Month: October 2021

Bakıda mağazalara çörəkdaşıyan avtomobillərin sürücülərindən sağlamlıq haqqında arayış tələb olunur.

“Xəzər Xəbər”in məlumatına görə, bu problemlə paytaxtda çörək istehsalı və çörəyin mağazalara çatdırılmasını təşkil edən sahibkar Söhrab Cabbarov üzləşib.

Çörək sexinin sahibi iddia edir ki, yol polisi çörəyin mağazalara çatdırmasına mane olur.

O deyir ki, son bir neçə gündür səhərin erkən saatlarında çörəyin daşınmasını həyata keçirən avtomobillərin sürücüləri yollarda müəyyən maneələrlə üzləşirlər.

Sürücülərin reysqabağı tibbi arayışları olmadığından sahibkar iddia edir ki, yol polisi onların çörəklə dolu olan avtomobillərini cərimə meydançasına aparır. Hətta belə hal bir neçə dəfə təkrarlandığından onlara maddi zərər də dəyib.

Söhrab Cabbarov deyir ki, bütün sürücülərin işə qəbulu zamanı onlardan tibbi arayış alınıb. Səhhəti normal olan sürücülər işə götürülüb. Qanunvericiliyə görə, sərnişin və yük daşımalarını yerinə yetirən avtonəqliyyat vasitələrinin texniki vəziyyətinin və sürücülərinin reysqabağı tibbi müayinəsinin təşkil edilməməsinə görə protokolu aidiyyəti üzrə Dövlət Avtomobil Nəqliyyatı Xidmətinin əməkdaşları tərtib edə bilər.

Məsələyə Bakı şəhər Baş Polis İdarəsinin Dövlət Yol Polisi İdarəsi də münasibət bildirib. İdarədən deyilib ki, sürücü bununla bağlı yol polis idarəsinə müraciət etsin, onun şikayəti qısa zamanda araşdırılacaq.

Mövzu ilə bağlı süjeti təqdim edirik:

İraqdan ölkəmizə repatriasiya olunmuş 38 uşaqdan 17-si Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin, 21 nəfəri Səhiyyə Nazirliyinin müəssisələrinə yerləşdirilib.

Bu barədə Əmək və Əhalinin Sosial Müdafiəsi Nazirliyindən bildirilib.

Bundan əvvəl tərkibində Agentliyin nümayəndəsi də olan İşçi Qrupu Bağdad şəhərinə (İraq) ezam edilib. Orada cəzaçəkmə müəssisələri və uşaq evlərində saxlanılan, Azərbaycan vətəndaşları olan həmin uşaqların ilkin tibbi və psixoloji müayinəsi həyata keçirilib, onlara zəruri yardım göstərilib.

Ölkəyə gətirildikdən sonra uşaqların hər birinə psixoloq, sosial işçi təyin olunub. Onlarla bağlı fərdi plan əsasında, həmçinin aidiyyəti dövlət qurumları ilə əməkdaşlıq şəraitində reabilitasiya və reinteqrasiya proqramının icrasına başlanıb.

Sosial tərəfdaşların dəstəyi ilə qış paltarları ilə təmin edilikdən sonra uşaqların ailələrinə, yaxın qohumlarına verilməsinə başlanacaq. Sonrakı mərhələdə də onlara sosial-psixoloji dəstək davam edəcək, yerləşdikləri ailələrlə psixososial reabilitasiya işi aparılacaq.

Azərbaycan Hökuməti tərəfindən bu vaxtadək İraqdan və Suriyadan repatriasiya olunmuş digər şəxslərlə, onların yaşadıqları ailələrlə bağlı da Sosial Xidmətlər Agentliyi ehtiyaclarına uyğun sosial-psixoloji reabilitasiya proqramı tərtib edilməklə sosial işlər aparıb. Həmin şəxslər psixoloji konsultasiyalara, maarifləndirici tədbirlərə, asudə vaxtlarının mənalı keçmələri üçün müxtəlif dərnəklərə cəlb ediliblər. Hazırda da onlarla sosial işlər davam etdirilir.

Bakıdakı Türk Şəhidliyində Türkiyənin Azərbaycandakı səfirliyi tədbir keçirib.

Tədbir Türkiyə Respublikasının Cümhuriyyət Günü ilə bağlı olub.

