Bu gün Brüsseldə Ermənistan, Avropa İttifaqı və Amerika Birləşmiş Ştatları arasında 3 tərəfli görüş keçirildi. Lakin, bu görüşdə Azərbaycan tərəfinin iştirakı nəzərdə tutulmamışdı. Belə olan halda həm ABŞ dövlət katibi Entoni Blinken, həm də Avropa Komissiyasının Prezidenti Ursula Fon der Leyen Azərbaycanı inandırmağa çalışdı ki, görüş yalnız iqtisadi xarakter daşıyır və sülhə maneə yaradacaq heç bir müzakirədən söhbət gedə bilməz. Amma istisna edilmir ki, görüşdə hərbi məsələlər və Ermənistana bu istiqamətdə yardımların edilməsi də müzakirə mövzusudur. Hər halda ABŞ və Aİ rəsmiləri yaxşı başa düşür ki, Brüsseldə Azərbaycana qarşı atılacaq hər hansı təxribat xarakterli addım onlardan da yan keçməyəcək. Birinci növbədə Avropa öz enerji təhlükəsizliyini riskə atmaq istəməz. İkinci növbədə isə, tərəflər yəqin ki, Makronun taleyini yaşamağa razı olmazlar. Yadınızdadırsa, Praqa görüşündən cəmi bir gün sonra Makronun Azərbaycana qarşı əsassız iddialar səsləndirməsi Fransanı sülh danışıqlarından həmişəlik uzaqlaşdırdı. Necə deyərlər, fransız xoruzunu Makronun qoltuğuna verib yola saldıq. İndiki mənəzərədə isə Avropa Parlamentinin və Avropa Şurasının Azərbaycan əleyhinə bəyanatlar verməsi fonunda görüşün məqsədinin əslində regionda yeni müharibəni alovlandırmağa yönəldiyi məlumdur.
Acınacaqlı hal ondan ibarətdir ki, Paşinyan görüş zamanı Alma-Ata bəyannaməsinə sadiq qalaraq Azərbaycanın ərazi bütövlüyünü tanıdıqlarını dedi. Ancaq, görüşün bitməsindən bir neçə dəqiqə sonra Tovuz və Gədəbəy atəşə tutuldu.
Digər tərəfdən rəsmi Moskva da bəyan edir ki, görüş Cənubi Qafqazda sabitliyi pozmaq məqsədi daşıyır. Həmçinin, qardaş Türkiyənin xarici işlər naziri də bildirib ki, görüş bölgəni geosiyası toqquşmalar meydanına çevirməyə xidmət edir.
Cənub qonşumuz İran isə hələlik susur. Yəqin ki, başı qarışıb Ermənistanı silahlandırmağa. Son 30 ildə olduğu kimi.
Xülasə, başa düşmək çətin deyil ki, indi qərbin əsas məqsədi iqtisadi yardım adı altında Ermənstanın əli ilə bölgəni savaş poliqonuna çevirməkdir. Paşinyan rejimi isə bu dəfə də maşa olmaq missiyasını layiqincə yerinə yetirməyə hazırdır.
