Month: September 2020

Sosial şəbəkələrdə Bərdə rayonunda yetkinlik yaşına çatmayan qızın qaçırılması ilə bağlı valideyninin müraciəti əsasında yayılmış məlumatlar Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva tərəfindən dərhal nəzarətə götürülüb, o, şəxsən yetkinlik yaşına çatmayanla telefon əlaqəsi saxlayıb. Eləcə də Ombudsmanın tapşırığı əsasında Müvəkkilin Gəncə Regional Mərkəzinin əməkdaşları tərəfindən ailələr ziyarət edilib, məsələ yerində araşdırılıb.

Ombudsman Aparatından verilən məlumata görə, nəticə olaraq həmin yetkinlik yaşına çatmayan şəxs Bakı şəhərində lazımi sosial reabilitasiya və psixoloji xidmətlərə yönləndirilib, hüquqlarının təmini nəzarətdə saxlanılır:

“Qeyd olunmalıdır ki, sosial və mənəvi-psixoloji mahiyyətə malik olan bu kimi məsələlər hər birimizin dəstəyini tələb edir. Müvəkkil yetkinlik yaşına çatmayan şəxsin maraqlarının təmin edilməsinə dəstək olan vətəndaşlara, dövlət qurumları və vətəndaş cəmiyyəti nümayəndələrinə öz təşəkkürünü bildirir”.

Xəbər verdiymiz kimi, bu gün tanınmış gitara ifaçısı Nofəl Süleymanov ehtiyatsızlıqdan oğlu tərəfindən qətlə yetirilib.

Big.az mərhum musiqiçinin bacısı oğlu idmançı, dünya çempionu Anar Süleymanovla əlaqə saxlayıb. Anar bildirib ki, ifaçının oğlu Şövqi hazırda şok vəziyyətindədir:

“Hadisə yerindəyəm. Polislər buradadır. Ekspertiza aparırlar. Oğlu şokdadır. Ekspertizanın rəyindən sonra dayım Ağcabədidə dəfn olunacaq”.

Ümumi təhsil müəssisələrində tədris prosesinin təşkilini və tənzimlənməsini təmin etmək məqsədilə “Xüsusi karantin rejimi dövründə ümumi təhsil müəssisələrində illik planlaşdırmaların hazırlanmasına dair metodiki göstərişlər” hazırlanıb.

APA-nın məlumatına görə, bu barədə Təhsil nazirinin müavini Məhəbbət Vəliyevanın rayon (şəhər) təhsil şöbələrinə (idarələrinə), Təhsil Nazirliyinin birbaşa tabeliyindəki ümumtəhsil müəssisələrinə və birbaşa tabeliyində olmayan digər ümumi təhsil müəssisələrinə ünvanladığı məktubda bildirilib.

Metodiki göstərişlərdə qeyd edilib ki, təhsilalanların sıxlığı yüksək olan təhsil müəssisələrində sinif otağında sosial məsafənin (1,5 m) gözlənilməsi məqsədilə siniflər yarımqruplara bölünür. Təlimin təşkilinin planlaşdırılmasında bildirilib ki, müəllim dərs ilinin əvvəlində illik planlaşdırmada ötən tədris ilindəki məzmunu, xüsusilə mart-iyun aylarında distant şəkildə tədris olunan məzmunu təkrarlamaq üçün müvafiq saatlar ayırır. Bu zaman müəllim üçün metodik vəsaitdə verilmiş istiqamətverici illik planlaşdırma nümunələrinə istinadən tədris planında nəzərdə tutulmuş dərs saatlarını saxlayır. V-XI siniflərdə təbiət-riyaziyyat fənlərinin (riyaziyyat, informatika, fizika, kimya, biologiya, coğrafiya) 4-5 saat; humanitar fənlərin hər birinə (Azərbaycan dili, ədəbiyyat, tarix və s.) isə 2-3 saat təkrarın verilməsi nəzərdə tutulur.

I siniflərdə Azərbaycan dili, riyaziyyat fənlərinin dərs saatı hesabına 2 həftə məktəbəhazırlıq mərhələsində keçirilmiş məşğələlərin, II-IV siniflərdə isə Azərbaycan dili və riyaziyyat fənlərindən 4-5 saat təkrarın verilməsi nəzərdə tutulur. Tədris ilinin əvvəlində təkrar dərslərin cari ilin mart-iyun aylarında tədris olunmuş mövzular əsasında keçirilməsi mütləq nəzərə alınmalıdır. İllik (yarımillik) planlaşdırma tərtib edilərkən ibtidai siniflərdə yaxın mövzular birləşdilir. Mövzuların birləşdirilməsi Pedoqoji şuranın və ya metodbirləşmənin qərarı ilə rəsmiləşdirilir. V-XI siniflərdə ümumiləşdirici və təkrar dərslərə ayrılan saatlar ixtisar edilir.

