Month: September 2024

Dənizkənarı Bulvar İdarəsi İdarə Heyətinin sabiq sədri İlqar Mustafayev bir neçə gün əvvəl korrupsiya cinayətinə görə həbs edilib. Ötən gün onun 2 milyon manatdan bir qədər artıq mənimsəmədə ittiham olunduğu barədə də məlumat yayılıb.

“Qafqazinfo”nun əldə etdiyi digər məlumata görə, sözügedən yeyinti məbləği istintaqın ilkin araşdırmasının nəticəsidir. İ.Mustafayevin qanunsuz əməlləri nəticəsində dövlətə dəymiş ziyanın həcmi daha çoxdur.

Bununla bağlı istintaq orqanı artıq yeni dəlil və sübutlar aşkar edib. Hazırda həmin materiallar tədqiq olunur. Ehtimal odur ki, ibtidai istintaqın gedişində təqsirləndirilən şəxsə yenidən ittiham elan ediləcək. Bundan sonra dövlətə dəymiş ziyanın dəqiq məbləği də aydın olacaq.

Bulvar büdcəsində olan pullar necə mənimsənilib?

Məlumata əsasən, İlqar Mustafayevin cinayət işindəki çoxsaylı epizodlardan biri bulvar ərazisində parkinqlərin quraşdırılması ilə bağlıdır. Bu epizodda dövlətin qanunla qorunan mənafeyinə xələl gətirən hərəkətlərlə külli miqdarda vəsait kənarlaşdırılıb.

Digər bir epizodda isə təmir-quraşdırma işləri adı altında mənimsənilər pullardan söhbət gedir.

Qeyd edək ki, bir müddət əvvəl Hesablama Palatası Dənizkənarı Bulvar İdarəsində yoxlama aparıb. Nəticədə qanun pozuntusu ilə müşayiət edilən xüsusilə külli miqdarda pul vəsaitinin bilinməyən yerlərə sərf edildiyi üzə çıxıb. Məhz bundan sonra Baş Prokurorluğa müraciət edilib.

“Kanal13” internet televiziyasının rəhbəri Əziz Orucov barəsində olan həbs qətimkan tədbirinin müddəti daha üç ay uzadılıb.

Bu barədə “Report”a onun həyat yoldaşı Lamiyə Çerpanova məlumat verib.

O bildirib ki, Ə.Orucovun barəsində olan həbs qətimkan tədbirinin müddətinin uzadılması ilə bağlı qərar Səbail Rayon Məhkəməsində verilib.

Qeyd edək ki, Ə.Orucov ötən il noyabrın 27-də saxlanılıb. Ona qarşı Cinayət Məcəlləsinin 188.2-ci (Qanunla müəyyən edilmiş mülkiyyət, istifadə və ya icarə hüququ olmadan torpaq sahəsi üzərində özbaşına tikinti) maddəsi ilə cinayət işi açılıb və şübhəli şəxs qismində saxlanılıb.

Ötən il noyabrın 28-də Səbail Rayon Məhkəməsində keçirilən prosesdə Ə.Orucov barəsində həbs qətimkan tədbiri seçilib.

Daha sonra ona qarşı Cinayət Məcəlləsinin 206.3.2-ci (qaçaqmalçılıq-qabaqcadan əlbir olan bir qrup şəxs tərəfindən törədildikdə) maddəsi ilə yeni ittiham irəli sürülüb.

Bakı Ağır Cinayətlər Məhkəməsində qəsdən sağlamlığa ağır zərərvurmada təqsirləndirilən Fuad Səmədovun (soyadı şərti) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Əli Məmmədovun sədrliyi ilə keçirilən prosesdə hökm oxunub.

Məhkəmənin hökmü ilə Fuad Səmədov 4 il müddətinə azadlıqdan məhrum edilib. Təqsirləndirilən şəxs barəsində seçilmiş başqa yerə getməmək haqqında iltizam qətimkan tədbiri ləğv edilib, Fuad Səmədovun barəsində həbs qətimkan tədbiri seçilib və o, dərhal məhkəmə iclası zalında həbs olunub.

İttihama görə, hadisə 6 noyabr 2023-cü il tarixdə, saat 23 radələrində paytaxtın Suraxanı rayonu ərazisində qeydə alınıb.

Belə ki, 2002-ci il təvəllüdlü Fuad Səmədov sevgilisi Nərgiz Fərəcova (şərti) ilə qadının evində yaşayıb. Həmin gün təqsirləndirilən şəxsin dostu, zərərçəkmiş Elmar Tahirov (soyadı şərti) onlara qonaq gəlib. Söhbət zamanı qadın Fuada ondan ayrılmaq istədiyini bildirib. Mübahisə zamanı Fuad Nərgizi döyməyə başlayıb. Bu zaman otaqda olan Elmar təqsirləndirilən şəxsin qarşısını alaraq sakitləşdirmək üçün onun sifətinə şillə vurub. Fuad isə zərərçəkmişə etiraz edərək mətbəx otağında ələ keçirdiyi bıçaqla Elmarın qarın nahiyəsinə bir zərbə endirilib.

Hadisədən sonra Fuad Səmədov saxlanılaraq istintaqa cəlb edilib. Onun barəsində başqa yerə getməmək haqqında iltizam qətimkan tədbiri seçilib.