Month: January 2020

Gölməçə, bataqlıq, yaddan çıxarılımış yerlər… Sakinlər bu ərazini belə adlandırır. Söhbət Sabunçu rayonu Ramanı qəsəbəsi Mərkəzi küçə adlanan ərazidən gedir.

Bakının mərkəzindən 10-15 kilometr məsafədə yerləşən bu yerdə sakinlər artıq 30 ilən çoxdur ki, bərbad vəziyyətdə olan yollarda əziyyət çəkirlər. Yağışlı günlərdə isə yolda hərəkət demək olar ki, tamamilə dayanır. Əlacsız qalan məktəblilər ayaqlarına selofan paket keçirərək necə deyərlər, daşı daş üstünə qoyub birtəhər məktəbə gedə bilirlər. Sakinlər buradakı vəziyyəti belə təsvir edirlər:

“Burada vəziyyət dözülməzdir. Rayondan gələn qohumlar deyirlər ki, siz şəhərdə yaşayırsınız? Taksi çağırırıq, 5 manata gedilən yolu bizə 10 manata deyir”.

Sakinlər mövcud vəziyyətlə bağlı birbaşa rayon icra hakimiyyətini günahkar hesab edirlər. Belə ki, uzun illərdir vəziyyətlə bağlı sakinlər dəfələrlə müraciətlər etsələr də, onlara verilən cavab eyni olub: “Gedin düzələcək”.

İllər gedib, amma düzələn heç nə olmayıb. Sakinlər ümumiyyətlə rayon icra nümayəndələrini tanımadıqlarını da bildirdilər.

Problemlə bağlı Sabunçu rayon icra hakimiyyətində isə bizə verilən cavab sakinlərə deyilənlərdən fərqli olmadı. İlk olaraq mühafizə xidməti vasitəsilə bizi yola salmaq istəyən icra nümayəndələri daha sonra israr etdikdən sonra telefon vasitəsilə bizə cavab verdilər:

“Bu barədə Azərbaycan Avtomobil Agentliyinə məlumat vermişik”.

Ən maraqlısı isə odur ki, özünü icra başçısının köməkçisi adlandıran şəxs ad-soyadını təqdim etməkdən itina etdi.

Ümumilikdə geridə qoyduğumuz 2019-cu ildə Azərbaycan Avtomobil Yolları Dövlət Agentliyi tərəfindən Sabunçu rayonunda uzunluğu 87 km olan 135 küçə və yol asfaltlanaraq istifadəyə verilib. Hazırda isə Sabunçu rayonunun Pirşağı, Zabrat, Ramana və Maştağa qəsəbələri ərazisində ümumi uzunluğu 15 km olan daxili küçə və yollarda əsaslı təmir işləri həyata keçirilir. Amma görünən odur ki, ya bu ərazi sakinlərin dediyi kimi yaddan çıxıb, ya da müəyyən qurumlar problemin həllində maraqlı deyillər.

“Vətəndaş məmnunluğunun ən yüksək səviyyədə təminatı üçün tərəfimizdən bütün zəruri tədbirlərin həyata keçirilməsi təmin olunur. Fəaliyyət sahəmizə daxil olan, ictimai münasibətləri təhdid edən sosial neqativ hallarla bağlı daxil olan bütün müraciətlər, istisnasız olaraq araşdırılır. Heç bir müraciətə etinasızlıq göstərilmir”.

Bunu Oxu.Az-a açıqlamasında Bakı Şəhər Baş Polis İdarəsinin Mətbuat Xidmətinin rəisi, polis mayoru Elşad Hacıyev bildirib.

Onun sözlərinə görə, vətəndaşların müraciət etməsi üçün DİN-in “102 Zəng Mərkəzi” daxil olmaqla, internet-informasiya resurslarından, eləcə də, sosial şəbəkələrdən geniş imkanlar yaradılıb:

“Müraciətin məzmunundan asılı olmayaraq, hər bir müraciət diqqətlə öyrənilir. Vətəndaşları narahat edən hallar, xüsusilə qeyri-aşkar şəraitdə cinayətə meyilli şəxslərin əməlləri ilə bağlı məlumatlar məxfilik təmin olunmaqla nəzarətə götürülür, ən müasir metodlar tətbiq olunmaqla yoxlanılır. Vətəndaş heç bir ərazi polis orqanına dəvət olunmadan, sorğu-suala çəkilmədən təxirəsalınmaz qaydada müvafiq tədbirlər həyata keçirilir.

Hər bir vətəndaş əmin olsun ki, onu narahat edən hallara qarşı polis barışmaz mövqedədir, cəmiyyəti təhdid edən istənilən hala qarşı mübarizədə onun yanındadır, onun maraq və mənafelərinin mühafizəçisidir. Polis haqqında ictimai fikrə yönəldilən böhtan və yalanlar polisin fəaliyyətinə kölgə salmaqda aciz görünür. Nəzərə alınmalıdır ki, istisnalar ümumi mənzərəni dəyişə bilməz.

Polis Azərbaycan dövlətçiliyinin əsas sütunlarından biri olmaqla, fəaliyyətini gündən-günə təkmilləşdirir, formalaşdırır. Dövrün çağırış və təhdidlərinə laqeyd yanaşmır, fasiləsiz olaraq, vətəndaş maraqlarının keşiyindədir.

Qanunla dövlət və cəmiyyət qarşısında hər bir şəxs onun hüquq və azadlıqlarından bilavasitə irəli gələn vəzifələri var. Hər kəsin üzərinə vəzifələr yalnız Konstitusiya ilə və ya qanunla qoyula bilər. Hər bir şəxs Azərbaycan Respublikasının Konstitusiyasına və qanunlarına əməl etməli, başqa şəxslərin hüquq və azadlıqlarına hörmət bəsləməli, qanunla müəyyən edilmiş digər vəzifələri yerinə yetirməlidir”.

Bakıda “Saipa” markalı avtomobillərlə avtoxuliqanlıq edib çəkdikləri videonu sosial şəbəkədə yayan sürücülər həbs edilib.

Videogörüntülər Avtosfer.az saytında dərc edildikdən sonra Bakı şəhər Dövlət Yol Polisi idarəsinin əməkdaşları həmin sürücülərin saxlanılması ilə bağlı tədbir keçirib. Sürücülər saxlanıldıqdan sonra barələrində protokol tərtib edilərək Səbail Rayon Məhkəməsinə aparılıb.

Məhkəmə tərəfindən 1998-ci il təvəllüdlü Vəliyev Fərhad Fikrət oğlu və 1999-cu il təvəllüdlü İsmayılov Rəvan Ceyhun oğlu 15 gün həbs cəzasına məhkum edilib.

Dövlət Yol Polisi İdarəsinin əməkdaşları sosial şəbəkədə yayılan bu cür neqativ videoları yayan sürücülərə ciddi nəzarət edir.

Hacıqabulda 58 yaşlı qadın zəhərlənmədən ölüb.

Median.Az qafqazinfo-ya istinadən xəbər verir ki, Hacıqabul şəhər sakini Yuzbaşeva Kifayət Ağaqulu qızı sirkə turşusundan zəhərlənib.

Qadın yaxınlarının köməkliyi ilə rayon mərkəzi xəstəxanasına aparılıb.
Həkimlərin müdaxiləsinə baxmayaraq, qadının həyatını xilas etmək mümkün olmayıb.

Faktla bağlı rayon prokurorluğunda araşdırma aparılır.