Azərbaycan və Türkiyənin dövlət himnləri səsləndirilkdən sonra Türkiyənin Bakıdakı fövqəladə və səlahiyyətli səfiri Cahit Bağçının iştirakı ilə Türk Şəhidliyində Azərbaycanın müstəqilliyi üçün canından keçmiş türk hərbçilərin məzarlarının üzərinə gül dəstələri və çələng qoyulub.

Cahit Bağçı xatirə dəftərinə fikirlərini yazıb. Daha sonra tədbir iştirakçıları Şəhidlər Xiyabanını da ziyarət edib.

Dənizkənarı Milli Parkda Vətən müharibəsində qazanılan qələbəyə həsr olunan “Zəfər” Yarmarkasına start verildi.

Bu barədə “YAŞAT” Fondu məlumat yayıb.

Qeyd edilib ki, 29 oktyabr – 9 noyabr tarixini əhatə edəcək yarmarka Bulvar ərazisində, Kukla teatrının arxasında yerləşir.

Bu gün dünya ölkələrində, eləcə də regionda COVID-19 virusuna yoluxma hallarında kəskin artımlar müşahidə edilir. Belə ki, COVID-19 virusunun “delta” ştammı ilə müqayisədə daha yoluxdurucu olan AY.4.2 yayılmağa başlayıb.

Qonşu Türkiyədə gündəlik yoluxma sayı 26 mini keçib, 210 nəfər vəfat edib, Gürcüstanda sutka ərzində yoluxma sayı 4 009, ölənlərin sayı 45, İranda isə son sutkada 11 mindən artıq insan koronavirusa yoluxub, 159 nəfər isə vəfat edib. Azərbaycanda sutka ərzində koronavirusa yoluxanların sayı 2 420 nəfər, ölənlərin sayı isə 29 olub. Müqayisədə bu göstəricilər kifayət qədər yaxşıdır və buna səbəb ölkəmizdə zamanında pandemiya ilə bağlı düzgün mübarizə üsullarının seçilməsidir.

Lakin insanlar vəziyyətin stabil olmasını düşünüb gigiyena qaydalarına laqeyd yanaşmamalıdırlar. Belə ki, sosial məsafə saxlanılması, qapalı məkanlarda maskadan istifadə olunmas vacibdir.

Bəs vaksinin üçüncü dozası necə, digər iki doza qədər önəmlidirmi?

Artıq ölkədə müəyyən bir qrup insan vaksinin üçüncü dozasını vurdurub.

Yaxın günlərdə vaksinin üçüncü dozasını vurduracaq olan millət vəkili Aydın Mirzəzadə Oxu.Az-a açıqlamasında bildirib ki, hazırkı vəziyyətdə vətəndaşların daha intensiv vaksinasiya olması, 3-cü doza vaksinasıyanın sürətləndirilməsi zəruridir :

“Bütün dünyada koronavirusun geniş yayılmasının qarşısını alan vaksinasiya oldu. Artıq 50 faizə qədər əhali hər iki dozada vaksin alıb və 1 aya biz ən yüksək göstəricilərlə əhalinin 80-90 faizinin vaksinasiya olunmasına nail olacağıq. Aparılan araşdırmalar onu göstərir ki, qarşıda vaksinin üçüncü, hətta dördüncü dozasının da vurulmasına ehtiyac var.

Elm adamlarının araşdırmaları göstərir ki, koronavirus əleyhinə vaksinin üçüncü dozası orqanizmin müqavimətini 5-6 dəfə artırır. Bu o deməkdir ki, biz yaşlı nəsli daha yaxşı qoruya bilərik. Həyatının gənclik dövrünü yaşayan neçə-neçə insan koronavirus səbəbindən vəfat edib. Təəssüf ki, bu gün koronavirusdan ölənlərin sayı artır və biz üçüncü dozanın vurulmasını mümkün qədər sürətləndirməliyik”.

Deputat vurğulayıb ki, yaxın günlərdə o özü də vaksinin üçüncü dozasını vurduracaq :

“Vaksinin iki dozasını vurdurduq. Hər hansı bir fəsadlar qeydə alınmadı. Hazırda həkimlərin tövsiyəsi üçüncü dozanın da vurulmasıdır. Hesab edirəm ki, bu proses də ölkəmizdə vaksinasiya strategiyasına uyğun şəkildə aparılacaqdır”.