Month: June 2020

“Bəhram Bağırzadənin ümumi vəziyyəti ağır olaraq qalsa da, son iki gün içərisində ağciyər toxumasında yenidən havalanma görülüb”.

Bunu Oxu.Az-a açıqlamasında COVID-19-a yoluxmuş Əməkdar artist Bəhram Bağırzadənin müalicə olunduğu Mərkəzi Gömrük Hospitalının Elmi-Təcrübi və Tədris Mərkəzinin rəisi Rəşad Mahmudov deyib.

Onun sözlərinə görə, Əməkdar artist Bəhram Bağırzadənin müalicəsinin başlanıldığı ilk 10 gün ərzində heç bir müsbət irəliləyiş olmayıb:

“O, süni tənəffüs aparatına qoşulmuş vəziyyətdə idi. Ağciyərlərin vəziyyəti onsuz da yaxşı deyildi, hətta deyərdim ki, ilk 10 gün ərzində ağciyərlər toxumalarının qalan 10 faizinin də fəaliyyəti müşahidə edilmirdi. Bütün ağciyərin tamam zədələnmiş formada olmasına baxmayaraq, son iki gün ərzində ağciyər toxumasında yenidən havalanmanın müşahidə edilməsi bizi sevindirdi. Artıq həkimlər üçün yeni bir ümid var. Əlimizdən gələni edirik ki, qarşıdakı günlərdə daha yaxşı reaksiyalar alaq”.

Həkim əməkdar artistin müalicəsinin 7 iyun tarixindən başladığını da qeyd edib:

“Bildiyiniz kimi, iyunun 6-da Bəhram Bağırzadədə yüksək hərarət müşahidə olunub. Bir gün sonra isə müayinələr nəticəsində ona COVID-19 diaqnozu qoyulub.

Uzun müddətdir ki, sosial şəbəkələrdə geniş müzakirələrə səbəb olan həmin səs yazısı da məhz 7 iyun tarixinə aiddir. Qorxulu yuxu halına gəlmiş bu xəstəliyə görə yaxınlarını narahat etməmək üçün bu səs yazısını göndərib.

Lakin iyunun 9-da B.Bağırzadənin tomoqrafiya nəticələri göstərir ki, xəstəlik onun ağciyərinin 10 faizinə ziyan vurub. Ayın 12-də B.Bağırzadənin vəziyyəti anidən ağırlaşır və intensiv müalicə ilə bərabər o dərhal tibb müəssisəsinə yerləşdirilir. Sonuncu tomoqrafiya isə ağciyərlərin 90 faizinin zədələndiyini göstərir.

Həyati vəziyyətinin təhlükədə olduğunu nəzərə alaraq, onun dərhal ECMO cihazına qoşulmasına qərar verdik. Bununla da onu həyatda saxlaya bildik. Aparılan intensiv müalicələr nəticəsində, nəhayət, son iki gün ərzində müsbət irəliləyiş qeydə aldıq. Təbii ki, hələ də yüz faiz proqnoz vermək üçün çox tezdir”.

Xatırladaq ki, Azərbaycanın Əməkdar artisti Bəhram Bağırzadə koronavirus infeksiyasına yoluxub. Vəziyyətinin kəskin pisləşməsi səbəbindən iyunun 13-də Mərkəzi Gömrük Hospitalının reanimasiya şöbəsinə köçürülüb.

Ağciyər toxumasının 90 faizindən çoxunun zədələnməsi səbəbindən həkimlər onun ECMO cihazına qoşulmasına qərar verib.

Əməkdar artist B.Bağırzadənin müalicəsi birbaşa Azərbaycanın Birinci vitse-prezidenti Mehriban Əliyevanın nəzarətindədir.

Dünya ölkələri pandemiya şəraitində vətəndaşların məhkəmələrə əlçatanlığını təmin etmək, ədalət mühakiməsini dayandırmamaq məqsədilə müxtəlif həll yolları axtarır.

Baku TV xəbər verir ki, mütərəqqi addımlardan biri kimi, bu sahədə də elektron texnologiyalar köməyə çatır.

