Month: September 2020

Bu gün Respublika Olimpiya Mərkəzində İcbari Tibbi Sığorta üzrə Dövlət Agentliyinin İdarə Heyətinin sədri tərəfindən Naxçıvan Muxtar Respublikasının Baş nazirinə dövlət başçısının adından təcili tibbi yardım avtomobilləri təqdim edilib.

Bununla bağlı agentlik məlumat yayıb.

Səhiyyənin inkişafı istiqamətində dövlət tərəfindən aparılan islahatlardan danışan Agentliyin İdarə Heyətinin sədri Zaur Əliyev bildirib ki, sözügedən sahənin inkişafı Prezident İlham Əliyevin daim diqqət mərkəzində olub:

“Ölkə başçısının tapşırığına uyğun olaraq Agentlik tərəfindən ölkəmizə yeni təcili tibbi yardım avtomobilləri gətirilib. Yeni sifariş olunan təcili tibbi yardım avtomobillərinin ilk hissəsi cari ilin iyul ayında, növbəti hissəsi isə sentyabr ayında gətirilib.

Təcili tibbi yardım avtomobilləri arasında respublikaya gətirilən yeni, müasir standartlara cavab verən Ambulans-Perinatal ölkə səhiyyəsində yenilikdir”.

Daha sonra Naxçıvan Muxtar Respublikasının Baş naziri Agentliyin İdarə Heyətinin sədrindən “Mercedes Sprinter 316” markalı avtomobil bazasında yığılan yeddi ədəd – bunlardan beş ədədi sadə, iki ədədi reanimobil olmaqla, təcili tibbi yardım avtomobillərini qəbul edib.

Naxçıvan Muxtar Respublikasının Baş naziri Səbuhi Məmmədovun sözlərinə görə, dövlət başçısının səhiyyə sahəsində yürütdüyü məqsədyönlü siyasətin nəticəsidir ki, bu gün Azərbaycan koronavirus pandemiyası ilə yüksək səviyyədə mübarizə aparır.

Baş nazir bildirib ki, Naxçıvana təqdim edilən təcili tibbi yardım avtomobilləri muxtar respublikada səhiyyə sahəsi üzrə həyata keçirilən işlərə əlavə bir töhfədir:

“Biz bunu yüksək qiymətləndiririk və cənab Prezidentə və Birinci vitse-prezidentə öz təşəkkürümüzü ifadə edirik”.

Məlumat üçün bildirək ki, 2020-ci il ərzində Agentlik tərəfindən Almaniya istehsalı olan “Mercedes Sprinter 416” markalı avtomobil bazasında Türkiyədə yığılan 26 ədəd reanimobil, “Mercedes Sprinter 316” markalı avtomobil bazasında yığılan 42 ədəd sadə təcili tibbi yardım avtomobilləri, Türkiyə istehsalı olan “Ford Transit” markalı 10 ədəd sadə və 22 ədəd reanimobil “Gəncə Avtomobil Zavodu” İstehsalat Birliyindən, həmçinin, 84 ədəd “Fiat Doblo” markalı təcili tibbi yardım avtomobilləri “Autouniversal” Məhdud Məsuliyyətli Cəmiyyətindən satın alınıb.

Toylar oktyabr ayından bərpa edilə bilər.

BAKU.WS-xəbər verir ki, son bir neçə gün ərzində ərazi icra hakimiyyətlərindən şadlıq evlərinə ünvanlanan sorğular belə deməyə əsas verir.

Şadlıq evləri də artıq müəyyən hazırlıqlara başlayıblar. Paytaxt ərazisində yerləşən obyektlərin administratorlarının sözlərinə görə, son 1-2 gündə sifariş yazdıranların sayında müəyyən artım hiss olunur. Əsasən, toyları karantinə görə dəfələrlə təxirə düşənlər müraciət edirlər. Amma onların arasında yeni müştərilər də az deyil.

