Month: February 2020

Dövlət Təhlükəsizliyi Xidmətinin (DTX) keçirdiyi əməliyyatla saxlanılan Neftçala Rayon İcra Hakimiyyəti başçısının müavini Gültəkin Sadıqovanın bacısı məktəb direktorudur.

Onun bacısı Aytəkin Mahmudovadır.

A.Mahmudova Neftçalada Mehman Səfərov adına İnteqrasiya təlimli İnternat tipli gimnaziyanın direktorudur.

Xatırladaq ki, DTX-nin keçirdiyi əməliyyatla Neftçalanın icra başçısı İsmayıl Vəliyev, icra hakimiyyəti başçısının birinci müavini Vurğun Əkbərov, icra başçısının digər müavini Gültəkin Sadıqova, Memarlıq və tikinti şöbəsinin müdiri Vüqar Nağıyev, Ərazi idarəetmə və yerli özünüidarəetmə orqanları ilə iş şöbəsinin müdiri Anar Cəfərov, rayon Mərkəzi Xəstəxanasının baş həkimi Telman Zahidov, rayon Təhsil şöbəsinin müdiri Əjdər Kərimov saxlanılıblar.

Tovuzun bir neçə kəndində “qulaqdibi” xəstəliyi yayılıb.

Oxu.Az xəbər verir ki, rayonun Aşağı Quşçu kəndində başlayan xəstəlik qısa zamanda Qovlar, İbrahimhacılı və digər yaşayış məntəqələrinə də yayılıb.

Xəstəlik daha çox uşaqlarda müşahidə edilir.

Məsələ ilə bağlı İbrahimhacılı kəndinin həkim məntəqəsinin terapevti Şəfəq İbrahimovanın Oxu.Az-a verdiyi məlumata görə, “qulaqdibi” xəstəliyi ilə bağlı 40-a yaxın müraciət olub:

“Bu vaxta qədər belə bir vəziyyət olmayıb. Təxminən 40-a yaxın xəstəliklə bağlı müraciət edilib. Xəstələrin arasında böyüklər olsa da, uşaqlar çoxluq təşkil edir. Xəstəlik bizim kənddə başlamayıb, qonşu kəndlərdən yayılaraq bura gəlib. Xəstəlik virus infeksiyasıdır, hava yolu ilə yoluxur.

İnfeksiyanın inkubasiya dövrü 21 gündür. Xəstəliyə yoluxan şəxs 21 gün heç kimlə təmasda olmamalıdır. Uşaqlar məktəbdə bir-biri ilə ünsiyyətdə olduqlarına görə, xəstəlik yayılıb. Xəstəliyə yoluxan şəxslərə peyvənd vurulub. Onların vəziyyətləri artıq yaxşıdır. Məktəbdə monitorinqlər aparılıb”.

Qovlar şəhər xəstəxanasının baş həkimi Fazil Əliyev isə kənd sakinləri arasında heç bir xəstəliyin yayılmadığını deyib:

“Qulaqdibi” xəstəliyi bizim kənddə deyil, Aşağı Quşçu kəndində yayılıb. Bizim kənddən bu xəstəliklə bağlı hələ ki müraciət edən olmayıb”.

Aşağı Quşçu kənd bələdiyyə sədri Tofiq Hüseynov isə yayılan məlumatların əsassız olduğunu deyib. O bildirib ki, kənd əhalisi arasında “qulaqdibi” xəstəliyi yayılmayıb.

Dövlət Təhlükəsizliyi Xidmətinin (DTX) keçirdiyi əməliyyatla saxlanılan Neftçala Rayon İcra Hakimiyyətinin başçısının müavini Gültəkin Sadıqova rayonda “təhsil biznesi şəbəkəsi” qurubmuş.

Bu barədə Oxu.Az DTX-nin yaydığı əməliyyat çəkilişlərinə istinadən xəbər verir.

Belə ki, sorğu-suala çəkilən icra başçısının ictimai-siyasi və humanitar məsələlər üzrə müavini Gültəkin Sadıqova məktəb direktorlarından alınan rüşvətin siyahısı barədə məlumat verir.

