Month: October 2023

Bakıda köhnə binaların sökülməsi əmlak bazarında alıcı qüvvəsini artırır, həmçinin, vətəndaşların mənzillərinin dəyərini də artırır.

Bu barədə Trend-in suallarını cavablayarkən əmlak məsələləri üzrə ekspert Elnur Fərzəliyev deyib.

O qeyd edib ki, 2016-cı ildən başlayaraq Bakıda istismar müddətini bitirmiş və qəzalı vəziyyətdə olan binaların söküntüsü başlayıb.

“Bugünədək köhnə çoxmənzilli yaşayış binaları sökülüb yeni binalarla əvəzlənib. Bir çox qəzalı vəziyyətdə olan fərdi yaşayış massivləri sökülüb. Bu proses hələ də davam edir. Hazırda Bakıda minlərlə istismar müddətini bitirmiş köhnə çoxmənzilli bina və 100-dən artıq qəzalı kimi qeydə alınan köhnə yaşayış binası var. Ümumən Bakıdakı çoxmənzilli yaşayış binalarında aidiyyəti qurumlar tərəfindən monitorinqlər aparılarsa, təbii ki, qəzalı vəziyyətdə olan binların sayı daha çox olar. Həmin binaların sökülməsi əmlak bazarında alıcı qüvvəni, həmçinin, vətəndaşların mənzillərinin dəyərini daha da artırır”, – deyə o bildirib.

Ekspert əlavə edib ki, vətəndaşın köhnə mənzili sökülüb yenisi ilə əvəz olunanda onun dəyəri əvvəlki mənzildən ikiqat çox olur.

“Köhnə binaların söküntü dairəsi genişləndikcə kirayə bazarında da qiymət artımı yaranır. Zamanla Bakıda köhnə mənzilli kirayə evlər sıradan çıxır və bu proses davam edəcək. Onlar yeni tikili binalarla əvəz edildikcə qiymətləri də artacaq”, – deyə E.Fərzəliyev vurğulayıb.

Azərbaycanda tələbə ürəktutmasından dünyasını dəyişib.

Bununla əlaqədar “Azərbaycan Universitetləri” səhifəsi məlumat yayıb.

Məlumata görə, Azərbaycan İqtisad Universitetinin (UNEC) Biznesin idarə edilməsi ixtisasının IV kurs tələbəsi olan Elmin Rzayev ürəktutmasından vəfat edib.

Qeyd edək ki, son 10 gün ərzində üç tələbənin ürəktutmasından vəfat etdiyi haqqında xəbər yayılıb.

Təhsil müəssisəsində yol verilmiş qanunsuzluqlarla bağlı cinayət işi məhkəməyə göndərilib

Bu barədə Yevlax Rayon Prokurorluğundan məlumat verilib.

Yevlax rayon Qaraməmmədli kənd tam orta məktəbində baş verən qanunsuzluqlarla bağlı rayon prokurorluğunda başlanmış cinayət işinin istintaqı yekunlaşıb.

İstintaqla 04.03.2019-cu il tarixindən 10.11.2022-ci il tarixinədək olan dövrdə qeyd edilən məktəbin direktoru işləmiş Rəşad Əsədovun davamiyyəti olmayan işçilərə və tədris olunmadığı halda dərnək dərslərinə görə müəllimlərə əməkhaqqı ödənilməsi, evdə fərdi təhsilə cəlb edilmiş sağlamlıq imkanları məhdud şagirdlərə tədris olunan dərs saatlarına görə müəllimlərə hesablanmış əməkhaqqının öz əməkhaqqı kartına köçürülməsi və digər yollarla ümumilikdə 53 min manatdan artıq dövlət vəsaitini mənimsəməsinə, həmçinin rüşvət müqabilində məktəbdə təhsil alan şagirdin adına olan ümumi orta təhsil haqqında attestata başqa şəxsə aid məlumatları daxil etməsinə əsaslı şübhələr müəyyən edilib.

İş üzrə toplanmış sübutlar əsasında Rəşad Əsədova Cinayət Məcəlləsinin 179.3.2 (külli miqdarda mənimsəmə), 308.1, 308.2 (ağır nəticələrə səbəb olan vəzifə səlahiyyətlərindən sui-istifadə etmə), 311.2 (vəzifəli şəxs tərəfindən qanunsuz hərəkətlərə görə rüşvət alma) və 313-cü (vəzifə saxtakarlığı) maddələri ilə ittiham elan edilməklə cinayət işi aidiyyəti üzrə Şəki Ağır Cinayətlər Məhkəməsinə göndərilib.