Hələlik toyların bərpası ilə bağlı rəsmi məlumat olmasa da, bəzi restoranlarda oktyabr ayına boş yer tapmaq belə mümkün deyil. Mərasimlərin Məhərrəm ayından – oktyabrın 18-dən sonra bərpa ediləcəyi istisna edilmir. Sahibkarlar hələlik dəqiq məlumat olmadığı üçün yeni qiymət siyasətləri ilə bağlı da məlumat verə bilməyəcəklərini deyirlər.

8-ci km ərazisində yerləşən şadlıq saraylarından birinin administratorunun sözlərinə görə, icra hakimiyyətindən restoranın ərazisinin neçə kvadrat metr olması, zalların ölçüsü, müştəri tutumları ilə bağlı dəqiqləşmələr aparılır.

“İcradan zəng edib açılacağını deyiblər. Lakin hələ dəqiq tarix bəlli deyil. Bütün obyektlərdən say, sahə soruşurlar. İndi ona uyğun tarix və qonaq sayı deyəcəklər. Məsələn, 400 nəfərlik zala nə qədər adam, 200 nəfərlik zalda neçə adam olsun. 99 faiz toyların bərpa ediləcəyini gözləyirik”.

Həmin ərazidəki başqa bir şadlıq evində isə 1-2 günə şərtlərin açıqlanacağı və əmrin çıxmasını gözlədiklərini deyiblər.

“Biz də gözləyirik. Sifarişləri dekabr, noyabr aylarına da qəbul edirik. Sifarişlərimiz çoxdur. Bunların əksəriyyəti toyları təxirə salınanlardır. Gözləyirik ki, əmr verilsin, biz də işimizi bilək”.

“20 Yanvar” metrostansiyası civarında yerləşən şadlıq evlərindən birinin rəsmisi də qeyd edib ki, bütün ərazilər üzrə həm mərasim zalları, həm şadlıq evləri ilə bağlı siyahı hazırlanır, tutumla bağlı məlumat toplanır:

“Sözsüz ki, məhdudiyyətlə olacaq. 300-500 nəfərlik toyların olacağını gözləmirik. Ümumiyyətlə, oktyabr ayında mərasimlərin başlayacağına da inanmırıq”.

Paytaxtın daha bir populyar sarayından icra hakimiyyəti tərəfindən hazırlanan siyahının operativ qərargaha təqdim edilmək üçün hazırlandığı qeyd edilib.

“Mənim özümlə danışıblar. Deyiblər ki, bizdən siyahını operativ qərargah götürəcək. Ehtimal ki, toylar Məhərrəmlikdən sonra başlayar. Oktyabrda bizdə ümumilikdə yer yoxdur. Ayın 18-dən axırına kimi doluyuq. Onların arasında təxirə düşənlər də, yeni müştərilər də var”.

Bakının şadlıq saraylarının daha çox olduğu istiqaməti – Çobanzadə küçəsindəki obyektlərdə zalların tutumunun yarısı qədər qonaqla toy etməyə icazə veriləcəyini gözləyirlər:

“Yəqin ki, 300 nəfərlik zallarda 150-120 nəfərlə toya icazə verərlər”.

Şadlıq evləri ilə bağlı qeydiyyat Bakı ilə yanaşı, rayonlarda da başlayıb.

Şəkidən verilən məlumata görə, qurumdan zalların sahəsi, qonaq tutumu ilə bağlı məlumat toplanılıb:

“Soruşduq ki, nə məsələdir. Dedilər, ola bilsin ki, şadlıq evləri açıldı. Bakıdan istəyiblər. Hələlik rəsmi məlumat yoxdur. Elə etməliyik ki, nə müştəri, nə də biz ziyana düşək. Qiymət artımı da gözləniləndir. Amma təki açılsın, birtəhər həll edərik”.

Son günlər sosial şəbəkələrdə hərbi əməliyyatlara başlamaq, sıravi vətəndaşların toplanaraq cəbhə bölgəsinə getmək, silaha sarılaraq torpaqlarımızı işğaldan azad etmək kimi çağırışlar səslənir.