Rayon Təhsil Şöbəsinin müdiri Əjdər Kərimov isə qeyd edir ki, müəllimlərdən yığılan 30 min manatı şəxsən İsmayıl Vəliyevə təqdim edib.

O bildirib ki, hər ayın sonunda da 2000 manat rüşvət verib.

“Mən bu pulu əldə etmək üçün məcbur qalıb, hər ay məktəb direktorlarından 50-150 manat arası pul almışam”, – deyə Əjdər Kərimov bildirir.

Ümumiyyətlə, bundan əvvəl də mətbuatda yazılırdı ki, Neftçalanın təhsili bərbad səviyyədədir.

İnternet materiallarında qeyd edilirdi ki, Əjdər Kərimovla Gültəkin Sadıqova rüşvət əməliyyatlarına birlikdə rəhbərlik ediblər.

Məktəb direktorlarının təyin edilməsi, dərs saatlarının bölüşdürülməsinin onların müştərək diktəsinin “bəhrəsi” olduğu bildirilirdi.

Gültəkin Sadıqovanın məktəblərin təmirinə ayrılan pulu da mənimsədiyi haqqında çoxsaylı iddialar mövcuddur.

Onun bu vəzifədə işlədiyi müddətdə Bakı şəhərində iki bina evi, Neftçalada böyük bağ evi, əkin sahələri və sair mülklərə sahib olduğu da yazılırdı.

Gültəkin Sadıqovanın uşaq bağçalarına ayrılan vəsaiti də mənimsədiyi, bunun nəticəsində uşaq bağçalarında bərbad vəziyyətin hökm sürdüyü də iddia olunurdu.

Müavin Milli Məclisə keçirilən növbədənkənar seçkilərdə 61 saylı Neftçala Seçki Dairəsindən namizəd idi.

Xatırladaq ki, DTX-nin keçirdiyi əməliyyatla Neftçalanın icra başçısı İsmayıl Vəliyev, icra hakimiyyəti başçısının birinci müavini Vurğun Əkbərov, icra başçısının digər müavini Gültəkin Sadıqova, Memarlıq və tikinti şöbəsinin müdiri Vüqar Nağıyev, Ərazi idarəetmə və yerli özünüidarəetmə orqanları ilə iş şöbəsinin müdiri Anar Cəfərov, rayon Mərkəzi Xəstəxanasının baş həkimi Telman Zahidov, rayon Təhsil şöbəsinin müdiri Əjdər Kərimov saxlanılıblar.

Prezident İlham Əliyevin fevralın 20-də imzaladığı sərəncamla İsmayıl Vəliyev icra başçısı vəzifəsindən azad edilib.

Fevralın 24-də ölkə ərazisində cənub-qərb küləyinin güclənməsi müşahidə olunacaq.

Bunu açıqlamasında Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin Hidrometeoroloji Proqnozlar Bürosunun direktoru Gülşad Məmmədova bildirib.

Onun sözlərinə görə, üç gün ərzində Bakıda və Abşeron yarımadasında hava şəraitində mühüm dəyişiklik gözlənilmir:

“Fevralın 22-si, 23-ü və 24-də Bakıda və Abşeron yarımadasında hava şəraitinin dəyişkən buludlu, arabir tutulacağı gözlənilir. Gecə və səhər saatlarında duman, çiskin olacaq. Mülayim cənub küləyi əsəcək.

Fevralın 24-də respublika ərazisində arabir cənub-qərb küləyinin güclənməsi müşahidə olunacaq. Havanın temperaturu gecə saatlarında 4-7 dərəcə, günorta saatlarında isə 9-11 dərəcə arasında dəyişəcək”.

G.Məmmədova qeyd edib ki, bölgələrdə də üç gün ərzində yağmursuz hava şəraiti müşahidə olunacaq:

“Lakin gecə və səhər bəzi şərq rayonlarında çiskin olacaq. Havanın temperaturu bölgələrdə günorta saatlarında 12-17, dağlıq ərazilərdə isə 6-11 dərəcə isti təşkil edəcəyi gözlənilir”.