Fənlər üzrə həftəlik dərs saatlarının əyani və ya distant (məsafədən) formada bölgüsü xüsusi karantin rejimi dövründə uyğunlaşdırılmış tədris planlarına əsasən aparılır. Yeni dərsin, bölmənin ilk 15 dəqiqəsi diaqnostik qiymətləndirməyə ayrılır. İllik (yarımillik) planlaşdırma tərtib edilərkən dərslərin tədris planında göstərilmiş saata uyğun əyani və distant keçirilməsi nəzərə alınır. Lisey və gimnaziyaların tədris planlarına Pedoqoji şuranın qərarı ilə müvafiq dəyişikliklər edilə bilər. Dərslikdəki mövzu və tapşırıqların əyani və ya distant tədris olunması məsələsi metodbirləşmənin müzakirəsinə çıxarılaraq kollegial qərar qəbul edilir. Əyani dərslərin müddəti 45 dəqiqə, distant dərslərin müddəti isə 30 dəqiqəyə qədər planlaşdırılır.

Azərbaycan Respublikasının Prezidenti yanında Əfv Məsələləri Komissiyasının sədri və tərkibi dəyişdirilib.

Prezident İlham Əliyevin imzaladığı sərəncama əsasən, Komissiyanın sədri Azərbaycan Respublikası Prezidentinin Administrasiyasının rəhbəri Samir Nuriyev təsdiqlənib.

İndiyədək Komissiyanın sədri ramiz mehdiyev idi.

Bundan başqa, əvvəlki tərkibdə olan Əbülfəs Qarayev (sabiq Mədəniyyət naziri), Bəxtiyar Əliyev (Milli Məclisin deputatı), Səttar Möhbalıyev (Milli Məclisinin deputatı, Azərbaycan Həmkarlar İttifaqları Konfederasiyasının sədri), Elmira Axundova (Milli Məclisin sabiq deputatı Azərbaycanın Uktaynadkı səfiri), Məlahət İbrahimqızı (Milli Məclisinin deputatı), Mehdi Mehdiyev (Qarabağ Müharibəsi Əlilləri, Veteranları və Şəhid Ailələri İctimai Birliyinin sədri), Cəmilə Ramazanova (Əməkdar müəllimi) Komissiyanın tərkibindən çıxarılıblar.

“Rayonlara gediş-gəlişin açılması ölkədə koronavirusun yayılma səviyyəsinə ciddi təsir etməyə bilər”.

Bunu Trend-ə açıqlamasında Azərbaycanın baş infeksionisti Cəlal İsayev deyib.

O qeyd edib ki, ölkədə tətbiq edilən sərt karantin qaydalarında yumşalmalar olsa da, insanlar hər an ehtiyatlı olmalıdır: “Ümid edirəm ki, yumşalmalar, rayonlara gediş-gəlişin bərpası virusun yoluxmasını artırmaz. Yoluxmanın yayılması insanların qaydalara nəzarət etməməsindən irəli gəlir. Əgər insanlar qaydalara əməl edərlərsə, məsafə saxlayarlarsa, bu halda yoluxma arta bilməz. Bunu da insanlar dərk etməlidirlər.

Bu gündən yollar açılıb, insanlar rayonlara gedib-gəlirlər. Amma bu o demək deyil ki, insanlar rayonda qapı-qapı bütün evlərə getməlidirlər, ara məsafəsi saxlamalı deyillər. Bütün hallarda tətbiq edilən qaydalara riayət olunmalıdır. Qaydalara görə, insanlar öz şəxsi avtomobilləri ilə ailə üzvləri ilə birlikdə rayonlara gedir. Sadəcə həmin ailə rayonda qohum-əqraba ilə çox təmasda olmasalar, başqa qohumları ilə telefonla əlaqə saxlasalar, yoluxma artmayacaq. Digər tərəfdən, rayon yerində sıxlıq müşahidə olunmur. Və həmin ailələr qaydalara əməl etsələr, yoluxma sayında artım olmayacaq”.

C.İsayev bildirib ki, rayonlara taksi ilə gediş-gəlişdə təhlükə ola bilər: “Yəni əgər rayonlara sərnişin daşıyan taksiyə 4 müxtəlif şəxs minərsə, bu halda qismən təhlükə ola bilər. Amma bu halda da vətəndaşlar diqqətli olmalıdırlar. Özlərində hər hansısa bir simptom hiss edən şəxs taksi ilə rayona getməməlidir. Bir sözlə, Bakıda bu qaydalara necə nəzarət edilirsə, elə rayonlarda da eyni səviyyədədir.

Rayona gedən insanla xüsusi söhbətlər aparılmalıdır. Guya karantin dövründə insanlar rayonlara getmirdi? Ezamiyyət və ya hansısa bir işlə əlaqəli insanlar rayonlara gedib-gəlirdi. Onlar qaydalara rayonda da əməl etdikləri üçün yoluxmalar artmırdı. İndi də eyni qaydalara riayət olunsa, yoluxma nəinki artmayacaq, əksinə azalacaq”.

Bakıda gözəllik salonlarında oğurluq hadisələri baş verir.