Baku TV xəbər verir ki, bu, bir tərəfdən Azərbaycan cəmiyyətində vətənpərvərlik hissinin yüksək səviyyədə olduğunu nümayiş etdirsə də, digər tərəfdən onun ifadə forması bir sıra narahatlıq doğurub. Çünki bu gün Ermənistan təxribatları təkcə torpaqlarımızda deyil, eyni zamanda informasiya məkanında da törədir.

Düşmən tərəfindən azərbaycanlı adı və soyadı ilə yaradılmış yüzlərlə sosial şəbəkə hesablarından Azərbaycana qarşı informasiya müharibəsi aparan, ölkəni xaosa sürükləyən, xalqımızın və ordumuzun döyüşkən ruhuna mənfi təsir etməyə çalışan çağırışların şahidi oluruq.

Biz, düşmənlə müharibə şəraitində olan dövlətik. Ona görə də indiki vəziyyətdə hər bir Azərbaycan vətəndaşı, xüsusilə də sosial şəbəkə istifadəçiləri çox diqqətli, ayıq-sayıq olmalı, paylaşımlarına, statuslarına diqqət yetirməlidirlər ki, ermənilər həmin məlumatlardan ordumuza, əsgərlərimizə qarşı istifadə edə bilməsinlər.

Lənkəran rayon sakininin müsahibə verdiyi üçün polis bölməsinə çağırılması ilə bağlı sosial şəbəkələrdə məlumat yayılıb.

İddia olunur ki, o, TV-lərdən birinə məktəblərdə bərbad vəziyyətlə bağlı tənqidi açıqlama verdiyi üçün polis idarəsində saxlanılır.

Daxili İşlər Nazirliyinin Mətbuat Xidmətinin Lənkəran regional qrupundan Oxu.Az-a bildirib ki, bu iddia uydurmadır və heç bir əsası yoxdur:

“Lənkəran rayonunun Göyşaban kənd sakini Daşqın Əsədovun yaşadığı evin həyətində qanunsuz ət kəsimi ilə məşğul olması və bu zaman sanitariya qaydalarının kəskin şəkildə pozulması ilə bağlı Daxili işlər Nazirliyinin “102” xidməti zəng mərkəzinə müraciət daxil olub.

Müraciətlə bağlı polis əməkdaşları həmin ünvanda olub və fakt təsdiqini tapıb. Amma D.Əsədov səs-küy salıb, polis əməkdaşlarının qanuni tələblərinə qəsdən tabe olmayıb”.

“O, İnzibati Xətalar Məcəlləsinin 535.1-ci maddəsinə əsasən inzibati xəta törətdiyi üçün onun barəsində toplanmış materiallar baxılması üçün rayon məhkəməsinə göndərilib”, – deyə məlumatda qeyd edilib.

Bir müddətdir artıq çelenclər “Instagram” və “Tik-tok” kimi sosial şəbəkələrdə çox məşhurdur. Bu “meydan oxumalar” müxtəlif formatda olur. Lakin bunlardan bəziləri hətta faciəyə yol açacaq qədər təhlükəlidir.

ARB TV-nin efirində yayımlanan “Günə doğru” verilişi məsələ ilə bağlı ətraflı süjet hazırlayıb.

Bir müddət əvvəl “Tik-Tok” sosial şəbəkəsində Rusiyadan olan məktəblilər çelenc başladıb. Onlar hallusinasiya görmək üçün allergiyaya qarşı olan “Benadril” preparatını böyük dozalarda qəbul ediblər. Nəticədə üç yeniyetmə xəstəxanalıq olub. Çelenclə bağlı heşteq artıq 55 milyon baxış toplayıb.

Xatırladaq ki, Amerikada və Türkiyədə sosial şəbəkələrin fəaliyyətinə nəzarətlə bağlı xüsusi qanunvericilik var. Bu qanunların köməyilə sosial şəbəkələr birbaşa nəzarətə götürülür. Ölkəmizdə sırf sosial şəbəkə davranışlarını tənzimləyən ayrıca qanun yoxdur.

Sosial şəbəkələrlə bağlı ayrıca qanunvericiliyi qəbul etmiş ölkələrdə birbaşa sosial məsuliyyəti şirkət özü daşıyır.