Prezident İlham Əliyevin tapşırığına uyğun olaraq, “Böyük Qayıdış” proqramı çərçivəsində Qarabağda yenidən qurulan şəhərlərimizə məcburi köçkünlərin qayıdışı prosesi davam edir. Bu günə qədər köç prosesi çərçivəsində çox sayda ailə doğma torpaqlarına qovuşub.

Ancaq sosial şəbəkələrdə Azərbaycanın digər rayonlarından olan sakinlərinin də Qarabağa köçmək istəkləri ilə bağlı suallarına, müzakirələrinə şahid oluruq.

Maraqlıdır, digər rayonların sakinləri Qarabağdan ev ala və ya köçə bilərmi?

Mövzu ilə bağlı Qaçqınlar və Məcburi Köçkünlərin İşləri Üzrə Dövlət Komitəsinə sorğu ünvanladıq.

Qurumun Beynəlxalq əlaqələr, informasiya və mətbuat xidməti departamentinin direktoru İbrahim Mirzəyev Bizim.media-ya açıqlamasında bu fikirləri səsləndirib:

“Əvvəllər evləri “Qaçqınkom” tikirdi, daha sonra isə köç prosesini reallaşdırırdı. Ancaq “Böyük Qayıdış” proqramı ilə bağlı Azərbaycan Respublikası Prezidenti Administrasiyasının və Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli ilə bağlı Əlaqələndirmə Qərargahı yaradılıb.

Qaçqınlar və Məcburi Köçkünlərin İşləri Üzrə Dövlət Komitəsi köçürülmə ilə məşğuldur və yalnız bu istiqamətdə öhdəliyi var. Digər məsələ ilə bağlı “Qaçqınkom”un məsuliyyəti yoxdur. Hazırda Qarabağa yalnız yerli sakinlər köçürülür”.

“Azərbaycan vətəndaşları yaşayış yerini seçməkdə müstəqildirlər”

Millət vəkili Elman Məmmədov isə daha ümidli danışıb. O qeyd edib ki, ilkin köç mərhələsində Qarabağa yerli sakinlər köçürüləcəklər, növbəti mərhələdə köçkün olmayan digər rayonların sakinləri gedə bilərlər:

“Azərbaycan Respublikası Konstitusiyası və qanunlarımız da bunu deməyə əsas verir. Azərbaycan vətəndaşları yaşayış yeri seçməkdə müstəqildirlər. Burada heç bir məhdudiyyət yoxdur və olmayacaq. İlkin mərhələdə məcburi köçkünlər öz torpaqlarında məskunlaşdırılandan sonra istənilən Azərbaycan vətəndaşı yaşamaq və işləmək üçün Qarabağa gedə bilər. Bu arzunun özü belə, alqışlanası istəkdir”.

Bakı şəhərində ağacları gecə ilə kökündən çıxarıblar.

Xətai rayonu, Məhəmməd Hadi küçəsində tikinti olacaq ərazidə beşə yaxın ağac kökündən çıxarılıb.

Məsələ ilə bağlı Ekologiya və Təbii Sərvətlər Nazirliyi ilə əlaqə saxladıq.

Nazirliyin Mətbuat Xidmətinin rəhbəri İradə İbrahimova Oxu.Az-a açıqlamasında bildirib ki, Xətai rayonu, Məhəmməd Hadi küçəsi, 70 ünvanında tikinti məqsədilə hasarlanmış ərazidə aparılan ilkin araşdırma zamanı beş ağacın kökündən çıxarılması təsdiq edilib:

“Ağaclar kökündən çıxardıldığı üçün onların növünü müəyyən etmək mümkün olmayıb. Ağacları çıxaran şəxs və ya şəxslərin kimliyinin müəyyənləşdirilməsi, ərazinin kimə məxsus olduğu barədə araşdırmalar davam etdirilir”.
//oxu.az

“Ermənistanda əsirlikdə saxlanılan Azərbaycan vətəndaşları ilə bağlı məsələ bu yaxında Azərbaycanda səfərdə olan Avropa Şurasının İnsan hüquqları üzrə komissarının qarşısında qaldırılıb”.

APA xəbər verir ki, bu barədə Azərbaycan Respublikasının İnsan Hüquqları üzrə Müvəkkili (Ombudsman) jurnalistlərə açıqlamasında bildirib.

“Gözləyirik ki, tez bir zamanda xəbər alaq”, – Ombudsman qeyd edib.

Xatırladaq ki, Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan Ordusunun itkin düşmüş əsgərləri – 2004-cü il təvəllüdlü Aqşin Qabil oğlu Bəbirov və 2003-cü il təvəllüdlü Hüseyn Əhliman oğlu Axundov Ermənistan tərəfindən əsir götürülüb, saxta ittihamlarla qanunsuz olaraq həbs olunublar.