Banklardan götürülən kreditlərin qaytarılması məsələsi, xüsusilə əsas borcalanın vəfat etdiyi hallarda tez-tez hüquqi mübahisələrə səbəb olur. Bu halda bank tərəfindən vəfat etmiş şəxsin ailəsinə müraciət edilərək kredit öhdəliyinin ödənilməsi tələb olunur. Ailə isə borcu ödəməkdən imtina edir.
Belə vəziyyətlərdə əsas sual ondan ibarət olur ki, borcun ödənilməsinə kim cavabdehdir – mərhumun ailə üzvləri, yoxsa zamin?
Mövzu ilə bağlı Valyuta.az-a danışan bank məsələləri üzrə ekspert Əkrəm Həsənov bildirib ki, hər bir şəxs – istər sağlığında, istərsə də vəfat etdikdən sonra – öhdəliklərini öz əmlakı hesabına ödəməlidir:
“Əgər şəxs vəfat edibsə və onun adına əmlak mövcuddursa, borclar həmin əmlakdan ödənilir. Əmlak vərəsələrə keçərsə, onlar qəbul etdikləri mirasın həcmi qədər mərhumun borclarına görə məsuliyyət daşıyırlar.
Əgər vərəsəlik üzrə heç bir əmlak yoxdursa, bu halda ailə üzvlərindən hər hansı bir borcun ödənilməsi tələb oluna bilməz. Yəni, onlara heç bir əmlak keçməyibsə, borcu da ödəməyə borclu deyillər”.
“Zamin məsələsinə gəldikdə isə, zaminlik hüquqi məsuliyyət yaradır. Şəxsin sağ və ya vəfat etmiş olması fərq etmədən, əgər əsas borclu öhdəliyini yerinə yetirə bilmirsə və onun adına əmlak yoxdursa, bu halda borcun ödənilməsi üçün zaminə müraciət olunur. Zamin, borclunun yerinə məsuliyyət daşıyır”, – deyə ekspert əlavə edib.
