Month: May 2024

Bakıda hotelin damından girib, dördmərtəbəli, 13 otaqlı villadan oğurluq edən şəxslərə hökm oxunub.

“Qaynarinfo”nun məlumatına görə, hadisə Nərimanov rayonunda “milyonerlər məhəlləsi” kimi tanınan ərazidəki villaların birində baş verib.

Hadisəni isə 1996-cı il təvəllüdlü Ramin Hüseynov (soyad şərti) və Yusif Bağırov (soyad şərti) törədiblər.

Belə ki, onlar içkili vəziyyətdə villanın yaxınlığında yerləşən hotelin damından evə keçməklə ümumi dəyəri 76 500 manat olan əşyaları oğurlayıblar. Təqsirləndirilən şəxslər villanın ikinci mərtəbəsində hər birinin qiyməti 1 700 manat olmaqla ümumi dəyəri 8 500 manat olan Türkiyə istehsalı beş ədəd mis şamdan, 17 000 manat dəyərində bir ədəd qadın təsvirli bürünc heykəl, 8 500 manat dəyərində bürüncdən qadın təsvirli heykəl, üçüncü mərtəbədə olan yataq otağından 8 500 manat dəyərində XIX əsrdə Fransada hazırlanmış farfordan olan bir ədəd sandıqça, həmin mərtəbənin dəhlizindən 25 500 manat dəyərində XIX əsrə aid Fransa istehsalı olan bürünc materialdan bir ədəd masaüstü saat, dördüncü mərtəbədə olan yataq otağından 3 400 manat dəyərində yerli istehsal olan bir ədəd mis qazan, 5 100 manat dəyərində bir ədəd çaynikaltı tas aparıblar.

Ramin və Yusif villada qonaq otağında divanda əyləşib evdən tapdıqları bahalı viskini içiblər və domino oynayıblar.

Hadisə 2022-ci ilin dekabr ayının 30-dan 31-nə keçən gecə baş versə də, ev sahibi həmin vaxt ailəsi ilə birgə Xəzər rayonu, Şağan qəsəbəsində yerləşən villasında yaşadığından hadisədən iki gün sonra xəbər tutub.

Məhkəmənin qərarı ilə hər iki şəxs Cinayət Məcəlləsinin 177.2.1, 177.2.3 və 177.2.4-cü maddələrində nəzərdə tutulmuş cinayət əməlini törətməkdə təqsirli bilinib və barələrində üç il müddətə azadlıqdan məhrumetmə cəzası təyin edilib. Onlar oğurladıqları əntiq əşyaların əksəriyyətini də ev sahibinə qaytarıblar.

Əldə etdiyimiz məlumata görə, villasından oğurluq olan ölkənin tanınmış şəxsidir.

Su anbarında qanunsuz balıq ovlayan şəxs müəyyən olunub.

Su Nəqliyyatında Polis İdarəsinin Mingəçevir Xətt Polis Məntəqəsinin əməkdaşlarının həyata keçirdikləri tədbirlərlə su anbarında qanunsuz olaraq balıq ovu ilə məşğul olan Ş.Müslümov saxlanılıb.

Həmin şəxsdən qanunsuz ovladığı balıqlar və balıqovlama ləvazimatları aşkarlanıb.

Faktla bağlı araşdırmalar aparılır.

Bir neçə gün öncə Bakının Neftçilər prospektində yeni ticarət mərkəzi “Crescent Mall”un istifadəyə verilməsi ilə ərazidə piyadalar üçün təhlükəli vəziyyətin yaranması barədə müzakirələr aparılır.

“Qafqazinfo” xəbər verir ki, bu barədə sosial şəbəkələrdə məlumat və şəkillər yayılıb.

Fotolardan da görünür ki, piyadalar, hətta yanlarında azyaşlı olsa belə, həyatlarını təhlükəyə ataraq yüksək sürət həddi təyin edilmiş yoldan keçirlər.

Əksər sosial şəbəkə istifadəçiləri ərazidə piyada keçidlərinin təşkilini, işıqfor quraşdırılmasının vacibliyini qeyd edirlər.

Maraqlıdır ki, ərazidə yeraltı piyada keçidi olsa da, vətəndaşlar oradan istifadə etmirlər.

Azərbaycan Avtomobil Yolları Dövlət Agentliyindən bildirilib ki, hazırda sözügedən keçid istifadəyə yararlıdır: “İnsanlar oradan istifadə edirlər. Keçiddə eskalatorlar da işləyir. Ümumiyyətlə, keçid elə yerdədir ki, piyadalar onu görməyə bilməz”.

Bakıda 18 min nəfərə bir ambulans düşür, onlar da yollardakı tıxaclardan hərəkət edə bilmirlər.

Median.Az report-a istinadən xəbər verir ki, bunu Milli Məclisin İnsan hüquqları komitəsinin sədri Zahid Oruc parlamentin mayın 31-də keçirilən yaz sessiyasının son plenar iclasında “Azərbaycan Respublikasının 2023-cü il dövlət büdcəsinin icrası haqqında” qanun layihəsinin müzakirəsi zamanı deyib.

Komitə sədri bildirib ki, Bakıda 139 ambulans fəaliyyət göstərir: “Paytaxtda rəsmi olaraq 2,5 milyona yaxın insanın qeydiyyatda olduğunu nəzərə alsaq, 18 min nəfərə bir ambulans düşür. Paytaxtda qeyri-rəsmi yaşayanları da buraya əlavə etsək, vəziyyəti təsəvvür etmək çətin deyil. Əhalisi 1.2 milyon nəfər olan Tbilisidə təcili yardım maşınlarının sayı 200-yə yaxındır”.