AZXEBER.COM-a göndərilən görüntülər iki müxtəlif gözəllik salonunun təhlükəsizlik kameralarının lentə aldığı kadrlardır. Görüntülərdən də göründüyü kimi müştəri kimi salonlara daxil olan qadın digər müştərilərin çantalarının olduğu yerə yaxınlaşır. Ətrafdakıların nəzərinin üzərində olmadığını görəndən sonra isə öz əməlini davam etdirir və vətəndaşların pul kisələrini oğurlayır.

Məlumata görə sözgüdən qadın hazırda müxtəlif rayonların ərazilərində olan gözəllik salonlarında oğurluq hadisələri törədib.

Həmin görüntüləri təqdim edirik:

Müəllimlərin işə qəbulu üzrə vakant yerlərin seçimi başa çatdıqdan sonra yerləşdirmə mərhələsində eyni bal toplayan və eyni yeri seçən namizədlər arasında seçimlər müəyyən meyarlar əsasında aparılacaq.

Bu barədə Təhsil Nazirliyinin canlı yayımında çıxış edən nazirliyin İnsan resursları şöbəsinin müdiri Eşqi Bağırov məlumat verib.

O bildirib ki, bu zaman qiymətləndirilmə fərqli aparılacaq:

“Əvvəlki illərdə sualların çətinlik dərəcəsinə uyğun olaraq fərqli ballar tətbiq olunduğu üçün namizədlərin balları tam yox, kəsrlə qeydə alınırdı. Bu isə yerləşdirmə məsələsində eyni bal toplayan namizədlərin konkret vakant yerlərə yerləşdirilməsi zamanı toqquşma hallarını minimuma endirirdi.

Amma aparılan təhlillər və bu məsələdə test suallarının qiymətləndirilməsi ilə bağlı elmi yanaşmalar, sualların çətinlik dərəcəsinin müəyyən olunması ekspertlərin subyektiv mülahizələrinə dayanırdı. Bütün bunları nəzərə alaraq, təklif edildi ki, artıq hər düzgün sual 1 bal olaraq qiymətləndirilsin. Hər namizəd imtahanı bitirdikdən sonra ekranda tam balını görür. Belə olan halda toqquşma halları çox olacaq. Odur ki, burada əlavə meyarlar üzərindən qiymətləndirilmənin aparılması zəruridir”.

E.Bağırovun sözlərinə görə, qaydalara əsasən, eyni bal toplayan və eyni vakant yerə namizədlik verənlər olduğu təqdirdə namizədlərin elektron ərizələrində qeyd etdiyi digər meyarlar üzərindən qiymətləndirilmə aparılacaq:

“İlkin olaraq onların topladığı ixtisas balı əsas götürüləcək. Məsələn, hər iki namizəd 55 bal toplayıbsa, onlar arasında ixtisas suallarına daha çox düzgün cavab verən namizədə əmsal veriləcək. Beləliklə, digər namizədlə müqayisədə həmin vakant yerə üstünlük əldə edənlər yerləşdiriləcək.

Nəzərə alırıq ki, eyni bal toplayan və eyni vakant yeri seçən namizədlər arasında ixtisas suallarına bərabər sayda doğru cavab verənlərin də sayı az olmayacaq. Biz ikinci meyar üzrə də qiymətləndirmə aparmalı oluruq. Bu meyar isə təhsil göstəricisidir. Bu o deməkdir ki, iki eyni bal və düzgün cavablandırılan ixtisas suallarının sayı da bərabər olan namizədlər arasında, hansı bakalavr, magistr təhsilinə malikdirsə, eyni zamanda hər hansı elmi dərəcəsi varsa, o namizədə bu göstəricilərə görə üstünlük veriləcək. Məsələn, namizədlərdən biri orta ixtisas, digəri bakalavr təhsillidirsə, bakalavr təhsili olana 0,001 bal əlavə olunacaq və o bir addım öndə olacaq. Əgər hər iki namizəd bakalavr təhsillidirsə, yalnız birinin həm də magistr təhsili varsa, o zaman magistr təhsili olan namizədə 0,002 bal əlavə ediləcək və o, yerləşdirilmə prosesində üstünlük qazanacaq.

Eyni zamanda əlavə olaraq hansısa namizədin fəlsəfə doktoru elmi dərəcəsi və yaxud elmlər doktoru elmi dərəcəsi varsa, onlar da müvafiq olaraq 0,003 və 0,004 bal ilə qiymətləndirilərək üstünlük hüququ əldə edəcəklər.

İstisna deyil ki, bu göstəricilərin hər birinə uyğun namizədlər olacaq. Buna görə üçüncü qiymətləndirmə meyarı da nəzərdə tutulub. Belə ki, əgər təhsil göstəriciləri də, ixtisas balı göstəriciləri də iki və daha çox namizəddə eynidirsə, onların təhsil haqqında sənədlərinə baxılacaq. Ali təhsil pilləsini fərqləndirmə ilə bitirən namizədlərə əlavə bal veriləcək ki, bu da yerləşdirmə prosesində onlara üstünlük verəcək”.