV-ə istinadən xəbər verir ki, bu sözləri Azad İstehlakçılar Birliyinin sədri Eyyub Hüseynov deyib.

O, sertifakatı olan 2 şirkətin adını da açıqlayıb: “Azprotein Foods Group” və “Səhliyalı”.

“2014-cü ildə Standartlaşdırma, Metrologiya və Patent üzrə Dövlət Komitəsi bu fast növünün hazırlanması və istehlakı standartlarını təsdiq edib, lakin qurumun ölkədə bu standratlara əməl olunub-olunmamasını yoxlaması haqqında məlumat yoxdur”.

Komitənin mətbuat xidmətinin rəhbəri Fazil Talıblı bildirib ki, 2017-ci ildə Dövlət Qida Təhlükəsizliyi Agentliyi təsis olunduqdan sonra dönər satışına nəzarət bu quruma verilib. Bundan sonra nəzarətlə onlar məşğul olacaq.

Qida Təhlükəsizliyi Agentliyinin mövzu barədə mövqeyini öyrənmək isə mümkün olmayıb.