Month: December 2025

Son zamanlar mağazalarda satılan yumurtaların təzəliyi ilə bağlı bəzi narahatlıqlar ifadə olunur.

Xüsusilə qiymətlərin dəyişməsi və satış dövriyyəsinin sürətlənməsi fonunda alıcılar məhsulun nə dərəcədə keyfiyyətli olduğundan əmin olmaq istəyirlər.

Təzə yumurta həm dad, həm də sağlamlıq baxımından vacib olduğundan, istehlakçılar onun köhnə və ya yeni olduğunu müəyyənləşdirmək üçün etibarlı üsullar axtarırlar.

Mövzu ilə bağlı Azərbaycan Quş əti, Yumurta İstehsalçıları və İxracatçıları Assosiasiyasının sədri Mürvət Həsənli BAKU.WS-ə bildirib ki, marketlərdə köhnə və ya təzə yumurtanı ayırd etmək üçün onun istehsal tarixinə baxmaq kifayə edir:

“Vətəndaşlar bilməlidir ki, yumurtanın istehsalı ilə bağlı Azərbaycan Qida Təhlükəsizliyi Agentliyi (AQTA) gündəlik yoxlamalar aparır. Bunun əsasında isə baytarlıq arayışı təqdim olunur. Bu arayışla yumurtanın üzərindəki tarixi qarşılaşdırmaqla onun köhnə və ya təzə olmasını müəyyən etmək olur.

Qeyd edim ki, hazırda ölkədə tarladan süfrəyə qədər istənilən qida və ya ərzaq məhsuluna AQTA tərəfindən ciddi nəzarət var. Bu nəzarət son üç ildə Azərbaycan qidasına olan inamı birə beş artırıb.

Azərbaycanda marketlərdə satılan yumurtanın üzərində istehsal tarixinin olmaması mümkün deyil. Əgər belə bir hal olarsa, həmin şəxs və ya şirkət barəsində qanunla nəzərdə tutulmuş addımlar atılır”.

Səhiyyə Nazirliyinin qanunsuz plastik cərrahiyyəyə və başqa tibbi fəaliyyətə icazə verilməsi ilə bağlı ittiham olunan əməkdaşlarının milyonlarla qiymətləndirilən əmlakları üzərinə həbs qoyulub.

Median.Az qafqazinfo-ya istinadən xəbər verir ki, əmlakların çoxu müxtəlif ünvanlarda yerləşən mənzillərdən ibarətdir.

Səhiyyə Nazirliyinin İnsan resursları, elm və təhsil şöbəsinin müdiri vəzifəsində işləmiş Səidə Rüstəmova, həmin şöbənin baş mütəxəssis-böyük inspektoru olmuş Ruhiyyə Məhərrəmova və nazirliyin İctimai Səhiyyə və İslahatlar Mərkəzinin keçmiş akkreditasiya şöbəsinin müdiri Lətafət Cabbarova mülklərin bəzilərini yaxınlarının adına rəsmiləşdiriblər.

Ən çox əmlak isə cinayət işinin əsas fiquru sayılan Səidə Rüstəmovanındır. O, işlədiyi müddətdə çoxsaylı daşınmaz əmlaka sahib olub. Əmlakların orta bazar dəyəri 5 milyon manata yaxındır.

Səidə Rüstəmovanın özünün və anası ilə oğlunun adına rəsmiləşdirdiyi əmlakların siyahısını təqdim edirik:

Yasamal rayonu, Həsən Məcidov küçəsində mənzil – Qiymət: 463 365 manat;

Nəsimi rayonu, Abdülvahab Salamzadə küçəsində iki mənzil – Qiymət: 323 605 manat biri, 332 755 manat digəri;

Nəsimi rayonu, Akademik Həsən Əliyev küçəsi mənzil – Qiymət: 429 488 manat;

Yasamal rayonu, İnşaatçılar prospektində mənzil – Qiymət: 670 275 manat;

Yasamal rayonu, İnşaatçılar prospektində 18 m² qaraj – Qiymət: 45 000 manat;

Abşeron rayonu, Novxanı kəndində torpaq sahəsi – Qiymət: 43 250 manat

Sabunçu rayonu, Nardaran qəsəbəsində bağ sahəsi – Qiymət: 78 000 manat;

Bakı şəhəri, Nəsimi rayonu, Həsən Əliyev küçəsində ev;

Bakı şəhəri, Yasamal rayonu, Həsən Məcidov küçəsində mənzil;

Yasamal rayonu, Xarici dairəvi yol 10, “Royal Park” yaşayış massivində ev;

Yasamal rayonu, Şəfayət Mehdiyev küçəsində ev;

Abşeron rayonu, Novxanı bağlarında fərdi yaşayış evi;

Abşeron rayonu, Novxanı kəndi bağlarında mənzil;

“Mercedes-Benz” və “Audi Q5” minik avtomobillləri.

Məhkəmə qərarı ilə eyni cinayətlərdə ittiham olunan Lətafət Cabbarova və Ruhiyyə Məhərrəmovanın fərqli ünvanlarda bir neçə mənzilləri və avtomobilləri üzərinə həbs qoyulub.
Qeyd edək ki, ötən həftə Baş Prokuror yanında Korrupsiyaya qarşı Mübarizə Baş İdarəsi tərəfindən istintaq olunan bu cinayət işinin detalları barədə geniş məlumat vermişdik. Həmin xəbərimizdə həkim kimi işləyə bilmək üçün rüşvət verən şəxslərin siyahısını da təqdim etmişdik.

Hazırda bu iş Bakı Ağır Cinayətlər Məhkəməsində hakim Mahirə Kərimovanın sədrliyi ilə araşdırılır. Ev dustaqlığında saxlanılan xanımlarım təqsirləri sübuta yetirilərsə, onları 10 ildən çox həbs cəzası gözləyir.

Səkkiz şagirdin zəhərləndiyi “Nur” dönərxanasının sahibi Elnur Nəbiyev zəhərlənmə faktına münasibət bildirib.

Median.Az-ın məlumatına görə, E.Nəbiyev “Teleqraf”a açıqlamasında iddia edib ki, şagirdlər dönəri aldıqdan sonra saxlanma qaydasını pozublar.

Gəncədə şagirdlərin zəhərlənməsinə səbəb olan dönərxananın sahibi: Gec yeyiblər

“Beş ildir, burada fəaliyyət göstərirəm, heç bir zəhərlənmə faktı qeydə alınmayıb. Dünən təxminən saat 14 radələrində iki şagird gəlib 30 dönər aldı. Bu, kameralara düşüb. Necə olur, otuz dönər yeyən şagirddən səkkizində zəhərlənmə olub? Məndə olan məlumata görə, şagirdlərin çoxu dönəri aldıqdan sonra gec yeyib. Dönər hazır olandan sonra 30 dəqiqə ərzində yeyilməlidir. Ən azı, iki saatdan sonra yeyiblər. Hətta bir nəfər dönəri qardaşına evə aparıb. Gecikmə olub, dönər vaxtında yeyilməyib”, – deyə sahibkar bildirib.