Xəzər rayonunun Türkan qəsəbəsində yaşayan Afər Əhmədağa oğlu Əmirov hüquq-mühafizə orqanlarına və bütün aidiyyəti qurumlara açıq müraciət edib. Onun sözlərinə görə, avqustun 8-də tək övladı olan qızı – Aytac Əmirli Əfqan Əflat oğlu İmamməmmədov tərəfindən qaçırılıb.
Şikayətçi Musavat.com-a bildirib ki, məsələ ilə bağlı dəfələrlə 102 qaynar xəttinə müraciət edib, təcili tədbirlər görülməsini istəyib:
–Məni övladımla görüşdürmədilər. Xəzər rayon 1-ci Polis Bölməsindən ərizə verdim. Dedilər, bizlik məsələ deyil. Mən məcbur qalıb bu müraciəti KİV vasitəsilə ictimailəşdirirəm”.
Əhmədağa Əmirov iddia edir ki, qızının qaçırılmasında maddi maraq da var:
– Mənim torpağımı 30 ildən çoxdur əlimdən almaq istəyirlər. Mənə elə gəlir ki, qızımı Əfqana pul verib oğratdırıblar.
O, Əfqanın əvvəllər də oxşar hərəkətlərə yol verdiyini bildirir:
“Əfqan narkotik istifadəçisidir, onun çirkli əməlləri çoxdur. Beş il əvvəl indiki həyat yoldaşı Sevil adlı qadını da zorla qaçırmışdı. O vaxt Sevilin iki azyaşlı övladı atasının yanında qaldı. İndi isə Əfqanın Sevildən 4 uşağı var. Bununla belə, qızımı da qaçırıb. Özü isə açıq şəkildə deyir ki, mənə heç nə edə bilməzlər, çünki arxasında yüksək vəzifədə adam var”.
Afər Əmirov həmçinin qeyd edir ki, Əfqanın həyat yoldaşı Sevil də onu və həyat yoldaşını təhdid edib:
“Arvadı yoldaşım Balacaxanım Əmirovaya mesaj yazıb, deyib ki, sizi şərləyib həbs etdirəcəklər”.
Şikayətçi hesab edir ki, baş verənlərə hüquqi qiymət verilməli, Cinayət Məcəlləsinin 230-cu maddəsi (çoxarvadlılıq) əsasında tədbirlər görülməlidir. Əks halda, onun sözlərinə görə, ailəsi intihar həddinə çatdırılıb:
“Biz məcbur olub özümüzə qəsd etməyi düşünürük. Çünki nə torpaq problemimizə, nə də qızımın qaçırılması məsələsinə düzgün baxılmır. Mənim yeganə tələbim odur ki, qızım mənə qaytarılsın, məsuliyyət daşıyan şəxslər isə qanun qarşısında cavab versin”.
Əmirovun ərizəsi Daxili İşlər naziri Vilayət Eyvazova, Respublika Prokuroru Kamran Əliyevə, Ailə və Uşaq Problemləri üzrə Dövlət Komitəsinə, Ombudsman Səbinə Əliyevaya və bütün KİV-lərə ünvanlanıb.
