Lənkəran rayonunun Hirkan kənd sakini, 28 yaşlı Qardaşova Şəlalə Şaddıq qızı itkin düşüb.
Ş.Qardaşovanın dayısı oğlu Həsən Əliyev qafqazinfo-ya açıqlamasında bildirib ki, iki azyaşlı uşağı olan Şəlalə martın 27-i saat 18:00 radələrində yaşadığı evdən çıxıb.
“Taksi çağıraraq Bakıya gedib, 20 yanvarda düşüb, sonra isə hara getdiyi bilinmir”, – deyə o bildirib.
Ailənin iddiasına görə, Ş.Qardaşova həyat yoldaşı Anar Qardaşov onu döydüyü və əziyyət verdiyi üçün evdən qaçıb: “Martın 25-də Şəlalə anasının yanına gəlib və Anarın onu incitdiyini, buna görə də qaçacağını deyib. Anası isə ona uşaqları olduğunu xatırladaraq evinə qayıtmasını tapşırıb. Onlar münaqişəli ailə olublar, əri Anar mərc oyunları oynayıb, pulunu orada batırırmış. Ailənin 6 və 7 yaşlarında iki övladı var, 13 ildir evlidirlər”.
Ş.Qardaşovanın əri A.Qardaşov isə iddialarla bağlı açıqlamasında deyib ki, həyat yoldaşı ilə münasibətləri qısqanclıq zəminində pozulub. O iddia edib ki, xanımı paytaxta sevdiyi şəxsə görə qaçıb: “Qardaşının, ailəsinin qorxusundan qaçıb. Şəlalə gedəndən sonra telefonunda bir neçə nömrə tapdıq. Polis əməkdaşları həmin nömrələrlə əlaqə saxladı, amma bildirdilər ki, Şəlalə onların yanında deyil.
Onu Bakıya aparan sürücü deyir ki, Şəlalə onun telefonu ilə Kamran adlı şəxslə danışıb. Həmin şəxs ona “1 manatlıq” taksilərin yanında düşüb gəlməyi məsləhət bilib. Sürücü ilə həm polis, həm də mən danışmışam. O deyir ki, Şəlalə onunla deyil. Mən də polisə dedim ki, cinayət törədən şəxs onsuz da özü etiraf etmir”.
Anar Dadaşov arvadı Şəlaləni döymədiyini bildirib: “Onun üçün burada, kənddə şəhər həyatı yaratmışdım. Əgər mən onu döymüşdümsə, gedib anasıgildə qalardı, polisə şikayət edərdi.
Mərc oyununu da öz puluma oynayıram, arada 2-3 manat hesaba qoyuram. İndi tapılsın, boşanacağam, daha nə edəcəyini özü bilər”.
Ş.Dadaşovanın itkin düşməsi ilə bağlı polisə müraciət edilib, axtarışlar aparılır. Onu görənlərdən Daxili İşlər Nazirliyinin 102 xidmətinə məlumat verməsi xahiş olunur.
