Month: September 2021

Dünya neft qiymətləri ucuzlaşmağa başlayıb.

Bunu ticarət sövdələşmələrinin nəticələri göstərir.

Bakı vaxtı ilə saat 17:53-ə olan məlumata görə, “Brent” markalı neftin noyabr fyuçerslərinin qiyməti 1,37% azalaraq 70,65 dollar/barelə düşüb. WTI markalı neftin oktyabr fyuçersləri isə 1,64% dəyər itirərək bir barel üçün 67,42 ABŞ dolları təşkil edib.

Qeyd olunur ki, buna Rusiya Baş nazirinin müavini Aleksandr Novakın açıqlamaları təsir edib. Belə ki, o, OPEC+in dünya neft bazarındakı izafi ehtiyatların öhdəsindən gəldiyini və indi tarazlığı qorumaq, hasilat və tələbatı sinxronlaşdırmağın zəruri olduğunu söyləyib. O, həmçinin qlobal neft bazarının 2022-ci ildə tam bərpa olunacağına ümid etdiyini və bu il tələbatın gündəlik 5,8-6 milyon barel artacağının gözlənildiyini bildirib.

Xatırladaq ki, OPEC+ koronavirus pandemiyası səbəbindən neftə olan tələbatın azalması səbəbindən keçən ilin may ayından bu yana hasilatını gündəlik 9,7 milyon barel azaldıb. Vəziyyət sabitləşdikcə razılaşmaya korrektələr edilib. 2021-ci ilin avqust ayından etibarən isə alyans hər ay hasilatı gündəlik 400 min barel artırır və 2022-ci ilin sentyabr ayının sonuna qədər tədarükü azaltmaq öhdəliklərindən tədricən geri çəkilməyə ümid edir. Bu ilin sentyabr ayı üçün bu, gündəlik 4,96 milyon barel təşkil edir.

Əlavə edək ki, bu gün OPEC+ çərçivəsində bir sıra görüşlər keçirilir və razılaşma iştirakçıları neft hasilatının tədricən artırılması ilə bağlı planların saxlanıb-saxlanılmayacağına qərar verəcək.

“Pandemiya ilə bağlı olaraq dünyanın demək olar ki, bütün ölkələri onun iqtisadiyyata vurduğu ziyanları neytrallaşdırmaq üçün yumşaldıcı pul- kredit siyasətinə üstünlük veriblər. Bunun nəticəsi olaraq əksər ölkələrin Mərkəzi Bankları faiz dərəcələrini azaldaraq, yumşaq pul-kredit siyasəti nəticəsində dövriyyədə olan pul kütləsinin miqdarını artırıblar”.

Bu sözləri “Report”a açıqlamasında kriptovalyutalarla bağlı danışan “Unicapital İnvestisiya şirkəti” ASC-nin Araşdırmalar və investisiya məsləhəti şöbəsinin müdiri Seymur İbadov deyib.

S.İbadov bildirib ki, pandemiya dövründə dünyada və ölkəmizdə kriptovalyutalara maraq artıb:

“Bütün bu baş verən amillər isə öz növbəsində investorları aşağı faizlərin mövcud olduğu bir dönəmdə klassik investisiya alətlərindən kənar, başqa maliyyə alətləri axtarmağa vadar edib. Məhz bu baxımdan pandemiyanın höküm sürdüyü dönəmlərdə demək olar ki, investorlar tərəfindən kriptovalyutalara olan maraq artıb. Bu tendensiya bizim ölkədən də yan keçməyib”.

S.İbadov Azərbaycanda əhalinin ən çox hansı kriptovalyutaya yönəldiyini qeyd edib:

“Qeyd edək ki, kriptovalyutaların sayı yüzlərlə ölçülür və demək olar ki, vaxtaşırı yeni kriptovalyutaların yaradılması barədə informasiyalar alırıq. Kriptovalyutaların sayının çox olmasına baxmayaraq əsas bir neçə kriptovalyutalar mövcuddur ki, bunlar bu bazarda həlledici məqama malikdir. Belə ki, hazırda kriptovalyutaların bazar dəyəri 2 trilyon ABŞ dollarından artıqdır. İlk növbədə bu tip alətlər arasında ilk rəsmi kriptovalyuta hesab edilən “Bitcoin” qərarlaşıb. İnvestorlar arasında sıralamada məşhurluğuna görə 2-ci yerdə isə “Ethereum” qərarlaşıb. Sonra ilk onluqda bu kriptovalyutalardan sonra “Cardano”, “Binance Coin”, “XRP,Dogecoin”, “Solana”, “Polkadot”, “Uniswap” qərarlaşıb.

“Bazar dəyərinə görə kriptovalyuta bazarlarında “Bitcoin” və “Ethereum” ümumilikdə bütün bazarın 60 %-dən çoxunu təşkil edir”, – deyə S.İbadov əlavə edib.