Bizim ölkədə də bu vasitələrdən geniş istifadə edilir və onların köməyilə mülki işlərə məhkəmələrdə onlayn şəkildə baxmaq mümkündür. Bundan sonra isə tək mülki yox, cinayət işləri ilə bağlı məhkəmələr də onlayn şəkildə baş tutacaq. Bu barədə qərar Məhkəmə-Hüquq Şurasının iclasında verilib.

Məhkum və təqsirləndirilən şəxsin onlayn şəkildə bilavasitə təcridxana və cəzaçəkmə müəssisələrindən dindirilməsi həm cinayət sahəsində ədalət mühakiməsinin daha çevik həyata keçirilməsi, həm də vətəndaşların hüquqlarının daha etibarlı qorunmasına şərait yaradır.

Cəlilabad rayonunda kütləvi dava nəticəsində bir nəfər ağır xəsarət alıb.

Hadisə rayonun Alar kəndində baş verib. Belə ki, kənd sakini Zaur Quliyev qohumları tərəfindən döyülüb.

Zərərçəkənin oğlu və yaxınlarının sözlərinə görə, hadisə yaşadıqları evin həyətində baş verib:

“Biz həyətimizin qabağında dayanmışdıq. Bir anda bizə hücum etdilər. Əllərində armatur, plastik su boruları ilə atama zərbələr endirdilər. Sonra isə Ə.Quliyev əlində daş parçası ilə gəlib atamın baş nahiyəsindən ağır zərbə endirdi”.

İlkin məlumata görə, Z.Quliyevin həyətyanı sahəsindən təsərrüfat texnikasının keçməsinə icazə verməməsi qohumların qəzəbinə səbəb olub. Axşam saatlarında tərəflər arasında yaranan mübahisə isə sonradan əlbəyaxa davaya çevrilib. 10-a yaxın şəxs Z.Quliyevi küt alətlə döyərək, ona ağır xəsarətlər yetiriblər.

Zərərçəkən hadisə ilə bağlı Cəlilabad Rayon Polis Şöbəsinə müraciət edib. Şöbədə onun halı pisləşdiyi üçün polislər tərəfindən xəstəxanaya yerləşdirilib. Həkimlərin müayinəsi zamanı Zaur Quliyevin baş nahiyəsində çoxsaylı sınıqların olduğu müəyyənləşib.

Ailə yaxınlarının sözlərinə görə, Z.Quliyev 20 il bundan əvvəl qıcolmadan əziyyət çəkib:

“Uzun illər müalicə olundu, sağaldı. Həkimlərdən heç bir şikayətimiz yoxdur, əllərindən gələni edirlər. Amma daşı necə vurublarsa, bu günə qalıb. Ağzından köpük gəlir”.

Hazırda xəstəxanada olan Z.Quliyevin vəziyyətinin ağır olduğu, hadisədən sonra danışıq qabiliyyətini itirdiyi qeyd olunur.

Faktla bağlı araşdırma aparılır.

//oxu.az

Zərdab Rayon Polis Şöbəsinin əməkdaşları tərəfindən koronavirus pandemiyası ilə mübarizədə əhalinin sağlamlığının qorunması məqsədilə elan edilən xüsusi karantin rejiminin pozulması hallarının qarşısının alınması istiqamətində mütəmadi tədbirlər davam etdirilir.

Daxili İşlər Nazirliyinin Mətbuat Xidmətinin Bərdə regional qrupundan verilən məlumata görə, karantin rejimi ilə bağlı məhdudiyyətlər tətbiq edilməsinə baxmayaraq, bəzi şəxslər tərəfindən nizam-intizamın pozulması hallarına rast gəlinməkdədir.

Belə ki, Zərdab rayonunun Alıcanlı kəndində 25 nəfərə yaxın şəxs toplaşaraq, toy məclisi təşkil edib, bununla da, xüsusi karantin qaydalarını kobud şəkildə pozublar. Zərdab Rayon Polis Şöbəsinin əməkdaşları tərəfindən məclisdə iştirak edən 14 nəfər saxlanılıb.

Saxlanılan şəxslər barəsində İnzibati Xətalar Məcəlləsinin 211-ci maddəsi üzrə protokollar tərtib edilərək, məhkəmənin qərarı ilə onların hər biri 100 manat məbləğində cərimə edilib.